niginfolog2.gif (11208 bytes)

 

 

 

Comments Joint Contd.

Pa Mugo, the Senator of the Masses



 

December.19.2001

Eleganza “Heaven on Earth” Estate: Who get that kind money?

My fellow Obodians, how dey go dey, I hope say una dey kampe? I don hear another one o, I hear am for Lagos say Eleganza Group of Companies don open their new Estate for Ikoyi area. My people, no be kind place wey people like us fit dey live o. Last week I hear wey some people dey talk am say the Manager for the place talk say he go cost between $35,000 and $50,000 per year if you want rent the place. My people, no be say I make mistake for the money own o, na the thing wey dem put for paper be that. Dem talk am say the cheapest for the place na $35,000 American Dollars. This one no be mistake, I no dey talk about Trinidad and Tobago Dollar. Canadian Dollar nko, no be am. And wetin dem dey call that Country for South America wey dem talk say dem want change their money to Dollar? He be like say na Venezuela or Argentina, but any way sa,  no be that kind Dollar. I dey talk about the money for God’s own Country, the US of A. Na the kind dollar dem talk be that. Na him be say if to say na soso Naira you get under your mat for village, make you no appear with your Ghana must go bag because, dem go disgrace you. That one na joke, dem dey take local Money. 

My people jokes apart, no be say I dey talk say the company no fit put any price wey wey him like for his Estate. And I no talk say make people wey get that kind money no buy am, but the thing be say, na our people dey talk say make person look him backyard before he do things. If you take that kind money go Mallam Place for Keyside for Lagos Island go change am, I no think say you go fit carry that kind money for hand by yourself. I dey talk 4.5 million Naira per year for the place. My fellow Obodians, this na the cheapest o. If you dey talk about the $50,000 own that one go cost you 6.5 Million Naira. Osanobua! Seh seh seh my brother, na person wey rich go die well o. Which kind Barawos go pay that kind money for rent if him no dey do one kind 419? My people even for Lagos own, that money go build better bungalow for Ikeja area, I no dey talk about Mushin or Ajegunle o, I mean better place for this our Eko Akete. And if to say na my village you carry am go, na him be say you don become Kingsmaker be that. Kia kia our Igwe/Emir/Oba go make you him Royal advisor. This poku money for rent ?, I want know the kind Ole dem wey go put that kind money down just like that for rent, when no be say craze dey craze am. My people he be like say una no hear me o, we dey talk about our Lagos Nigeria o, the place wey United Nations talk say 60% of our people dey live below poverty, and a place wey na soso oyinbo pass me down we dey wear and use. This na country wey 90% of him University Graduates no get work and just dey waka about o.  The obodo wey dey call Giant of Africa and plenty of him road na dead traps and the thing wey dem dey call Middle Class na history as the country don become either you dey rich yanfuyanfu or you and the Rats wey dey for Okokokomaiko church we no sabi person wey poor pass.

I sabi say plenty of our Leaders and Olowo dem dey follow America own but the thing be say for God’s own Country, dem get the kind economy wey fit support that kind thing. Plenty of dem people especially Middle Class fit afford plenty thing wey our rich people dey take do yanga for Lagos and Abuja. New York City wey our Leaders dem dey follow follow, plenty people wey dey pay that kind money for Manhattan na Millionaires for Dollars no be our own  Naira o. From the thing wey my brother tell me, plenty people wey fit spend that kind money no be politicians but businessmen and women wey their financial portfolio full pass shit wey dey for Oyingbo area. So my people the thing wey I dey talk be say before we start dey build Plush and choice Flats as our Wannabes dey call am, make we make sure say plenty of our people go fit afford am.

We dey talk say crime dey, na this kind thing dey make some people turn to Armed Robber and Pen Robbers as plenty of our so call Leaders be. If we dey talk about Corruption and say we want commot am for our Obodo, he go good if plenty of our Super Millionaires go look themselves for mirror and change the person wey dey see first. Na him be say plenty of the thing na dem dey cause am. Where all these people wey dey build all these Plush houses want make our people find that kind money? And which kind expertrate dem think say fit afford am? I know say my body never reach Obodo Oyinbo border before but from the thing wey I dey hear and see for CNN, all these Dimplomats no fit afford that kind rent unless dem dey do one kind wayo for Embassy wey their government no sabi. These people na the same civil servant we get for our Obodo, their government no dey pay dem that kind money for salary. And make dem no tell me say na all these so call Technicians wey we dey call Expertrate for Nigeria go dey live for that kind place because these people for their country, dem no fit dey pay almost $4000 American Dollars for rent unless dem be Drug Dealers. Money no dey easy like that, make dem no deceive us. Na all of us sabi say majority of our People wey dey for Oyinbo Country no get that kind money especially since dem go pay rent and mortgage for their Domain. And the people wey I know say go do anything to live for the place na our own Barawos wey we dey call Governors, Senators, Congress and the rest of their Ogbologbo Onyeochi dem. We no say plenty of dem no be say dem get factory for Agbara or Aba wey dey make money for dem. Na this our so call oil money na him dem go take rent the place. And plenty of dem na their young Concubines wey dem fit born na him dem go put for the place.

My people na this kind thing I hope say our Press go write for their papers o. Any politicians wey we hear say he get flat for the place, he no need say make wey probe am or say make wey create panels wey dem go bribe, this na Bar Beach straight tarara, make he go face firing squad for the place. I no want hear tory, this na our money. No person wey get sense go go spend that kind money for Flat when you know say if you times four times na big mansion be that for VGC area. My people na here I go stop o, na beg I dey beg the estate owners say he go good make dem be part of our solution no be part of the problem. Nigeria na awa country, make we treat am well.

December.14.2001

Lagos Lawyers Nawa For Una O

My fellow Obodians how now, I hope this life dey treat una better? I know say plenty of una don hear the hilahilo way happen for Lagos Court last week between Former Chief Security Officer during Abacha regime, Major Hamza Al-Mustapha the man wey dem talk say he dey among people wey want kill Chief Alex Ibru for Lagos along with him lawyer and one Judge, Justice Ade Alabi.

According to my source, them talk am say na the Judge first start the thing. I hear the lawyer for the accused person talk say we want change something for the case and the Judge come talk am say he no go gree. As them dey argue back and forth, na him I hear say the Judge talk say the Lawyer dey behave like he be Hooligan. Na him be say he dey behave like all these "Area boys" wey we dey see for Lagos. The lawyer come ask the Judge say se na him he dey call hooligan, the Judge come say yes. So when the man hear that, he come tell Judge say him go withdraw as Lawyer for the Accused because him no think say he go fit continue with Judge wey no respect am. I hear say the Lawyer too na SAN o, na him be say him no be suegbe (mumu) lawyer. When Al Mustapha hear that he come tell the Judge say him no fit respect am as he dey call his lawyer Hooligan. I hear say the Judge say him no care. Na him Mustapha come let the Judge hear am. He talk say the Judge na yeye and he dey bias agaist am and his Lawyer because dem no be Yoruba. He come ask the Judge say if to say him Lawyer na Yoruba, se he go fit call am Hooligan? My people I hear say Al Mustapha and him lawyer dey vex gan o. He tell the Judge say him get proof say he the man don take bribe from people wey no want make he go free. Dem talk say the Judge ask am make he sit down and the man say no. To cut my tory short the case no fit continue that day o.

But the thing wey make me vex small for the thing be how plenty Lagos Lawyers especially my Yoruba people own dey attack the lawyer wey be Ibo. Dem talk say dem go ask make Lagos state Justice Office punish the lawyer for the thing. My people I no sabi this one o, how many lawyers go take that kind abuse for court? All these Lagos Lawyers wey dey attack the man, I fit bet una my life say if to na dem the Judge call hooligan, I no think say dem go like am and na wrestling the thing go turn to. Dem fit talk say make dem remove the Judge patapata. Make una no get me wrong o, I no like the way wey Al Mustapha dem behave for the court, if fit be true say the man and his lawyer want take cunny cunny dabaru the case as dem dey ask say make dem postpone the thing, but I no think say the thing deserve wey Judge go dey call the lawyer Hooligan. Which kind language be that wey person wey we call Judge go dey do name calling for court. The only problem wey I get with the lawyer be say he for tell his Client make he meshonu (shutup) because na the Judge court dem dey and you no fit dey talk to a Judge like that. But my people, the Judge behaviour for court that dey, dey small to reach o (O Ku die ka to). As Oyinbo people dey talk am that kind talk no belong for court. If to say na me be the Lawyer, na salt I go take wash the Judge mouth for am. I hope say the people wey go look into the matter go dey fair for the thing. We no fit look the other side because one Judge na our friend or from our tribe. No be the lawyer talk say we dey equal under Lawyer, which kind tribal stuff dem want put for the thing? Na everybody no say the accused dey guilty for the trial but since wey no dey there when the thing happen, he go good make we let the people wey dey in charge for the thing do their work. As for the case, I hope the Judge go remove himself because his behaviour for court that day means say he no go fit dey objective. Even self, I hear say Former Chief of Army Staff, Lt. Gen. Ishaya Bamaiyi too talk say the Judge dey ask for money for back. Na him be say the Judge no fit judge the thing well since dem don accuse am say he want take money. The man don let the accussed get to him as he forget his cool. But that one no be excuse, we no fit dey put emotion for court matter. As for Mustapha, he be like say the man still think say na Abacha regime na him dey wey. The man dey pompous and arrogant and he no get respect for anybody. How he go tell a Judge for that matter say him and the Judge no dey for the same class, nawa for our soldier o. For that, make dem add to his sentence if dem find am guilty of the main case. But I still think say make dem just give the case to another Judge, we all know say no matter who dem put, the people na baba nla criminals and dem go find dem guilty for the crime.

Na here I go stop my people, make una tak am jeje o.

November.29.2001

Who dey Make our Sharia Law Self?

Doh my people, how una dey? I hope una dey cope with all these hilahilo wey dey happen for our Obodo Nigeria. Wetin dey happen with my people for North wey be say na one fight after another we dey hear every week? He be like this Sharia thing dey done dey make everybody kolo o. I guess he get as he be for some of us wey dey leave for North. As people no get the kind freedom wey dem get before dem just dey take am on their Neigbhours.

No be yesterday I hear again say there was a fight between my people wey be Cattle rearers some Farmers. Dem talk say na about 9 people lose their life because of some yeye reason wey I no sabi. I beg make all these Panels and committee wey our Government dey create left and right no come tell us say na because of some Malu wey wander into the farmer land o na him make people dey kill. That one go dey low, he go belike say people value Malu life pass their fellow humanbeing. I guess our Leaders dem wey think say Sharia go settle all the ills wey dey for our society now sabi say na only when people get better work and food for table na him dem go think about Religion and Peace for our motherland. All these foreign religion no fit solve am. Na beg I dey beg my fellow country people make dem take am easy o.

Since we dey talk about Sharia self, wetin I dey hear for Sokoto State wey dem talk say one yeye Sharia Judge sentence a small girl for death because she comit adultery with one man wey dey marry. Before I go even talk about the thing, how person wey dey single go comit adultery. I no say I no be lawyer o and my knowledge for School own na Standard Six he end, but one thing wey I sabi be say the na fornication dem dey call the kind thing wey she do, she no fit commit Adultery since she dey single. Make I turn back to the court case, where dem dey get all these Sharia Judges self? He be like say plenty of dem no sabi law, I hope no be some week Sharia Course wey dem learn for Saudi na him dem want dey take dey judge us for our Obodo? The thing wey I no sabi be say which time he become crime say person sleep with another person wey no be him wife or husband? Plenty of all these our yeye Governors wey introduce the thing, how many of dem get one wife? Dem no fit tell me say say the first day wey dem meet their wives na that the same day na him dem marry dem? How many fit tell us for Television say him no have sex with the women dem before he marry dem? Another thing be say, how many of dem want put their hands for Koran say since dem marry their wives dem no touch another woman or even self since dem introduce the so call Religion Law, how many want talk say him never sleep with another woman beside him wives? I don talk am before this Sharia law no only people like me wey poor and no get money go surfer am. Person wey come from rich family and the ones wey get people for high places no dey pay the thing any mind as na poor people law. Since dem talk say the woman go die, why the thing no apply to the person wey sleep with am? I be the girl sleep by herself? I hear dem talk say the yeye Judge no dey hard on the man wey give the girl belle. Who the callous Judge want make he take care the Pikin wey the girl go born? Na wa for our Sharia Judge o, the person wey actually commit the crime go go free why the poor innocent girl go die because she sleep with marry man. No be say dem talk say "he takes two to tango", wetin make the Judge believe say no be by force the man take give the girl Belle as the thing common for our Obodo especially for Village? No be say I support death o, as he be say dem go kill the girl true true, he go good make Human Rights Groups too take the man go court for the same crime for another state as our Sharia Judges for Sokoto don dey kolo. Dem don turn Sharia Law upside down. Where our Federal Government dey for this? Make una no tell me say that our Araoke Attorney General Ige no sabi him left from right o? Why we need dem self if dem no fit defend innocent girl wey be citizen of our Obodo Nigeria. Abi this great force wey dey behind Sharia don make our Federal Government too tremble and dey too afraid to even talk about the thing? If our so call Attorney General no sabi our Constitution make he ask the people wey sabi am well well. I no say Federal Government get power pass State Courts and our Uncle Legba the President too get power if him too along with the yeye Advisers wey just dey chop our money for nothing go read their law book. The reason why we get advisors for Nigeria I no sabi self since plenty of dem no sabi their work. My people no be secret say I no like this dubious Sharia law wey our desperate politicians want take surpress us as dem no fit do the thing wey dem dey do when Khaki Boys dem dey for power. The thing be say na only poor people the thing affect and plus the so call Sharia Judges na joke and dem no sabi their yansh from their back. Se una hear about another Sharia Judge wey sentence one man for murder, and him come talk say the knife wey the man take kill the victim na the say knife dem go take kill am. Where the man get his own law I no sabi, when we no be cow wey dem dey slaughter for Abattoir for Lagos. How dem go take kill the man with knife, se dem go dumbu am abi na wetin? My people he get as he be. These people make me sick. I go dey tak to una now, make una dey do jeje o.

November.21.2001

The Havoc Wey Our Leaders Dem Dey Cause

How una dey my people, I hope say una dey kampe? I know say he don tay wey una hear from me. As una see we don get new look for this our Virtual Booklet wey we call Online Commentary. Na our Oga patapata talk say his money don come make we change the website around. Poku still plenty inside the soup o, the man wan do the thing small small. I beg make I no bore una with our company tory as I know say plenty of una go talk say no be that one una go chop.

My fellow Obodians wetin una think about this security palava wey be say the thing no gree comot our minds. Everywhere you go, na soso Armed Robber talk you go dey hear. I no fit remember the last time wey I close my two eyes when I dey sleep for house. As the yeye Barawos dem no dey separate poor soul like me from those Pen Robbers wey dey their mansion dey chop our money. But truth truth if we look am well well, I no think say our Leaders dem dey serious about the thing as plenty of dem get money wey dem go fit take buy security. And as for these our Politicians from the President down to Council Chairman wey dey for my Mama Village, na so so talk dem just dem talk as the thing no too dey affect dem. Na everytime we dey hear say dem go hire plenty people for Police and come give dem weapons and equipment wey dem go take fight crime.
But my people I no think say that one go fit solve am especially if our Leaders dem no change the way wey dem dey take run our Police Force.

My people make I break the thing down for una small, how many people una think say we get for Police Force and how many Politicians we get for the country? I know say the number go dey close but if una add our Leaders dem family, the number dem go fit fill a whole Lagos State.

All this ngbati ngbati wey these our Leaders dem dey talk say because our Police no get weapon na the reason wey dey make crime rise be that. Even if we give our Police plenty Weapons that one no go solve am as plenty of those weapons go end up for Robbers Hands. Unless our Oga Politicians dem look their backyard first, na Otubante (waste of time and energy) the thing go turn to.

My people if una look the number of our Force wey dey follow our Politicians dem from our Excellency Uncle Sege down to our Honourable Council Man/Woman, that one self fit cover a whole Lagos and some states. And una know say the people get plenty family no be small, we dey talk about our First Lady and their pikin dem. And make we no forget say plenty Council Chairmen/Chairwomen get concubines for corner wey Police dey provide security. And I know say plenty of their friends wey dey live for Obodo Oyinbo too go get Police Escort when dem visit home. So my fellow Obodians, which account we go come right this one o? I no dey talk about one Police man per person o, una know say people like our Governors dem dey get battalion wey dey follow dem and their Dogs. The thing be say as Police Academy dey graduate people na so our Leaders dem dey assign dem for their own selfish reason. Na only for our Obodo you go see Oga Messeger for Governor Office dey get Escort. My brother talk say for America dem, Senator no dey get escort unless he be Senate Leader or Speaker of the House. All the other ones na only dem dey waka about or make their aide follow dem but no be go house o.

But for our Beloved Nigeria, even Politician Dogs get Escort and our Leaders dey talk say Police no too plenty. My people if dem fit comot all those goones wey dey do follow follow behind dem and their family, crime go reduce no be small. This our country we no too dey use our God given Talent for better thing. This kind attitude don dey around for long time and the thing no dey fetch us anything but trouble and destruction. Plenty of our Leaders no be say dem no get sense but GREED and EGO don chop their common sense finish and dem just dey waka like Dead people wey him brain don die pafuka

As I want stop here, if our Leaders continue this their AS USUAL business, our Obodo go continue dey get problem from every corner of our beloved country. I hope dem go look at the mirror first and change their way of live.

OGA POLITICIANS, TAKE A BITE AT CRIME BY RELEASING YOUR ESCORT TO THE COMMMUNITY.

November.02.2001

Wetin Una Do For Us Lately Oga Politicians?

How una dey my fellow Obodians, I hope say una dey kampe? My people I no know for una but me I don tire for these yeye Politicians wey we call our Leaders. As dem no do the thing wey go help move our country forward, I no sabi why we dey pay dem in the first place. No be last year I talk say I no fit see the thing wey dem do wey I go talk say improve the Lives of us wey be Commoners. As this year want end so, I still no sabi the thing wey dem don do for us o. But na everytime we dey hear say dem spend our money for something wey no fit put food for our table.

For example, this our so call Pan Africanism me I no support am now especially when our country dey go down hill. No be say I no like my fellow Africans wey dey for our Continent but as people for my village dey talk am, "if fire dey born us and dey born our pikin if we want save ourselves and the poor pikin, we go first quench the fire wey dey born us before we go comot the one wey dey born our Pikin". Na him be say if you dey drown you must first save yourself before you go fit save another person. Everytime you turn around una go hear say our President dey help some people for other African countries. Another time una go hear say the man dey give free oil to our Neighbours for Niger and Chad. The thing wey I want tell our Big Belle Leaders be say he no mean say because dem family get plenty food eat and plenty money to blow na him be say the rest of us wey be Nigerians no dey go sleep hungry for night. I know say plenty of dem no be say dem born dem with silver spoon for mouth, I hope dem remember say plenty Nigerians dey, wey dey die for hunger as dem no get money feed their family. As the thing be so, I no sabi the progress wey that our Minister for Information dey cry about o. If to say na those two or three caterpillars wey the Government buy for one or two villages for few states na him the man dey call dividend for Democracy make he go check his head for Aro Abeokuta. I go even talk say if the man want hear truth, make he come to our area for Malu Road, he go know say that their cry for democracy dividend na propaganda wey no help us but just dem and their WOBIA FRIENDS AND CRONIES.

My people these our leaders dem no get heart o, una notice say for the past one month na that their yeye Electoral Bill we dey hear for Radio, Television and Newspapers as if to say the world want come to an end. I no kuku sabi the thing wey dem dey force about? Se dem think say we Mekunus care whether some councillors stay for three our four years. Or make some Governors dem allow other people take their posts as dem don serve as Govenors two times already. As my brother for America dey talk- WHO CARES? Se as crime plenty so wey we no fit sleep with both our eyes close for night or wey plenty children don die because of hunger, or the one about plenty of our youths wey don become men and women of underworld as the degree wey dem get don because useless since dem no fit find work with am, or what about our girls dem wey dey sell their body because dem no fit find work do and dem no want turn to Armed Robbers? Nawa o my fellow Obodians, which time wey our so call Leaders dem go put the kind energy wey dem dey put for this their yeye Bill for Project wey go fit solve plenty of those problems wey I talk just now? As for now I not think say we care whether one person be Governor or make another person be deputy, the thing wey dey burn us for under dey serious pass who our next leader go be. Sebi na person wey don belle full go dey worry about that. I beg my people, make we start dey pray and ask our God /Allah say which time HE go bring LEADERS wey go put our country and the people wey dey live for am first before their Bank account for Switzerland? Na only God/Allah fit solve this one for us o, and I hope say we go dey alive to witness am.

Na here I go stop, make una take am easy o. Please LOVE YOUR NEIGBOURS AS YOU LOVE YOURSELF.

October.31.2001

Liers Plenty For Aso Rock

How dey go dey go my fellow countrymen and Women? I don hear another one o. Dem talk say our President Uncle Sege and his Military Leaders dem talk say the thing wey dem talk say happen for Plateau State na lie. Dem talk say no be so the thing happen. When the thing don become embarrasment for dem, na him dem come change their tory. Last Week when President dey talk to our Press him talk say the Soldier wey dey involve for the thing dey defend themselves against the people wey dey atack dem.Weting una expect from an ex-Soldier. Na everybody know say our own Military no get honours. All of dem na Ogbologbo for Lies.

My people this na our President o. The person wey be say for our Constitution dem talk say make he defend us esepecially the ones wey dey unarmed. This na the man wey dey in charge of our Country o. The man wey no fit defend small pikin dem and their mama wey those yeye Drug smoker hoodlums wey call themselves Soldiers yamutu. I still no fit believe the thing o. How person go shoot Women and small pikin and our President go turn around and talk say the soldier dey defend themselves. The question wey our So Call Reporters for ask am be say against who the Khaki Boys dey defend themselves. The thing wey we hear be say them gather men together and come dem shoot dem like say dem be Malu for Ajegunle. I even hear say no be say the people wey dem kill get guns o. If to say na true true the Army dey defend themselves why he no ask the coward Khaki Boys come tell us wey be Public their own side for the tory. If na true true the Army dey defend themselves why we no bring Detectives for Obodo Oyinbo make dem study the thing. We can even ask the man wey defend Simpson during Evidence own for America make he come investigate the thing for us. Se una remember say the first time wey people talk say the thing happen, that our yeye Chief of Staff Ogomudia talk say na lie people dey lie say him Boys no do the thing. I no sabi why the man no fit resign if him be real Professional. Person wey be man of Integrity for don resign since the thing happen under his watch. But make una no expect say that kind thing go happen for our Obodo. I never see person wey get that kind moral and Integrity for Nigeria. Because dem no say na the end of their Power trip be that. Plus na him be say end don come for their Chop money be that. Dem no say if dem comot, dem no go fit thief money from our Reserve be that.

All this tory wey all of dem including the Ministers and our Uncle Sege dey talk no fit solve the thing. If to say na true our President want move the country forward, the first thing wey he for do be say, make him comot all those Leaders wey dey in charge including the yeye Cowards wey kill people wey no get weapons for hand. If to say he fit possible, I for talk say make our President no run for another term as the thing happen during his term. Na that kind action go fit move our country forward and people go respecct am more. Instead of this cock and bull tory wey dem dey tell us as if to say we be mumu.

Na here I go stop my fellow obodians, make una no expect say the people wey give the Order and their Muguns go face Justice for Nigeria. Small time dem go create one yeye Panel talk say make dem Investigate the thing. Wetin happen to all those Panels wey dem create before? No No be say na just talk our Leaders dey talk. Na the same thing go happen to this one. Our Uncle Sege too dey afraid, him know say if he try am na for him house for Egbaland him go find himselve. Dem go overthrow am, his entourage and send dem packing

October.26.2001

Our Soldier Don Turn To Killers

He don happen o my people, our Soldier for Benue don turn our Villages to Killing Fields. No be this week I dey tell una say our Soldier go revenge. I know say na their mama born dem, he no dey hard if you want figure our Khaki Boys out. Why una think say Our Late Yabbist King call dem Zombie? Dem too no dey hear word at all. Na go dem hear as my Grandmother for Village dey talk, dem no dey hear come. I know say dem go make sure say dem teach the people lesson.

My fellow Obodians, una go think say our Soldiers dem go use some common sense get the people wey kill their peers, but no be for our Nigeria, common sense no dey common for the people. Which kind human beings wey no get soul go gather people together like say dem be Malu (cows) and come spray dem with Bullets? Una mean say our Army no be person again wey be say dem no sabi between right and wrong. Una want tell say the money wey our Government dey spend for their head na to kill innocent people dem go learn for training? Haba Alhaji, wetin this world dem turn to wey be say our soldier go just kill people just like that and dem no go blink. You mean say everytime dem wear that yeye Uniform, Evil go just creep into that their small brains? Yamutu people coldblood like say dem be fowl for market? My poeple this one don pass me o, I no sabi this kind thing. Why dem no fit fight their fellow Village Soldiers for Liberia like that? My African Brethrens for the place for dey enjoy their Obodo now, instead na that yeye Monster wey call himself Leader dey use the Obodo like say na him papa Domain. All this gbana wey dem dey smoke don turn their head so tay dem no sabi Human again wey be say anything wey cross their way na yamutu. Se no be person born dem, abi dem no dey shame? Small time dem go call themselves Professional Soldiers, no mind dem, dem be Wannabe Mercenaries wey dey prey on Innocent people. Their sakara na our obodo he reach, dem for send go Afganistan make Talibans teach dem lessons.

As for my fellow Obodians wey no sabi the thing wey I dey talk, make I tell una small. No be for Tuesday I hear for Radio say our Soldier dem pack themselves for Motor come go the area where some yeye youths kill their fellow Soldiers two weeks ago. When dem reach the place, dem come ask the villagers say make dem come outside say dem want talk to dem. As my source tell me, she say dem come separate our men from women and children dem. Na him dem come spray the men with bullets like say na Animals dem dey kill. From their I hear say dem go another village and kill all the men wey dey there too.

Some people even talk say dem go our Former Minister of Defence, General Kalu house and kill Four people for the place. My people make una dey surprise if our country no pafuka soon because I no understand that one. If dem fit go their Oga patapata house go kill him relatives wetin una think say dem go do with me and una? Na him be say this our Country don dey dabaru small small be that. If our President and his people think say everything dey kampe, na him be say if una sabi person wey our Uncle Sege and his Deputies dem, make una tell dem say make dem stop the Ogogoro wey dem dey drink wey make no fit think straight, because our Obodo don dey crack small small. If our country still dey kampe after next election, make una know say no be my Papa born me. All this tory wey dem talk say na Tiv and Jukun people dey fight themselves because dem no want live together again na lie, I know say na some Godfathers push the thing as say dey go benefit from the thing if our Country pafuka.

As I want stop here my fellow Obodians, make una no surprise if una hear say my brother for Obodo America don send for me o. Since our Leaders dem no call me when dem dey chop the money, I no want dey when dem start dey kill themselves. Person wey no eat Giri no dey die suddenly. Make una dey pray for our country o as I go follow my neighbours dem go their Mosque/Church this weekend.

October.22/24.2001

Who Kill Our Soldier for Benue/Taraba State?

My people he don shele again o, I hear say some youths for North go ambush some Soldier and come kill them like say dem be rats. Dem talk say the people wey find the bodies say the way wey dem take kill the Soldier no dey good at all. My source talk say dem kill dem like say dem be animals.

My people which kind wahala wey the yeye youths want start again. I know say no person wey dey for our Obodo wey Soldier never show am pepper. Plenty of us no lilke as the people destroy our Country. Na all of us sabi this. The thing wey those hooligans do to those Soldier na only people wey be monsters go do that kind thing. Plenty of us know say those Khaki Boys wey dem kill no be dem destroy our Country. The people wey do am dey for their mansion dey enjoy our money wey dem thief from our Coffer. On as serious note, the kind thing wey those youths do fit cause wahala for our Obodo o. The thing wey I no sabi be say which kind person or group dey behind this Indian Hemp smokers dem? I no think say those boys fit do that kind thing by themselves. Some powerful people go dey behin the thing. If to na me be Uncle Sege, I go dey careful gan. Some people no too like his government and dem go try all kind thing to dabaru am. I hope say him don send his security men after the invicible power dem. The question wey I want ask be say how those boys fit do that kind thing wey people for the area no go see dem. Something no dey proper for the thing. Even self which kind soldier those people be, wey some youths fit kill all them like that and dem no fit fight back. I no go lie to una, I no care which can weapon person get for hand, if dem waylay me, I go die fighting o. Even if I know say dem plenty pass me, me too go kill plenty of dem before dem before my body become vegetable. That day make God expect plenty visitors because no be only me go go yonder for the thing. But na pray I dey pray make that kind thing no happen to any of us Amen/Amina.

As the thing don happen now, I hope say the people wey sabi the youths wey comit this kind evil deed go come out o if we no want katakata happen for Nigeria. Na all of us know say our Army go take revenge. Before the thing go cause anachy for our Obodo as my brother dey talk, he go good if the killers come out o. If not I pity the next riot wey happen for our Obodo because the Khaki boys go make sure say some people pay for the thing. So my people if una get pikin or family wey too dey involve for riot, make una warn am make he stop am if una no want bury am before his/her time. Na all of us hear and see the thing wey happen for Niger Delta when some youths kill our Security men. And that na against Police o. Una know say our Soldier go come out with full force, like say na Liberia Rebel dem dey fight. I pray say our Leaders dem go resolve the thing before our Country pafuka. Na here I go stop, make una dey do jeje o. Please if una get killers for una midst I beg make una point dem out before innocent people pay for the goods wey dem no get.

October.19.2001

Na wa for our Away President O

How dey go dey go my fellow Obodians, I hope una dey live? Which kind country we dey self my people? Why be say we no get luck for Leader own. If una look our history, plenty of our Past President na yeye. Dem be like Asewo wey be say na because of money she dey sleep with you. Na him be say she no too care how you be. Na that kind person we dey get as Leaders for Nigeria. If dem no thief our money dem go sell our rights to Foreigners. Just like Abacha dem wey go take our money open business for his family for Ivory Coast. You mean say our youths no sabi work. Why dem no fit open company for our Obodo so our youths fit find work do.

But the one wey we get for that position now that one wohwoh small. No be say he thief money (yet) o, na because o his ways. Make una no get me wrong o, I like the man small but the thing wey I no sabi be say the Old man no too dey think at all or him advisors na mumu. The reason be say na everybody wey dey for this world sabi the riot for Kano between Bin Laben relatives for Nigeria and their Christian brethen. Even my brother wey dey for America talk am say he see am for CNN. Na the same thing my cousin for Paris talk. The only people wey I think no hear or see the thing na our Uncle Sege and his wacky and die friends wey he call advisors. Make I ask una this, how person house go dey burn and he go come dey go party? This one pass me o. How wahala go dey for our country and our President go dey go Overseas? His country men dey kill themselves our President dey go Paris go shake hands for people wey he forget shake their hands the last time he travel. Abi na French Food wey dem go serve for the place na him our Leader never chop before and he think say he go miss am? Which award dem want give for the place wey pass innocent people wey dey die for our Obodo? Abi which meeting dem dey do self wey be say him life depend on am. This na our President o and the man want make dem relect am again. We dey hear plenty world leaders wey be say any time wey trouble dey for their country na the end of the trip be that. Plenty Leaders go trade place with our President because na the thing wey dem fit take win Eletion be that. I guess the thing no mean anything for our Obodo as the man know say our votes no dey count. No matter what we do, his people go stuff the ballot boxes.

The man get some nerves o as dem dey talk for America, I even hear say the soldier wey go meet am for Airport the man ignore dem. He no even look their side as if to say dem no dey. This na our country President o. Na everything dey dey akward for our Obodo, I no sabi the thing wey those soldier do wey go make our President ignore dem. This na the kind thing wey we no dey hear for other countries because their opponent go jump over that like Ants wey see sugar for road. And the media no go let the person rest. I guess that one no count for our country because na Autocrademocracy we get for our Ohodo no be Democracy. Our Media stll dey run after money instead of tory wey affect our live. I no go lie to una, as of today o, the man no dey get my vote. His behaviour pass me, na him be say the man no respect our country and the people wey dey live for the place. Na here I go stop my people, na only God fit help us for Nigeria because plenty of our so call leaders na wolf in sheep agbada.

October.17.2001

Haba My Hausa People Dem!

My people how una dey cope with all this nonsense wey dey happen for North. Wetin dey happen for the place self wey be say na every week dem dey kill themselves? The thing wey I go talk today plenty, and I know say my Northern brethren no go like am but nothing go prevent me wey I no go speak truth.

No be for the Oputa panel wey I hear one Major dey talk say our Hausa Leaders put am for Prison because his people carry one market from area wey my Hausa people plenty and come go build new one wey Hausa no plenty. The man talk say na the thing wey cause wahala wey plenty people die for the thing be that. He even talk the hoodlums burn plenty properties. He say small time he found himselve dey look Prison wall. He even talk say for Prison dem no tell am why he dey the place. To cut the tory short the man say dem sentence am and Major General Gumwalk to death. He say na only God save am, wey be say dem come reduce the thing to 5 Years imprisonment. According to the Major, he talk say plenty people wey dem put for Jail na from his tribe, he talk say dem no put any Hausa man for Prison.He even talks say our Federal Government dem give the Hausa Community Plenty money and no kobo touch his tribe hand. That one na one.

Se una remember another riot for Plateau State wey plenty Non Hausa people die for the thing. I hear say that one too na because dem say some people kill one Chief and because of that katakata come start. My source talks say if una see how plenty of my Tiv people dey run helter sketer, una go pity dem. Small time some Hausa from surounding States too join for the tihing. I even hear say apart from people wey die, if una see how dem burn plenty Business and Houses for the thing.

Another one na for Kaduna between my Muslim and Christian Brothers. This na over matter wey I no think say concern us for Nigeria. Dem talk say some Muslim people mostly Hausas dey jump up and down when innocent people die for America. I no sabi this thing o my fellow Obodians. I no care which religion you be, Anybody wey dey happy when plenty people die na monster no be person. Where he dey for Koran wey God say he dey alright make you kill your neighbours? Small time plenty of these my moslem brothers go go Mosque dey pray to God. The people just dey deceive themselves because I no think say God go hear that kind prayer when we dey support destruction of our fellow mankind.

The last one wey I go talk again na the one wey happen for Kano. I hear say some fools dey use the money wey dem earn for work dey buy Bin Laden Memorablia (Mobile Phones, Tshirts, etc). Why be say some of us we no dey use our God given Brain self? This thing too dey happen where our Black people dey. We too dey worship people instead of our Makers. These people wey dey protest against America, which of dem wey that kind thing go happen for his village or Town, he no go carry cutlass go attack people wey kill his family and townsmen. Una want tell me say as America want fight the people wey destroy their lives and Properties no dey justify? I know say plenty of una no forget the thing wey happen for Lagos last year? No be una want carry Trailers go Lagos go attack our Yoruba people because dem kill plenty of my Hausa people for Lagos? Why America no fit do the same thing?

Wetin our Arab brothers do for us self other than say we dey worship the same God? These fools wey dey attack Christians for North, una want tell me say if our Arab brothers dey kill Christians wey be Nigerians una go support dem because dem be fellow Moslems. The way plenty of una dey practice una religion self pass me o. If una no no, All of us wey be Nigerians na black. Plenty of our Arab people na Yellow. Se una hear say plenty of our people wey be black for Sudan, the so call people wey una dey support dey use dem as slaves. These na una fellow black people o. So my fellow Hausa, I know say plenty of us dey nice for bod, na the few Animals weu dey among us dey cause this katakata. But we as people, he go good if we check ourselves, deeds and words. We get plenty Tribes for Nigeria, why be say na only my Hausa people dey fight everybody. As my Mama dey talk when I dey young. Everytime wey she catch me dey fight, I go tell am say na jeje I sit down wey the person come hit me. And my Mama go talk say why be say na the same tory I dey talk everytime she catch me dey fight? She talk say he go good if I look at myself first because different people no fit dey do the same thing to me all the time.

My people na here I go stop o, He go good if we watch our deeds before we cause katakata for our Obodo. This killing don dey dey too much o. If we no stop this self destruction, I no think say the country go fit survive o.

October.10.2001

Nigeria Connection: Our Police Don Become Teachers

My people how dey go dey go, I beg make una no vex with me. I no too dey get tory nowadays. Una don hear this one, I don hear another one o, and una go laugh if una hear am. No be jeje I sit down for Office dey nak tory with some Omoges na him one boy come tell me say I get visitor from Maiduguri. As I reach the place so na my friend Mohammed wey be Oga for Police na him I see. The Man don change o, you no go even know say the man na Olopa as him face fat so. Him no be the kind police wey dey chop corn for roadside for my area. I come ask am wetin he dey do for our area, na him come tell me say him dey here for official business na him make him say make he stop by my house. When he reach my house na him dem tell am say I dey for office. The yeye man with him belle dey ask me how tey get the job self? To cut the tory shot na him the man tell me say him dey go back to Maiduguri tomorrow and I come ask am say no be today he just come and why he dey rush. Na him he come tell me say dem get some training wey dey important. I come ask am say which kind yeye training dem dey do for Police Station wey dey important. Na him the man tell me say the training na for some people from Congo Republic. I come ask am as I dey laugh say if he mean our Olopa go train Police from Congo, and he come say yes. Mohammed come ask me why I dey laugh, my people wetin una think?

No be say I no like our Police ( I no fit talk say I dey proud of dem) but the thing be say dem mean say these Congolese dem no fit find another country Police and na our Nigerian Police Force dem want make he train dem? I no too sabi the country but the thing be say if dem no get checkpoint for Congo before, now dem go get am. Una mean say the people no dey read papers? Abi because dem no sabi English na him make dem no sabi say our Police na Ogbologbo for fraud. Which kind law enforcement dem dem want learn from us when our own too dey go Obodo Oyinbo go learn how to become Police? I hope say no be their country go pay for the thing because the thing go be waste of money. I know Plenty of una no too like the thing wey I dey talk but my people if we no want lie to ourselves our Police na Big Jagudas. You mean our Police wey dey give guns to men of underworld for evening and come collect am for early morning after dem don get their own shares, sabi crime prevention? Why be say na Robbers dey rule our country? I no dey lie if I say our Nigerian Police dey among the worst Olopa for this world. The people wey fit sell their mama because of money go come dey train some African Police. I pity the people for Brazzaville, the little peace wey dem get don pafuka be that. Because I no sabi say our Police Force fit teach dem anything positive since Agbari dey too much for our people. I understand say other people think say we be Giant of Africa and we sabi plenty, that na lie for my book. I know plenty African countries wey better our country fine fine. For Nigeria we dey bless but the problem be say plenty of us dey look for easy money and we no want sweat for the thing. And the leaders dem, those na disgrace. The only thing wey dem sabi na to feed their big belle and waste our money for their concubine heads.

Our Police na reflection of our society, we too like money and we dey corrupt. Na everything get price for our obodo including our conscience. Na here I go stop my people, if to say the young Kabila ask for my opinion I for tell am say make he no waste his money. The people wey he send go dey worst pass before dem come Nigeria.

October.01.2001

Nigeria Saga: Murder For Hire

My fellow Obodians life don tire me for this our Country o. As I see am, life no mean anything for our Obodo. People just dey die like fly and the Police no fit do anything about am. And the problem be say our Police no want talk say dem don fail us. How many times una hear say our Police catch someone for murder. Even ordinary Armed Robbers wey be our Number One Enemy dem don become Kings of our Land. What a joke. The only people wey dem fit catch na OPC and Bakassi Boys dem because those dey easy for dem. The ones wey no get face like the Hired Killers just dey operate like say we no get security for our Obodo.

This Assasin palava self how the thing take start self? My people why be say for our Obodo we no too dey copy Oyinbo behaviour wey go do our country good? Na the one wey fit wipe our whole country na him we go dey follow follow like people wey no get direction. Make we take asewo own for example. If you go Allen Avenue and Ajegunle na so you go see our women dem with skimpy skirt like say na their junior sister wrapper dem wear. Some of dem be like masqurade wey dey for my papa village. And this kind corner thing wey these yeye girls dem dey do no be kind thing wey our forefathers pass down to us o.. But as country hard so na everybody dem dey sell her body for money. Sebi na the one wey dey for corner we dey, plenty asewo poku for Corporate world own. Na dem dem dey call Senior Girls. These na the women wey you go see dey run after bank managers and Managing Directors. All these thing don make our women cheap. Sebi una hear about our pikin dem wey don become Body snatcher for Europe. This na the kind thing wey our Leaders don turn our people into be that o. But this one small compare to this Assasin palava my people.

The major problem na this Hired Killer own. As he be for our Obodo now, no person life safe. Se una hear about Mr Monday Ndor, member of River State House Assembly wey assasin kill as the man dey return from Bori Town. This no be first this year o. Plenty Politicians and Business men and women don die from this Undesirable Elements and I no think say I ever hear say our Police catch one Killer for the crime. Plenty of dem na Egunje (bribe) you go see dem dey collect for check point from Danfo and Molue drivers. The reason why we still get Police self for Nigeria I no sabi. I know say the thing no dey easy but the way wey things dey go, this people go continue dey kill us like rats unless our Police do something about it. Our Leaders dem wey dey call Oyinbo people make dem come invest for Nigeria just dey waste their time. Se our people wey be say if you do business with dem finish when the time come make you collect your own share na Hired Assasin dem go send after you make dem come kill you for Hotel. If to say I be Oyinbo wey get money, I no go lie to una my fellow Obodians, our Obodo go be the last place wey I want do business. Agbari don dey too much for our Obodo, and the thing don dey deadly as our Business people don start another way wey dem go fit comot their partners. Before na through Juju, but plenty of dem don go hightech now. Before you know it, na Hired Killer go dey pursuit person everywhere you go. Person life no worth penny for our Obodo now.

Twenty years ago this kind thing no dey for our Obodo. But as soon as this General Marodonna Babangida enter power, our life just change for worse. No crime wey no dey for Nigeria now. Some crime before na inside movie you go dey see dem. Plenty of dem don get root for Nigeria now. And our Leaders no fit do anything as plenty of dem dey among the people wey dey comit all these attocities wey don become disease for Nigeria. The baba Isale (Kingpin) for the thing na our so call Leaders. I don tell my friends and families wey get small money say if dem value their lives make dem no join politics or do business with our people dem. If dem want start business wey dem no get all the money make dem just leave the money for bank. Although that one too no safe as our Bank Managers and Cashiers don become informants for men of Underworld. Na wa for our country no place even safe o.

As I want stop here the thing wey I go say be say as Police dem don loose control for the thing, he go good make everybody for Nigeria dey carry gun. I know say this no be best idea but at least before person attack you, him go think twice as he sabi say you get your own gun too. All these Barawos wey dey attack in large numbers when dem want attack a whole Estate go think before dem come because dem know say the thing go be real battle for dem, and dem fit no make am back alive. My people make una just dey pray o because na the only thing wey fit comot us from all these bondage be that.

September.24-26.2001

My people I hope say una no vex as una no hear from me since last week. Thing be say my source dem no fit find tory for me. I dey pray say something go come up this Friday if not we go just dey look ourselves for face ( I just dey joke with una). Any way sa if dem no fit find me tory he be like say I go ask some of una make una tell me something wey una think say go be better topic for our people. Make una wait, he be like say I dey hear one of dem dey enter come. He be like say tory don shele o, I go see una on Friday as my God/Allah don talk am make una dey take am jeje o.

September.21.2001

Uncle Sege Adviser For Aviation Matter Get Big Mouth

My people I don come again o, how una dey? I hope say una dey kampe? Make una no worry he go better one day sa.

He don happen o, I no sabi where our President dey get these him Advisers from self. Before I start, make I tell una why I talk so. Na all of una sabi the thing wey happen to our Friends for America, the God's own country. Plenty people die for the thing and I hear say if una see how many people go lose their job because of the thing una go say Osanobua. Na that we dey talk for our house House before my friend Johnny enter. He come ask me If I don hear the thing wey our President Advisor for Aviation Matters talk? Me I think say he dey talk about that woman wey dem say don dabaru Nigerian Airways, I come ask am say wey thing the woman do again? Na him talk say no be the woman, this person na the adviser no be Minister. As my friend narrate the thing to me, him talk say he read am for News say the man Captain Shehu Usman Iyal talk say the thing wey happen for American Embassies for Tanzania and Kenya no fit happen for here. My people, na so I open my mouth gbaga like this, as if to say no be the thing I hear be that, which kind fools we get for Government self? This na the person wey dey advise our President for Aviation matter o. My fellow Obodians, if una get family wey be Ajala travel make una tell am say the time don come wey he must sit his yansh for one place.

Una see this kind person I no sabi how dem take make am Captain self? Una go think say because na Airforce person he go get some sense for that him small head but he be like say no be so. If to say na Civilian like me wey talk am, we for say na because I no sabi anything na him make talk like that. This person come be captain again, how he tay reach that post self because he no be like say get sense for upstairs. Even America wey be Oga for Technology own and security, na all of us see the thing wey dem do dem. Israel nko, no be almost everyday suicide bombers dey attack their territory? We for ask the man say which kind Ogogoro wey he drink when him talk am? If the thing fit happen to those countries wey I mention, who we be for Nigeria? Make I start with that Captain self. I no go lie to una, if dem bribe the man say make he allow dem make dem attack our Country, the man no go resist. Plenty of our people go sell Nigeria and dem no go blink dem eyes at all at all. Una want tell me say Abacha and all the so call Leaders wey chop our money, dem no be Nigerians? Abi the captain want tell me say those Barawos dem no sabi the thing wey go happen to our Obodo if dem neglet am and send the money to their accounts for Obod Oyinbo? That worst pass terrorist self because na the whole country dey surfer for years. Where plenty of dem dey today? No be dem don become Ministers and Senators wey dey rule us? The thing wey I sabi about our people be say we no get conscience. Plenty Nigerians go sell the country for Kobo and dem no go think twice about.

Another thing be say the thing wey the man talk dey dangerous. Se the man want make those people target our Obodo? As the world dey close so, wetin make the man think say dem no dey among us already? Who go stop dem self? Make una no tell me say these our security men wey be say when dem see ordinary Robbers wey carry Shakabula (local guns) na run dem dey run. You mean na dem go stop person wey get bomb for motor? He be like the man don kolo. I no talk say I be expert o, but I no think say person with that kind background go dey talk that nonsense. Wetin go happen if those people think say we dey deer dem and come face us? As dem never face our country he dey good so. Because those people no be mumu for the thing o. Countries wey get better security pass us dem no fit catch dem and the man come dey talk about us wey be say we no fit stop even Ghana must go back bags wey dey obvious for our Borders. Se the man think say if dem dey carry contraband come our Borders our custom go fit stop dem? He be like say the man no sabi our country self. Se those custom people wey be say na the thing wey dem want chop na him dem dey look for ports. Dem go just give dem some Pounds and our custom officials go look another way.

My people na hear I go stop, I hope say our President go want these his so call Advisers dem make dem dey think before dem open that their big mouths. As for this man, this thing wey he talk dey dangerous and he fit give some people false hope. I hope our President go sack am. Make una dey do jeje o....................

September.19.2001

I Forsee Big Religious War For Our Obodo

My people how una dey, I hope una dey cope with all this hulahula wey dey happen for our World? Na beg I beg una make una forgive me say una no hear from me, na all these killings wey dey happen for our Obodo and America make me no fit come work o. My people I no know for una o, but the way wey things dey happen for our Obodo lately, make una no surprise if hear break lose for Nigeria and war come happen. As for una wey witness civil war of 1966-1967, if una look at the thing wey dey crop unto our society now una go see say dem dey similar. The thing wey I no sabi be say our so call Leaders wey be say plenty of dem participate for last civil war dey act like say dem no sabi the thing wey our people face especially my people wey dey for East. This thing no be joking matter, plenty people lose their lives for the thing. The first sign wey I see, and I believe say our Government make big mistake when dem allow some States make dem introduce Sharia as state law and religion. If we sabi our people well well, we be what some people wey sabi book go call Nomadics. Na him be say we too no dey sit down for one place, we like dey waka waka. If you go North, una go see plenty Southerners wey majority of dem na Christians dey live for the place. And the same thing for South, wey be say plenty Northerners wey be Moslems call the place their home. So the thing wey I no sabi be say why our Leaders dem go allow Sharia Law wey fit divide our country? Wetin our so call SSS dem do wey dem no fit advice our President say that na bad move. Una want tell me say we no get Organization/Agency wey dey in charge of that kind thing for Nigeria? Me and una know say that no be true, because plenty of the people wey rule us in the past, use the thing to oppress their opponents and our people. This na the kind thing wey make our country yeye. The system wey our Colonial Ruler put in place for us wey our government for they use for Intelligence gathering, find out where trouble dey or go fit dey; but our Leaders dey use am dey harrass their opponents. Make I break it for una small small.

This Sharia na good thing for Islam and we fit use am for plenty goods for our Obodo but the thing be say our Country no be like other country, the people wey introduce am no do am because dem be good Muslim. Me I no care the thing wey dem talk, if dem search their mind dem no say plenty of dem do thing for Politics and want use am create katakata for our Obodo. Una want tell me say dem no sabi say the thing go fit cause palavar for our country? And after one state introduce am, the other ones come dey follow follow and the thing come spread like say na bush fire. Plenty of our so call Leaders no get backbones, dem go use anything to remain in power. Dem fit sell their mama if the thing go make dem retain power. This dey typical of our people. Na the same problem we get for craft or job own. Una remember about 10years ago wey be say na everybody want become Fashion Designer, na the same thing dey happen wey be say every where you go, na so so Church and Business Centers you go see for corner. Our people too dey look at another man life dey judge their own. And the thing dey cause plenty wahala pass anything. Why our Uncle Sege go allow the thing dey beyond me o my people. But as I don talk before, the man don change, I no care the thing wey he dey tell us for public. We all know say the man no be mumu and he dey intelligent proper but the problem be say the man na Figure Head. Na "some power that be" dem dey call the short, I no dey wrong if I say dem get something on am. Because I no sabi a sensible Leader wey go allow the kind system wey him and everybody wey dey around am know say na bad omen for our Obodo.

Since the time wey dem make this Sharia state religion and law for our Nigeria na him the thing don dey cause wahala. Plenty innocent people don die as our people dey poor so, plenty of dem lose lose theri properties for the sake of Religion. Last year na Kaduna, Enugu, Anambra, Kano, Zamfara, Ogun, Lagos, Sokoto. This year na Kaduna, Plateau, Cross Rivers, Nasarawa, Bauchi, Plateau, Abia, Anambra, Akwa-Ibom, Kwara, Lagos and some other states wey I no remember. Before we no too dey hear that katakata for our Obodo but now the thing don become routine for our Society. And another thing be say some our so call Leaders wey no fit close their yeye mouth and keep their unwanted opinion to themselves dey fuel this war just because dem want be Relevant at all cost.

As I see am, the thing go happen again, and make una no surprise if the thing lead to Religious war for our Obodo. And if that happen, make una just forget the country wey una sabi as Nigeria. As I want stop now, na beg I dey beg our Leaders including the Imams, Alfa, Cardinal, Pastor, Reverend, Jujuman and Babalawo say make we begin dey talk among ourselves if we no want our country become Yugoslavia. I go see una on Friday as my God don talk am, make una dey do jeje o.

September.12.2001

How una dey my people, I no go fit give talk today because plenty of our co-workers dey live for Obodo America. According to our Oga for Lagos, some of dem na New York City dem dey live. We pray say everybody dey kampe o including other Americans wey the thing affect. I promise una say una go hear from me on Friday. Make una help us pray for dem o.

September.10.2001

No Respect For Our Leaders

How dey go dey go my people, I hope say una dey enjoy o? My people I don find out why Oyinbo dey live longer pass us o. This leave wey I take na him make me realize the thing. Una remember I tell una say I dey go my village go rest. When I reach the place I make sure say my family for Lagos no sabi the place wey I dey stay. Since I don dey go leave na this one I go say I enjoy pass. My people make I no lie to una, life no dey for city o, na for village be the bomb as my brother for America dem talk. Na so so fresh food I dey put for my belle, no be the kind Oku Eko wey plenty people for Lagos dey eat. If una see me now, una go think say I just come back from Obodo Oyinbo. Even people wey dey for our office talk say I look better, but make I no bore una with my enjoyment.

Which kind yeye thing wey I dey hear now wey plenty people talk say make we respect our Leaders especially our Head of States? He be like say the people wey dey talk this nonsense don smoke gbana. Which African Leaders wey una sabi wey put his people welfare before his own? Since wey dem born me na only few people dem na him deseve that kind treatment and plenty of dem don die. Na only General Gowon deserve my respect. No be say the man and his cabinets no chop money but plenty bridge wey una dey waka everyday na him build dem. Even all these monumental buildings wey una see throughout Nigeria especially for Lagos na during the man era na him dem build am. All the other ones from our Current President Uncle Sege to General Abubakar na rogues dem be. Una want tell me say that yeye farm wey our President get for Ota na his own sweat na him take build am? If we look well well na that our money wey dem allocate for OFN (Operation Feed the Nation) na there plenty of the money be.

As for the rest of dem una sabi their stories. Plenty money wey Babangida, Aikhomu, Shagari, Diya, Abacha, Ekwueme and the rest of dem get today belong to all of us. Na the reason wey me no consider dem say dem get money. The place where dem born me, if na true wayo you take get money people no dey respect you. I no respect any of dem. Which time wey una hear say dem take people wey call dem barawos go court? Because the salary wey dem get for their military career as Oga for Soldier no fit reach the kind Billion wey dem stack for Obodo Oyinbo. And as for the civillians among dem, which kind business dem get wey pay dem the kind money wey dem get for Bank accounts now? My people make we no deceive ourselves, all these people wey dey act like say dem born dem with silver spoon na big Onyeochis. Una don see the kind mansions wey dem get around the country, which kind industry una hear say dem get wey dey bring that kind money? I look around our Obodo, I no see or hear say any of these undesirable Elements get company for their village.

So my people, I never see leaders wey dem say make we respect o. Una want make we respect all these people wey be say na through force dem take gain power? Abi the ones wey be say their hands soil with plenty innocent people blood wey dem don send to their maker before their time? So which leaders we dey talk o my people? Make una look around, una want tell me say with all the resources wey we get for our Obodo, how come plenty of our people dem want run go Obodo Oyinbo go live? When I be small pikin, plenty people wey dey go Oyinbo Country go study dey rush back home when dem finish their study, but the thing no be so now. As other countries dem dey move forward, na back and reverse our country dey do. How many middle class we get now and how many dey 25 years ago? Almost all of us now no fit afford three square meals a day. But if una go our leaders dem house, una go think say na everyday be celebration. If una go London, una go see as plenty of their pikin dem dey blow our money like say dem get atlantic ocean for backyard and na money full am.

So my people, as for me o, we no get Leaders wey I go fit respect. Na only Robbers wey dey wear Leader Clothes na him we get for Africa. Na here I go stop my people, make una dey do jeje o.

August.31.2001

Assasin Palava Don Enter Politics

My people I beg make una no vex with me say una no see me on Wednesday. Se a month ago I tell my Oga say I dey go leave. I no sabi say the man think na next week I go begin. Na jeje I sit down for house dey drink Palmwine na him our messenger for work knock for my door say Oga say make he come call me. Me I think say the bobo dey joke since me and an na friends. Na him de man tell me say he wish say na joke him dey joke o, the bobo come talk say our Oga dey vex say I don begin make I no dey dey punctual for work. To cut the tory shot una believe say the man no talk say him no sack me if to say no be our secretary wey show am my leave paper. Any way sa my people, una Senator of the Masses dey go vacation next week Monday as my Oga give me extra day because the man with him Moustache disturb me from my vacation wey I for start this week. I don plan say this time around, na for our village I go run to. Make the man with him big stomach come tell his goonies make dem come call me for village. I no think say the man sabi be say na me be Mayor for our Village. Na kobko na him I go say make dem take comot him wire moustache. Me no fit wait go the place go eat fresh Ogbona and crayfish and I go come nack better palmwine on top of am.

Kedu ko du my people? Se una don hear say war want start for Ebonyi State between our brothers dem Senate President Anyim and Governor Egwu. The kind palava wey begin between these powerful men no be joke. I hear last week say our Senate President Anyim send report to Police say our Governor Dr. Egwu dey threaten am with Assassin. He talk say him don notice say Hire Killer dey follow am here and there. He even talk say the people dey call him house say if him come to Ebonyi, na him dead body him family go carry. Last week I hear say our former Vice President elder Ekwueme and some elders for South East gather together say make dem resolve the thing wey dey between these foolish men. But according to my source for South East, dem talk say Governor Egwu no want settle the thing. Dem say the man no dey happy as dem make Senator Anyim Senate President. I even hear say the man campaign against his fellow Ebonyian for National Assembly. Some people talk say the Governor no dey happy say our Senate President go dey share limelight with am for Ebonyi State. But my people since I no dey there and no be say both of dem call me dey tell me the thing I no sabi if this na true true or not. But my fellow Obodians, if to say na true this people want kill each other because of power, na him be say dem go better thing for us be that for Nigeria. The thing wey I no sabi with dem be say plenty Nigerians go sell their mama if the thing go make dem reach the kind power and prestige wey these too foolish men get. One na Senate President and the other na Governor and dem want kill themselves for the thing, how many of dem wey him family don reach that kind positions before? Na him be say some people no sabi when God lift dem up. Which among dem think say if the other person die, no be him we go blame. Una see my people, these people no be people like me and una o, these na people wey sabi book well well and dem go Univeristy. One na Doctor and the other one he be like say him be Lawyer or Engineer. If to say people like me wey no sabi book dey behave like this, people go tallk say na because we no get education na him dey make us dey behave like bush people. Wetin una go come say about these fools now? If both of dem know say dem too dey big for the position wey we put dem, make dem just comot the thing and let people wey go appreciate dem get the thing.

I don tire for this kind village politics wey plenty of our so call leaders dey practice, if dem no want the thing make dem just comot. Abi na by force? I no sabi the kind unversity wey some of dem go wey be say na through force dem dey take power. These positions dem no be their rights, na priveledge and small time their time go pass. I hope say dem go listen to our Elders and end this chicken fight wey dem want turn deadly.

Na here I go stop my people, I go see una for September 10. Make una dey do jeje o.

August.27.2001

Our Educational System Dey Kill Our Future

My people he no dey easy for person wey be student for our Obodo. This no be the kind thing wey una no sabi. Plenty of una wey go Secondary for Nigeria know say to pass WAEC and GCE no be joke. You go study so tey he go be like say your life want end for the thing. Before I start dey talk about the thing make I start from when person dey for form One. If I miss anything make una forgive me as una sabi say for na Standard Six me I stop since this Book brain no be all of us collect am when we dey come for this world.

When you want comot Primary School, you no fit wait because you know say the next step na Secondary School. And na dat go tell your Family say you no be small pikin again. And plenty of una no want stay home go Secondary because your Family especially your Parents no go let you rest as dem dey ask you make you do this and make you do dat. The day you leave home go Boarding House na dat day you start dey become real man or woman. Because na there dem go teach you home training if you no get one before you comot for your house. The yeye people wey call themselves your Seniors go use you so tey he go be like say na House Boy/Girl you be. Even from the thing wey my nephew tell me, house maid get better life pass you. All the provisions wey your Mama buy you na inside Senior belle the thing go end. You wey be say your brother or sister no fit ask you make you help am watch him trouser and Blouse before you tell am where him/her go go. You cause am so tey he go be like say na you and him/her na mate. But for Boarding school if you try am, na you and Belt go become one as dem go take am put mark for your body. Small time you too become Senior, and everything wey dem do you, you too want do am to people wey be your junior. You don forget the hate wey you get for your Seniors dem when dem make your life miserable. The question wey I want ask be say since you sabi say plenty of the thing wey those Senior do you na injustice why you come do the same thing to the Innocent pikin wey be your Junior for School? Plenty of una go talk say dem dey train person for Future, that fit be true if dem no kill you first.

As you reach Form Five, plenty of una study well well to reach the place. When time don dey reach wey you go graduate, dem give una Mock Test before una do WAEC. Plenty of una do well because una read well well. I hear say plenty schools dey follow WAEC style during this Mock Exam as dem want make their students know how WAEC be. When WAEC come una study hard because everybody know say if you want go University you must get better result for WAEC if not, you go retake the thing or do GCE. Na everybody sabi say the thing no dey easy. Small time when result comot, those yeye WAEC go tell plenty of our pikin say dem fail. And true true if una look am, plenty of those students no be say dem no sabi book but because our Educators dem too dey rely on exam wey person do for one day. As I dumb so I know say some Pikin dey sick for that day, some of dem because hungry no gree den, dem no fit do the thing as hungry no let dem rest. And plenty wey dey live for Big cities like Lagos and Ibadan, no fit reach the Exam place intime because of go slow. This thing don spoil plenty pikin life especially the ones from poor family. Plenty Student wey no get money for another exam, go start dey look for work. But today wey even University graduates no fit find work, na him be say person wey stop for Secodary go end up for him Papa Farm for village if him no want Messenger work for Office.

So my people na so life be for Nigeria o. Thet thing wey I no sabi be say why we too dey make life hard for ourselves especially our Pikin dem? Small time some students we go tell dem say because dem no get all their papers make dem go repeat am or make dem do GCE. Plenty time, plenty of these pikin dem go fail the paper wey dem don get for WAEC and come pass the ones wey dem fail for WAEC. I know sabi why we no fit let dem join am together make dem take enter University, instead we go tell dem make dem go do am again. And this no be exam wey dem dey do every month o, if dem fail am, na another year be that. You go see some people wey don dey take the thing before dem born my mama. Why this hassle self? Plenty of these our Leaders sabi how the thing be when dem be small Pikin o. But the money wey dem dey chop no let dem use their head say make dem change am. And dem know say the thing don destroy plenty of our Pikin wey for don do better thing for our Obodo. You go Oyinbo country, dem dey do things wey go make their Youths wey be their future better, but that no be so for Nigeria. Nothing wey we dey improve, as we dey do things when I be small pikin na so he still be.

The question wey I want ask our so call Expert for Education be say why plenty of our Pikin wey dey go Obodo Oyinbo with Grade Three or no school Cert dey come back as Doctors and Lawyers? And plenty times the kind law and Medicine wey dem sabi better pass our Nigerian Lawyers/Doctors dem. So una see my People, exam wey person do for one day no fit give true test say person sabi the thing or not. Our Pikin dem wey dey study for Obodo Oyinbo don proof that wrong. I hope say our Educators and Leaders dem go change for the sake our Pikin before GIANT WAEC and GCE GO DESTROY THEIR LIFE.

Na here I go stop my people, make una think before una do am o

August.24.2001

Haba Money Grubbers, Una Don Start Again?

How una my fellow Obodians, Se dey go dey go for una? Una don hear? Our Leaders dem especially the Governors don begin their yeye wobia way again. Dem no too dey see money for face. Na everbody sabi say because of plenty oil wey our country sell this year, the money wey dey for our Nigeria Reserve plenty well well. Two weeks ago our Governors dem come decide say dem go take Federal government go court. Dem talk say since the country get plenty money for reserve, make the government share am among all the states. The thing wey dem do in the past wey IMF and other Foreign Banks talk say our Country owe Billions of Dollars na him these wacky and die want start again. I come hear say Uncle Sege and his people wey dey for Federal talk say dem no go share the money as say the country still dey go through some growing pain as dem put am. When I hear that, I tell my friend Johnny say at least some people get some senses for their head for Abuja. No be these Kalokalo wey call themselves Governors wey be say anything wey look like money dem want chop am. Una mean say these people no sabi the say say "make person save for raining day"? And as my Mama people dey talk, NO TAKE YOUR TEN FINGERS CHOP! I come think say as Obasanjo and Central Bank don yari, the thing go stop, but that na dream for my part.

On Monday as I sit down jeje for my house na him my Johnny come stop by my house. He come say he hear say as pressure dem too much for Obasanjo head, the man come agree say Federal Government go share the money. Una see my people, all the yeye people wey we call Leaders na the same side all of dem face. As una know, our President no dey things without a reason. I fit bet una say the Governors dem and their Cronies don threat the man say if he want win another election, make he release the money.

Nawa o my people, these people go continue to eat our country dry like this? Where all these yeye people wey call themselves Human Rights Organization including our so call Media wey be say na Contract their CEO dey look for for Abuja and State Capitals dey? Which people go come fight for our future as all the Elders dem don sell their soul for Naira? Where all these student Leaders dey self? Una want tell me say na only few of us care enough about our Children. My people if una no sabi, na our pikin future na him these people dey mortgage. Upon all the money wey Federal Government allocate to our Governors, I no sabi the thing wey dem take the money do for our Obodo. Instead plenty of dem don share the money among themselves and their cronies. This one no be lie o, I hear say plenty of our Leaders dem especially the Governors dey buy properties yanfu yanfu for Obodo Oyinbo as if to say tomorrow no dey. My source tell me say some Governors dem dey build mansions for Washington Potomac, Chicago, Atlanta and some other cities for America. My source tell me say there is this HighRise Condominum for Washington DC wey plenty rich people dey buy. Dem talk say na only our People dem dey pay cash for the thing. These na flats wey each one cost at least 1 Million Dollars (1.25 Billion Naira). Se una dey hear my fellow obodians?

My people na so una see am, I even hear say Governor for Central Bank talk say him no support the thing o. This na person wey sabi our Economy well well. The man talk say the thing go cause super Inflation for our Obodo but our Government dem no want hear that since plenty of dem sabi where the money dey go. For example make I ask una this question, no be here una dey wey our Comrade Governor Tiunbu borrow plenty money last year, the man don borrow another one again o. Which person wey una think go pay that one when the Governor don comot? Na me and una pikin go dey responsible. While the man and his family go dey chop our KUDI for Washington DC.

As I want stop here my people, I hope say some people wey get small good inside their body for Nigeria go resist this yeye Federal Government bonus wey be say na our Politicians dem dey benefit for the money. I don talk before, if God give me small money, all these Foreign Instituitions na dem I go suit for Wordl Court. Small time dem go talk say our Country owe money, una want tell me say with all the Technology wey dem get, dem no fit go after the people wey wack the money? All these things na politics, these country wey dey borrow us money, na there our so call Leaders wey be Traitors dey store the money. Na the thing wey make Westerners look other side be that because the thing dey help their economy no our own Nigeria.

The thing wey I go say be say, all the people wey dey chop the money make dem continue, one day our Almighty God/Allah go bring person wey go deal with all of dem.

August.22.2001

General President Obasanjo Na Wa o

My people he don shele again o. This one happen for Murtala International Airport. I hear from my source say State Security Service (SSS) no allow our former Vice President Aikhomu go London last Monday. Dem say na jeje the man dey go, as he enter Airport make he go give his Passport to Immigration make dem check am, na him One State Security Service man tell am say he no fit go. The man come call his Oga for Phone about the thing, na him dem tell am make he tell our ex Vice President say President Obasanjo talk say he no fit comot the country. My people make una hear me o, I say dem talk say our General Uncle Sege talk say the man no fit leave our Obodo go London.

Which kind yeye thing wey our Country one start again wey person no fit comot him country because he no support our President? I for understand if the man kill person or steal some money and he want come run away. Dem talk say the man no fit comot because he dey involve for some wahala wey happen for Edo State. The question be say even if the man dey involve, Where our Police dey when all these things dey happen? Dem want tell me say our Police no sabi their job again? I know say I no sabi law well well, but the thing be say wetin concern the State Security Service for the thing? Se our General President and his Security Operatives want tell me say we no get court wey go fit handle something like that? My people, na the thing wey I dey talk about all these Khaki Boys wey dey call themselves Politicians. That their yeye military behaviour still dey for their body. The thing wey I no sabi for these people be say, na dem suppose to sabi law pass, but no be so, na dem dey break am pass. Any time wey things no go their way na him that their were (craze) go come out. Dem too dey think say the world revolve around dem too much. This na lesson to all of una wey dey vote for Ex Military Leaders because dem carry bag of Gari and Rice give una. Plenty of dem too dey behave like say dem don smoke Ganja. I hope say our next President no go dey use him power when things no go his way. As for me o, I do talk say I no go ever vote for person wey be Soldier before, plenty of dem no get respect for their fellow humanbeings. No be lie I dey lie, if to say no be Gun and Boot wey dem dey wear, I fit take plenty of dem one by one.

With all their sakara, na only civilian dem fit handle. Why dem no fit win the war for Sierra Leone when dem face people wey get guns like dem? Na only for Nigeria their power reach, when dem see people wey dey tough pass dem, dem go run away.

Na here I go stop my people, I hope this kind thing wey our yeye SSS and President Obansanjo do no go happen again if our country go move forward. If to say na me be Aikhomu, na court I go carry dem go. But if we think again, that man wey call himself Aikhomu no be better person. The man dey reap the thing wey he sow. The man too don comit plenty attrocities to plenty Nigerians when he dey for power as No 2 Citizen. I don talk am before, na NEMESIS, everybody go get his own. Na the reason be say make we dey do good everytime be that. No person sabi tomorrow. Se Aikhomu sabi say this kind humilation go happen to am? No, na so he be o my fellow Obodians.

August.20.2001

Our Country No Go Better Until...

How una be my fellow Obodians, I hope una dey Kampe? Today the thing wey I want tell una dey serious gan, and want make una think about am well well. This thing dey before dem born me and he still dey as I dey talk to una. Situation for our Obodo no go change unless we change our lifestyle for this country wey all of us call our Papa Land.

The first question wey I want ask una be say how many of una wey dey live for Nigeria no dey work for Government? My people if to say I fit see una I go see say na only few go fit raise their hands. Because for Nigeria plenty of us wey comot school no dey think say make we open our own business. Instead na where we go fit thief plenty money na him we go dey plan. Na everybody sabi say Government no dey pay good money, if want big salary, either you work for Bank or Oil Company. But since that kind job no plenty, the next best thing na Ministry. No be say dem dey pay plenty money but we know say we go dey command plenty respect especially if na better Ministry we dey work. In other words for Ministry you fit become Millionaire if you dey work where plenty contract dey . Na there you go see Messengers wey get plenty houses for Lagos. This na our mentality for Obodo Nigeria, plenty people no join Ministry because dem want help the Country, na how dem go take thief money na him be the motor wey dey drive everybody for the place. From ordinary Messenger to Permanent Secretary, na how much cut dem go get for that contract na him dem dey run after.

The next question be who be the largest Employer for Nigeria? Na all of us know say na our Government. Instead wey our Leaders go create environment where people go fit open their own business, na to steal the money na him be their goals. The money wey dem allocate for Ministry wey go bring investors come our Obodo, the Leaders dem don send the thing to their Bank Account for Zurich. Because of this, work wey dey around no dey plenty. As goverment want reduce unemployment, dem go be force to hire people wey dem no need or want. Small time you see people wey their names dey for payroll but dem no sabi where the Ministry gate dey. As order come from Oga patapata make dem hire plenty people, the Director for Personell don see that as opportunity wey he go fit thief money. The man go create plenty ghost workers as him too want become millionaire. Na this kind thing dey make people dey rush after Government work be that. Our Government dey too big. The money wey dem for use to promote investment, na him dem go use pay ghost workers.

As for the few ones wey get their own business, plenty of dem their business dey evolve goverment Contract. Na everybody for Nigeria be General Contractors. People no dey open business for nothing for our obodo. As soon as you hear say their friends or brothers don become senators or Ministers, kia kia, all of dem don become Contractors because dem know say Ije (food) don dey for dem be that. Na for Nigeria you go see people wey no sabi Medicine but because of their Connection, dem go win Contract wey say make dem supply Medical Equipment to all General Hospitals for our Obodo. How people no go die when everybody don sell their soul to Mighty NAIRA? People wey open business do am for one reason, to thief money from our Government. Everywhere you go na the same tory. People go do everything to become Important for our Society. We believe for Nigeria say the only way wey you go make am for business for Obodo be say our na our Government be your Customer. Na there you go get contract, chop the money and no one go ask you why you no fit the project. Plenty Housing Estates wey una see wey look like places wey dem dey keep Chicken, the contractor don chop the money. And there is nothing our government fit do since the Government people behind am no get clean hands for the thing.

Na all these things dey cause wahala for our Obodo. Since our Government dey encourage am, how una think people go change? Which time wey una see wey wey get good Government?

As I talk before, the only thing wey go make our country better be say our Goverment must change. All this yeye thing wey be say everybody na Government dem dey rely on must change. I dey beg our Leaders say make dem make Ministry hard for all our people wey be say people no go dey rely on am to survive. If Ministry or Government job no dey attractive, that go make people start their own business. Na all those things fit turn our country around. As for contract own, make dem do am so tay if you no finish your project you no dey get money. Another thing be say make our Media dey involve, any project wey government award and the company wey win am make dem publish am. If the people wey win the contract no finish am, make dem arrest the criminals wey dey involve. He go good if dem make am law say if person thief government money, na treason be that and the thing go cause the person life. I know say I no get all the answers, but if we want make our country better, we must change our ways and lifestyles. Na here I go stop my people, make una dey do jeje o.

August.17.2001

Councillors for Akwa Ibom Want Eat Our State Dry

My people na me again o, how una dey, I hope una dey kampe. Plenty of these our so call Politicians no dey ceast to amaze me my people (this na the new oyinbo wey I learn from one University boy wey dey for our area). I don hear another one o, and I know say plenty of una don hear am too. But for una wey no get Radio for house or no get money take buy paper, this one na for una. No be Monday I hear say some Barawos Councillors for Akwa Ibom dey blackmail the Governor. Dem talk am say if out Governor no increase their salary, make the man kiss Election 2003 bye-bye. My people this na the people wey dey run the affairs of our Local governmet o. Se una agree now say no be only Men/Women of the Underworld be Thief, plenty of our Leaders dem be Ogbologbo for crime. Na dem and the Robbers dey share our National Cake.

Make I ask una this, una think say if una carry plenty money go this people office and dem come see am, se una think una go leave that place alive? I no think so my people. I wonder wetin dem do to the money wey Federal Goverment give their Local Goverment? How people wey we call our caretaker go dey sakara our Governor say the man no go get their votes this coming election? The question wey I want ask dem be say who tell dem say dem too go dey there next time around self? Wetin make dey think say people go vote for dem again with all these demands and pressure wey dem dey put for our state? But I thank God say the Governor talk say he no dey listen to dem. My people this na my type of Governor o. I no dey listen to una again, I know say plenty of una think the Governor too na Thief, but this time around I support am 100%. At least he no give-in to those yeye Councillors wey be disgrace to our state. Se na only these people dey for this world? Plenty of dem na to eat the state and country dry na him make dem join politics. Na God go punish all of dem wey dey thief our money. Make una see me se trouble o, una believe say plenty of these yeye people no pay their staff salary up till now and dem want collect raise from our Governor. Una see my people, se una see our politicians in action? If to say these Councillors no dey selfish, how dem go dey ask for Salary Increase when plenty family wey dey work for dem no get pay last month and the months before that. We don talk am before, I no know about tomorrow o, but these people wey dey represent us now only sabi their own. Dem no care if me and you no eat for a month, as long as their own pocket dey full for money.

My fellow Obodians, na here I go stop, I hope say all my people for Akwa Ibom go remember these Councillors dem next election. Make una count on me say all these people wey dey chop our money, na all of dem names I go list during next Election. Make una dey do jeje o.

August.15.2001

Haba Judge, Wey Your Common Sense?

My people how una dey today, I hope una dey watch everything wey dey happen around una? Another one don sele o, and na for Ekiti State I dey. Se una remember early this year or so, wey we hear say our Government dey give people wey dey go Mecca money? Plenty of una write me say una no support that kind thing especially when we get plenty religions for our Obodo. Today own dey different small, I go even say this one dey wohwoh pass the other one own.

No be last month or so wey hear say one Governor dey take our money send some Politicians (Legislators) go Jerusalem. He no tay wey the thing happen na him our Brother Lawyer Falana take the Governors and his Barawo Legislators go Court. When I hear the thing, if una see as I jump una go think say I don win Pool. But he no tay wey the thing go court na him we hear say the yeye Judge talk say our Human Rights Lawyer no get case. The Ode/Mumu (Dumb) Judge talk say since the Human Rights People no fit show say the thing go affect dem, Him dey throw away am.

How the yeye Judge think all those people wey don become Robbers take become am? If to say the few money wey dem allocate our State our Leaders dem take am create work, some of these people go become a better citizen. From there dem no go dey attack people like our Human Right Lawyer Falana and the rest of us. So which kind case the Judge say we no get?

My people se una hear? Where dem dey get this kind Judge and which School give am Law Degree self? How the man take become Judge don pass me o. I no sabi this one, how person wey get sense go make that kind judgement. Ordinary people, I dey talk about commoner like me wey no sabi book, know say this one na common sense. How the man go talk say the money wey those Fraudsters wey call themselves Politicians/Legislators want take go Jerusalem no go affect us? Se the Judge dey go garage where plenty small Conductors dey as their Papa no fit find money send dem school. Abi na Univesity Students wey no fit find Job since dem comot school na him make we talk? Heh my people, where this yeye Judge dey when dem talk say 95% of our Graduates no get work? Which kind constitution go talk say he dey ok make we use Public money dey send people go Pilgrimage? If the thing dey, make dem burn am. Which kind yeye thing be this my fellow obodians? The thing no gree me think self. We dey talk say work no dey, plenty family no fit find food eat and the few money wey dey, our Leaders don spread am around among themselves and their cronies dey take am dey feed their ugly faces. Se dem want tell me say these Legislators no fit afford money go Jerusalem? The thing wey I no sabi be say, wetin our people go benefit from this jounrney self? Today na Jerusalem, Tommorow na Mecca, which time una go send some of us wey dey practice Traditional Religion go Brazil? All this thing na waste of money I see am; and na this kind thing dey make people think say our Leaders dem no care about our Obodo. Na only their own dem sabi. Small time dem go talk say Federal Government no release their money, I dey pray say one person wey close to Uncle Sege go see this my comment and go tell am. If to say na me be am, I no go give that Governor and his cronies salary for one year. As be like say dem get too much money for pocket. Dem lucky say I no dey work for that State, If to say na Ekiti State I dey work and I come be civil servant, if dem no pay me salary na the Governor and this Legislators na him I go take go court. And go beg the people make dem take my case go that Fool wey call himself Judge Babalola court. I want hear the kind excuse wey the Wobia go talk say I no get case. I no think say the Judge get common sense for upstairs. The money wey he go chop no let am see beyond his nose.

I hope say our Leaders dem go comot this kind Judge wey no dey apply common sense to law. My people make una no surprise if the Judge hand no dey inside our Politicians Pocket. Small time time una go hear say dem make the old fool Chief Judge. I hope say my people go remember who be their friends for 2003. The so call Legislators and Governors na 419 in disguise.

Na here I go stop my people, make una no allow these kind people hijack our freedom and Democray o.

August.13.2001

Poverty Dey Breed Plenty Babies

How dey go dey go my fellow Obodians, I hope una enjoy the weekend? As for me o, I no too enjoy am as my pocket get hole. Anyway sa, he go better one day.

Na wa for us for Obodo Nigeria o. We dey complain say we dey surfer but that one no disturb our Pikin Factory. No be this weekend my source for one local Newspaper talk say the new Population Data Sheet when dem just release for Obodo America talk say our population for Nigeria don reach 127 Million. Dem talk say na we be the 10th Populous Country for the world. Haba, as plenty people dey complain say Men of Underworld no let dem rest for Night, plenty of dem na so so Poi Poi dem dey take relieve the pressure. Wetin be this? Imam/Pastor you want go sell dem? Dem talk say plenty people for Third World Countries na so so sex dem dey do for Night. As rich Nations dey get better na so we for developing countries dey produce Pikin yanfu yanfu.

Na him want make me ask our expert for Nigeria this quetion because I no understand the thing at all at all. How people wey fit afford plenty pikin dey get few why we wey poor pass church rat and no fit afford am go dey born pikin like say we get Children shop for Jankara? This thing make me remember one uncle wey I get for London. Twelve years ago wey the man come home I come go visit am. When I reach him house I see say the man and his wife na two pikin dem get. As una know say me I get big mouth, nothing wey I see wey me no go talk. Na him I come ask am say why him no bring all his pikin come home? The man talk say se bi na dem dey outside dey play as I no sabi before say na two the man get. I come follow him answer with another question say as he get money so why be say na only two he born? The man come laugh, he ask me say where I want make he tey get the money? He come talk say besides, him no get that kind time wey him go dey pursue him wife when people dey look how dem go take survive. The man come tell me say him dey shock say I no get pikin because plenty people for Nigeria na to make babies na him be their past time. He come talk say se I no know say na person wey no get work and money na him dem born pikin pass. When the man talk am, I tell myself say he be like say this oyinbo country don dey turn this man head o. How person wey no get money go born plenty pikin, how he go take feed dem? I come tell the man say I no sabi that one o. He come talk say make I listen. He say person wey dey work and dey dey busy every time no go get time for sex because by the time wey he go reach him house he don tire. And if him wife too come get better work or business all those wahala go don make am tire by the time wey reach house for night. Plenty of these people, the husband and his wife no too dey see each other. But for person wey no get job and he come dey poor, him and his wife go dey see each other plenty time. Every time wey hungry catch am like this and he come see Iya Bonboy for house, wetin I think say go happen next? The man talk say na person wey no dey busy go get time for sex. Na the thing wey make poor people dey get plenty pikin be that.

My people that time I hear the man but I still no sabi the thing wey he talk untill I come reach house come look around my street wey be say I know say plenty of us wey dey live for the area money and us no dey meet. But na so so Naming Ceremony and Christening you go dey hear every day. Na that time the thing come make sense to me. If you reach our area, he go be like say na Baby factory you dey as you go dey hear yan yan yan for night.

My people na so una hear am o, wetin we go come do? We dey complain say food no dey plenty, the way wey our country dey go, make una no dey surprise if our population reach 500 Million by 2040 and 85 of dem na gari be their staple food. I pray say this poverty wey don take control of our Obodo go stop and our Leaders dem go create plenty work for us so we no go fit get time for Poi every time wey we see our wife dem. Na here I go stop my people, I hope say all of us go look at our pocket before we ask Hajia Silifat/Mama Ronke/Mama Ngozi make she come inside come rub our back. As the country dey so,  we no fit support one more Pikin, please make una think before una do am if we no become like our Brethens dem for Somalia

August.10.2001

South West Governors Want Hijack Election

How una dey my fellow Obodians? Make una no worry, one day sa our Country go better.

Another wuruwuru want sele o my people, and na our South West Governors one start am. No be last week I hear say the Wayo Governors dem dey talk say dem go support Uncle Sege if the man agree say his party no go contest for South West area. Before before, una believe say plenty of these Governors dem dey among the ones wey I think dey try for our people. As I know say he no dey easy to rule for this our Obodo. Na so everybody go dey talk say wey my own?

As I dey talk before, this new thing wey I hear I hope say no be so dem talk am. Make we look at the thing well well self. Which kind deal dem want make for our people? I understand say the man na our Yoruba brother and he dey do him best. But one thing wey I no sabi be say, se make we vote for person because he come from our area, abi because the man na him be best candidate? My people una sabi say plenty of these governors dem study for Obodo Oyinbo, dem want tell me say this kind thing dem fit try am for those places? Na one of the things wey I no like about our people wey read for Oyinbo country be that. Make una listen my fellow Obodians well, anytime wey something no favour dem, dem go talk say our people no sabi anything. Na so you go hear dem dey talk say for Britain na so dem dey do this, and for America na so dem dey do that. But when dem sabi proper say this one go benefit dem, that their yeye rule go just dissapear like that. Na mee you go hear. Una no go hear a word from dem. Me I call those kind people "OPPORTUNISTS" as Oyinbo people dey say. If una call una self opponents why una go dey make wayo deal wey go put our democracy for shame. Na the thing wey I go call the biggest Wayo be that for this new Millennium. If una think say una dey do better work, why una dey worry una self about that kind thing. Unless the money wey una take they build houses for America na from our Treasury una thief am. He be like say all those sakara wey these Governors dey talk say South West na for AD na empty boast, doubt don dey crawl for dat their corny corny head.

My people, this no be joking matter o, this kind thing wey these people want start no dey good for our country at all at all. Una see my people, Non Yoruba wey talk say we Yorubas too dey play tribalism no lie for here o. If to say na Notherners talk say dem want make that kind deal with Hausa President, na so you go hear our Pro Democracy group go dey yell foul and talk say Notherners want dominate Nigeria. Where dem dey now? Una want tell me say dem no dey for this our Obodo? If to say na Overseas dem dey, I sabi say dem dey read news for Internet. This kind silence make me wonder if these our Pro Democracy Groups no be Ethnic Organizations self.

My people as I go stop here, I hope our President go reject that kind wayo for the sake of our young Democracy. If these people agree for this kind wayo, I hope say our Anti-Graft Commission go go arrest dem for bribe because na the thing wey dem dey call Government Sanction Corruption be that. Make una dey do jeje o as una reject all these wayo deals wey our Leaders want put on us.

August.08.2001

Whch Kind Crazy Person Dey Make Those Yeye Virus Self?

How una dey my people, I hope una dey manage? Una no talk say una no hear from me this pass monday. Na this yeye computer Virus o. Na jeje I sit down for office wey one boy for our office talk say I get message for my computer. As I open the thing I come see say na of my friends for Bank na him send am. As I open the thing I read am wey the bobo dey talk say make I advise for something. Since una no say for our Office na me be Oga Adviser for everybody. Whether na person wey her husband no dey sleep for house o or na man wey just see omoge wey he like, na me dem go come talk to about the thing. With all this adviser self I no sabi why me no fit find woman for Lagos. I guess say the Omoges don see for my face say I no get kobo for pocket. If dem marry me, na hunger go kill dem. As I dey talk before my people, na him I come see something wey look like paper clip for the message I come ask one of the secretary for our office wetin the man want make I do with the clip. Which kind thing be this now? Na him the girl come talk say na attachment dem dey call am. He say na message dey inside the paper clip. Which kind Invention wey Oyinbo never try self? This one don pass me o, how the message take enter paper clip I no sabi o. Sebi dem talk say nothing wey fit enter needle mouth, how this people come do am now? Anyway sa, I come no fit open the thing. Na him I come send message to my friend for bank say the message wey he send I no fit open am. Small time the man come write me say no be him write am. To caught my tory short, before I know, everytime wey I want open document my computer go tell me say he need SirC32.exe before he go fit open am. As una sabi say I no finish Standard Six for school, how go come manage with this box wey dey call computer? Na him I come go call one of those computer boys for office make dem come see me see trouble o. Na him the boy come talk say na Virus. My people if una see how I be when the bobo talk say na virus na him my computer get, una go laugh me. I come ask the bobo say how the thing go get am when no be say I dey sick myself? Besides, even If I dey sick, how the computer go get am when dem talk say no be person dey inside am? Na him the boy come tell me tory about the thing.

My people some people dey craze for this world o. I dey talk about mad wey don pass Jankara market for Lagos. How people go dey manufacture virus for computer when plenty Doctor dey look for cure for disease? The reason why our Doctors dem no fit go talk to this people I no sabi. If this people fit dey create this kind thing, before you know dem go create computer wey go dey take our omoges. Na wa o, this Oyinbo people don pass me o. Which kind brain wey get for Africa self? All those juju wey dey take harm people, why we no fit turn am and do something positive for our race. Which kind head we get for Africa wey be say na to destroy our own kind na him we sabi pass. Na the thing wey dey kill our society be that, he for better if plenty African Leaders go put money where our pikin dem go fit develop their brain, instead na to spend the money on their concubines and buy motor na him dem sabi. I don talk am before, all these our so call Leaders dem be cause on us. Na to chop the Continent dry na him be their mottor.

Anyway sa I no leave una. Me I dey go enjoy for Beer Parlor , make una take am easy o.

August.03.2001

Oputa Panel: Why Our Past Leaders Dey Afraid?

Thank God Friday don come. How una dey my fellow Moslems, I hope una dey go Mosque go pray to our Papa Allah? Na only person wey open his heart go see his grace. Since we dey talk about repentance, wetin I dey hear about our past Leaders wey no want appear for Oputa panel? I even hear say Uncle Sege wey be our President talk say if dem ask am make he appear him no go hesitate. My people, who be our past Leaders wey no want appear for the place when person wey be current President no get problem for the thing? He even talk say he go go if dem ask am again. Una see my people? Plenty people for our Obodo get big ego wey pass Olumo Rock, the reason why dem no want go the place I no sabi.

I even hear some people wey talk say since dem be past Head of States, make Justice Oputa and his Panel go meet dem. My people all that na nonsense. If their hands dey clean why dem no go tell dem side of the story. Unless dem no get tory wey people go believe. The question wey I want ask people wey talk so be say why we dey concern about these people wey one finger no too enter their yansh when dem dey power? Which kind respect we dey give these people when dem no respect our Constutution? How dem take reach power, no be by force? If dem no respect us and our country, why we go dey worry about dem? Alhough I sympathesis with General Buhari because the people wey him overthrow want eat our country dry. If to say General Babangida and his cronies no comot dem, Nigeria for don better. All this yeye behaviour wey plenty of us dey see for road we no fit try am during Buhari regime. But the only bad thing about his regime be say, dem no respect people rights.

Make I continue with my tory, whether person be former Head of States or na commoner like me as long as say the person na Nigerian, he must obey the law of our Papa Land. Una want tell me say all the attrocities wey these people comit against their fellow Nigerians no mean anything? Why we no let the people wey dem kill their family be the Judge, plenty of us too dey do Mr and Mrs Too Know, he dey easy for us, why we no go talk; sebi no be us dem kill his family with bomb. Plenty of us for Nigeria too sabi our own. Some of these yeye supporters na their own neck dem dey protect. Dem dey afraid say their own secret and attrocities fit come out. Under our law everybody dey equal, if our past Leaders hands dey clean I no sabi why dem no want clear their conscience unless their accusers dey right.

I beg my people I no want hear that tory say because dem be Past Head of states he no go good make dem appear. These people for don think about that when dem dey send assasin go kill their fellow humanbeings because dem want remain for power for life.

Na here I go stop my people, I hope this go teach some of us wey think say we be God when we reach positon of power. Nothing last forever, make sure say you do good when it reach your turn.

August.01.2001

Government Deal With GSM Providers Na Joke

Nigeria hail thee my brother. How una dey cope my fellow Obodians, I hope una dey take am easy o? Una don hear say the two GSM Providers wey talk say dem go start wireless next week don release their price? Dem talk say the connection fee go cost between 15,000 Naira and 20,000 Naira, plus the person go dey pay 4000 Naira every month for access. As for the minute own, that one go cost about 35 Naira. Osanobua! I guess say people like me wey don plan say him too go dey carry the thing dey do yanga for our area, the yeye people don kill my dream be that. Where dem want make poor people like me get the money? Sebi I hear say for other African Countries, plenty Barbers and Cleaners for road dey use am, where dem take get the money? Na wa for Nigeria, my source tell me say for other African countries Mobile Phone no dey expensive. Him talk say na the reason wey plenty of those people fit afford am be that.

The question then be say which kind magomago wey those country government do with Wireless Providers wey our Leaders dem no fit arrange that one with the one wey dey here? Which kind government wey we get for this our Obodo self? He be like say these people wey dey rule our country dem no too like commoners like me o. Why be say dem no dey put us for mind when dem dey do their mago mago? I even hear say that yeye Government organization wey dem call National Communication Commission (NCC) na dem approve the thing? My people make I ask una something, why be say anytime wey our government dey look for people wey go head some of this yeye Panel self, dem no dey include poor people like me? When dem know say the decision go affect everybody especially we wey be commoners, why dem no fit put us for the panel? If to say people like me dey there when those GSM Providers carry their rate come, sebi I for don check my pocket and tell dem say no be here una go dey charge this kind price. My people, una know say I for don tell dem make dem carry the thing comot my face. But our Leaders dem no get that kind sense, since the money wey dem go take buy am na from our Treasury dem thief am, wetin una expect from dem? Una know say dem no care if people like us get am. Even self as plenty of us sabi, rich people for Nigeria no too dey like make we dey compete with dem. I know say dem no want dey see poor people like us dey carry the thing around like dem, because dem want people to know say na dem be it. Wonder no dey end for our Obodo self, and plenty of our leaders dey talk say dem want improve communication na the reason why dem sell the licence be that. But the question now be say how much we dey get for salary wey go dey pay 20,000 for Mobile Phone? Se na that yeye 7500 Naira wey plenty people dey get for work na him dem go dey comot 4000 Naira every month because dem want dey talk to their mama for village? Na him be say after we don buy phone, make we just put am under our leg so the thing go carry us reach work. Abi, how we go take pay for Molue and Danfo when we don take our money buy phone? Wife and pikin still dey o, how we go tay feed dem? My fellow obodians, I guess that our premature dream no go come alive o.

The only way wey plenty Nigerians go fit buy am be say if we dey put some money for bank, and by year 2010, our money go reach. Na here I go stop my people, I guess say our Leaders dey take style tell us say if we want dey use Mobile Phone make we move go Burkina Faso.

July.30. 2001

Objectivity Palava

My People we thank God say our National Team win for football. Now we fit tell that yeye boy wey come from Liberia, wetin be him name self- Weah, make he go sit down for one corner dey cry. Any way sa today no be the day wey I go yab am.

I receive one letter from our countryman. Make una read the man letter with him Oxford grammar. When una finish, una go see my comment about the thing wey the man talk. Enjoy am.

I wonder why Nigerians are not very objective when it comes to selling Nigeria to the rest of the world. I want a country where I'll not be introduce as a Yoruba man or Hausa man or an igbo man. These differences is what is pulling the country back. You can always read sentiment in whatever write-up that comes from Nigeria. Let's bury our difference and put Nigeria where she belongs. After all it is the geographical entity that makes the country great not the individual ethnic groups.Sit up and push the country forward and stop wasting your time promoting an ethnic group that the world does not care about.

I hope say una enjoy the thing wey the man talk for the letter.Wetin una think, una no think say he dey take style yab me? As for me o, I not too like am. As una sabi say me I no too sabi grammar, na one  pikin wey dey work for our office na him I say make he read the thing for me. For begining na praise I dey praise the bobo. I talk say if to say everybody wey dey for Nigeria dey reason like this, our country go don better. He no tay wey I praisy the bobo, na him the boy for our office read the last two lines for me. My fellow obodians, I know say no be me dey smart pass for our village, but I sabi when person dey yab me. He be like say the yeye bobo dey take style dey tell me say I dey tribal. Wetin he mean say make I "sit up and stop dey promote one ethnic group"?

Una know say I no talk say I dey perfect but the thing wey I sabi be say that tribalism wey the bobo say I dey promote no be true. I no think say one ethnic group dey wey me I never yab for this our Forum. I don talk about Hausa, Yoruba, Ibo, even the so call minority, na all of dem don see my saliva for their head. So my fellow Nigerians, I no sabi the ethnic group wey the man say I dey promote. He good make person dey look him facts well well before he talk.

Na God I take beg the man, make him read all the thing wey I don write for this forum. If the man fit prove say I dey favour one tribe pass the other, my name no be Pa Omugo. We try hard make we dey neutral for this place. I know for sure say the Oga patapata for our Company hate tribalism with passion. He even dey for our company code of conduct say dem go sack you if you play tribalism for this work. I hope say the man no take our comment on the past government say we no like one group. That no be our thinking o. Na person wey dey wrong na him we dey yab, I know care where the person or the group come from, if dem do yeye thing or spoil our country name my mouth go rain saliva on them.

Na here I go stop, make una dey do jeje o.

July.27. 2001

New Day For Nigeria : More Heads Dey Roll For Commission Report

My people se una think say na Nigeria we dey wey all this things wey dey happen? I no think say I go see time wey our Leaders dem go dey cough out all the chop money wey dem don wack. Se una don hear say the Cocoa Export Levy and Cocoa Buffer Stock Funds Commission Inquiry wey our beloved Uncle Sege form last year don come out with their report o? I hear say all the people wey chop money, dem don refer their case to Ministry of Justice and Nigeria Police Force. Na him be say plenty of these Barowos dem go pay a visit to our Monumnetal Complex for Kirikiri. Una sabi say dem talk say all the small fry wey dey involve too dem go pack dem go visit Malari Land. Na wa my people, I guess make I call my friends dem for CBN as dem talk say plenty of dem dey for this mago mago scheme.

My people make I tell una secret, una sabi say this kind thing wey dey happen dey make happy small inside. No be say I dey happy my friends go spend time for Prison. But I don talk am before, person wey help chop money must dey ready for judgement if the thing turn for him head. All these surfer surfer wey plenty of our pikin dem dey face, na this Wobia dem cause am for us. I no think say I go lose sleep if dem put my friends for Jail, na the food wey dem chop na him want carry dem go the place. I no dey like make person dey take the thing wey no belong to am.

As for the Leaders dem wey dey involve, for their sake I hope no be say na their girl friends chop the money o. Because the kind money wey dem talk say make dem return no be small my people. I no sabi where dem go get am since una know say plenty of our people no dey see money for face. Na so dem go dey spend am like say there is no tomorrow. Person wey no fit return the money, I hear say him punishment go dey double o. I dey hear from my source say our Government go award dem lifetime membership for Kirikiri. Huuh, that na death, I hope say this go teach plenty of our leaders dem lesson say dem fit run but dem no fit hide. Small time, judgement day go come as my Neighbour Mama Mary dey talk for Bible Study.

As usual, the oga patapata for the thing na Soldiers. Make I ask una something my fellow Nigerians. Why be say our Service men for Nigeria na long throat plenty? Una want tell me say na the thing wey dem dey teach dem for Defence Academy be that? He be like say soon dem wear that uniform, all the home training wey their mama put for their head and the advice wey their papa give dem go just dissapear like that. Na to thief money na him dem sabi. Na wa o, the people wey swore say dem go defend and hold our country together na dem be oga for corruption.

My people no offence to our good Military Men, he go good if dem just scrap their oat as plenty of their members just dey make fool of am left and right. How person wey call himself Officer for Military, na him go be Oga patapata for Jibiti.

Na true say our Military dem need head orientation. I hope say the people wey dey teach the thing go include orientation for magnet hands. Because this our soldier case don pass head orientation o. Even if their head dey say make dem no take money, their yeye hands go dey say se 5 million Naira dey enough?

Na here I go stop my people, I hope say the message wey our government dey send our country men and women go stick inside that our dubious heads.

July.25. 2001

Small Small Mask Don Comot Our Barawo Leader Faces

Una don hear my fellow Obodians? I hear say the commission wey Uncle Sege create make dem check if some our past Leaders use wayo thief goverment land and properties don release their findings. Plenty of our so call Leaders dey among the Oleh wey dey smile for our face for morning and come take wuruwuru take our property for night.

No be yesterday I read am for paper say the commisson talk say make the Onyeochi dem return all the properties wey dey their possesions. Plenty of the people na real Power that be dem o. Plenty key players for Abacha government dey for the thing, ex-Lt.-Gen. Oladipo Diya, Vice-Admiral Mike Akhigbe, Alhaji Lateef Jakande, Lt.-Gen. Ishaya Bamaiyi and Dr. Walter Ofonagoro.

Plenty of these people dem I no too dey surprise because na all of us sabi say na professional Rogue and robbers we get for Military dem no be Professional Service Men. I never see one military person especially officers dem wey no get long throat. As for Alhaji Jakande, me I dey disappoint say the man go yeye the reputation wey he build during our Papa Awo time. Which kind property the thing be self wey the man no fit say no? The man and Dr Walter Ofonagoro na jakuda wey don forget the home wey dem take comot. I remember the adage for Yoruba land wey talk say I go rather become a slave before I go become barawo wey dey take things wey no belong to am. All those civilians wey dey for the list, una be disgrace for una people. As for Lt General Diya, how the man take dey waka for Odogbolu self? The last thing wey Ijebu person go be na to fewo (thief). I guess say the man don forget say Ijebu man wey thief na disgrace to him family and town. The man just spoil the respect wey people get for Ijebu people wey Papa Awo build.

My fellow Nigerians una see how life be now? These people think say as dem take the thing, no person for our Obodo fit ask dem make dem return am. I hope say our government no go stop there o. If we dey talk say make small pikin no dey thief, na big crime if these leaders dem escape kirikiri time.

This na my judgement, if Uncle Sege mean business about this his anti graft thing, na these people make he take teach people lesson. I hope no be say since plenty of dem na power that be, dem no go taste kirikiri life for at least 15 years with hard labour. If to say person no be real jakuda, how you go make Government properties your own? I no sabi that one o. If our government no put these people for Prison, na God/Allah I take beg our Judges dem make dem release all criminals wey no kill person for our Obodo. Make dem come tell dem say anytime wey dem want rob make dem go after our Leaders dem wey thief Government money and properties. As dem dey talk for United Nations Chapter, all of us dey equal under the law of the land. This na treason as I understand am. If our government dem no fit arrest the traitors, make we kuku dabaru the whole thing make everybody find his way.

Na here I go stop my people, make una continue dey watch the thing wey our Government Leaders go do to these Gbewiri dem. I know say plenty leaders still dey wey the arm of the government no catch because dem get Godfathers for the place. Small time, their protectors go comot and we go come see the chicken yansh as he dey open. One last thing my fellow Obodians, make una no let person tell una say him Papa get money for Nigeria o. That one na big fat lie because no Rich Peson for our Obodo wey no do wuruwuru before he get money. Se na Abacha pikin or Babangida dem go tell you say their papa get money? Ask dem which factory their papa build for Nigeria wey dey bring dem money? And if to say dem get factory make dem explain how their papa take get the money wey him take build the business? Dem no go fit tell you. Every rich person for Nigeria na Big Barawo and their time go soon come.

July.23. 2001

Plenty Of Our Politicians Na Hooligans and Killers

How una dey my people? I hope say una dey kampe? He don happen for Edo State. I hear say some hooligans go attack FDN members where dem dey have meeting for Benin area. My people, wetin our country come turn to wey be say you no fit start or join a political party wey you like if you no want make dem send killers or hooligans to your house? Why be say military time want better the democracy time wey plenty people die for? Plenty of the people wey dem attack na members of FDN Poltical Party wey our former military Vice President Admiral Augustus Aikhomu (rtd) and some people start. He be like say our people don dey craze o. If dem fit attack former vice president people wetin that mean to plenty of us wey no get power for our Obodo? Person wey dey send Hooligans and Killers to his opponent, him too no dey different from the people wey he send. "He takes one to know one" as Oyinbo people dey talk

The thing wey I no sabi be say se na by force person dey join party? If people say dem no want join PDP, PPP and AD, I believe say dem get that right. This kind thing wey be say our Leaders dem go dey send Hooligans and Hire Killer make dem go attack their opponent don pass politics o. The thing wey I no sabi be say if you think say you dey good and you dey sure of your program, why you no fit run your campagn base on that instead wey you want eliminate your opponents one by one? This kind politics wey be say plenty of our Politicians wey call themselves Interllectuals go dey send killers go attack their opponent don pass me o.

I hear say some people dey talk say na Edo State Governor and his PDP dey behind the thing. If to say na true, the man should be ashame of himself. You mean say the man as a governor no get better thing for his state wey be say na the people wey go run against am for 2003 he go dey send Hooligans after? I guess say the man no get better program for his state wey he fit run on. Na person wey dey weak and no dey sure of his capabilities na him dey do this kind thing. Plenty of these people wetin make dem think say dem go dey alive self when 2003 come? This kind thing wey dem want start dey dangerous? Who ever dey advice dem for this kind behaviour make he tell dem make dem stop o before there is all out war for Edo State. I no think dem remember say we be minority for Nigeria, na look the majority people go dey look wey we go kill ourselves finish before dem intervene. Our Leaders don forget say we no be threat to our Obodo. Dem go talk say if Edo people kill themselves, that na one group wey dem no go dey worry about be that.

If to say our Local Politicians no be foolish people se na this kind thing dem go dey spend energy for when plenty of our area still dey underdevelop? If una kill una selves finish, which people go help us develop the state? Se na our Yoruba Brethrens we go run to abi na our Ibo Brethrens? Make una think before una do am o?

I beg, na God I take beg una make una think before una start dey send Hooligans and Killer to una self. Remember say the person wey no get power today fit get am tomorrow and him no go forget the thing wey you do am. As Oyinbo people dey talk am, "what goes around comes around". Some people go say na the bad thing wey our former Vice President do in the past when he dey for power na him he dey get the reward. The question be say if una sabi so, why una no fit learn from that say the table too fit turn tommorrow? I guess be say plenty of us we no too dey think about the future, and na him dey make us behave like say there is no tommorow.

As I talk before, if you dey sure of yourself and program you no go dey send Hooligans after your Opponent. Why you go dey afraid if you think say you do right by your people? I guess the money wey you hide for Obodo Oyinbo na him you no want make another government bring out for all of us wey be your people to see. LET YOUR DEED BE YOUR VOICE & THE JUDGE.

Na here I go stop my people, make una take am jeje o.

July.20. 2001

PDP Women Don Dey Kolo (Craze)

My people he don sele for Lagos. This thing wey we call democracy don tun some people head o. All because of the kind power the thing go bring dem.

No be yesterday I hear say some politicians wey be women for Lagos dey vex. Dem talk say plenty of dem dey vex with their Party National Vice Chairman Commodore Olabode George. I hear say the man no respect dem. From the thing wey I hear, dem talk am say the man ask him boys (dundy United) make dem detain the women and their supporters for Prison. I know say the thing wey dem say the man do if to say na true dey bad. The thing wey I no sabi be say the people wey the man ask make dem put these women for Prison se na him own Personal Police abi na waiting? Make una correct me o if I dey wrong. No be say our President talk say he no go allow States Police for our Obodo? Which time dem come start Personal Police Force (PPF)? I no sabi say the yeye behaviour wey those khaki boys dey perform when dem dey for power still dey o? If to say I be the women family na all the Police people wey dey responsible for the thing na dem I go ask my Lawyers make he charge for court. Especially when the women themselves no be poor people like me. As we sabi say for our Obodo person wey never belle full no dey join politics. The women go get some money for pocket. Even self I no sabi (make una pardon me for this because I no too dey like the idea) why these women dem no fit use their womanhood for the yeye Soldier man wey dey live in the past? Dem for let am no say na women dey rule this world at least for our Obodo.

That one don do for the man own, as una see say I no support the kind thing wey the man do to dem. But the thing wey dabaru my hear na the thing wey I hear say the women go do if the man no apologize to dem. My fellow Obodians make una hear this o. I hear say the women say if the man no apologize, dem go go him house go dey protest naked for the place. Una no hear me my people? I say the women talk say dem go go dey protest for the man house naked without any cloth for Seven days . Una no think say the women dem the beating wey the man give dem don turn their head? How person go say she dey vex and come go person wey she dey vex with house and dey protest without her cloth? Una no think say dem don dey kolo small? Which person wey dey advice these people self? Small time una go hear say dem nominate dem as our Ministers. Shei shei, we don die for this country. Na these kind people want rule our country? I no sabi the thing wey that one go do to the man wey dem dey vex with? I hope no be say na the reason wey the man say make dem detain dem be that because he be like say he remain small for dem? People wey want go person house go open their yansh for public go dey craze.

Na God I take beg their family say make dem advice dem before dem go make fools of themselves o. If dem want make the man apologize no be this kind wey dem go take get am. If dem do am, na dem go be laughing stocks for the area. Even self since I get some moral for body, if these women do am, I hope say the Police go charge dem for court for INDECENCY, as Oyinbo people dey call am.

Na here I go stop my people I take God beg una, before una do anything make una think real hard before una do am o.

July.18. 2001

Emir Of Ilorin Don Cause Katakata

How dey go dey go my people? Katakata want happen for Ilorin between Yoruba and Fulani/Hausa people. As the thing dey go so if our government no find solution to the thing now, make una just forget about the country dey call Nigeria.

I no go lie to una make I say I sabi the real person wey cause this wahala. But the thing wey I sabi be say our current Emir no do am well at all. Wetin happen to that old believe wey be say our Oba, Emir and Obi na father figure to all his subjects and if wahala want happen between his subjects he go find ways wey he go take resolve the thing. And he go do am so tay all the people wey dey involve go thing say na dem right. But this our Emir for Ilorin too dey play that yeye thing wey dey kill our society- Tribalism. Na the kind thing wey you go see when people dey take money buy throne be that. Nowadays for our Obodo, plenty people wey dey for position of power whether dem be President o, Senator, Minister, Chairman, Managing Director even some of our Kings, na through bribe plenty of dem dey take reach the position. Why we no dey give post to people wey we no say dem go move our country/state/city/town/village forward instead na the person wey get money pass na him we go talk say the kingmakers choose?

Sometimes we go even lie say na Oracle or Koran select dem. He don tay wey this wahala dey brew for Ilorin but for some reason our so call Leaders pretend like say dem no dey live for the country. This palava I don talk about am before when I hear say Emir for Ilorin join Arewa Group. Why person wey know say plenty of his subjects na Yoruba and he go go join one particular Ethnic group. The Emir no do am well at all. The thing wey I no sabi be say which kind advisors dey advise the King self wey be say plenty of his decision no dey in line with person wey we consider Papa of everybody? Him no dey see the rest of Emirs, Obis and Obas wey senior am? Take the Emirs of Kano and Kaduna, I no remember ever see dem make dem join politics because dem respect themselves. Na the kind Leaders wey we want be that. Dem know say all the people wey dey live for their city, whether na Hausa, Yoruba, Fulani, Ibo, Tiv, Ijaw, Itsekiri, all of dem na their pikin. Na the way wey king wey get wisdom dey behave be that. No be all this so call King/Emir/Oba/Obi/ wey be say dem too dey leap before dem look. I no care which part of the country our Obi/Oba/Emir come from, he go good if dem treat everybody wey dey live for their place the same whether the person na from their tribe or not.

As for the solution he go good if our Leaders dem go ask for our major Emirs, Obas, and Obi make dem get involve. Our Emir from Kaduna, Kano, Sokoto, Maiduguri, Minna, our Oba from Ile-Ife, Ibadan, Ijebu Ode, Lagos, Benin, Akure, our Obi/Igwe from Onitsha, Asaba, Enugu, Port Harcourt, and Aba. All of dem na our Fathers and na only dem go fit solve the thing.

Another solution wey me as Dr for School of Democracy go talk be say make dem ask all the people wey come from Ilorin make dem vote whether dem want make our Emir for Ilorin dey rule dem or if dem want their own Oba. I know say plenty people no go like the thing but as the current Emir don choose his path, I no go blame dem if other tribe no want am make him continue to rule dem. The thing wey I no sabi be say why our Historians no tell us the people wey dey right. If to say na true Ilorin belong to the Yorubas, make the man vacate the position se na by force person dey take rule?

But my people whether na our Kings dem we go ask make dem get involve or if to say na through democracy, the thing wey I go say be say, he go good if we resolve am quick before the thing cause katakata for our Obodo. Hausa/Fulani and Yoruba are two of the largest ethnic groups for our Obodo, if we no want witness another Burundi, our Leaders must find a solution to am NOW.

Na here I go stop my people, I hope say perople wey dey for position power go read my comment and dem go share am with our Leaders.

July.16. 2001

Wetin Dey Wrong With Our Muslim Brethrens For South?

How una weekend my fellow Obodians, I hope say una enjoy am? Me I no fit say the same thing as hungry no gree me as I no get money for pocket. The thing wey I want talk today don dey bother me since only be say I no too dey remember. But today wey I remember na him I say make I say am before I forget again. But I know say plenty of my Yoruba people wey be Muslim no go too like am but that one no go stop me as I go always talk truth.

My fellow Obodians how many of una wey get friends wey be Musllim sabi her Muslim name? And the few of una wey sabi the name dey call am by that? I know say una no plenty. Na the same thing with my so call Muslim friends especially the women dem. Plenty of dem as dem become sisi dem no want make people dey call dem by their muslim names. I sabi some women wey be say their Papa na big Imam for Mosque but the pikin no want anything with their Muslim names. If you ask dem wetin be their names? Plenty of dem go give you their adopted names wey be say their papa no sabi. And the few ones wey dey use am either because their Imam papa go disown dem if dem bear other names other than their muslim names or dem go make am sound arabic. Make una no get me wrong o, their still plenty of dem wey dey proud of their religion and names but the problem be say dem no too plenty. And some of dem wey dey use the names you go think ssay dem no be Yoruba again as dem don turn the thing to Arabic. Na so so Ziouqrat instead of Sikiratu or Abdul Kareem instead of their Yoruba pronounciation Abudulahi. I know one woman wey her name na fatimo but if you call am that she go tell you say you be illiterate. One day she told me say na only person wey no go school go dey call am that. She say her name na Fatimat. I come ask am say where he dey for Yoruba book wey letter "T" dey end word? The woman no sabi say I still remember the thing wey my Yoruba teacher teach me for class. Although I no too sabi the thing because na F9 gadaba the man give me.

The thing wey I no sabi be say you get some of dem wey don go Mecca plenty times and dem no want make you call Alhaji or Alhaja with their muslim names. The question be say which kind muslim dem be self? How una no go dey proud of una religion? Why be say plenty of us too dey dey ashame of our names? Our other Southerners too dey guilty of this only be say their own no too plenty. I sabi some of my Ibo brethren wey no want people call them by their Ibo names. Na soso Jeremiah, Clement, Cordelia and Florence you go dey hear. Dem no want make you call them Okechukwu, chukwudi, Ngozi and chukwuma.

My people na this kind thing cause the condition wey we find ourselves now for our Obodo because we no too dey appreciate our own. No be this kind thing ruin our economy because na soso Oyinbo thing wey dey like? I know say I no too sabi book but I get common sense. Nothing wey dem dey do for our Obodo dey nice for our face. How many of us go wear Coat wey dem sow for Ibadan and Shoes wey dem make for Aba with pride? Una dey laugh abi, na the reason wey plenty of our pikin dem no fit find work when dem comot school be that because na soso ready made from obodo Oyinbo with dey like, we no too dey proud of our own. If to say we dey support our own all this Ibo made stuff we dey make fun of for don improve and our life go don better.

Na this same palava with this name thing be that. I hear say some our people wey dey obodo Oyinbo dey ashame to name their pikin Nigerian names because dem no want make Oyinbo people make fun of dem. My answer be say if dey too ashame of the names why dem no change their papa name (surname) too to Oyinbo name? Ignorance people.

My people na here I go stop, if we no stop this kind attitude, I no think say our culture go see beyond this decade.

July.13. 2001

Surfer Surfer Don Turn Our Women To Exporter

How una dey my people? I know say he go better one day. But I no fit talk the same for our people wey dey for Obodo Guinea dey wait for Judgment. No be yesterday I dey read paper with my friend Johnny na him we hear say dem catch our people dem for Guinea dey transport Asewo go Europe. I know say plenty of una go talk say where I dey since this day? For plenty of una the news dey old. He don tay wey our people dey sell their body for Europe especially Italy. Come to think of it, na true o. No be last year my brother dey tell me say the time wey he dey come Nigeria him plane come pass Italy. He say if you see plenty Omoge wey enter dem plane for Rome. He say plenty of dem don bleach their body and come see as dem dey carry body odor. That one I no fit sabi with my brother o. Na everytime he dey talk say plenty of us wey dey Obodo Nigeria too no dey use Lofinda abi na deodorant he call am. I guess na the thing wey make am dey buy the thing everytime wey he send people to me from Obodo America be that. The man self I no sabi am, he dey act like say no be mat he tay dey sleep when we dey small. Oja re my people, na him sabi.

As I dey talk, he say he come ask the woman wey dey sit beside am why be say plenty people wey enter plane for Rome na women. The woman come tell am say na their base be that because people believe say Italian men like black women. She come talk say the people wey he see na the people wey dey bring plenty hard currency enter our Obodo be that. My brother tell me say the woman come tell am say na Exporter dem dey call dem. When my brother first tell me I no sabi the thing wey he mean say dem be exporters since no be say dem dey carry goods go sell for Obodo Oyinbo. He come tell me say I be mumu, he say the body wey Oyinbo people dey poi nko no be good be that?

My people to cut my tory short na so our country be now. No be all the women una see wey say dem dey live for obodo Oyinbo especially for Europe get work o. Plenty of dem na dem body dem dey sell for corner. This surfer surfer wey our yeye past Leaders bring to our country don turn regular people wey before una no fit catch dey with this kind thing done become Ogbologbo for the thing. I hear say plenty people wey dey behind the thing na some of our high society women wey una sabi. If una see some women wey dey spray yanfu yanfu and no be say her husband get money, make una be careful o. He fit be na somebody sweat the woman dey blow for una head.

As for our Leaders dem, se this kind thing no dey shame dem. Evertime dem go carry agbada dey run go Oyinbo country as if to say the people respect dem. If dem no sabi, plenty of these Oyinbo dey laugh at us as our countrywomen don become wowo for their hands. Na God/Allah I take beg una make una find solution for this problem as face dey push me. We for no see this kind thing for paper if to say we get Leaders dem wey get sense and dey considerate. Instead na Barawos dem dey manage our Treasury. All this nonsense for no too plenty if to say work dey wey these women and men go do. I beg Nigerian Parents, na God/Allah I take beg una make una no too push pressure for una pikin head as country dey so, if una no want make dem carry dem body come meet una for house. He dey dangerous out there, make una talk to una pikin before dey too late.

Na here I go stop make una dey take am jeje o.

July.11. 2001

Like President Like Senators: The Globetrotter Leaders

How una dey my people? I know say una no dey kampe. Which kind country we dey self wey be say almost all our Leaders na their own dem sabi. I no fit poin t to one thing wey these Barawos dem do wey go benefit us the mekunus. Instead na to jet from one couintry go another na him be dem thing now.

No be last week or so I hear say Uncle Sege dey complain say plenty of our Governors na "Owanbe" party na him dem dey do for Obodo Oyinbo. Make una see me see trouble o, the Kettle dey call Pot black. Which person start the abroad thing self no be am? If to say our President and all the other Politicians dey shame no be journey to Obodo Oyinbo everytime go be dem motto the first two years. And if you ask dem say why so so "ajala travel", dem go give you one yeye excuse say dem want repair the damage wey Military do for Oyinbo eyes. The question wey I want ask dem be say which people be these Military people wey don become "weep boys" as if to say plenty of dem no be the same people wey dey for military. I guess since dem done remove khaki and come put agbada, that don comot the responsible for their neck and remove the yeye havoc wey dem cause our Obodo Nigeria during Soldier era. Which of dem fit tell me say him no dey for government when Soldier dey rule our country?

Make I come back to this yeye "Away travel" wey done become the "thing" for our Politicians. No be a month ago I hear say some legislators dem award money to themselves say dem want go Obodo Oyinbo go learn how to rule our country "dem call am how to legislate". Una want tell me say these people no fit learn am before dem become Senators? I no sabi this one my fellow Obodians, dem case be like person wey want dey drive danfo and he come go motor park go carry passengers. Instead make he carry dem go Lagos where he tell dem say he dey go, he come tell dem say before dem go lagos, he want stop go learn how to drive motor. Una no think say the man don dey Kolo? As for our Politicians dem, no be say dem no sabi the thing wey dem dey do. Na barawo wey dey for their family body na him dey drive dem around. If dem mean well for our Country, se no be unemployement, security issues and good infrastructures dem go dey tackle? Instead dem just dey blow our money dey take am dey buy jewelries for dem comcumbines and yeye bastard wey dem dey call pikin. We dey complain say armed robbers don overtake our obodo, how that no go happen when the people we call leaders na Ogbologbos for the thing? As long as the people wey our pikin dem consider as role models na barawos, I no think we go fit defeat "men of underworld". The thing wey I go tell our politicians be say one day go be one day wey God go give us better leaders wey go probe all of una and no be say na jail dem go put una if una sabi wetin I mean....

As for these yeye Thiefs wey call themselves Armed Robbers, shame on una, all of una na chicken. If to say una be bad boys and girls as una call una selves, why una no go attack people wey dey thief plenty money, and na dem cause una make una dey rob? I guess say una weapons no dey sosphicated afterall and all of una na sizzy as dem dey talk for obodo oyinbo. Una no fit tell me say una no sabi the people wey dey thief our money but una too chicken to attack dem because dem get better weapons pass una? Na the poor people wey struggle get money na him una dey sakara and dey terrorize as if to say una dey bad. Na Yoruba people dey talk say if your juju dey proper you go take am nack yourself for head. Why una no go attack these una Lords for Barawo and see which person papa farm dey big?

I beg my people, na here I go stop, make una take am easy o.

July.09. 2001

Child Trafficking: Tory of Alhaja Bisket

My people how life now, I hope una dey cope with this surfer surfer wey we dey surfer for Nigeria? Make una remember say the God wey bring us to this world no dey abandon his people. I know sa na everybody don hear about the high class woman wey Police say dey sell small pikin. Make ask una something wetin una think about the case? Se una think say na true true the woman want go sell those small pikin, abi the woman want help dem as she and her husband talk? Whatever answer una give, na only the woman and the pikin dem sabi the truth. As say me  and the rest of una no dey there when the thin happen, I no go fit talk say na true the woman do am. But if to say na true the Police find the pikin dem under that condition wey dem talk for News, the woman innocent no dey good at all.

Make I talk small about the excuse wey the woman dey give. I hear for court case say the woman talk she get Orphanage and na there she dey take the children dem. She talk say she dey pick small children wey their mama don abandon for road and give dem shelter. As for her husband, him talk say him and her wife don send plenty of these pikin dem go obodo oyinbo. The Alhaji talk say dem dey treat the pikin dem like their own. As for the condition wey police found the pikin dem, the woman and her husband talk say na the yeye driver cause am. My people I no talk say the woman and her husband dey lie and I no fit talk say na true dem want go sell the pikin dem since I no dey there and I no dey inside their mind. But the question wey I want ask the woman and her husband be say since the woman herself dey inside motor where Police find the pikin dem, you mean say she no dey hear when the pikin dey cry? Why be say she no fit ask the driver why the pikin dem dey cry? If to say na true true dem dey treat the pikin dem like say na dem born dem, una want tell me say dem go put their own pikin under that condition? If to say na their own pikin dem hear dey cry, una mean say dem no go ask the driver or the pikin dem why dem dey cry? This their tory no hold water for my court o if to say na me be judge. Which mother go put her own pikin wey Oyinbo people dey call toddler under Chairs/Tables with plenty load for back of her car? I hear say for inside the motor, na so so chairs, tablse, tarpaulin and plates na him dey around the pikin dem and no be say dem dey sit on them. If to say na true the pikin dem be like their own you mean say Madam Bisket go put her little toddler for back where load dey while she sit down for front with driver? I go dey surprise if the motor get Air condition.

My people as I talk before, since I no dey around when the thing happen. But if to say na the pikin head catch up with the woman, by the Grace of God/Allah, the woman no go escape am. Because I no sabi a mother wey get her own children go dey sell another person pikin and when she sabi the kind pain wey a woman dey face during childbirth. How she go feel if na her pikin another person want sell for market? This na lesson for all the yeye people wey dey look for quick money and want become "Cash Madam" by force. Na plenty day for thief but na one day be owner own wey the thief go enter owner den and no go fit comot. All the people wey become rich through blood money, na hell dem go go when dem die and by God grace, their generation no go see peace for their life.

And if to say the woman dey innocent, the good wey she dey do go help am escape the thing. God go make am meet Judge wey go have mercy on am. My advice to am be say, make she forget about this Orphanage business become she no fit for the thing. How person go put a baby for back with plenty load around am? Wetin she think go happen if dem enter Pit for road as dem plenty for our Obodo dem? The condition wey Police find the pikin dem no dey good even for our Obodo Standard. na here I go stop my people, may God bless all the people wey dey do good for our Society. And the whole Nigeria thank the Corporal wey find the pikin dem, we thank am from the bottom of our heart.

May.24. 2001

Federal Character System Na Joke For Our Obodo

My people na me again o, I don come with another comment. I know say plenty of my Hausa brethens no go like the thing wey I go talk today but as I talk am before, anything wey affect Nigerians I go talk am even if the person na my own blood. Na the thing wey expert dey call better journalism be that.

No be yesteday I sit down jeje for my house I dey read newspaper na him I read say our Eaglet, the Under-17 Team dey the same group with US, Japan and France for Soccer and dem go travel go Trinidad & Tobago go represent us for World Championship. I no too pay attention to their coach name until I read another paper say the Under-15 Team too win Nike Tournament and dem go represent Africa as dem beat South Africa in Seychelles. I come notice say the dem Coach na Northerner. Na him come make me go back to the first tory wey I read na him I come see say the man too na Northerner. Na him make remember say our National Eagle new Head Coach na from North him too come from. I no get anything against my people for North but the question be say na only dem sabi coach soccer or any other sport? I notice say every time Teams go represent our Country plenty time the person wey dey head the deligation na Northerners.

Wetin dey happen here my people, una want tell me say na only Mallam sabi coach for our Obodo? Which kind thing be this, for sport? If to say na for military matter I go say no problem since we no say plenty people wey dey for Military na Northerners. But as for sport own, I no sabi that one own. Na all of us sabi say plenty people wey dey do Sport for Nigeria na Southerners especially my Ibo brethens. The question be say how we come have plenty Northerners for coach? Na common sense say person wey dey do the work go sabi the work pass the person wey just come from no where and become head just because he sabi "Banka Dede". I no say plenty of these guys na good coach and some don pay their dues but if everybody dey equal he go good if we give other tribes chance especially when this country belong to all of us. As our country no dey perfect now I support true Federal Character wey everybody go feel say dem belong especially for Sport Management. That old yeye system wey be say barboon dey chop and Monkey dey work must stop if our country go better. This no be military regime wey be say na only our Nothern brothers dey occupy Permanent Secretary positions why southerners with better qualification go dey answer sir sir to dem.

Na here I go stop my people, I hope our Leaders go put their yeye ego and tribalism aside and work on the things wey go make our country better.

May.21. 2001

All African Games Na Waste Of Money

My people our Leaders don start again o. I no sabi the thing wey dey wrong with dem wey be say dem no too dey use dem head. I know say he don tay wey I don dey hear say our country go host All Africa Games. I also know say the yeye Stadium wey dem dey build for Abuja na the reason why dem dey rush am be that. But my fellow Obodians make I ask una this, se with the situation for our country wey be say plenty people no fit afford one meal a day na this kind thing our Leaders go dey spend money for? The yeye festival self which kind people dem think say go dey spend money for ticket when him and his family never belle full? Besides we know say plenty of our Politicians and dem rogue friends no go pay for the tickets as the rest of us. Between dem and us, which person una think say fit afford the thing self? Na wa for this life o, the rich dey get richer while us the Masses dey get poorer. I know say Armed Robber no dey good but I no sabi why these murderers wey call themselves Men of the Under World no fit face Abuja and all the people wey dey cause this surfer surfer wey be say na the poor man wey struggle to make small money or our brothers and sisters wey dey Oyinbo Country dey wash Plates dem go dey attack for Nigeria? The question be say wey I want ask the Olosi rubbers be say which people cause their surfering na us the masses wey dem dey terorize everyday on na our Leaders wey steal the money wey belong to all us?

Make I go back to the All Africa Games. This surfer surfer problem dey for other African Countries but dem Leaders just like our yeye Politicians na Onyeochi and na only dem own dem sabi. If you visit most African countries na only few dey better and care for dem people. And most of the ones wey dey good to their fellow countrymen na Arabs but majority of our Black Brother Leaders na disgrace to Black Race. With all the resources wey we get for Africa, I no sabi why na so so handout we dey fight for for Obodo Oyinbo Countries. Plenty of dem go carry their yeye Agbada come 2003 come dey chop food and money wey go dabaru dem stomach patapata. The thing wey I no sabi be say all this money wey dem want take feed dem fat Faces why dem no fit do better thing for their country instead wey we go dem spend am on sport wey only dem and their rogue friends go watch. I hear say our Uncle Sege dey for better mood during the yeye display of the Mascot. The man na really disgrace for person wey I hear say him family not too get money when he dey small. Una go think say with his background he go understand say hungry no go for body. I expect say the man go cancel Abuja project and All Africa Games because of the kind condition wey our country dey now. But no be so, the man with him pot belle don forget the surfer surfer and humilation wey him surfer for Prison. I guess the man dey try to make up for the loss time wey dem put am for Kirikiri. My people as our African Leaders dey prepare for All Africa Games, I go dey pray say make God derail their plan because the surfer surfer wey plenty of African children surfer dey too much for any sane man to carry.

Na here I go stop my people, make una continue to pray for our Country and African continent as whole.

May.18. 2001

The Thing Wey Dey Destroy Our Country Dey Inside All Of Us

How dey go dey my people, I hope everybody dey do him part so our country go better? My people I know say plenty of una laugh when una read the first two lines. The thing wey I go tell una be say I no think say the thing na joke. How many of us wey be Nigerian care for our Country? This question no apply to our Politicians especially the ones wey dey National Assembly because we sabi their answer. Plenty of dem go tell you say na the reason wey dem join their yeye Political parties be that to chop our money. Dem want take their experience help our country. And we sabi the kind help wey dem go give our Obodo.

Before I start with us wey be commoners, I want talk small about our so call Leaders. Na all of us remember say two years ago, our country dey bad gan as we no get money for National Reserve. When we vote this Barawos in we think say we don find people wey go help move the country ahead but instead na their own family and pocket dem move along with their foreign accounts wey full with our oil money. The thing wey I no sabi about these people be say how dem go dey spend money for furniture when majority of people wey send dem go Abuja no fit find food eat? Plenty of our Youths no fit find work when dem comot University. But the people no want hear that one because the furniture wey dey their office and home no dey good enough for men of their caliber. I no sabi country wey him Leaders and Politicians go like dem pocket pass their motherland. No be seven months ago wey some fools wey dem call New Salary Committee come come out with one ridiculous Salary Proposal for our Leaders dem. If una see the kind money wey these people go make, I now see why people dey talk say if you want make it in Nigeria, make you become Politician. Make una see us o, plenty of the people wey dey inside these Committee na Book People o, and dem get book for head so tay when dem sleep book dem come out dem mouth. These na people wey dem consider say na dem be the best in their fields. But as I see all of dem na BIG Jagudas. The money wey dem want chop no allow dem see proper. How our country go dey in this kind mess and we go dey propose salary like say our National Treasury na Atlantic Ocean with plenty water? If you compare Abuja with Mushin, dem be night and day and dem no fit meet. If una see the kind life dem dey chop for that place while for Mushin people no fit find money buy Similac for dem pkin. Na so you go see our Leaders with fine cars along with dem small girls wey dem dey call Girlfriends. Plenty of these Girls dey young pass the Politicians Pikin. Na so the thing be for our country o, our Leaders dey among the people wey dey destroy the country big time.

As for the rest of us, all us of too dey guilty. How many of us dem go give bribe and he no go take am? How many of us go talk if we see people dey do things wey fit destroy our county ? I beg make una no raise una hand because all of us na the same. Make I use our driving as an example. This yeye traffic wey all of us hate, plenty time na we dey cause am. How many of us see lanes wey no move and come see Pedestrian path wey be say dey free and no go follow am? If you dey go Lagos for morning, na real hassle for road. Plenty time you go see people dey follow one way because dem no get patient and plus because dem too selfish dey forget say if dem follow that one way dem go block the people wey dey come from opposite direction. But as the thing dey inside us to be selfish, we no too dey think about other people for Nigeria. As long as our own dey kanmpe, we no too dey worry about our neighbours. How many of us think first about our neigbhours before we do things? Especially if we no say the thing dey wrong. Not too many people because all of us we go talk say no be that one we go chop. Since all of us feel that way, I no sabi why we complain when other people do am to us especially our so call Leaders.

These na some of the things wey dey destroy our country, plenty of us dey selfish, greed na another thing wey dey destroy us. Bribe make we no talk that one. That one na the thing we dey breath and drink every day for Nigeria especially for Lagos and Abuja. And we too dey envy of our fellow Obodians too much and the thing don send plenty people go yonder. The big thing wey dey destroy our country na the thing wey Oyinbo people dey call Law & Order and we no get that one for Nigeria. Disobedient na the first thing any pikin wey dem born for Nigeria go taste. Na one of the reasons wey our Green Eagles no dey perform well for Soccer be that.

Una see my people, he go good if we think about our actions and deeds how the thing fit cause katakata for our neigbhours. He good if we put ourselves in their postions first and see if we like am before we do am. This na some of the thing wey dey make our country no progress be that. Na the kind thing dey destroy society be that. I believe say, if to say our Leaders and Politicians dey think about the rest of us first and put themselves in our positions and see if dey like it, we no go see too many people dey put contract money for their pocket.

My people na God I take beg una, he good make all of us change because if we continue our yeye part, I no think say our pikin dem go fit find something eat when all of us don go yonder. Na here I go stop. make una dey do jeje o.

NIGERIA NA WA COUNTRY O, MAKE ALL OF US TREAT AM WELL.

May.16. 2001

Attention! No Stand At Ease: Military Don Hijack Democracy

How una dey my people, I hope say una dey manage? Wetin dey happen for our country self? He be like say this our country na only Khaki Boys dem do am for. How long ago wey everybody dey jump up and down say we don finally grab power from our money grubber Soldiers. We no know say the thing na short live. Everywhere way you look, the people wey want contest for next election na Military. This thing don tire me o, the people wey fight for democracy no fit enjoy am as plenty of our retired Officers don put their khaki down and come carry Agbada wear. If una go our National Assembly, plenty of the people wey dey there na former Military officers. From the thing wey I dey hear from my sources, plenty people wey want run for next election na these same Soldier Boys wey turn our our country to Poverty Universe.

Before I begin dey break am down, I know say plenty of una go talk say since dem be Nigerians, dem get right like all of us. I know say dem be Nigerians like us but how much salary dem dey pay soldier wey he go dey buy whole village. The thing wey I no sabi be say as my Grandmother dey talk am, person wey be thief go always be thief even if dey go church or Mosque everyday. The thing na like smoke no matter wetin you do to hide am, the thing go come out. The thing wey I no understand be say how this people dey win election self? Which kind "MuMu" and "Ode" dey vote for dem? I know say plenty of dem dey buy election and votes, but if we no sell the thing dem no go see buy am. I hope say people wey dey sell dem votes dey sell their pikin future. He be like say plenty of us for our Obodo no dey learn and we like am as we dey worship these Barawos dem. Everywhere you look, na so so Khaki boys you go see dey blow money yanfu like say the thing na water.

As these people dey chop our money, 80 percent of our us no fit feed our family. Na the kind thing wey dey make some of us angry be that. Na this make me call the people wey dey vote for dem "eru Aiye" Life Servant because the "Chicken Change" wey dem dey give dem before election no go last one week before dem go back to their miserable life.

My people na so una hear am o, if we want make our country progress, we must stop dey vote for these khaki boys wey be say the condition wey our country and us dey now, na dem cause am. Dem no care that time, and I no say dem no care now. How many of dem una see for una area when election no dey around? Na so the thing be o, we must stop dey vote for dem if we no want our pikin suffer the kind surfer surfer wey all of us dey face everyday. Na beg I dey beg una my fellow obodians, this coming election make una tell everybody wey una sabi say if we want make our situation change and our live better, any Politicians wey don rule us or represent us na no go area. We must do everything to prevent their victory. The time don come wey we must handle our destiny/business ourselves. These money mongers no pay us and dem no pay our country. Plenty of dem pikin dey obodo oyinbo dey chop our money while me and una dey languish in poverty for Nigeria.

Na here I go stop my people, "a word dey enough for person wey get sense" Till una hear from me, make una dey do jeje.

May.14. 2001

Uncle Sege Don His Grobetrotting Affair Again!

Hello my people, se una dey manage? Which one wey our President dey self? For some reason the man no fit sit him yansh for Nigeria. Every time wey you hear , the man don fly go another Country. No be last Wednesday or Thursday the man travel go America. I hear say the man dey for Belgium as we dey talk. This Baba Egba sabi blow our money o. I never see one month wey the man no travel go another country. Make we look the thing well well, the way wey our President dey blow money for journey no dey wise at all. He don reach almost Six months wey President Bush for America don dey for power, na only once the man comot go another country. And no be dem neigbhour for Mexico he visit? Se una want tell me say the America no get money? And na the reason wey the man no fit travel be that, eh my people?

No my brother, una see for America the Government sabi him priority unlike our Government wey be say dem no get our country matter for heart. Una see for America, the people think say Recession dey come  and their goverment want make sure say dem look at the matter well well wey the thing no go fit happen. Another thing na this Energy wey I hear say dem dey get for California. The thing don almost become embarrassment for their President. Una see my people, for Obodo America, the people love their country but I no fit say the same thing for our Leaders. I no say plenty of una go talk say na nonsense I dey talk but as my mama teach me, people no dey like make una tell dem truth. Plenty of our Leaders sabi their pocket pass the country own. For example which country una dey wey our National Assembly dem dey blow our money for funiture? Una want tell me say if the people care for our Obodo na funiture money bill dem go dey pass when everybody sabi say the condition wey our Past Leaders leave our country no be pretty sight at all. As I talk before, una want tell me say all these our Senators and Legilslators no fit afford funiture for house? I beg make una give me a break as dem dey talk for Obodo Oyinbo.

As I want close my comment, I hope say our Leaders dem go do less travel and more action on this yeye condition wey our Obodo country dey. Na here I go stop my people I go dey talk to una on Wednesday as my God/Allah don talk am, make una dey do jeje o.

April.27. 2001

Our Country Na Hell For Business

How dey go dey go my people, I hope say una dey hang in there jeje. He don tay wey I don dey think about the problem wey Business people dey face for our country. My people I no sabi how plenty of these people dey survive o. When I dey talk about business people me I no talk about 419 Business or people wey be say na through Dabaru and Wayo dem dey take survive for business. I dey talk about people wey dey do business for our Obodo true true.

No be since 1999 na him Uncle Sege dey travel all over the world make people come invest for Nigeria. The thing wey I no understand be as the man old so, him no think say he must put his house in order before he go dey ask foreigner make dem come put their money for our Obodo. Every where you go for our Obodo, nothing wey dey work. All the infrastructures wey go help business move proper don pafuka. Na almost two years now na him the man promise say NEPA light no go dey blink but as I day talk to to una now, the yeye poeple don take light, na Generator Plant na him we dey use for office. How business go tay survive when be say everytime dem move NEPA don use his power? I no sabi Business wey no need light for business. Plenty business don close their factory because NEPA don destroy their Equipments. Plenty business no fit hold meeting because the office no get enough ventilation for their counterparts from Obodo Oyinbo. Na everyday business dey loose billions of Naira as our Kingkong NEPA don visit us again.

There is this other problem wey dem dey call government regulations and Egunje. Na all of us know say our Government dey try him best make dem commot Bribe for goverment office but the thing go take years because the thing wey our Leaders dey talk for Television, Radio and Papers no concern junior staff wey plenty business people go meet when dem go the offices. If you know cooperate for the thing, the thing wey you want go collect no dey comot unless you settle dem. If you think say you too know, these God-Fathers for Egunje dem go just frustrate you. Plenty of dem na the thing wey dem dey take support their family be that as plenty times our Goverment no dey pay these people in time. Sometimes dem no dey pay dem salary for Six months. The question wey I want ask our Leaders dem be say, how dem want make these people survive in this kind environment? I no say some people even if our Goverment pay dem their money dem go still ask for their own Family Support but the few wey no want take Riba no get choice as pressure dey from their Family member and Landlord. This kind thing dey make am hard for plenty business as dem must pay extra money to get documents from our Government.

Another problem na the roads. With the yeye roads wey no see maintenance for years, plenty of dem, motor no fit pass as ditch plenty pass smooth road. This wahala plenty for Lagos as you go see plenty go slow especially for morning time. Plenty people by the time wey dem go reach office afternoon don reach as traffic don take halve of their day. Business men wey don schedule appoitment with their partners no fit make am to the office in time. Before you know am, their business partners don give up on dem. Even sometimes with the way our roads be, by the time you attend one meeting evening don come, plenty business men and women go come cancel the remaining meetings since he don dey too late. As men of the underworld no gree us waka again for night, na so you go see everybody dey rush home before night time come. This itself na another headache for business as people no fit do their work.

Another thing wey dey destroy business for our obodo na we ourselves. As plenty of us dey lazy and we no want work hard and we want make money. You go office go collect document the person wey dey in charge either he don go buka go wack or the person fit tell you say him dey for break make you no wahala am. People for our obodo no too dey take work serious at all. Plenty of us the only thing wey we sabi na to collect salary and get some Egunje, we no want sweat for anything. If you open business for our Obodo and you no dey there, the people go just run the thing to the ground for you. Sometimes I wonder which kind God creat us selves as plenty Nigerians dey lazy na only enjoyment we sabi. Plenty business don pack up as their employees don chop dem finish.

My people o, as all of us dey talk say he go better, I wonder when that go happen as our government and us no too care about the country. Plenty Leaders wey we get na only their own dem sabi. Make una take for example our National Assembly, na everybody for our obodo sabi say work no dey and we need business make dem come open business for our Obobo as plenty of our youths no gree find job. Which time una hear say make those yeye rouges pass bill wake go encourage Nigerians and Foreign investors come open business. We talk say country hard but our National Assembly dey busy dey buy Furniture and Motors for themselves and their concubines.

Haba National Assembly, na God go punish una and plenty of una na hell una dey go so as una no dey think about plenty of us wey dey struggle and no gree find food eat. Na pray we dey pray make God bring better Leader for our country. Na here I go stop my fellow Obodians, make una dey take am jeje o.

April.25. 2001

Death Traps Plenty For Lagos

How una dey my people, I hope say una dey manage? I beg una make una no vex with us na our writer vex comot our office say he no dey work again as our Oga catch am dey sleep for work when the man come visit from America.

My people una know say since Governor Tinubu enter office na him he don dey talk about say all the yeye road wey dey for Lagos him go repair dem. Na all of us know say the man dey try for Lagos. But I no think say I fit talk the same thing about our yeye Federal Government. All the Oil money wey dem talk say he dey for reserve last year I no sabi the thing wey dem dey take the money do? We no say since our Federal Government Leaders enter office I no think say dem lack for anything. No be this year we hear again say dem want buy our yeye good for nothing Legislators and Senators Peugeot cars. Which kind work wey our National Assembly do for wey be say we dey dash dem motor. He don reach two years wey our Leaders don enter office I no see thing wey I go fit point say Uncle Sege and his Potbelly comrades don achieve since dem buy dem way into our lives.

Make we take the road wey everybody dey call gateway to Nigeria since plenty neigbouring countries na there their citizens dey follow if dem want come our Obodo especially for the ones wey no get plane money. The road if una no remember na this yeye Badagry road. I no say the thing don improve small pass the time wey that yeye killer leader wey no go die well for him grave dey for power. The road na real death trap. No be two weeks ago na him our Oga ask me make I follow am go him house as we tay too long for office and another thing be say we dey go Abuja the next day. But since my parents wey dey heaven dey watch over me I come tell our Oga say we get Vigil for our Church. Na him my oga come ask him wife neiphew make he follow am go home. As the man dey drive him Honda from Maryland dey go Badagry road, as dem want reach Mile 12, dem come decide say make dem follow Festac as we all know say Mile 12 no be kind place wey you want dey pass around 11PM for night. As dem want branch like this na inside gutter dem find themselves for the place. As God dey with our Oga, two people dey waka along the road, na the people and my oga Neiphew-in-law carry the car comot gutter, if not na there my Oga and the Boy for sleep. My Oga come talk as God safe am for that place him come dey pray. As dem dey go for Badagry Road before dem reach Barracks, there is this overhead bridge wey people wey dey comot Trade Fair go follow na him dem see this big gutter wey dey for middle of the road, before the man press on him brakes the thing don dey too late. Na inside that big hole dem land, my Oga come find way wey he tay manouver comot the trap not before the two right tires don turn to crazy man's outfit. All the two tires for him right side don turn into shred and the car right body don turn to goat wey cow hit for head. All this thing happen around 11:30 for night. Luckily for dem, another Danfo dey around wey enter the same ditch minutes before our Oga. The man talk say he no fair for his life until that night as the whole place dey deserted. As reach the place wey Danfo dey na him come see Vulganizer wey dey work on that danfo. To cut the tory short na this Vulganizer dem follow go him shop. My Oga say if una see as he dey sweat, una go think say na inside Bar Beach water him just comot. Him talk say as dem dey waka go the man shop him don comot him shirt and remove Watch wey dey him hand. He come take hand dabaru him hair as he no want make the people wey dey the man shop know say him na Americana. As reach the place na so so men wey look like say dem don smoke Igbo (Hemp) na him see. The man even talk say him try hard make him no speak grammar as he no want make dem sabi his identity. Na so the man buy tires wey be say under normal circumstances he no go put am for him tire for almost N1500.00 from the Vulganizer. Una know say my Oga no enter him house for that day until 1:am for morning.

Na the same thing happen again to the man near 2nd Gate for Festac area as he dey avoid another ditch. Luckily for am na only one tire the thing affect.

My people una see how inaction of our Leader dey cause palava for ordinary citizen for our Obodo. If to say God no dey with the man he for don encounter Armed Robbers as dem plenty around that area. Na because God still dey with our Oga na him safe am those two nights. Our Government Leaders dey travel all over the world dey ask both Nigerians wey dey Obodo Oyinbo and Foreign Investors make dem come open business for our Obodo. Which fool go come risk him life like our Oga and go come put him money for this kind environment? Na pray we dey pray make God send us Leaders wey go care about our country pass dem pockets and egos. Na here I go stop my people, make una dey take am easy o.

March.09. 2001

Life Don Become Yeye For our Obodo

How una dey my people, I hope say una dey manage? Today matter no dey easy for me as I watch people dey waste their lives or other people's live because of money and power. Every time you read paper or watch television na people wey dem kill for road during fight or wey Armed Robber kill you go hear. No be yesterday I read am for paper say dem find plenty body for Ikotun aread for Lagos. Se una also hear about these yeye Agberos (Area Boys) wey dey fight for Oshodi Bus Stop because one group no want make the other group carry passengers? My source tell me say na about Two people die for the thing where several people dey injure. This thing wey I dey talk na everyday occurence for our obodo, life don become yeye so tay plenty people no value their lives again and people just dey drop like chicken. As the rush for wealth increase na so death of innocent people wey some of our rich people don use their body for money. He rare wey you go see dead body for our country wey dem never comot his/her private part. Plenty times you go see dead body for road wey be say for days, our local council no go carry am in time. Sometimes he dey reach months before City Council go carry the dead body. I remember last year when my Brother and his family come visit us for Nigeria and dem come talk say make I follow dem go Lagos Island go buy Tapes. When we come reach the area, I come tell my brother say make we park our car around Central Mosque since parking na palava for Lagos. Na him me, my brother and his wife come dey waka go Ebipenjo Lane. As we dey waka we notice say people wey dey come from opposite direction dey cover their noise with their hands, as we get close to the area na him we start dey smell the thing. My people if una see as the area dey smell, una go think say na inside Montuary wey NEPA don take him light for Months na him una dey. My brother and him family come dey ask say wetin be that smell, I come tell dem say he fit be gutter as all of us know say plenty gutter for Lagos Island na Shit full am. Small time na him we see one dead body wey flies don almost eat finish, my people if una see the faces of my brother and him family, the pikin dem come dey cry as dem cling to their Papa and Mama. To cut the story short, I hear say the body don dey there since one month wey people just dey pass am.

My poeple se una want tell me say the dead body no get family wey fit come carry am? Wetin our government people dey do wey be say dem allow the thing make he burst? As he be for Nigeria, our government go carry Dog body comot for road first before dem go carry dead body. The thing don become Baraku among our people wey be say dem no dey think about am twice. Humanbeign life don become yeye as our people dey kill themselves. This I dont care attitude dey for our Government too, small time if wahala happen for our Obodo, the first thing wey our Government go say to Mobile Police be say shoot to kill, dem no dey talk say make dem go there go arrest people wey cause the Wahala. Na this same attitude you go find in plenty African countries. Una no see the fight for Burundi, Sierra Leone, Liberia and others wey be say dem just dey hack person head like say dem be chicken. I no sabi how grown men go dey cut small pikin hands and legs because dem come from another tribe or country.

As I don dey tire, my advice be say he go good if all of us look within ourselves and see if we like what we see for Mirrow because plenty of us dey run after power, money which sometimes dey bring hatred among God, Allah own people. My fellow Obodians, the change to brotherly love must come from us first and then to our fellow neighbours and friends before we can see the end of this evil behaviours wey don become part of our daily lives.

March.08. 2001

National Assembly Want Chop Us Dry

How una dey my people, I hope say life dey treat una better? No be weeks ago I dey tell una say our President Uncle Sege dey lobby National Assembly make dem approve money for am make he take buy Presidential Jet. The new request wey our President dey make na about him Vice President Alhaji Atiku own. Na all of una hear say the man Plane crash for Portugal and na God save am and his entourage. If not, una for don dey hear say make wey elect new vice president. As the thing don dey become embarrassment for our President an his people dem.

My people, Uncle Sege think say him smart, as National Assembly reject bill for him own Jet he come send Vice President own. He think say if dem approve that one, him go come submit him own again and he go dey hard for the people to reject am. But as una know say all of our Politicians na Ogbologbo for Agbari. Dem know say our President want use wayo for dem, dem come tell am say he no good make he submit one bill for 8 Jets instead wey him dey submit one just for Vice President own. My fellow Obodians I hope una dey hear that? How this yeye people go tell us say dem know the country hard and dem dey do their best. But na everyday una go dey hear say the thing go take time but dem want take the money wey dem for use create work for us and come take am buy Jets for the President and Vice President, including the Senate President, House Speaker, Attorney General and some yeye positions.

Thank God our President and his advisors talk say that one na nonsense and dem no go do that. Una see my people, these our National Assembly no dey cut am small o. Even for America wey dem dey copy, the only two positions wey get private Jets na office of President and Vice President. Na the thing wey I dey talk be that about the Rogues wey we call Legislators. Una see the kind wayo wey dem want put for our face, dem know say if our President and Vice President want the thing bad dem go put the additional six for the thing. I no think say plenty of these people go die well. This thing don dey tire me my fellow Obodians. I no sabi how people go dey that bold and selfish wey be say dem think say the world dey circle around dem? Our country still dey bad like before and this yeye Democracy wey dem promise us na illusion. Majority of us no get work and plenty family no fit find food eat. Plenty pikin don die because their Papa and Mama no get chop money. With all these, our people dey talk about 8 Private Jets. This people no talk about Bicycle my people, dem dey talk about Luxury wey be say if dem take the money create business the thing go reduce our unemployment rate by 65%. Na this dem want take buy 8 planes for people wey no need am.

Una sabi how I feel about the previous bill for Presidential Jet, but this one I no know whether make I cry or laugh because the thing don pass me. Una no think say these our National Assembly dey kolo for head? I go let una be the Judge of that as I want go Toilet go do the natural thing. Make una remember say the thing wey una do for ground na him your family and pikin go come meet, make una dey do jeje o.

March.07. 2001

Arewa General Secreatary Dey Shoot From His Hips

How dey go dey go my people, I hope una dey manage? Yesterday I talk to una about the way some of our Politicians dey behave. Today the thing wey I go talk dey similar but my yabbist stick for today go be on Acting Secretary General of Arewa Consultative Forum (ACF).  The man name na Mallam Inuwa Abdul-Kadri. No be yesterday I read am for paper say the man talk say the bill wey our National Assembly want pass wey go make am impossible for past Military Head Of States collect entitlement as their civilian counterpart na nonsense. According to the thing wey I hear, dem talk say the General Secretary no support our constitution wey talk say he dey illegal for person to take power by first. As most of our past leaders take power by first, and no be say na we elect dem for the position. The Congress come talk say anybody wey become head of states by force no entitle to money and benefit wey regular person go collect if the person become our commander in chief. This go make people think twice before dem waylay our constitution.

Na because of this thing na him make the man talk say he no good make person no eat the fruit of his labour. Him talk say since he take special effort and power for person to become our President, he good make dey pay dem their entitlement as our past leaders.whether we elect dem or not. My question to the yeye Mallam be say which labour our past military Head of states do? You mean say he good make we reward people wey destroy our country? As the man dey talk, he be like say make we reward robbers wey come to our home and take over our house by first. And since the man no comot everything wey dey the house, he go good make dem get some benefit. Too. Na this kind thing make talk say I know say the man no serious, I hope say he go go give the people wey pay am for propaganda their money back. Because this him talk no be kind thing wey go expect from person wey get brain for head. How you go talk say make wey pay people wey cause plenty of the wahala wey we dey surfer now? I no blame the man since na glass house him dey live. If we look am well well the man na from Privilege Family, plenty of these surferness wey people like us dey face everyday no dey reach am. How the man no go talk so since na our Past military leaders give am the money wey he take build mansion wey him build for his village?

Una see my people, na this kind person dey spoil our obodo, small time una go hear say the man want become Minister for Nigeria. Una wonder why our country no improve? No be this kind person dey spoil am? And plenty of dem no dey think at all. As dem dey talk for computer class, garbage in garbage out If the kind person become Government Leader for our country our own don finish be that. Because the man dey talk like person wey no get gumption for head. Make una see us see trouble o, the man na Acting General Secretary for Arewa Consultative Forum. The group suppose to represent us wey be Northerners for Nigeria, wetin una think go happen as this man dey talk like say he no get anything upstairs? Arewa na Think Tank group, how the man take become Acting General Secretary I no sabi. One thing for sure wey I know, the man no get there because he get sense or he sabi book. I hope say plenty of these leaders dem go think well well before dem open their big mouth.

Na here I go stop my people, make una take am easy o.

March.06. 2001

Governor Akande Dey Practice Personal Politics

I hope say una dey manage my people, how life dey treat una? Wetin Again I dey hear about Osun State self? Every time wey you hear something about the state for Television, na so so fight you go dey hear. If the Governor no fight him Deputy, the Police get wahal with local Council. And if that no happen na people wey dey fight for Crown you go hear their palava for Radio. No be two weeks ago I hear say the Governor go Mecca for Hajj? But as him and his deputy no dey gree, the man come ask the state secreatary make he dey look after the state affairs for am. But as I hear dem talk say according to our Constitution, the only time wey the Governor fit delegate the task to another position or person be say him Deputy Governor no dey around. But as the Deputy Governor Omisore dey around, I no sabi why the governor go ask another person make he dey take care of the state affairs for am?

Before I continue make wey talk small about plenty of our people wey dey go Mecca self. As he be for Nigeria, plenty people wey dey go this hajj no dey go because dem believe the thing wey Prophet Mohammed talk about the thing wey Islam religion stand for self. The thing don become status for our Obodo. Plenty people like make dem call dem Alhaji or Alhaja. As my Afa for our Mosque tell me when I be small pikin, him talk say the Islam mean Peace, you must love your Neighbour as you brothers and respect dem too. And he talk say as for Mecca own, we go there go clean our sins, and he no good make we dey vex with people before we take on that journey.

So my people my question be say as the Governor na educated person and he sabi book well well but this him behaviour dey small before he reach o. Although na our elders dey talk say Age no reach wisdom and another thing be say because you go university no mean say you go get sense. But this Osun Palava own don dey too long. The wahala no let my poeple for Osun reap the fruit of our Democracy (although no be say people wey dey other states dey enjoy anything). Since wey we start this democracy self na him the governor and deputy don dey bump heads like say the Positions na their papa own. He dey okay if people no dey gree for Politics but only good Leaders and Politicians go separate that from their official duty. This thing wey the governor do, if to say I be senate leader for Osun State Assembly, I go look whether the thing cause make we comot the governor as he don personalize him position as the head of the state. If the governor no like him deputy na him sabi but he must still follow the constitution because if we start dey do the opposite na him be say we dey undermine the foundation of our Country be that. I no care if the governor dey do good job or not, this thing wey he do, na him be say the man dey childish and no be kind person wey we want dey lead our state or Obodo be that.

I hope say the people wey dey for Osun States go start dey look how dem go comot am or purnish am. And if the man survive the thing because he get some suporters for State Assembly, I hope say my people for Osun no allow am make he serve second term as the man no sabi politics. This him behaviour make me think say the man no too get comon sense just like plenty of our So call Leaders for Nigeria. Dem no too dey think well well before dem act, plenty of dem too dey emotional for Politics. If you no agree with dem, you don become their enemy be that. Na the same politics wey I think our Uncle Sege too dey practice. I hope say our Leaders for Osun and Yoruba go fit resolve this chicken fight wey our Governor for Osun state dey do with him Deputy as the thin don dey get out our hand

Na here I go stop my people, make una dey do jeje o.

March.02. 2001

Religious War Don Start Dey Divide Us

How dey go dey my fellow Obodians, I hope una dey manage? Se una hear say the Muslim for south dey ask our Government make dem make next Tuesday Public Holiday. And the one for North dey talk say na Monday dem want. Una see my people, na the thing wey democracy dey cause be that. I no understand why these two Regions no fit gree whether the Muslim Holiday go be Monday or Tuesday especially since both of dem dey worship the same God. This no be fight between Muslim and Christian but between two different areas of the Federation.The only thing wey I go say be say tribalism don enter the thing and na this yeye Sharia own cause am. Before all these fight over which day we go celebrate Muslim holiday no dey happen between our Brothers for North and South. Una remember the thing wey I talk before about Sharia palava. The thing wey our Muslim Brothers for North no realize be say plenty people wey be Muslim for South get relatives wey be Christian and dem go do anything to protect dem. And unlike Southerners, this kind thing no dey for North. I no think say you go fit see Muslim family wey get Christian relatives as he dey for South especially South West.

Another palava wey religion dey cause for our obodo na this Sharia thing for North. No be last week I hear say some Religion Fanatics for North go burn Army Truck wey dey carry Beer dey go Army Barracks for North. As the truck get problem for road na him these yeye boys wey no get work come look inside the thing dem come see beer wey dem load for the truck. Na from their dem comandeer the thing go Police station wey dey the area. I hear say the Police come tell dem say make dem leave the thing alone, the yeye youths come refuse. When the thing comot Police station, na so these youths put petrol for the thing and burn am. No too long na him I hear say the Army come hear about the thing and come dey rush go there. But before dem commot barrack na him I hear say their Oga patapata receive telephone from their Area command say make him stop dem from going to the place. If to say the Commander no do this, no be the thing wey we go dey talk be this. The whole area for don dabaru and plenty people for die for mistakes of some hoodlum Youths. As it be so, the thing don dey divide us small, Soldier for one side, and the civilian for the other side. This kind thing fit cause another coup or war for our Obodo.

The question wey I want ask all these Politicians wey dey introduce yeye law for their own selfish reasons be say wetin dem go do to prevent this kind thing in the future? Because I believe say one day go be one day wey the instructions from the Oga for Barracks go dey too late and and the Army go descend on those thugs wey call themselves Sharia Vigilante. Na beg I dey bey our Politcians and Government be say make dem make sure say those fanatics wey dey forment trouble comot for street because I no think say other people or Military Organization go take the thing lightly from dem if the thing happen again. I guess say our Pro Sharia governors no think about this thing before dem start dey introduce law wey go divide us instead of make the thing unite the whole country. As the wahala dey brew for background, I no go surprise if our country dabaru especially if our Leaders no find solution for the thing now. My opinion be say this Sharia thing na distraction for our Society and I no think say we need am now. But as I be nobody, this na just my opinion and I know say plenty of una no go agree with me and I respect that.

Na here I go stop my people, I hope say una don dey plan for the coming Holiday. Make una dey take am easy o my fellow Obodians.

February.28. 2001

Why All This Fuss for Rating Self?

How una dey my people, I hope una dey enjoy. Wetin dey wrong with our Leaders self? No be yesterday my source tell me say our Leaders talk say the thing wey International Transparency or wetin be their name talk about our Country na lie. Dem talk say the data wey those people use no dey complete. Transparency International na the people wey talk say our Country na the Leader for Corruption. Last week na him I hear say our Leaders dem, from Uncle Sege to him Ministers and all the important people wey dey for our Obodo talk say the thing na nonsense. Dem talk say if to say the thing dey complete dem go for find out say our Obodo no be the worst offender for Corruption.

My people una see our Leaders dem, which person wey dey for our Obodo wey no know say corruption dey grow wings for our Body? The thing wey I no sabi be say whether Transparency International say na Nigeria be last or first, me I know get palava with dem because even if the people talk say na our country be the last for the thing, na all of us know say we dey breathe and eat bribe for Nigeria. Which kind cry wey dem dey cry when we know say na one cancer wey go take miracle from Above for the thing to dissapear among our people? Which contract wey you want get for Nigeria wey you no go give the people wey dey in-charge chop money for Family Support? Our President fit talk Anti- graft from here to Kutuweji, the thing dey go on for our obodo pase pase. Even as I dey talk to una, some money dey exchange hand as we dey talk. All these our leaders dem wey dey shout say Transparency International rating na lie, na rouges including our President. The man no fit tell me say him family members and friends no benefit from the thing since him come to power. All these Ajala travel wey him wife and advisors dey do, who dey pay for the thing? Dem want tell me all these places wey dem dey go na for only official business? That 65 Karat Gold and Diamond wrist watch wey cost arm and leg from where dem buy am, and who dey pay for the thing? That one na fringe benefit? I guess say that one na Official Souvenir as my brother for America dey talk.

Make we no fool ourselves, the answer to the thing no be whether na our country come first for Corruption or last, the answer be say how we go take comot the thing for our Obodo because the thing don ruin our country finish? Plenty Palava wey we dey face today for Nigeria na corruption dey cause am. All this hilahilo wey our Leaders dey talk na waste of time, make dem stop dey give contract to person wey dem sabi or wey give dem money for back. And all these wayo style wey be say their pikin wey dey go school for Obodo Oyinbo go collect School Fee money from Company Chairman wey dem give Contract. If dem put the kind energy wey dem dey put for Transparency International talk, our country for don better. I know say Uncle Sege dey try him best but him and the rest of dem must do more my people. If all of us na flies wey fit dey follow these our Leaders dem around, we go know say plenty of dem their money don increase jaburata since time wey dem become Senator or Legislator. Wetin dem want tell us now, we know say plenty of dem dey build mansions for Obodo Oyinbo as we  talk.

My fellow Obodians, make we no fool ourselves even if our Yeye Leaders want turn us to "help me hold my Cloth people" This bribery thing dey for the water wey we dey drink, na only God fit help us. Na here I go stop my people, I go dey talk to una tomorrow as our Lord, Allah, Olorun, Chineke, Osanobua and Jah don talk am.

February.26. 2001

African Countries Don Become Big Gun Markets

I hope say una enjoy una weekend my people? How dey go dey go? I beg make ask una something, why be say for Africa we no dey make guns but all those fancy Weapons wey Oyinbo people dey make plenty for our Leaders hand? Which enemey wey we get wey be say our Leaders na so so weapon dem dey invest money instead make dem put the money where common people like us go fit enjoy am. As he be so, plenty people wey we call our Leaders don Kolo for head, if una go all these Oyinbo people wey dey make these weapons, their country dem dey kooleh, dem get peace. But make una look at our African continent, if you no hear about Famine, you go hear about tribes wey dey hack their fellow country men for head. Sometimes, na one country go dey support rebels for another country because the person wey be President no too like the Leader wey dey neibhouring country.

Plenty thing wey I no thing say go ever happen for our continent na him I dey see for television everyday. Which kind luck wey we get for Africa wey be say na us get resources pass but na inside poverty we dey live. Make I use Angloa for example, I no thing say since the day wey I sabi the thing wey dem dey call money, I go fit talk say this country get peace. Dem don dey fight this yeye war for so long I no even think say the thing dey for OAU agenda again. Make una see o my fellow Africans, God bless these country with plenty Oil and Diamond but war no allow dem enjoy am because one yeye bastard no like the other bastard. I dey sorry say I use this word. But the thing don tire me my people, evertime wey dem show Angola for Television na so so small pikin wey no get legs and arms na him you go dey see for the place. The thugs wey dey cause this war their pikin dey for Obodo Oyinbo dey enjoy blood money. The thing wey I no understand be say our yeye people wey call themselves African Leaders go dey go OAU meeting. I never see one good thing wey come out of that toothless organization. Na so so men with pot belle you go dey see for Television dey talk say dem represent African people. I no go lie to una, I never see one African wey I go talk say true true the man represent our continent.. The war wey dey happen for Angola don become routine wey be say people no dey talk about am again. But when una see all these innocent pikin wey be say their future dey hopeless, plenty of dem no go ever see their parent again as our selfish Leaders don ruin their future for dem. The money wey dem for take improve their people welfare, dem don take am buy weapons for America, Russia and China finish.

I beg my people, make our Leaders dem for Africa thank their luck say I no get money. Because if to say God bless me with plenty money, plenty of these our so call Leaders for African go don go join their ancestors for yonder. I for don use the money create soldier wey be say any Leaders wey no do right by our people, him too no go dey around to implement his yeye plan. All these people wey una dey see dey wear Agbada, Kaftan and French Suits no go dey around for our continent. I don tire dey hear make people dey talk say Africa na backward society because of these inept Men wey call themselves our Leaders. We don turn the whole continent into Gun Market for our Oyinbo Brethrens. Which time una hear say France dey fight Italy with weapons, or Sweden and Spain dey fight and na big gun dem take settle am? Some people go blame am on Oyinbo people. Dem go talk say na dem cause am because dem dey look for market for their products. If to say na so the thing be, una want tell me say our Leaders dem dey so stupid wey be say NO no dey for their dictionary? Make una look the whole West Africa, half of the countries na so so war dem dey fight among themselves. Plenty of these people wey dey cause these wahala, I no think say dem lose one single family member for the war. Na the fools and innocent people dey die like cow for Lagos Abattoir. Guinea, Liberia, Sierra Leone, Ivory Coast all these countries no get peace. If una go both Central Africa and East Africa regions, na the same thing dey happen. Uganda, Congo Republic, Burundi, Rwanda, Somalia, Eritrea, and so on, all of the yeye Leaders don take their yeye Ego spoil better thing for the rest of us. And people dey wonder why Oyinbo people no dey respect us. How dem go respect us when our home no dey settle? The only thing wey we sabi for Africa na to receive Aid. Which time wey una hear say bad thing happen for Obodo Oyinbo, and na Africa country go help dem?

Na every year we dey hear wey our Leaders dem go dey travel like Globetrotters dey ask for Debt forgiveness. The question wey we for ask dem be say the debt wey dem say our countries owe, wetin dem take am do? Which time wey dem borrow the money self? He go good make plenty of us start dem mobilize ourselves wey be say which ever goverment borrow money and when Oyinbo people come dey ask for their money back, na the people wey dey for that government we go ask make dem hold responsible. I go also talk say he go good make we start dey ask the defaulters make dem start dey vomit the thing wey dem chop. Because I no think say he dey right and fair make dem ask the whole country dey pay the thing wey we no chop. Plenty of us wey dey live for Africa no dey smell the money wey dem give am to Leaders not to talk of say make we spend am. Na the finger wey cause palava na him King must cut.

As I want close this my talk, na God I dey take beg generations wey dey come after us say, if our continent go better wey people outside the continent go respect us, make dem make sure say the path wey our Rogue Leaders dem follow, make dem comot am for History book because no be kind thing wey dem go dey study. Until plenty of these our so call leaders comot from this Universe, I no think African people go ever see peace.

February.23. 2001

Be Careful Who Una Dey Send Errand My People

How una dey my people, I hope say una dey my manage? Making una no worry, he go soon better. I no know about una but this thing wey I want talk today don dey too much for me. As I know say plenty of us wey dey live for Nigeria, we get one or two relatives wey dey live for Obodo Oyinbo. As all of us know say he no dey easy for our people wey dey live for those places. But the thing wey dey pain me pass be say some of those guys wey dey there na real 419 paraku. He no means say because dem dey Obodo Oyinbo dem no dey use Agbari. I go even talk say the local 419 wey we get for Nigeria still dey come behind those Overseas 419 dem. Those away own na real Chiefs for Jibiti. As I know say plenty of una go dey wonder wetin I dey talk. If you get relatives wey dey Obodo Oyinbo, the chance say this thing no happen to you dey small. He even small pass ant (Era) for our Obodo.

How many una wey send food stuff and goods through some of our people wey dey go Oyinbo country and you come hear story say dem seize the thing for Airport? No be say dem no dey seize the thing true true, but I hear say some people go just wack the thing for Oyinbo Country. Make we talk say you be tailor wey sabi sow cloth well well. As your relatives, friends or your relatives friends dey go back Obodo Oyinbo, you come ask am if fit help you sell the thing for the place or give am to your sister. Some people no go take am from you, and I no blame dem as some of us go just pretend like say the thing na by thin air he go take reach Obodo Oyinbo and dem no go pay kobo for the extra luggage wey we give dem. And some people because of shame, dem go take am from you but na for their house for Nigeria dem go leave am come tell their people make dem tell you say dem no allow am carry am enter. And sometimes na the thing wey happen be that. At other times the things go reach Oyinbo Shore but as the man no have time for your yeye cloth, he go just give am to him children and Akata friends say na the things wey bring dem from Nigeria be that. The man go come dey tell you tory say Oyinbo Custom seize from him hand. And few times, our people go sell the thing or if dem get their shop for Obodo Oyinbo, dem go add am to am. And dem go come give small tory why dem no go pay you money. As for food stuff own, the person go just tell him family make dem no worry about extra gari as he don banker for the one wey you tell am make he help give your brother, or relatives for Obodo Oyinbo.

Plenty of these thing no too dey invlove plenty money as people like me no too get money or property wey I go send relatives for Oyinbo Country. The one wey big pass na the thing wey dem dey do fellow countrymen for Overseas wey ask make dem help dem give money to their relaives for Nigeria. Plenty of our people deliver the message. But we also have plenty Ole wey be say na the thing wey dem dey take survive be that. As dem want go home, dem go rally round Nigerians say dem dey go home or say if dem get message for their family. Dem go even tell you say dem no dey carry load o but if you get money wey you want give your Papa or Mama, dem go help you deliver that one. True true, the money go enter here but the problem be say he no go be for your family hand. The man go just take the money and add am to the money wey he dey take build mansion for Lekki. Or he fit take am open Boutique for one yeye Asewo wey he call girlfriend. He go come send message to you say Custom seize the money from am for Murtala. Some of dem go even tell you say dem put the money for Carry on bag wey dem dey take enter plane. But as dem want enter plane na him dey come tell dem say the plane full inside, so dem no fit carry am inside. The next time wey dem see the bag na for Nigeria, and all the money wey dey inside, dem don thief am. Dem go come dey curse Baggage people wey no sabi anything. The real Ogbologbo for the thing, go even plan with men of underworld make dem come attack dem for road. This go come make am real for our Police eyes. All these because of some few Marks and Pounds wey dem want take impress their family or Village say dem don make am for Obodo Oyinbo.

This thing wey I dey tell una don ruin plenty people wey be say na from bank dem borrow the money as dem one take am build house for Nigeria. The money dem no see am, and dem go still pay money back to Banks wey loan dem money if not na their House for America dem to take. My advice to people be say before you ask person make he help you give money or food to your relatives, make you make sure say na person wey you know say he no go use 419 for you. Na here I go stop my people, make una dey do jeje o.

February.21. 2001

How Some Of Our Judges Reach Their Position Self?

How una dey my people, I hope una dey kanmpe. Today the thing wey I want talk dey important he fit affect whether person go live or not. No be a month ago I hear for Paper say our Government comot one Judge because the man no sabi him work. As the boy wey read the paper for me talk say the Judge collect money for back. Dem talk am say there is this murder case wey one person file against one Rich man. As he dey for our constitution say any court case wey involve murder, Court no fit grant the accuse bail until dem sabi say no be him do am. Na him dem carry one influential man go court for murder, as the man lawyer ask for bail the judge come deny am. The plaintiff talk say na for him face dem put handcuff for the accused hands and dem come push am inside Black Maria take am go Prison. To cut the tory short sa a, na him the Judge award money and properties to plaintiff. Small time the man come talk say make him go check the building wey dem just award am, as reach the place na the accused he see for door wey dey go out and him think say the man dey for Kirikiri. The man say him think na ghost he see but the man come tell am no be so. He come found out say na the Judge release am.

This second one I no think say he go fit happen for our Obodo but the thing sele. The people wey we think say dem go protect us na dem be Devil for Twins back. This tory no dey new o my people, una hear about one Nurse wey her Boss do test for am without her consent because she talk say she get boil wey no heal for body. As the test come back, the Doctor come found out say the woman get HIV. Instead make the yeye boss tell the nurse, he come send am and her husband go LUTH for Idi Araba. Na there the poor woman come found out say na AIDS test her boss do for am. When the woman come go back work, na him her boss tell am say make she go leave. From there dem come sack am for work. Na him the woman come carry her boss go Court because of the yeye thing wey the man do to am. As I hear, dem talk say he dey against our law make person do test for you if no sabi say na the thing wey dem dey do to you be that. The day wey dem go court na him the Defendant lawyer come ask the court make dem no allow the woman for Court because of AIDS. Una sabi say this yeye Judge wey no sabi law come agree with defendant. My people na wa o, how person go get case for court and no be say he die and dem no go allow make she enter court. I no go surprise if the judge no dey Kolo for head.

Na the thing wey make talk say I no sabi how plenty of these yeye lawyers dey become Judges self? Where he dey for law wey be say person no fit enter our court because he get disease for body? Which University give these woman Judge law degree self? I no say me no sabi book well, but I no fit make that kind decision? Which medical Doctor tell the Judge say if she allow the woman for court, na everybody go get HIV for the place. If to say na so the thing be, all for us wey dey live for our Obodo go don die long time ago. As the thing be, you no fit sabi person wey get the thing unless the thing don enter their body well well. I know say no person want die, but the Judge no get mercy at all at all, how the yeye woman go feel if to say na Head Court tell am say she no go fit sit for Bench for Court because she get disease for body? Na wa for these our Oppressors self wey be say small power wey dem get na to finish Mekunnu like me na him dem sabi. As the woman don take her case go Court of Appeal, I hope say the Judge there go reverse the yeye ruling. This na lesson to all of us say, he no dey good make we dey hire people wey no sabi work because na these kind thing dem dey cause for the rest of us.

Na here I go stop my people, make una dey thing before una do am.

February.20. 2001

My House No go Be House Of Gossip

How dey go dey go my people, I hope say everything dey go koole? Today na about our people wey don turn house of Worship to house of Gossip. The thing remind me for the tory wey I read for Bible when Jesus Christ our Saviour visit Synagogue for Jerusalem, as him enter the palce na him see Money changer and gambler dey gbaladun for the place with their women. Na him come talk say "my house shall be House of Prayer, but una don turn am to house Fornication and Gambling". He come drive all the people comot. But today own different small, na about our people wey be say instead make dem go church go worship our Almighty God, na gosip dem go sow for the place. The thing plenty among our women dem wey be say anything wey happen for Church, the Amebo among dem go don carry am among their friends and neigbhours. No be last week Sunday na him this my Friend wey dey live for Onitsha come visit him family for Lagos. That day the Bobo come talk say as him dey among friends and families he go take the opportunity go do Offering for Celestial Church wey dey our area. True true my friend and him wife don reach Twenty years wey dem marry for Lagos before dem move back East for work. God no too answer their prayer for pikin own until Ten years ago. Plenty people wey dey live for our area for Ajegunle dem no sabi say the man and his wife don born pikin as God answer their prayers. This time around as God go bless dem better, na double dosage he take stuff the wife belle. As I dey talk before, since the time wey the wife go born pikin don dey close, the woman come talk say she no go fit follow her husband go Church. To cut the tory short sha, as we reach Church come see as Rabbit Ears people come dey tune their Antennae on. Una know say sometime our people no too dey mind their own.We never reach thirty minutes for the place na him the CGF (Church Gossiper Fellowship) come send their Junior member make she come take style ask one of the people wey follow us come. As God go catch dem, the person wey dem send no too sabi our entourage. She come go ask the wife's best friend say wetin my Friend dem dey do here as dem hear say the man and his wife don scatter. She even talk say she hear say the man don follow a Ghanian woman when his first wife no fit born pikin. Na him my friend wife friend come as am where she tay hear that kind tory? The friend come raise her voice say no be prayer una say una come pray for here why be say na so so gossip na him una go dey run after like Touts wey dey run after Molue. She come tell the woman say by the way, the man and my friend get one pikin already and dem dey expect another twin soon. If to say the woman time no dey close, una for see am with her belle. The boy wey una see near the man, na their first pikin be that.

Se una see my people, na the thing wey make me no dey go church be that. I know say plenty of una go talk say person no dey go church because of other people. I know say you go church go worship and pray to our Almighty God but sometimes, the yeye thing wey these people dey do for church no dey allow Angels enter Church and no dey allow God accept prayer as the people don turn the place to Gossip den. If una be Angel which of una go go inside that kind church before dem turn their gossip on una? Small time dem go tell Angel say na him be the smallest Angel for God Kingdom as if to say na dem and our Almighty God dey make the decision for Heaven. This thing wey we dey take lightly don ruin plenty life for our Obodo. I even hear say the thing wohwoh for Obodo Oyinbo as our people dem don turn plenty of their church to Towncrier. My brother talk say him no dey go Nigerian Church again as the people turn against his family one day. Him talk say right infront of his wife, the people dey take style ask am who his pikin dem resemle as all his pikin dem na Oyinbo pepe and our whole family black pass Charcoal. Na true say dem no light for our family but how these people sabi so when no be say dem sabi our family finish? Na the kind nonsense wey our people dey do for church be that o. Wetin dem want make my husband do, leave him wife? Make una no pity some people if una see say the church wey dem dey go no gree dem because dem no dey honest with God? Instead make dem go there go worship and pray, na the thing wey no concern dem na him dem go place for ground dey sell for church. And dem go dey wonder why God no answer their prayer.

My people na here I go stop o, I hope say plenty of us if this thing remind us about ourselves or our friends, he go good if we stop the yeye nonsense before the thing consume us finish.

February.19. 2001

Why be say so many of our People dey bleach?

How una dey my people, na me again oo. I hope say una dey enjoy our pretty wheather. I beg make I ask una, why be say plenty of our people dey bleach. As be so now, even men dey do am bigtime, I dey talk about Godogodo Men. I no know the thing wey dey happen because he be like say the world want end. Ogini, kashiko, kilode? My question to una be say, where dem find this kind jabajantis from. I think say this nonsense go end for our shore but our people take am to Oyinbo country, I guess na our own Export be that. Wetin dey make people do am, I no know. Me I go make our interpretation or analysis. The people wey dey do am, I think say dem get the thing wey Oyinbo dey call "low esteem" because to me be say, if your like yourself very much, and you like de way God made you, why you won turn your skin to Oyinbo own. I no know think say the people know de thing wey go happen to dem after dem don do am for a long time. You go see some of dem, you no go even want make dem come near you because the way wey dem dey smell. He go be like say make person vomit. Agaga if you enter Molue with some of dem, and the bus come full, he go be like say you dey inside Oyingbo Water where dem dey dump shit. And some of dem think say dem better pass person. If you con see the one wey get tribal marks, I beg my sister, him face go be like Oyinbo road with plenty lanes. Some time I dey wonder if some of dem get mirror for house. He dey one man wey I know for our village, the man dey dark pass the pot wey my grandmother dey take cook Tuwo for Sokoto. The next time wey I see the man, he be like Michael Jackson wey dey poor. I think say na Iwin (devil) na him I see. And the man think say him be Mr Universe. I beg my brother and sister, if you dey do am go stop am because the end no dey good. I know plenty old people wey do this thing for a long time, now if you see dem, dem body be like person wey fire burn. The thing no look good atall atall. Another thing be say, doctor say de thing na health hazzard, he no good for our skin. A person wey truly like you no go care whether you be like skin or dark skin. Na the thing wey dey inside na him want. I know say there plenty people wey be say if dem see o say you bleach, de first thing wey go enter their korokoro head be say you be ashewo and Alatika, and dem no go respect you. I beg na here me go stop, make una dey do jeje oo, I go see una tomorrow because my God don say so.

February.16. 2001

Una Don Hear This?: Amala, Gari and Lafu Better For our Brain..

I don hear another one my people, dem talk say this one na realy eye opener for our people wey go do anything to leave our Obodo. Na inside Journal of American Medical Association dem talk am say the research wey dem do between our Yoruba people for Ibadan and Black Americans wey dey live for Indiana for America. Dem talk say during reseach wey dem do for Five years, dem come found out say Africans wey dey leave for Africa get better brain pass our Black American Brethren because of the thing wey we dey wack for Nigeria. I guess say all these Gari, Amala and Lafun wey we dey chop with Ewedu no dey bad for our body. Na wa o my people, before I remember when I be small pikin wey people go dey talk say Gari no good for Eyes. I know say plenty people including me go take bad eyes pass brain wey no dey work. Make una come see o, plenty people for Africa especially our people for Nigeria go dey complain say American food better pass our own. Dem talk say people wey dey live for America dey get fine body pass us . But me I dey among people wey believe say the thing no be so. The thing be say if to say our Leaders for Nigeria no dey thief our Oil money wey dem for take improve our lives, all these Kwashiokor faces wey dey waka for our road like Zombies no go too dey happen. But me I thank God say at least dem talk better thing about our food. As my brother wey dey for America dey say, him talk say plenty people especially Black Americans no want come Africa because every time wey dem show us for Television na people wey hungry don kill and small pikin wey flies dey follow na him dem dey see. Because of that plenty of dem no want hear Africa affair for ear.

As dem talk say the kind thing wey we dey chop for Nigeria na him make us get better Brain pass our counterparts for Obodo America, I guess say plenty of our People wey dey there go start dey force their pikin make dem dey wack Eba, Ogbono, Tuwo and Crayfish, if dem no want make dem become Vegetable wey dem reach 60. All these our Tokunbos dem wey be say na so so Burgers and Fries dem want wack go soon dey drink Gari and Ogi everyday. But the question wey I want ask the people wey do this reseach be say which time wey dem go do one for our Elders for Nigeria wey be say small time as soon as dem old small, you go see dem dey put bandage for legs when no be say dem get wound for body? I guess say that one no need foreign reseach as our expert for Nigeria- me Pa Omugo know say na the waka wey we dey wakaabout na him cause am. Una know say for Obodo Oyinbo dem no too dey waka as plenty people get motor. And for here, plenty of our Elders sabi all these shotcuts wey be say dem go reach their destination before person with motor reach the place. Since this one na eyes problem as motor dey get old if dem drive am too much na thing wey dey happen to Legs wey don reach Kontagora, Enugu and Ibadan come back .

My fellow Obodians, una see say our country no dey bad after all, if una hear person wey dey pack commot go Obodo America, make una tell am the thing wey Americans talk say our brain for Nigeria dey better pass our counterparts for Obodo America. And he go good make he let that brain work for here instead wey him go turn an to use brain for Ameria. Na here I go stop, make una enjoy una weekend as I go try for my own.

February.15. 2001

Our Governors for South East Want Cause Katakata

How una dey my people, I hope say una dey manage? As I talk yesterday,  I beg make una no vex with me o. All the jagbanjatis wey I dey do before, I promise say the thing no go happen again. Na here I go rest, make I no take my own disturbunaas we begin our next comment.

Wetin dey wrong with our Governors for South East wey be say sometimes you go think their brain na their yansh he dey. No be two weeks ago I read am say dem do meeting with some leaders dem. After meeting, na him dem come announce say dem go make sure say the next president for our country go be from our area. No be say no person for  our tribe wey no sabi govern our country but the thing be say I no think say 2003 be the right time. Ever since Uncle Sege from South West don become President na him some of our Leaders for North don dey complain say the man dey marginalize dem. Dem come talk say come 2003, dem no go support our current President. When the thing no come sell for  public na him dem come shift gear say no be say dem want make the next President come from North, the thin be say dem no want the current President win again. Na from there dem come start another Propaganda as Politicians dey talk am.

Dem talk say dem go support Presidential Candidate from South East. Na all of us know say   relationship between our Leaders for South East and South West don improve and dem don dey gree well well ever since this our Democracy start. As I see am, some of our Leaders for North don start another wayo wey dem go take dabaru the alliance. Na the reason we dey see plenty of these Rogue Leaders dey go South East. Dem dey pretend like say dem be our Leaders for South East friends. As the thing don dey enter our yeye South East Governors heads, na him make dem talk say dem go do anything under their power wey go make our next President come from the area. The question wey I want ask our Governors for South East be say how many of these their new found Friends dey there wey dem dey kill plenty of our people for Kaduna during Sharia riot?

The thing wey I go talk be say make dem think am well well before dem allow these opputunists come between dem and their counterparts for South West. Wetin go happen if the next president come come from South East and the same thing wey these same Agirasha Politicians dey complain about come happen, who go come support our Politicians for South East? Una know say plenty of our South West Leaders no go forget as we all sabi say Yoruba people too no dey forgive and forget. As dem dey talk for Yoruba land, the Cane wey dem take beat the first Wife still dey for Roof and never dry, and na the same one dem go take beat the new wife if she no behave herself. He go good if our South East Governors think before dem leap. He go good make dem behave like person wey get backbone. Make dem no allow this divide and conquer wey some Politicians want use for dem take place. No be say I dey support Uncle Sege, but if the man go lose him post, he go good if him do am without their help. People no go talk say because the man no fit govern our country na him make am lose the election, dem go talk say na because plenty of our Governors turn our people against am.

If our Governors for South East let these Barawo Politicians come between dem and their counterparts for West, I no think say either region go smell the Presidency again as these Opputunists don dey dey lay the groundwork. Na the thing wey happen for 40 years wey be say plenty of our past President na from our North. And the thing wey pain me most be say, plenty of my people for North no benefit for  the thing.  Na all of us sabi say the Asewo Policians dem na their own pockets and family dem sabi. As wiseman for my village dey talk. one word don dey enough for the wise.

Na here I go stop, make una take am easy o.

February.12. 2001

Who Want Become The Next Pa 'Mugo?

How una dey my people, I hope una enjoy una weekend? As our Company dey expand, some benefits wey our Visitors and Viewers dey enjoy don dey dey difficult for us to provide. We know say plenty of una dey enjoy Pa 'Mugo (motor mouth man) as he sabi talk about our People, our habits, cultures, norms, religions, everything wey dey wrong and good about our Obodo. The man also sabi talk Politics and the people in Government especially the rogues wey we call our Leaders, and last not the least, our beloved Country Nigeria, the place wey love to hate. This na country wey be say people all over the world dey call Ogbologbo. Plenty of us wey dey live for the place na Trouble, I never see country wey be say people wey no get money go dey Sakara person wey get and him go dey do like say na him Papa get the whole country. But make I no get carry away.

As I dey talk before, with this thing in mind na him make Management talk say make we ask some of our People if dem want go dey write the thing since work don dey dey too much for Pa Omugo. In the meatime, Pa Mugo go continue dey talk him talk but we hope say before this month finish we go find a taker. I beg my people, this vacancy no dey pay money now, we hope say as the thing continue dey grow small small , the Management and the person go fit sit down and talk about how much Kobo dem go dey give am. We ask everybody including our Omoges dem make dem apply as the thing no mean say because the name na Man own make our Women dem no apply. As people for Obodo Oyinbo dey talk am, we no dey discriminate at all. Whether you be "short Pebu for Surulere or Dongo enter wrong house for Idi Araba", as long as you sabi Pidgin English we go take you. Please if you know say you and Queen Elizabeth for England go the same school please make you just sit down for your house and dey enjoy your Shakespeare because we no want person we go dey take grammar kill us for here as plenty of us na standard Six we reach for School. As for Mr/Mrs Ogogoro, if you know say your mouth dey marry to your Beer, I beg make you no apply as we no want person wey be say when we ask am make he send him work, na Mr Gulder go dey comot for him computer . We want person wey go dey reliable, and by the way, we encourage our fellow citizens around the world make dem apply as the thing wey dem dey call INTERNET don make communication better for all of us, as person wey dey Ajegunle and Victoria Island fit dey yab from their own Parlors as long as our Chief NEPA no take light.Our people wey no sabi Muritala Airport go fit put himself inside Computer wey dey him brother house for Germany. Na wa o for Oyinbo, dem go soon dey make person parts, I no mean the one for Jankara Market o.

Na here I go stop my people, We go dey talk tomorrow as our God, Allah, Olorun, Chineke and Osanobua don tell us yesterday.

February.09. 2001

Our City Council Don Become Signboard Chaser

How una dey my people, I beg say una no hear from me. Na our systems for Office dey do yanga, I hope say una go forgive us. My people wetin dey wrong with our Local government wey be say anytime dem see Business Sign board for road or on top of building dem go think say na automatic money be that for dem. No be last year we sit down for office na him dem come bring paper say our company owe dem money. When our Oga see the paper him think say na people dey play with am. Dem tell am say na the thing wey he owe our Local Government be that. I know say plenty of una go talk say why we no want pay tax if we dey run business for Lagos. No be say we no want pay dem but the thing be say dem tell my oga say the thing na from 1998 through 2000. As una know no be say our Oga no want pay the money but the thing be say that year wey dem talk our Oga still dey for America. Na around last year June na him our Oga register the company with our Government. As we dey argue with dem for office na him we come ask dem say how dem tay know say we don open for business? Na him dem come tell us say na the sign wey we put on top of our Office na the thing wey dem see be that. Na him our Oga come ask dem say since when dem don dey see the sign, dem come talk say na since 1998. My people na wa for our govenment o, the way I see the people he be like say no be our government send dem. Una know as our people be, if fit be say our government no send dem, dem go talk say make dem go use gbaju e for this new company. But the problem be say our Oga na real Padi, him too no dey part with him money. Another thing be say the man sabi people for our Government. But the thing wey I like about the man be say him no too dey go to dem because him no believe that kind thing. Una know say the man tell dem say him no go pay as he never make money for the thing. And this na true, the man since wey he start business, na from his personal accout he dey take dey pay us. But make una no talk say na me tell una this o, as we know say the man get office for America, if he be say na that one he dey take pay us money but as una know these Yankee guys dem get small wayo for body, una no fit sabi with dem. As dem sense say our Oga mean business, dem come comot our office. Una sabi say last week, I see these yeye people dey trouble some company wey dem just open around our area. My people wetin this world dey turn to? If to say na so our government dey collect money, no wonder plenty company no dey pay dem money. How dem go take run our city government if the people wey dey in charge no sabi which time person open business? Which person dey in charge of Lagos Island local government self wey be say dem no sabi which company open for business for their area and which time dem

open am. Me I dey think say na our government dey give person permit wey go allow am make operating the thing for the area. Na the thing wey I dey talk be that about this yeye disease wey we get for our Obodo. Plenty people wey get business for our Obodo no dey reach the Ministry before dem go get business license, the reason be say the yeye people wey dey in charge for the thing don chop the money finish. How right hand go sabi wetin left hand dey do when plenty of these offices na their own dem sabi? If to say the people wey dem dey send make dem go collect money dey work well with the people wey dey give permit, dem for don know say our company na last year dem open am for Nigeria no be three years ago wey dem talk. Even self, which kind nonsense I dey talk for our obodo, how many of our Ministry dey keep proper record for office self? Na the thing wey I like for company wey get computer for office be that, if to say our government don allocate some money for computer, all this yeye thing go don reduce small. As for people wey one open Business for our Obodo, my advice to dem be say make dem make sure say dem no put Signboard for their area, if not, na these yeye Signboard watchers go dey knock for their door everyday. As for our palava with these yeye people, our Oga don receive letter say if we no pay dem their money, dem go carry us go court. My people make una no surprise if una see me for Television dey defend our Company o. Na here I go stop my people, I beg if una get tory wey una want make I talk, make una send me email.

February.06. 2001

Nigeria Here We come ...

How una dey my people, I hope una dey kampe? I don here another one o, I hear say plenty of our people wey dey Obodo Oyinbo want pack come home. Dem talk say since our country don dey better, dem want come home come stay. Which country dem dey refer to my fellow Obodians, I no think say na this our Obodo Nigeria? Na everybody wey dey home sabi say country hard. Which person dey tell this story self? I no think say the person na this our country he dey live. How person go talk say the country don better when plenty of us no fit find work and people no fit find food eat, the Light wey our Government promise us since dem begin this their Democracy dey get worst. Na everyday we dey hear say Men of the Underworld dey attack people for house. No be say I no want make dem come home, but as I promise people say I no go sugar coat anything especially if the thing concern our people. Plenty of these our Away people don tay wey dem no get water for house. Plenty of dem for Obodo Oyinbo no dey go through the yeye things wey our Government dey put us through. How many of us get phone where we dey live, and how many family fit afford motor? I hear say plenty Nigerian Families dey drive plenty motor for Obodo country, when some towns for Nigeria no fit boast of one family wey get car for their area. As for crime own, no be say he no dey for Oversea countries, but the thing no too dey plenty. Plenty of these our people don tay wey dem dey live for Oyinbo country and some of dem, their pikin never sleep for house wey light no dey. But these na some of the palava wey I no think say dem go fit handle if dem venture into our domain.

This question be say how many of these people dey ready for our Obodo? As for my opinion o, I no think say dem go fit survive our Obodo self. The reason be say plenty of these people no dey serious at all. Una know say every time wey dem come home for Holiday dem go bring plenty money because dem want come show off. Some people go come home come spend 3 weeks with Five thousand Dollars for Pocket, how dem no go live like Kings and Queens with that plenty dough. When dem reach our Obodo na so dem go dey live like say tomorrow no dey. Before una know, the money don finish and dem go come run back to their foreign base. The thing be like person wey go visit him people for village, dem go think say na him own Lagos as he dey wear better cloth and shoes. If he come get one Jalopy wey he dey push around, before una know am, the villagers don make am chief. Because of this kind enjoyment, some fools among our Away people go think say na so the thing go be if dem come home finally. No be say dem get one business for our Obodo wey dem dey nurse already o, dem think the few change wey dem carry go last dem for ever. The thing wey I no understand for the thing be say plenty of dem no dey think through this thing before dem jump on am with their two feet. Dem don forget say once dem move home dem don become one of us, the small money wey dem get go dissapear because the relatives wey dey visit dem when dem come home for Vacations no dey go back their village again. Na for that small house dem go dey live. Na so he be for our Obodo o, anytime wey one of us get some small change for hand, the whole family go pack comot Village come dey live with the Uncle/Aunty wey just return from Oyinbo Country. Our Away Brothers and Sisters no dey get honeymoon before Family problem start dey come from left and right. Na the thing wey dey make some people pack their load and return Obodo country be that.

As I talk before, I no say make people no come home or no help their family. The thing wey I dey talk be say before dem pack comot Oyinbo Country, make dem plan am well. He go good if dey start small business or find better job first before dem pack the whole family come. I go even advice say the ones wey don marry, make the husbands come try am first, dem as things improve for dem, the wife and pikin fit come join dem. Na all of us know say he no dey easy for Obodo country but my advice for our people be say if dem want come home come dey live, make dem make sure say dem get one small burgalow wey dem go fit call their own, if not, na landlord rent palava go kill dem before their time. Once the rent own don comot, the rest na small thing.

But as I tell my brother and his friends, make dem still dey simmer for Obodo country as our country still get plent palava. He go take another three or four years before we go fit talk say the country don better. Na here I go stop, make una think before una do am o.

February.02. 2001

Private Jet: Our President Na Money Gobbler

How una dey my people, I hope una don ready for the Weekend? Wetin I hear say our President dey lobby for Presidential Jet. Na yesterday my source for Abuja tell me say Uncle Sege don send some of his people make dem go talk to our Legislators about money for new Plane for him.I also hear say he go carry him case to Nigerian Public, say if he tell the public about the thing we go fit put pressure on our National Assembly dem.

My fellow Obodians, the country dey burn but our President the plane wey him go take dey carry him Concubines na him dem burn am for chest. Na everybody want better thing, our Politicians dem want dey enjoy like the Oyinbo people dem, but dem no fit deliver better service like dem. I understand say the old one get problem and na almost everyday the thing dem break down for Airport. But if our President and his fellow Politicians get shame no be money wey dem go take buy Plane na him dem go be their Priority as the country dey so. Una want tell me say the man no fit dey take commercial Airline like everybody? I know since him be our President Economy no go good for am, we no mind if he enter First Class. But for him to talk say he need a new Jet na that one me I no support.

No be last or so I talk say our Senators dem no need Peogeot 406, na so I believe say our President no need new Plane. If he no fit enter Commercial Airlines, make him sit him yansh for Abuja. The way our Politicians dey go so, I not think say the money wey dem collect for Wireless License go last. Una notice say since the day wey dem announce say we collect Billions of Naira na him different Budgets dey appear for Abuja. These our Politicians no dey see money for eyes, I know say the same thing wey happen for Oil Money na him go happen for this Phone money.

As I talk before, yesteday na Peogeot 406, today na Private Jet. Before una know, the money don finish. Small time dem go create yeye Panel say dem want probe how the money take disappear for Bank, as if to say no be dem chop am. The thing wey I no sabi be say with all these problems wey we get for our Obobo se na Motor and Private Jet na him be our Politician plan for our Country? If you go around our country plenty people no fit find work. Na everyday people dey die because dem no fit find food chop. Plenty hosptal for Nigeria no get money to buy medicine because our Goverment no want give dem money but dem get money wey dem go take build Abuja Stadium. The Oil money wey dem for pump into our Economy, that don take style appear for our Leaders Bank Accounts for Oyinbo land. I no think say because our President no get Private Jet, people no go respect us. Ajala travel around the world wey the man do last year don do, make him find work for us here. The money wey dem go take buy Jet, make dem take recruit people for Nigeria Police, as men of the under world don become our Kings. My people the time don come wey I go say Adios, I go dey see una on Monday, make una dey take am easy o.

February.01. 2001

Our Obodo Don Turn To Land Of …

Barika De de my people, I hope say una dey take am easy? As I dey sleep jeje for house na him my cousin pikin come call me say I get visitor for parlor. Na him I come tie my rapper come follow am enter our parlor. As I enter the place na one of my Brother friends from America na him I see. I come ask am wetin he still dey do for our Obodo? The man tell me say sebi him tell me say he dey work on one business for Abuja na the thing wey dey delay am be that. The Bobo come tell me say the reason wey he stop for my house na to ask me if I want follow am go the place. To cut the story short I follow am go Abuja. The last time wey I visit the place na for Night and our yeye NEPA get problem with Transmission as usual again, so I no too see the place well well. But my people this life no dey fair at all, and he no good make person no get money o. That our Abuja fine o my fellow Obodians make I no tell una lie. I know say I dey among the people wey talk say na waste of our money when dem want build the place and we no need another capital as the one wey we get we no fit maintain am. But our government try for this thing my people, if you enter the place you go think say na another world you dey no be this our country. But as the thing fine so my fellow Obodians, no be kind place wey me and una go fit survive as things dey deer so. Plenty Civil Servant wey dey work for Abuja na outside town dem dey live as the houses wey dey for Abuja Capital cost pass some houses for Victoria am dem. Food nko, make you no mention that one my Brother, the money wey you go fit eat for better restaurant for Lagos na him you go take pay for small Eba for yeye Buka outside Abuja. As everybody sabi say the place na for rich people, na so our Night workers full am too. That place don turn to brothel my people. I know say plenty people go talk say that one na old news for our Obodo, but this one wowo pass Lagos own. The Asewos dem get different class, if to say na big yansh na him be your style wetin dem dey take that one do, and for Size Koliye (small yansh own) how many you want, you go choose so tay you go think na Women Conference you dey for Thailand. And as those Senior Girls plenty so una know say you no fit compare dem to our University Girls own. Dem plenty so tay, no corner wey you go for Abuja wey you no go see their print for all over the place. And dem get plenty of dem wey you go think say dem be Models for America. All these pikin dem, plenty of dem their papa no know say na University of Bodydey for Abuja na there be their school.

As the thing poku my people, he don become epidemic for our Country. I go fit say if our country no improve and the thing continue like this, he go reach stage wey be say half of our pikin dem go don matriculate for these kind Universities. I no think say you go fit find a place for our Obodo, wey no get this problem. The thing wey I no sabi be say our Government no dey take am serious at all. And dem no fit talk say dem no know about the disease because na dem be the big financiers for the trade. Plenty time you go see our yeye Men dey inside car with young girls wey no be say na their sister born dem. Plenty of our Politicians dem, the women wey dem carry for side no be their wives. My people I pity our young boys dem o, because he no go surprise me if plenty of dem end up marry Ex-Asewos. As the thing be so, our women dem don lose their value because plenty of our Leaders see am as fringe benefit for their Positions and society and dem no see am as big problem. Plus the yeye rogues dem, dem go rather buy Peogeot 406 for themselves, instead make dem take the money open business for us. Na everybody know say the big contributor to this disease na this yeye work wey plenty of our women graduates no fit find. My own be say I hope our new Minister for Health go take am as his priority before our country turn to another Rwanda, where plenty of our African brothers and Sisters die because of hatred. But as for our own, the war na with SPREADER HIV. And the last time I check for CNN, dem never find the cure yet. Na here I go stop my people, make una take am easy o.

 

January 30. 2001

Overseas Here I come Become Nightmare for Lagos Mumus

My people I no know say we still get these plenty Mumus for Nigeria especially for Lagos o. Me I think say as we don get Federal Capital for Abuja, we no go dey get "Johnny Just Come" for Lagos again. But our people proof me wrong. No be late last year my brother dey tell me about some new gimmicks wey him read for Internet. The thing be say some people create Website wey dem talk say dem represent one Territory wey dey near Canada and US for North America. Dem come talk say as their Island small so, dem dey look for Citizens from around the world make dem come become residents and Citizens. The territory name na Republic of Lomar. Dem talk say for dem to become a country, United Nations talk say their population must increase if dem want make plenty country recognise dem, When my brother tell me about the thing, he come talk say he fit bet his last kobo say plenty Nigerians go jump for that Scam as people want comot Nigeria real bad. I come tell am say, no Foreigner fit use 419 for us since na we be the master for the thing. But na me be una for true, una know say no be only dem take our money dem even use our people to use 419 for us. Na last week I read am for News say plenty Business Centres for Lagos dey accept registrations for the citizenship with up to 4000.00 Naira payment. I hear say some business centres dey boast say dem make a killing for this Wayo.

My fellow Obodians, the thing wey I no sabi say no be only illiterates fall for this 419 o, I hear say some people wey be Professor for University even register their families for the thing. I remember the last time wey I pass Business Centre wey dey for our area for Ajegunle, if una see as the line long so, una go think say na Father Christmas dey give give out Food for the place. For this Business Centre, no person wey dey live for our area wey no sabi say the people wey dey run am na Big 419 Lord dem be. But the thing no stop our people as plenty Nigerians want comot this our Obodo country real bad.

I sabi say some people na from their mama belle dem take Mumu name for body, but for the rest of our Professors and Bankers, se dem want tell me say dem no fit carry their map and find where the Island dey self. My people una sabi say this place wey dem dey call Republic of Lomar no dey for this our Planet. I no know about Mars o, but I know say he no dey among countries wey we get for this our planet Earth. Even self if to say na true true the place dey and dem dey look for citizens, una think say na our type dem go dey look for especially the ones wey no get money? Wetin make these our Pa Jimoh types think say if Lomar Republic want increase their populations na Black people from Africa dem go dey look for wey go come become public liability for their heads. Una see my people, plenty of our people no like this our country at all at all, una see how desperate dem be wey be say plenty of dem want sell their birthright for 1,500 Naira without blinking their Big Kokoroko eyes. But if we look am self, I no go blame dem as the people we call Leaders self no help matter. As long as their families dey travel back and forth from Obodo Oyinbo with our Oil Money, dem no care whether all of us carry our bags and leave this country. I know say plenty of dem go dey talk say he go good if all of us wey dey poor comot so that dem go fit enjoy our Oil money well well.

The question wey I go ask our Government dem be say wetin dem go do to these people wey dey use 419 for their fellow desperate citizens. Una want tell me say our Law Enforcement People no dey for town when all these things dey happen for Lagos. Haba our Leaders, na so una go dey look wey our people go dey oppress themselves just because dem want become the next legislators from their area tomorrow. Na beg I dey beg our Government make dem arrest all these Wayo Business Centres wey dey use 419 for our people. As for the Professors and Bankers wey lose their money, I hope say una no recover una money because una be disgrace for una professions. Una know better unless the certificate una get na for Oluwole una take buy am. Na here I go stop my people, I hope say plenty of us go think before we put our hard earn money for something wey dey too good to be true.

January 29. 2001

Core North No Want Middle Belt Form Their Own Group

How una weekend my people, I hope say una enjoy am well well. Wahala don dey brew for North as my people for Middle Belt dey talk say dem go form their own group whether our Leaders for Core North like am or not. Una remember since last year na him our people for Middle don dey talk say dem want their own separate Identity from our people for Core North. Dem talk say dem dey tire for the thing wey my people for Core North dey do dem. My source tell me say plenty Leaders dem for Middle Belt dem no dey happy the way our Leaders for Core North react when Uncle Sege appoint plenty people from that region. Dem talk say plenty Core North Leaders dem no happy as our President select people from Middle Belt to represent North.

My people make ask una something, se una think say my people for Middle Belt justify say dem want their own identity or my people for Core North dey right to vex? But as I see am, I no sabi why our Leaders for Core North go no dey happy especially if the people want create their own group. No be today or tomorrow people don dey do am for our Obodo. No be Nigeria dem dey wey our Past Leaders dem create Mid-Western Region from Western Region? How dem think say those people too feel about the thing. Na the same thing happen for East wey our Head of States create Cross Rivers from Eastern Region. I remember say during that time when those regions want separate dem talk say since dem no dey speak the same language with Yoruba and Ibo people, he go good if dem go their own separate way. Plenty of dem even talk say the leaders of those Major Groups too dey discriminate against dem. No be say I fault those people wey want their own identity especially if the dominant tribe dey oppress dem too much. Me I support am well well especially if you think say the majority group too dey use you and dem no dey respect you. As for our Core North leaders, if na true dem think say Middle Belt na part of dem, why be say dem dey talk say our present govenment dey marginalize dem? The last time I check, plenty people wey Uncle Sege select for his govenment na Northerners dem be. Unless na true our Core North Leaders think say those people wey come from Middle Belt no be proper Northerners. And if to say na the case be that, I agree with dem say na true our President marginalize dem.

As he don tay wey Core North Leaders dey talk about marginalization, why dem come dey angry when Leaders for Middle Belt talk say dem want form separate Political Base? The thing wey I go tell our Leaders for Core North be say dem 'no fit chop their cake, and come get am for hand at the same time". If dem think say our people for Middle Belt na part of dem, make dem stop dey complain or dey talk say our current President no select plenty people from their region. But if to say dem just dey use the people when the situation favour dem, I no want hear their complaint say people want turn their brothers against dem since dem no consider dem as part North. He don tay wey our Leaders for Core North don dey use Middle Belt, I hope say dem go get that through their heads say those people go soon form their own Identity whether dem like am or not. The time wey one group go dey use another one don pass, plenty people for our Obodo don wise up now. More grease to our Leaders for Middle Belt elbows as Oyinbo people dey talk am. Na here I go stop, make una do am jeje o.

January 26. 2001

Our Neigbhours Na Big Oleh

How una dey my people, I hope una dey cope with these our so called African Neigbhours? Make ask una my people, how we tay dey live among some of our neigbours wey for Day time dem be our friends and when Night come, na dem be the Ants wey dey kill us small small. The last time, I talk am say some of these our African Brothers na bad news for us as dem dey kill our people for their countries. But today, the kind thing wey dem dey do for night, na real jibiti. I go tell una something, other than some few friends like Ghana, Togo, Guinea and few others, plenty of our west african brothers dem na Big Barawos. Se una dey hear say plenty of the people wey dey thief our motor and kill our people for night na from neigbhouring countries. The question be say no be today or yesteday wey we dey hear say plenty of these people go thief our motor and kill plenty of our people and then come run go their countries with the goods. Make ask una self, which benefit wey we dey get from our neigbhours self wey our government no fit close our border on dem? No be yesteday I hear say dem find some goods for Republic of Benin and Chad Republic? I even hear say the people wey dey drive the motor, na some Oga for Army and Police. I even hear say one of dem na Security personnel for their Country President. My people una hear that? This crime be like say state sponsor own and our government sit down there dey act like big Brother.

If to say na me be our President, if our neigbhours no fit help us fight these men of the underworld wey dey enter their country with our motor wey dem thief for our land, na economic sanction na him I go take kill dem. And I know say plenty of dem na our oil dem dey rely on and dem no dey pay for the thing self. But plenty of these our Leaders no too get sense for head, because if you go some of these countries, crime no too dey. Na the reason wey plenty Oyinbo dey go these yeye countries dem go invest instead make dem come Nigeria come help create job for our youths. Plenty Foreign Investors think say the crime wey dey occur for Nigeria na our people dey cause am. For dem eyes Nigeria no safe but her neigbhours na Paradise. Most foreigners think say plenty of us na Barawos, As we dey get bad names these yeye countries dey dey enjoy. I don talk am before, if dem no fit be good neigbhours make we boycott all of dem as I no sabi the benefit wey wey dem get from dem self? Instead na crime dem dey perpetuate against our Land. I hope say our Leaders dem go make their Leaders understand say if dem no stop these Gangs dem for their border, we too go do our own export to their country. As we plenty so, there are plenty AREA BOYS wey go volunteer for the task as long as we promise dem some Igbo.

My people, make we dey serious, these crime don dey get out of control. I no talk say na only Foreigners dey do am, but he go good if some of our neigbhours dem take some responsibilites check all these motor wey dey enter their countries without our approval.

He go good too if our Custom dem go start dey do some work instead wey be say na chop money dem go dey run after for our Border. How these people dey take carry the motor pass our border self? Una want tell me say we no dey get Security for border again? I hope say our government go make our Custom dey work with our Police wey be say every time wey dem snatch motor, the Police go radio all Customs wey dey for Border. Any Custom wey allow the motor pass, na firing squad he go face because to me that na crime against the country. Na him be say he plan with foreign agents to dabaru our Country be that. Na the thing wey Oyinbo people dey call Treason be that and na big one.

Na here I go stop my people, make una enjoy una weekend.

January 25. 2001

Religion Welfare: No Government Subsidy for Hajj

Allah Akbar, that one mean say Peace to una my fellow Obodians. Wetin be this thing wey I dey hear? Dem talk say some Muslim Leaders want make our Government help pay Hajj money for people wey dey go Mecca. The problem no be say our Government no dey help pay for the thing but this year the Islamic Religion Leaders for our Obodo talk say the money wey our Government contribute dey small. Dem talk say the fees wey governemnt annouce say Pilgrims go pay dey too plenty. Before I start my talk I go let una know say me I no get anything against my Moslem Brothers and Sisters since my Mama and my Grandmother (may dem Souls rest in Peace) na faithful Moslems. Plenty of my family dem no dey miss their normal prayer routine everyday. As I we don settle this make I come continue with my talk. Which kind nonsense be this self? I even hear say last year our Government dem help pay Hajj Money. I know say our Prophet Mohammed talk am for Koran say he go good if every muslim attend pilgrimage at least one time for him life time. As some people tell me, he dey for Koran say if you fit afford am, make you go. Why we go dey help people go the place when we talk say our Country na Seclular one. As we no dey do am before why we come dey start for now? I no want hear the excuse say because Exchange Rate dey high, plenty Muslims no go fit afford am. Na the reason wey I dey against the thing be that. If people no know, na our Foreign Reserve na him dem dey empty so, na the reason wey our Naira dey go down because we too dey waste money. Plenty people want go the place during their live time including my family dem but as dem no get money, dem just stay home dey watch am for Television. Me I no talk say make people no go but I get problem if na our Government go dey help pay for the thing.

I remember about two weeks ago wey one Imam dey talk say if our Government dey help pay for Sports why dem no fit put plenty money down for Mecca own. I know say me I no too read but as I dey talk before, I get common sense. Na him be say the person wey talk that nonsense he no think before he open his mouth. How person go dey compare Recreation to Religion before he make his point dey beyond me my people. As I hear say our Government dey help pay for Hajj, I hope dem go help pay Pagan Festival too if our Indigenous Belief Worshippers dem want commot Nigeria go their Sacred Place? Because as I see am, the thing wey good for Salim, go dey nice for Sangomola o. I guess say our Government too dey help pay for people wey dey go Jerusalem.

As I see am, I no think say our Government sabi wetin him want do with our Oil money. How many people wey dey go Mecca no get work? Una want tell me say since the thing for Koran talk say if you fit afford the thing, make you go at least one time, which kind business wey our Government get for the thing when plenty Nigerians no fit eat three square meals a day, and our Government dey put money for people wey no be say Food na their problem for house? As I talk before, the people wey dey make policies for our Obodo self, I no think say dem get sense. Dem want tell me say all those small pikin wey dey waka around the street because food no dey their belle go dey think about Mecca? Person wey want go the place and no fit afford am, make him sit him behind for Nigeria dey read the thing for News. He no means say because you no go Mecca, God go think say you no love am. As all of us know for Nigeria, there are plenty Alhajas and Alhajis wey be say the attrocities wey dem dey commit against fellow Nigerians pass devil own. Plenty people wey dey go for the thing now na for Fashion since their behavior no dey according to our Prophet Mohammed, Salah Ah Salah.

I go advice our Government say if dem no sabi wetin dem want do with our money, plenty people dey for Mushin, Ajegunle, Sabo Gida, Aba, Gbegi, Jos, Ontsha, Sokoto wey no fit find food eat. The money go help a whole Unemployed Nigerians wey dey die of hunger.

Na here I go stop my people, make una always think about una Neigbhour first before una waste that money on wants not needs.

January 24. 2001

Peugeot 406 For National Assembly Members

My people our Politicians don start again o. Na last week my Source for Abuja Federal Capital dey tell me say our National Assembly plan say dem go buy Peugeot 406 for our Money grubbing Senators. Na wa for us for Nigeria o, anytime wey our leaders see some surplus for our Treasury if dem never chop am finish dem no dey rest. As Federal Government announce say last year our Obodo gain plenty money for Oil and last week na him we hear say the Auction wey dem do for Wireless Phone own, the money wey dem gather pass the thing wey dem plan before. As soon as our Politicians hear that, na so dem begin dey announce different kind contracts wey no go improve our lives. Anytime wey our Leaders see money, dem go dey behave like small pikin wey see Sweet for Market. If dem no finish the thing, their mind no go dey at ease. My fellow Obodians, which kind motor wey these Onyeochi dey buy now? Se dem want tell us say since we send dem go Abuja na Molue dem dey enter go work? Wetin happen to all the money wey dem get for Foreign accounts, una want tell me say dem no fit use that money buy motor? I no know if some of una don go Abuja before, but the place no be for me and you o. Things dey dear for the place so tay the bread wey me and una dey buy for 50 Naira, na almost 100 Naira dem dey sell am for the place. And if una come go National Assembly, una go think say na Oyinbo Car lots una dey as plenty expensive cars poku for the place. I no even think say dem get Datsun for the place self. Na so so BMW, Benz, Jaguar, Lexus, Acura and other expensive motor I see for night for the place. As I talk before, the reason why dem think say if dem buy Peugeot 406 dem go fit work, that one pass me o. According to my Source for Abuja, na the thing wey one of the Leaders talk be that. Him talk say the thing go improve work for National Assembly. This na one of the people wey be caretakers for our Obodo be that o. I think say the Senators dem think say we be fool self. Dem think say plenty of us na  na "help me carry my Buba" person we be. How come na just to chop money na him our Legislators sabi? Dem want tell me say dem like as the country be so? If you go other states of the Federation, plenty people no fit find money buy food as dem no get work. Some people self wey get job he be like say dem no get anything as our Government no fit pay den salary. My people he be like say the only way wey our Leaders go know say we mean business be say if we carry our wahala go their neigbourhoods. Because these people think say dem dey do better job. I no sabi country wey her Leaders go dey spend money like say Government Treasury na Atlantic Ocean with plenty water? Since this their yeye Democratic Government start I never see any benefits for us the commoners self. All of us just dey die slow death while our Pen Robber Politicians and their families dey enjoy like say there is no tomorrow.

Na beg I dey beg everybody wey be serious Nigerians say anytime wey una see these cronies dey drive that yeye car for road, na stone make una take stone dem. I no sabi how people go dey this greedy wey be say dem only sabi their own. I no sabi why dem think say the yeye car wey dem want buy go improve their work? He be like say this our Politicians don dey Kolo self, because me I no fit explain this one o. I hope say plenty of our Human Rights Organizations dem go condem this yeye spending especially wey plenty Nigerians no fit find work. Na here I go stop my people before these Barawos dem send me to Aro for Abeokuta.

January 19. 2001

Wahala Wey Corruption Dey Cause For Our People

He go better my people, how una dey? Today as I sit down for my house na him I see our government anti-bribery and corruption message for television. I come say to my family say he go good if our government dey serious about the thing. Na him my family come talk say some people na the thing wey dem dey take chop be that since the salary wey dem dey get for work no plenty. I come ask dem say, se una no know say na the thing wey dey spoil our country be that? Dem come talk say people wey dey hungry and get family for house na dat one dem go chop? Na him I come explain the thing to dem as teacher go tell him pupils for school. Na him I come begin my people make una hear. Bribery and corruption na the thing wey make our country be like this. I go tell una the wahala wey the thing dey cause.  Danfo driver comot him house dey go work, as him dey go, na him he see road block for road. As he see the Police, him know say something go comot for him pocket.  Police come ask am wettin he carried for back, since the man know say if him no give dem money him no dey comot for the place. He give dem some money and dey go. Una know say the man never make money but he don dey give part of money wey him go make for dat dey to police. Another palava na those Agberos for motor park. Before Driver drive comot he must settle dem, na him be say dem go get their own share be that. When night come for him to deliver, him go lie to his owner say him just dey come from police station, and he never work since morning wey him comot. The man wey get the danfo no go make money for dat day be that. And if to say the man na the only thing wey him dey rely on be that, him pikin wey dey school no go get pocket money for school be that. The same thing go happen to Mama Oloja, the only different be say she go pass the cost to you for market. And una go talk say thing dey dear (expensive) for market. Doctor go wharf go get equipments wey him order from Oyinbo country, as una know, if him no bribe dem for Tin Can Island, na there those him machines wey him want use for him hospital go rotten. Since the man don pay plenty bribe money for Wharf, when una go him clinic, he go increase the money for him service. And  if to say na emergency, wey be between life and death, if you no pay money, him no go treat you. That is why plenty people dey die for our hospital if dem no get money. Na the same problem dey happen for bank wey people go bribe before dem give dem loan. When you don use half of loan money pay bribe, na the thing wey make some people no fit gree pay  bank the money wey dem loan dem be that.

Se una see my people, na the thing wey I dey tell people be dat , make we think gan before we take that bribe. Because, one way or the other, you go pay the thing unless we stop am. Na the ripple effect of dat yeye cancer wey dem dey call corruption dey cause wahala for our people and the country. This thing begin with all of us, Nigeria go better if we treat am right.

January 18. 2001

In An Ideal World : People We Want As Candidates

Nigeria go soon better my people, make una pray for am. As we dey hear say plenty of our politicians don dey prepare for next election, I come say make we talk about am small. The questions wey I want as una be say which kind people wey we want make dem represent us, and wetin we go use as criteria for the kind people we want? As for Presidential Election, se make we pick person because he come from our area or na because dem be the best candidate for our Obodo?

As for the first question wey I ask una, plenty people wey dey for government now if to say our country don advance for politics no go qualify for their office. Some people dey talk say make we no allow anybody wey overthrow Government before especially our general dem. Dem talk say people like Babangida, Buhari, Diya, Aikoumu, and Abubakir no fit run for election since dem overthrow sitting government. I dey in-support for the thing but with some reservations. I no go agree say because person don dey for government before or because na Military person, he no fit run for political office for our Obodo. Since these people whether dem be Soldiers, doctors or ordinary commoners like me as long say dem be Nigerians, dem fit run for anything wey dem like.

As for our past military leaders wey overthrow government na only few of dem I go talk say no qualify. The first person na Buhari and I thank God say I never hear say the man want run for Election. If una remember, na the man and Late Idiagbon comot President Shagari for office. Na all of us know say plenty people wey dey for Shagari government na rogues and dem dey corrupt but since na we vote for dem, I no think say he dey proper make General Buhari and his counterparts overthrow their government. I even hear say he dey against our Constitutions make person overthrow government, but for Nigeria we no say plenty of our Soldier no dey obey law of our land wey dem swear say dem go protect.

As for Babangida own, the only problem wey dat want get be say apart from say he thief money na when he allow Democratic election and he come cancel am again when his choice no win. I no go fault am say he overthrow our Government since the government wey dey there before am dey illegal. As dem dey say for Arithmetric, Zero cancel Zero. Since Buhari govenment na illegal one, we no fit fault Babangida and his partners because dem overthrow am. If to say dem allow the person wey win election stay for power, General Babangida and all the people wey take part in his government go fit qualify for future Political offices. But since power wey dey hungry dem no let dem use their God given brain, I no think say dem dey fit to run our Obodo again. As I talk before, na during Babangida regime na him our Country come become scatter scatter, Na during his regime na him our country come become like goats wey no get owner. The people wey for look after our resources just distribute am among their families and rogue friends. He go be great injustice if we allow am and the people wey serve under him run for office for Nigeria even if the office na comon local government own. The man na BIG TIME BARAWO, all the money wey he get we know our Military Officials no dey make that kind salary. If we to say na so we dey pay our Military I for don join the thing when I comot Standard 6.

Though Generals Diya and Aikoumu or wetin be their title be second in command, since dem dey involve for the coup, dem no qualify to run for office. Make dem ask dem how dey take get all these ill gotten wealth wey dem dey display now. Dem want tell me say na the salary wey Army, Airforce or Navy pay dem na him plenty like that? The only person wey I think say should run for political office if he want to na him be General Abubakir. I know say I no sabi am well well but at least the man, na him fellow officers put am there when that yeye Abacha die. And he no tay wey the bobo return the country to civilian government. How many of our leaders go fit do that kind thing other than Uncle Sege. Plenty of our leaders in the past na only their own dem sabi, power too dey intoxicate dem; na the thing wey no make our country better be that.

Plenty of these people wey dey for government now I no for sure say dem be rogue and dem no qualify to represent us. Make una ask una self, how man of dem no dey for government before? All the money wey dem take run for office, where una think say dem get am? Me I no remember the company or industry wey dem own o. If to say na true dem get businesses, I no think say we go get this unemployment problem at all. The only business dem sabi na to open companies wey no get offices. Na so dem dey take style thief our money. Una never ask una selves why we get so many General Contractors for Nigeria? Na everybody know say the fastest way to big money for our Obodo na to become Contractor. From there your money don come be that. If dem give you contract just pay the people some Family Support, the rest na your own. Small time we go hear say you too don become Chief for Village be that. From there na Abuja terere, na him be say you don arrive be that because you go soon become Senator Money.

As for people wey talk say make we dey rotate the presidency. I no too support the thing since we no want dey select people because dem be Yoruba, Ibo or Hausa. He go good if we dey vote for person because of what dem do in the past or because we no say dem go make good politcial office holder. But as una know for Nigeria, we no too dey vote for person because of their good work but na because dem carry bags of rice and beans put for our yard before election. Nigeria politics of today na how rich you be. Na the reason why for National Assembly na so so Thief Millionaires we get for Legislators. I no agree because Obasanjo na Yoruba make we vote for am; na the politics wey dey work for Nigeria be that now unless the other person get plenty money. Kudos to my Yoruba people, dem be exceptions to the rule. Na everybody know say plenty of dem no vote for Uncle Sege during last election but at the same time the other Presidential candidate na also Yoruba man. But he no too get money plus the power that be no too like am.

In an Ideal World, plenty of these people wey hold political posts for our Obodo go dey for Kirikiri dey surfer because the thing wey dem do na crime against humanity and our society.  But make una look, as our country no be ordinary country, I guess say make we dey rotate the thing. So that all the Ethnic groups go feel like say dem belong whether dem be majority or na minority. The only conditions be say we go make sure say the person qualify proper, get good reputation and na proven leader. We no want person wey be say na money he go take buy the thing. These na my dream for a better Nigeria, but as una sabi, I no think say this my fantazy go come true o as our Obodo no be that kind country. Na here I go stop make una treat our country well.

January 17. 2001

Our Life Style: The Thing Wey Extended Family Dey Cause For Our Life

Life go better my people make una dey take am easy. How una dey, I hope say una dey kampe? As we enter this new year, I don talk say at least four times a month I go talk about our Life style for Nigeria. Wetin una think about extended family for our Obodo? Make we take a hard look for the thing self as he affect our life and family. If I start today for months, I no think say I go fit finish the benefit wey we dey get for the thing . I remember when I dey small, plenty times my mama (may her Soul rest in Peace) want go North go buy the thing wey she go sell for Lagos, she go leave me with my Grandmother (may her Soul rest in Peace) for months. As old as my Grandmother be, una know say the woman get about ten of us wey she go dey look after at the same while my mama and her siblings go go market. I know say plenty of us dey, wey grow up with our cousins for house. And as he be for Africa, cousin and aunty no too dey common for our mouth especially if you be Yoruba as the thing no dey for our Vocabulary. Na everybody be our Brother or Sister for our society. Our Uncle pikin na brothers and sisters na him dem be to us. Na so the thing be for our Aunty pikin too. If you mama no come back from market in time, you no go feel am as your aunty go don fix food for you and her pikin. This thing common all over Africa as I hear. If a family no get money to feed herself, other relatives no get choice but make sure say dem help dem put food for belle. Because na real disgrace if your relatives dey surfer and you come dey enjoy. God forbid, something bad happen to your relatives and na only you get some small change for pocket. Na him be say you go dey responsible for their wellbeing be that. At least we no say the pikin dem no go realy feel am say their parent dem no dey. Na some of the benefits wey we dey get from this our way of life be that.

As the thing dey benefit us na so he come with wahala for example the thing wey I talk about say if person relative no dey for life and he come get pikin, na the family go take care of am. But some time the thing fit be like say na cause for the family, especially if themselves dey manage to survive. And if come be say na you be money person for the whole family, your own don better be that because every person wey get money problem for your family, na you dem go come tell. And you no fit run away from the thing because for our culture you no get choice, as he be for our Obodo, we no dey call am Help, na your obligation as Oyinbo people dey use the word he be. If your pikin dem dey go private school and no be say Bag Money dey plenty for your backyard, and the relative pikin dem na school age, na him be say either make you downgrade your pikin to Jakande school or add the boy name to your pikin private school. If you no do am for our Obodo, you go give your self name. Besides, I no think say he dey proper. How you go feel if to say the God reverse the situation and your relatives come do the thing to your pikin. I know say plenty of us no go like am o. Na him be say the thing good for the boy if to say you fit afford am, but if you no come get plenty money, I no think say your other Half go like the thing o. Na him be say tension go start for that house as the peace wey una get before go dey dissapear small small. and fit no return. This no be true for all situations and families but he dey happen more than we think.

Another thing be say sometimes some people wey no get conscience, go start dey use the boy like say na Houseboy. Especially if him relative na the husband. Our women dem too dey take advantage for the thing to the fullest. Sometimes the bad ones among dem, go use the bobo so tay, the boy go wish say make him follow him parents for heaven. If to say the woman na her be the boy relative, I no think say he go dey all that bad for the boy. But just like anything for this our universe, no mean say na so he go be, because if you see some family as dem dey treat themselves you go think say dem be enemy for life.

As the thing be, I no think say una go fit find something for this live wey dey kampe all the way. Just like our Extended Family no dey perfect, but I no think say we go fit survive without am. My brother wey dey America talk say plenty of these Ajerekes or Akata if you see as dem dey treat their relatives, sometimes brothers to sisters. Na that time you go know say we Africans dey lucky say we get that kind customs for our obodo. The only thing wey I go talk be say, he good if all of us no too abuse the situation. If you know say your relatives no get money help them if you can afford am. But if you know say the people no to get money, no go add your wahala to their own again.

My final thought be say Extended Family dey enrich our lives but with some wahala attach to am. Na here I go stop my people, make una try to be una brothers keeper as long as the thing no dey too much for una to carry.

January 16. 2001

Who Dey Responsible For This Thing Now?

How una dey my people, I hope say una dey manage? Today now about our Government Officials, how be say when something no dey work and you go meet our Government Officials and tell dem say make dem come fix am or say how the thing tay broke, dem go tell you say no be dem dey in charge for the thing or make dem tell you say na another ministry or department cause am. This na the thing wey my brothers dem for Obodo Oyinbo dey call "passing the buck" be that. This thing wey I dey talk dey happen for inside ministry too. You go your Payroll office for work and go ask dem say why dem comot some money from your salary, dem fit tell you say dem no sabi how the thing happen, or make dem tell you say na Human Resouces dem tell dem say make dem comot the thing. And you go Human Resources go ask why the thing happen dem go tell you say dem no sabi anything.

The thing wey bring this my talk na about the thing wey happen for Abuja Airport last week when Uncle Sege dey come back from Iran. I hear say as him plane want land like this na him the whole place turn darkness as power no dey for the whole airport. When dem come ask NEPA how the thing come happen, our NEPA officials come talk say no be their fault. Dem talk am say na Airport Authority cause am no be dem. When dem ask NAA say how the thing happen? Those people come turn around say no be their fault na NEPA cause am. Na him be say as dem no want take responsibility for the thing, the thing go happen again. Na just like person wey dey drink too much, the only wey the person go sober or change be say, he go first agree to himself say him get problem. Na him then people go fit help am. As these two government agencies no sabi anything, how una think say dem go fit prevent if happen again? My people una sabi say as I dey talk to una now, we no sabi which of these yeye Agencies cause the thing and who dey in charge. Na him be say for our Obodo, no person life save if dem fit do that kind thing to our President. Wetin una think say go happen if na ordinary people like us want land for the place?

The thing wey I no understand be say, how this kind thing go dey happen to that kind Airport when no be say na Aerodrome be the place? Why be say for Nigeria we go call Oyinbo make him come build this thing kind thing for our Country, and we no go fit maintain am self? As wise man dey talk, you cut your coat according to your Size, but no be so for our beloved country. Na him be say you build the thing wey we think say bricklayer go fit handle since plenty of our Engineers dey dey office dey enjoy AirCondition, instead make dem follow Oyinbo go learn how the thing dey work. Plenty of our Leaders go go Oyinbo country go copy their Buildings and dem go come come back here say dem want be build the same thing for Nigeria because dem want leave big Legacy behind and at the same time chop some money why the building dey go on. As dem dey talk say the Oyinbo wey do pencil na him too do eraser, no apply here as our people go ask make dem build the thing but for some reason the money wey dem allocate say make dem take manage the building some people don divert the thing build private Mansion for Lekki or send am to their Account for Geneva. And when the thing come dey pafuka after Five Years or so, and you go ask our Government officials wetin happen to Maintenance money, dem go tell you say na before their time na him dem build the thing and dem no sabi anything. And you ask dem say no be recently we hear say the Government allocate some money for the thing, dem go tell you say Ministry Of Finance no gree release the money. And you come go Ministry of Finance why be so, dem go tell you another tory. Na so the thing be for obodo, we no dey accept fault at all at all, we like dey say na another person do am no be us.

Na this same tory dey happen for Power Project wey Federal Government, Lagos State Government, NEPA and one American company like this dey build. Na since 1999 we hear say dem go build another Generating Power Place wey go dey supply Light for Lagos. Last week when people ask say why dem never start the thing, na so you dey hear everybody dey talk say no be dem cause the delay. You go NEPA office dem talk say na Lagos State Government and the American Company cause am no be dem. And if you go ask Lagos State Government, dem go tell you say na Federal Ministry Of Mines and Power no sign the paper. Or make dem tell you say na dem no appove the money. And my people the truth dey between all of dem and dem no am. But lie don chop their brain finish, instead make dey take the blame if to say na dem cause am, dem go put am for another person head or department instead make dey accept the thing and move on. But that one dey foreign to our people, that kind thing no dey work.

My fellow Obodians, una sabi say if to say we dey accept responsibility, our life for don better for Nigeria long time. Na him be say our Soldier dem go fit tell us why dem chop our country money finish and where the rest of the money dey. Se una no think say our palava go reduce small with this kind honesty? Na here I go stop my people, that one no go happen for our GENERATION, make we stop dreaming as miracle no too dey happen for our Obodo. Which time una hear say our Leaders bring the money wey dem thief from our Treasury back from their Foreign Banks? That no go ever happen, no be cause even if you catch dem wey dem dey steal the money dem go still deny am.

January 15. 2001

Name Power: Who Be The Powerful Among Us?

How dey go dey my people? I hope una enjoy una weekend? Which kind people wey get power for our Country self? Me I no talk about these new Millionaires wey we get for our Obodo now. I dey talk about people wey be say when you hear their name you know say na power even if dem no too get money. As I want talk this thing I know say our Oga patapata no go like the thing because him family dey among dem. Make una no surprise say all these people wey get power now no go enter the list, as we no sabi dem like Thirty years ago. The people wey I dey talk say their name na power don dey around since when dem born our Country Nigeria. As I talk before, all these our Leaders wey dey do Shakara now no dey among the names wey I think say come with power o. Obasanjo, Babangida, and Abacha dem, with all the money wey dem get now, I no think say their name mean power if no be say dem plan coup, who remember their names before? This na the truth my people, if to say Army no dey rule for Nigeria, these people no go even enter Nigeria Footnote if dem dey talk about our History. I know say plenty of una go dey say he be like say I don drink Ogogoro na him no make me no sabi the thing wey I dey talk. But true true, who among una wey sabi all these our Leaders wey come after Gowon regime before dem seize power? Na him be say if dem no wear khaki dem go just be like me and una. I know knowing the way Power dey intoxicate our Leaders, dem fit send their yeye Security after me if dem read this article, but na true I dey talk and I go continue to talk the thing till I go yonder.

The question now be say which Family name wey dey popular for our Obodo whether dem get money now or not? I dey talk about names wey whether you be Hausa, Ibo, Ijaw, Ibibio, Tiv, Efik, Yoruba or Fulani you know say these names na popular name. I no mean say common names o, I dey talk names wey come with prestige. The name Kuti dey among dem. Na the reason wey make me talk say our Oga no go like the thing because the man dey like make he dey treat himself like me and una. And na all of us know say that no dey possible. How many of una go hear person tell una say his Surname na Kuti, wey una mind no go be full of questions? Another Family name wey get prestige and money na Dantata own. I know say if we see person wey tell us say him surname na Dantata if he look like say the man no get money we go think say na lie him dey lie about the name. Since we associate that name with Dantata wey everybody know say na money. Another name na Ibru, as I be illiterate so and no too sabi anything, I know say that name na money and power. He get some names too wey dey popular too but as time no gree me, I think say say these three names don do. Plenty of una go dey wonder why I no mention Abiola, Igbinedo, and some Rich Family names but I as I talk before, who be these people before dem hit am big. If to say dem no steal contract money, who think say we go hear their names? Na him be say some of dem na true our sweat na him dem take make money. And if una trace their families, no be say dem get money before or their family na one big popular name. Me I no dey talk about season Billionaires/Millionaires wey we get now. Ten years from now, I no think say we go hear their names again. Because as dem take get the money, na so the money go dissapear, make una mark my word. But when you talk about Ibru, Dantata, and Kuti, these na names wey we all sabi for our Obodo. Some of dem no be say dem get money o, at the same time no be say dem be poor, dem just be names wey we all sabi for Nigeria. How long wey una don dey hear these three names? He don tay I be, na these names be our own Rockefeller and Kennedy as dem be for America.

Na him be say all these quick millionaires and billionaires wey we get for our Obodo now, make dem go sit down for one place. These their new money no go last, na so he dey be if you no work for the thing. As for me o, I no consider person wey be say na true fraud and gbajues na him take become Money man/woman rich. I fit chop their money but me I no dey respect dem o.

Na here I go stop my people, make una remember say good name dey better pass Gold and Silver wey don soil o.

January 12. 2001

Ivory Coast: Wetin dey Happen to Our People?

How una dey my people, I hope say una dey manage? Una remember say last year I talk about some Cameroonians wey dey kill our people for Borders. And he be like say the wahala still dey around. Now we come hear again say na our yeye Fellow Africans dey kill our people for Ivory Coast. Late last year when palava dey between the former Head of State for Ivory Coast and the person wey beat am for Election. Na plenty of our people na him dem kill for the thing, I no hear anything from our President and the yeye people wey dey for National Asseimbly. And I dey among people wey think say the thing go soon stop but that no happen. No be this weekend I hear again say during that yeye coup wey no succeed, the people start dey blame Foreigners wey dey live for Ivory Coast. Una know say plenty foreigners wey dey there including Nigerians na him dem attack. I even hear say dem kill some Nigerians wey dey live for the place.

While all these atrocities dey happen against Nigerians and other Africans, our yeye President dey go Iran dey talk about trade and Oil when those Lunatics wey dey Ivory Coast dey kill our people. I wonder which kind President wey our Uncle Sege be self? How person roof go dey burn, and him go dey travel around like say him be Globetrotter for America? I never hear say people go dey attack Americans, since na the people wey our country dey copy be that, their President go dey travel abroad. We no even hear one single word about the thing from our President or him Executives like say the people wey those yeye French Speaking Thugs dey kill no be person born dem. And as for our so called National Assembly, since the thing no concern money wey dem go fit chop, I no hear a word from dem too. This no speak well of our Leaders at all including our Governors too. Una want tell me say those people wey dem dey kill for Abidjan no be from una States some of dem come from?

My people I no know whether this na only me o, the thing wey I notice be say when fellow Africans dey kill our people, I no too dey hear make our Leaders talk, but if to say na Westerners do am, you go dey hear wey all these Potbelly Leaders wey we get go dey talk say dem no go gree. You go even hear wey dem go dey Sakara say dem go recall their Ambassadors as if to say that one go change anything. The question be say why we no fit react that way when our so-called Fellow Africans dey kill our people? As for me o, I no care whether na Africans or na Westerners, anytime wey our people dey under attack by some Rogue Nations, our country should react forcefully. No be once or twice wey these yeye people dey kill our brothers for Ivory Coast and Cameroon, and our Leaders no fit condemn am at all.

As the thing be, if we no fit be fellow West Africans in peace, make everybody bear him Papa name. This thing no be by force. But wetin I expect from our Leaders, no be only money dem sabi?

Na beg I dey beg una my people, I hope say when Year 2003 come and dem bring that BIG BAG OF RICE come your house say make you vote for dem, make you ask dem say where dem dey when dem dey kill our fellow Brethrens for those God Forsaken places? Because if you no ask dem that question, how you go know say dem no go do the same thing to you, your pikin and family when you travel abroad the same thing come happen? I beg make una think well well before una open that BIG BRIBE OF RICE wey dem want tey buy your VOTES.

Na here I go stop my people, make una dey do jeje o

January 10. 2001

Minister Sarumi Auto Crash: Na Only God Go Judge

My people before I start make we dey silent small for 10 seconds and pray for all accident Victims wey die; May their Souls rest in Peace, Amen. Na all of us hear about two young couple wey die when their car and our Minister for Cooperation and Integration car jam for Lekki-Epe expressway. The victims na Victor and Naomi Umoren wey I hear say dey come back from their Honeymoon when their car and the minister own come collide for the place. Some people wey dem say dey around the area when the accident happen talk say when the thing happen, the Minister and him people no help the victims especially the woman wey still dey alive when dem comot am from the car. The eyes witness talk say the woman dey cry for help as she dey in pain but dem say the Minister and him people just comot their injure people and leave the woman for the place. The thing wey bad about the thing be say the young woman carry pikin for belle. But the young woman and her unborn baby no make am as dem no get help in time. According to our Minister and Police no be so he take happen. The minister talk say him no even dey around when the thing happen and na only him car dey involve. The Police say na the Couple cause am as dem dey drive too fast. According to dem, as the victims dey drive with speed na him their tyre comot, the car come cross another lane wey dey for motor wey dey come from opposite direction. Na him dem go hit the minister car and his entourage.

But the question be say who we go come believe now as all of dem dey talk tory? The two victims don die and the only people wey fit talk for dem na their people and the Eyewitness dem.

As for the police we no sabi whether na true dem dey talk or not since our Police Force get bad reputation already. Na the thing wey I dey talk about reputation be that wey some people dey talk say if na that one dem go chop. If to say our Police be better Police and get good reputation, all the thing wey some people dey talk say na lie dem talk about the accident no go happen. Nigerian Public no sabi our Police for Honesty, since plenty Police go look you for face and tell you tory, this kind thing don make plenty people no dey believe dem again. He go good if our Police go change as people no dey respect dem or their uniform because of the thing wey plenty of dem do or dey do for our Obodo. This no go change overnight but our Police Force get big Image problem because we no dey trust dem at all even if the thing wey comot their mouth na true.

And as for the Eyewitness dem, wetin be their motive self? Se na true dem dey talk or not, but if we look well well, why dem go say dem see the thing as he happen if dem no dey there? Na the question wey all of us must answer be that. He be like say na true dem dey talk but since we no dey there when the thing happen, I no think say I go fit talk am with confidence.

As for the Minister own, I hope say na true him and his people dey talk o becaue he go dey sad if to say na hide dem want hide and come cover am up. But the thing be say why the Minister too go dey lie? I hope say no be say na him cause the accident but if to say na so the thing happen wetin dey wrong if him tell us as the thing happen? Accident as dem dey call na accident, when no be say the Minister sabi the victims before, I no think say the man and him people mean am even if na dem cause the accident.

The only thing wey I go talk be say whether na the two dead victims cause the thing or na our Minister and his people cause am that one no be problem as accident dey happen for our Obodo everyday. But the only question be say why dem no help the victims as dem dey cry for help? Na everybody dey talk say the woman still dey alive when dem comot am from the car, why dem no fit rush am go hospital? May be the woman go dey alive today if the people wey dey around help am quick. This na the problem wey me get about the whole affair be that. Na all of us dey pray say when we need help make God send a good Samaritan to our aid. If we dey around when some people need our help and we no help dem, I no think say God too go help us when we need him help o my people.

Na only GOD, ALLAH and the people wey dey around or involve for the thing know the real truth that day. Whoever dey tell tory, God go judge am and I no think say he go tay before the thing happen. And whoever wey dem bribe, make him know say that na blood money and na the thing wey go kill am be that. Na here I go stop my people, I hope say we dey think twice before we act.

January 09. 2001

Who Go Manage Nigerian Social Insurance Trust Fund?

I hope say una enjoy una weekend my fellow Obodians? I apologize to una since una no hear from me yesterday. The owner of our company don open him own Web Host Company and na when dem dey move files to the thing wey dem dey call Web Server na him wahala come sele. Den don correct the problem sa, but the Oga patapata no dey happy with the other company wey dey host our site before; him think say na dem cause the palava.

Wetiin una I think about this new intiatives wey our Government just announce? I hear say dem go increase money wey workers dey pay "Nigerian Social Insurance Trust Fund" to 10 percent. My people no be say I no like the idea as I see say plenty things wey our government dey do nowdays, he be like say na America dem dem dey copy. As una know say God's own country na one of my favourites among nations. Na all of us know say plenty thing wey dem dey do for America dey work, but if dem try some of dem for our Obodo, na suicide he go be. One of dem na him be this their Social Insurance Trust Fund. Even I hear say the one for America don dey get problem small as plenty Americans wey dey old don dey retire. Na him be say plenty people go dey ask for their money. But from the thing wey my brother tell me, him talk say plenty old people for America, na the thing wey be their life support be that. If dem no get am, plenty of dem go dey live for street.

As for our Obodo country, the problem dey serious as all of us know say plenty of our Leaders dem na day time Pen Robbers. And dem no dey steal small money, na to take all the money wey dey for Reserve na him dem sabi. Our past Leaders don show us the way. Na plenty of us know the thing wey Dikko, Babangida, Abacha, Diya and the rest of dem do to our Oil Money. The question wey I get be say which kind company or people go dey in-charge this kind money wey be say if the thing dissappear he go cause war for Nigeria? And the rogues wey we call our Leaders, no go think twice before dem deposit am to their Foreign Accounts for Obodo Oyinbo. Some people go talk say this kind thing no go happen to this one since na life savings for plenty workers for Nigeria. But past history don teach people like me lesson say plenty of our people wey sabi book na how dem go take thief our money and transfer am to Obodo Oyinbo na him be degree wey dem get for University. Una remember the thing wey dem do to our Oil money with their Khaki Brethren. Me I no fit trust any politicians and Soldiers with my money o, especially for this our country. For Plenty of our people, 419 don full their head and dem go do am without conscience.

But as all of us know say we still get few Leaders wey Family Name dey important pass Money I go support the thing with conditions. I know say our country na a Soverign State but since plenty Leaders wey don rule us in the past na Big Barawos, he go good if we invite IMF and World Bank make dem they among groups wey go manage the Funds for us. He no means say we no belief in our people but as I talk before plenty of our Leaders no get good reputation at all at all and this no be the kind thing wey we go dey get "sentimental" as my brother dey talk. Na our Life Saving and if anything happen to am, he go cause more than hardship to plenty family since na the thing wey we go rely on when we retire be that. Until our so-call Leaders show some good leadership and transparency, me I no fit trust dem with my money because "Oga sir" wey I don dey do since I be small pikin don tire me and I no want do am when I retire.

Na the truth be that my people, make we no deceive ourselves. Our Leaders no be kind person wey you fit show your bank account for morning because when night time come, na dem go lead men of the underworld to your parlor. Na here I go stop my people, make una think before una do am o.

January 05. 2001

No Work No Pay: Wetin Dem Want Tell Us Now?

Na me again my people, how una dey? Na wa for our people o, wetin dem want tell us now? I hear say plenty of our people no go work this past Tuesday. Na my friend Johnny na him tell me o. The man bought one Federal plot for Lagos wey our Federal Government get. Since una know say for our country if you submit your document for Lagos na Abuja. dem go send am for Approval. The man come talk say him no wait till dem send the thing back from Abuja, he come decide say him go go the place go collect the "C of Own" himself as dey on Leave. Na the thing wey make the man go Abuja be that o. He say when reach the place, he be like say people no dey live there again, he say the thing dey empty. Plenty Ministry no open as dem extend their Holiday for another day. Why the rest of us dey work, our people for Abuja dey enjoy for house. I guess say that na Special Benefit for Abuja workers. The question wey I get be say se that na another public holiday or wetin we go call am? Tuesday when everybody dey work, plenty people for Abuja dey gbaladun with their family. I even hear say our Legislators and Permanent Secreataries dem wey we consider Leaders for our Obodo too no show up. Which kind country be this wey holiday no go dey all him Civil Servant go stay home when no be say dem dey on Strike.

As the thing happen now, I no hear a drop from our So-called Leaders wey be say everything wey dey wrong for Obodo dem go talk say na our President cause am. Who dem go come blame now as dem dey among the people wey no go work that day and no be say dem dey leave? My people I don talk before, these our so called Legislators dey lazy and dem no want work. The only thing wey dem sabi na to chop our money. How a whole National Assembly no go open when no be say crisis dey for our Obodo. Come 2003, plenty of dem go go their village come dey ask people make dem vote for dem again. The way our Leaders dey run this country, I no think say make sense at all. The people wey for dey make laws and policies dey busy dey enjoy for house with the money wey dem no work for.

As for our Labour Union dem, wetin dem want talk now? The other time wey Government talk say dem no go pay salary, all of dem dey on the street dey protest. Una want tell me say their Leaders dem no dey for the country and dem no dey read Newspapers? The country wey plenty people no fit find work, the few ones wey get am, no dey go work again. My people se na life we dey live or na wetin? How we go beg for work, once dem hire us, we go come dey do iyanga with the thing again. I wonder wetin our President go do for this crisis? Because this to me o, na crisis when no be say holiday dey. How country go move forward if we dey work like this. That day wey plenty of these people no dey work, una sabi how much money wey our country lose for the thing? I go dey surprise if the thing no reach Billion Naira, if we count all there salary including National Assembly dem.

I hope say Uncle Sege go teach everybody wey stay home for dat day lesson. If to say na me be the President, I go ask my Minister for Finance make him collect all Salary of the people wey no go work that day including our Legislators. Once dem don collect the money, I go come take the money put am for one bank. I go come distribute the money to people wey no fit find work and come tell dem say make dem use am open small business. The money no be say We go dash dem, the thing go be like small loan. Another thing wey I fit do be say, make I sack all the people wey dey involve and come hire some of the people wey no fit find work. Na him be say these our Civil Servants no want work. As for our Legislators dem, since I no go fit sack dem, I go withhold their money come tell each state say if dem no call their Legislators back, I no go release any money for dem. Me I believe say the whole country go support our President for that kind decision, because people no go want hear their complain. Se dem want talk say na our President dey behind why dem no go National Assembly that day?

But make wey talk true, our President no go do anything because the man himself, I no think say him dey serious about moving our country forward. Na this kind thing you go expect from a Serious Leader, no be the the one wey we get for Nigeria. If our President do some of the thing wey I talk, I believe say the whole world go support am for the thing. Na this kind thing go make our people know say the day of lazyness don pass be that. Next time when we get Holiday again, I fit bet una say, plenty people no go miss work especially our Civil Servants.

My people na here I go stop, I don talk my own o, if our Leaders like make dem change and if dem no like make dem continue as usual. As we all know say nothing last forever, one day the thing go end for dem.

January 04. 2001

Make Good Time Roll Our Yankee Brothers Dey In Town

What it is up my fellow Obodians? Is everything Kooleleh? Na my new Yankee slang be that o. That one na one in town my people. As we dey enter Year 2001, I go dey give una my slangs small small. As we reach this new year few of our people don dey go back to their adopted countries. I know say by the time we reach middle of this month plenty of dem go don go back. Men I enjoy this Christmas no be small my people. Make I tell una the kind enjoyment wey I enjoy. My people as we know say plenty of our Away Guys dey come home with plenty money. I know say no be all of dem get that kind money but the few one wey get am, no dey let man rest. I remember the time wey I go party with my brother on Christmas night. Na one of my brother friends wey dey live for Canada dey do am. My people if una see as food poku he be he come be like say na one Minister dey do party. Dem get one thing wey dem dey call "Shish Kebab" that thing sweet. I eat the thing so tay, I no fit open my mouth again. Make una come see assorted drinks, I look everywhere I no see one Made in Nigeria beer for the place including Ogogoro. All the drinks wey dey the place na imported and no be cheap ones self.

I no go lie to una my people, I enjoy the place well well. Make una come see me as I dey drink wine like say na water. I no even sabi how tay reah home as I dey drunk. This kind thing never happen to me before. My brother tell me say I dey behave like person wey never see those kind drinks before. Him talk say I dey act like bush man but him just dey laugh as I dey waka like Papy Lolo for television.

Make una come see our women with different wigs for head dey work their magic. This na real Nigbati party but with mixed crowd. If una see the kind shoes wey those Away guys wear, I know say plenty of dem my salary for two years no go fit buy am. Na the kind shoes wey be say you go want watch your hands before you touch am. As una know say those guys dey like to show off especially when dem dey around beatiful Omoge. If una see how dem dey spray money, he come be like say na another Universe na him I dey. That day my people, I wish say I be woman because I no see one woman there wey no carry at least 10,000 Naira go home. If una see how those guys dey takar, he good make person dey live for Obodo Oyinbo. The few ones wey no spend too much money na my brother and few of his friends. No be say dem no get money for pocket, dem no dey like dey spray. But if una see big big envelopes wey dem give the celebrant and his wife. These envelopes no contain Naira o, na so so Pounds and Dollars dey inside am.

Na this kind party make me remember the thing wey one Omoge wey dey live for our Street talk. She talk say for December time she no dey talk to our Local brothers because she no want make her Away Boyfriends see her with dem. That go spoil her money making business for am. The woman talk say the only party wey she dey go during December and January na the ones wey our Yankee brothers dey give. Na that time plenty high class Asewos dey make money. Come see plenty University Students for the place, I want take style join them but the yeye girls tell me say I no be their type, dem talk say dem sabi the people wey no comot Murtala and the ones wey no dey live for Nigeria. Una know say these yeye girls think say I be House boy for the place even though na my brother cloth I wear but that one no fool dem.

So my fellow obodians, na so I spend my christmas holidays. He no good make person no get rich man friend o especially if you dey poor. Che che, he no good make person no get money because money good for body. Na here I go stop make una dey do jeje o.

January 03. 2001

Uncle Sege Handshake Policy na Joke

How una dey my people, I hope una dey Miliki well well? Wetin dey do our President self? Which kind people wey him get as advisers wey no dey advice am proper? Since he become President na him I don dey hear say the man no dey give bonus to Youths wey dey represent our Obodo for Sports. I hear say the man talk say him no believe say make our Government dey give the people money. I for support our President if our Country na him personal domain but since the country belong to all of us, I no think say this him Handshake Policy dey proper self especially with the kind pressure wey those athletes dey face. He good make we use that as incentive and dey take am encourage dem for the sport since our country dey benefit from the thing too. Besides if the man believe say our Sportsmen and Women dey do am for their country, and he no believe say the thing proper make we give dem small bonus if dem do well, why himself dey get salary for him Post? As he be like say Uncle Sege mean business for this him Handshake Policy, my suggestion be say make we carry that him yeye policy and apply am to Political services especially the kind one wey our good for nothing Pen Robber Politicians dey do. The thing wey Na everybody sabi say plenty of these our Athletes dey use their money dey train for the thing and the thing no be small money. All those things wey dem dey use dey train cost big money. All those people wey we dey see for Television no dey happen just like that. Plenty of dem don suffer gan before dem reach limelight. As plenty of dem don sacrifice a lot to reach that point of their career, he go good if our country reward dem with some cash since we dey use dem to promote our country too.

As for the reason wey our President dey give I no understand at all especially if the man fit give himself and all those cronies wey dey call themselves Legislators and Ministers money, why he no want give people wey everybody know say dem dey do something for the country. We no fit talk the same thing about our Politicians dem including this our President. At least the people wey we say make our Government give money na our Youths wey do well for sport no be everybody. No be everyday our yeye Leaders dey collect money for work wey dem no dey do? No be two years ago we vote for dem? Wetin dem do since then, no be to chop our money? The country wey dem promise say dem go repair still dey bleed. Even self na dem cause plenty leak wey we dey surfer for Nigeria today. Since dem dey collect salary for work wey we no fit see say dem do for ground, I no know how the man go talk say him no go fit allocate money to our Athletes wey be champion in their respective Games.

I hope say the people wey dey advice our President go tell am make him abolish that him yeye Handshake Policy because the thing no dey pay and na joke. If the man insist, then everybody wey dey serve under this government no deserve One Kobo as our country don turn from Frypan to Fire. Plenty people no fit find work, our youths dem don turn to Armed robbers and prostitution finish. So our their President, wetin you and your fellow Politicians don do for us lately? No be say una dey give una selves Bonus wey una no deserve? My people I believe say na all of us like better thing including our youths wey dey represent our Country for Sport. These pikin dem na our heroes unlike our Potbelly Old Cargoes wey dey call themselves our Leaders. Na here I go stop my people ojare, make una dey take am easy o.

January 02. 2001

Wetin Be Your New Year Resolution?

Happy New Year my fellow Obodian, how una dey? I hope say una enjoy the thing?  As all of us sabi say every time wey New Year come, na so all of us go make our own New Year Resolutions. Since the day wey I don sabi Eba na him I don join people all over the world wey dey make promise as the new year come, dem go talk say certain things wey dem dey do before, dem go do am again. Una go hear people wey go talk say this new year o, dem no go dey smoke cigarrette again. And some people go talk say dem want reduce their weight this new year. Na everytime you hear Husbands go tell their family say dem go stop Adultery and fornication, and dem no go dey run after another man wife again. And as for our women, plenty go promise say this year dem go stop dey pursuit another woman husband. And some go talk say this year, dem go find their own husband marry even if the thing go make dem visit i JuJu man house, this year own go be different. As everybody dey make him own resolution, plenty of our Politicians go make their own too. Some go talk say last year na 50 Million Naira na him dey thief, this year own dey want triple am. Plenty of dem go promise say dem go do better thing for their Country which mean say dem go improve their family lives, and na the meaning of their own country be that.

But as we reach February, March & April, all these people wey don promise say dem go bury their old ways, go come dey wear the cloth again. The man wey don promise say him go stick with him wife, as soon as say January reach middle like this, the thing don dey eat am for belle. Few go fight this Womanizer Apetite but as for plenty of dem, he no go reach January 2nd wey another woman go don dey enter their face. Before you know it, dem go talk say just this one woman, from there dem go don turn to their old self again. Na the say for the women wey make the same resolution about men. Some of these women na true say dem want person wey dem go dey call their own but the problem be say the people wey fit marry dem no get money (na money dey rule our society) and since these women don taste better thing, Eba everyday no dey good for their body again. The thing go spoil their Skin wey dem don bleach finish. Small time, that their old Cargo Man friend go call dem say make dem come follow am go out. Na their the temptation go start, dem go compare Johnny the strugling boyfriend and Chief Aniplenty wey fit be their papa but he get plenty dough for hand. And dem know say if dem tell the man say dem no want do again, the man go take him Furnished two bedroom Flat from dem plus the car wey he buy dem. Na from there their old self go appear just like that. Na the end of the resolution be that. And for the smokers own, that cigarette crave no go let dem last because the next day as dem dey go work, na soso people wey dey smoke dem go dey meet for road. Small time the cigarette wey dem put for pocket last night go appear for their hand. The man go just put fire on am, till next year the man no dey think about the resolution again. Na so some people go do till the day wey our Godl go call dem say their time don reach that if Cancer no kill dem first.

As for our Leaders and Politicians own, their resolution dey come true because no be say dem talk say dem no go thief our money again. Their own be say make dem see plenty money chop. And we all sabi say as long na dem dey for that position, the money go continue dey enter their private accounts. Some of dem go even realize pass him resolution as plenty money dey enter our Reserves. Na the thing wey I no understand about this our Government cry about Debt reduction. If we get plenty money for bank, why we no fit pay our debt instead wey we go dey ask foreign governments make dem cancel am or postpone am. Na there I come realize say if our government no ask for debt relief, the Leaders dem no go fit fulfill their own personal New Year Resolution which be say make dem triple the money wey dey their Swiss accounts for Obodo Oyinbo.

My people na so life be o, una know see say our Leaders dem dey enjoy. Everything wey dem put their mind into dem dey get am. If dem want marry your daughter, he go happen even if you no support the thing because if you no gree dem, your other relatives go support dem as dem don send dem bags of rice and plenty Ogogoro behind your back. So the question now be say if dem get that kind luck how come dem no fit do the same thing for our Country wey be say if dem put their mind say dem go improve poor people lives for Nigeria, dem go fit do am but the problem be say that no be part of their New Year Resolutions.

My people na here I go stop o, na every year we dey plan new year resolution but plenty of us no dey follow am at all at all even person wey talk say this year him no go surfer. Everytime the fool go do something stupid, things wey go make am surfer again. Na the thing wey wise man dey call life be that. "Some people have it some people do not". Our Polticians/Leaders get am and me and una no fit get am no matter how hard we try because we no get the means and determinations wey our so called Pen Robbers get.

December. 29. 2000

National ID Project Don Become Cash Cow

How dey go dey my fellow Obodians? We hope say one day he go better. As one of my brothers dey talk, when you ask am how he dey, he go say man no die and he no rottine now. But as for our country and our so-called Leaders, the thing don pass that, I no know the thing wey I go call dem. My people se una hear about the Panel wey dem setup for National ID probe? Before I begin self, wetin be all these panels self wey be say anytime wey our Government want probe people or project dem go create panel? No be say I get problem with am but the thing be say the thing don dey lose him value as our Leaders don yeye am. Una remember the Oputa Panel own wey some Oga Soldier dey cry for the place. Another yeye thing about am be say plenty people wey our Government dey select for the thing na the same old cargoes wey destroy our country. All of dem na part of the problem, plenty of the people wey dem dey probe na their friends and partners. The wey dem dey do am now be say, you wash my hand and I wash your hand. Who dem think say dem dey fool my people? If dem dey serious about all these probes wey we dey see left and right, na young people wey no get anything for corner corner dem go put for the Panel. No be these backhand Associates wey dem put go clean the mess up.

As I dey talk before, no be last week I hear from the owner of the company wey dem give National Id Project to before talk say no be him chop the money wey our government talk say dem pay his company. According to my source, him talk say the government talk say dem award billions of Naira to the man and his companies make dem develop and implement the Scheme about two or three years ago. Dem talk say dem don give more than 75% of the contract money to the Firm. Our government talk say the man collect the money but he no do anything. But according to the thing wey I hear, the man talk say him company don finish the project but the problem be say the remaining work him no fit finish am as plenty of our Ministers dem wey dey for Government want their own cut for the thing before dem go let am finish the rest. He this kind thing dey frustrate the project as the Kalokalo wey dey for our Country no let am rest. Him talk say everywhere wey him go, the "Power that Be" for our Obodo want their own share of the pie. Him talk say plenty of these people na big Government Officials.

My people se una see again, I know say this thing no surprise una. But the thing wey I no understand be say na the same thing everytime, for our Obodo people no dey take responsibility for anything. And the way we dey run things for Nigeria, this bad Culture go dey around for a long time, I no care wetin our Uncle Sege talk. Because if una look am well, na everytime wey we hear say people chop government money, the Onyechi dem go transfer am to their foreign accounts. This money wey dem for leave for Nigeria make dem take am open business and hire those our youths dem wey no fit find work, dem go send am go help another country. Which time wey una hear say dem put these rogues for Jail or kill dem for the thing? I know say the only way we go fit stop dem dey thief money be say if we make people pay for am. If you steal money and no fit give am back, you go pay with your life just like Robbers wey dem catch. Another thing be say make our government seize everything wey dem get including properties wey dem get before dem thief money. After that we go come send dem to Prison or kill dem if to say the thing poku. This probe thing don tire me as nothing dey happen to the offenders. Make our Leaders thank their Mama say people like me no get power for Nigeria, if I get plenty power, na all these overnight Millionaires wey we get for our Obodo go don dey inside Kirikiri or for yonder. As long as our people think say if dem catch dem nothing go happen to dem especially our so-called Leaders, people go continue to thief money.

Se una hear say our Government want issue another contract for this National Id Project again? After dem don waste money for the old one and we no fit say na here the money dey. I bet una say the same thing wey happen to the first contract go happen to this one again. How una go think say the next company go complete the project when dem no be mumu. He be like say na the same companies wey dey inside the "Power That Be Caucaus" go bid for am. Since dem no say the people before dem no do anything. People no dey pay our government because everything wey happen dem go blame am on other people. Na this kind thing wey oyinbo people dey call "non accountability" and him dey for our Obodo and our government be part of it. Plenty people wey dem dey give contract na their friends and families. CHOP MAKE I CHOP NA HIM BE OUR MOTTO FOR NIGERIA, and I no think say the thing go stop for this New year. But I go dey pray say this New Year go dey different. But since I get small sense for body, I no go hold my breath for the thing.

Na here I go stop my people, he go good if all of us change our bad manners. If our country go better, na all of us go put our small kobo to am, and I hope say this New Year na the end of all these infighting for NIGERIA be that.

HAPPY NEW YEAR TO ALL OF UNA, MANY YEARS TO COME!

December. 28. 2000

Budget Allocation Want Cause Wahala For Our Obodo

How una dey my people, I hope say una enjoy the Holidays? As New Year dey around the corner na him I say make I talk about the fight wey various Regions want start with our Federal Government. Everywhere you go you go dey hear say our President because he no too like dem na him make am allocate small money to their regions. Whether na Kano you go o, or na Port Harcourt, na the same cry you go dey hear. My people for Delta talk say since na from their area we dey get Oil, why be say the money wey Government allocate to dem dey small compare with other area wey no dey contribute anything to our Reserve. Some talk say because our President na Yoruba man, plenty of the money na our South West people he give am to. And as for my people for North, dem talk say the Federal Government no allocate plenty money to their area as na dem need am pass. My South West people talk say since most people wey dey live for our Obodo na their area dem dey, as people all over Nigeria dey come there come live, dem no understand why Federal Government allocate small money. Dem talk say plenty of the infrastructures wey dey for Nigeria na their area, because of that all the structures don dey scatter scatter as plenty people dey use am. Dem talk say our Government must give dem plenty money. My people for South East talk say since 1960s na him our Federal Government dey discriminate against dem, dem talk say plenty infrastructures wey dey for other areas no dey for their region. Dem talk say few Bridges and and Federal Roads wey dey their area don become Death Traps as Federal Government no give dem money to repair am. Dem talk say if you look overall money wey dem allocate dem, dey small compare to other regions.

My people the question be say as everybody dey talk say our Government dey Marginalize dem, which one wey our Government no discriminate against. Una see say we no see one region wey talk say our Government give dem their own share. Me I like this kind thing as all of dem dey fight for their region. But the only thing be say plenty of these regions, the money wey dem allocate dem na the "Power tha be" and the Politicians dey chop am, no be the masses. As he dey so, plenty Politicians don become Billionaires as dem gradutate from Millionaire Circle. All these wealth na from the money wey dem thief from our National Treasury. He for good if all dem think about the masses and their regions first before dem take the money buy House and Expensive Cars for their yeye Girlfriends wey dey live for Oyinbo Countries.

I hear say some regions dey talk say since plenty of their people vote for our President, dem no sabi why Federal government no fit allocate plenty money to dem. My question be say which kind yeye talk be that? Wetin different between that yeye talk and bribe wey plenty all over the world sabi our people for? Una want tell me say because some people no vote for our President, make the man no allocate money to their regions as dem no vote for am and his party? If we talk say the money belong to all of us, wetin una want make those regions do since dem no vote for our President? Na this kind thing dey spoil our country my people. He no mean say because person or groups no vote for our President, we go come take their entitlement away. If to say na so everybody dey do, this small peace wey we get for don Dabaru. I thank God say the Executives no follow that kind talk or Advice. Na here I go stop, make una dey do jeje o my people.

December. 25-27. 2000

How una dey my people? I hope una dey enjoy una holidays. As una know say for Nigeria, Wednesday too na Holiday since na the day wey our Muslim Brothers dey celebrate Eid-el-Fitri.  Me too go join dem as una know say na all religions me dey celebrate. I go dey talk to una tomorrow as my God and Allah don talk am. I beg make una take am easy with the free Beer wey una see for una table.

December. 22. 2000

Our Leaders No Fit Comot Barawo For Body

Happy Ramadan, Merry Christmas, and Happy New Year my People? The days don almost here o, I know say for some of us the thing be like another day. But as for our Leaders and Politicians, next year go better for dem gan as dem just allocate Billion Naira to themselves. One of my Sources talk say if I see how happy our Legislators be for Abuja as dem dey pass another Budget for themselves and the Executive. He say plenty of dem dey talk say na brand new cars dem go buy this coming year with their own share. I even hear say dem talk say the money wey President Obasanjo put for Budget for National Assembly dey too small, and dem come add plenty Jara to am. My people, wetin dey wrong with this picture? As I understand am for normal society, if you work hard you go get your salary without any wahala and if you no work, you no dey get any money not even One Kobo. But for our Leaders, this their national service self na road to Billion Naira Chop Money Allocation. Wetin these people go tell us say achieve now? Since last year wey we send dem to Abuja, we no fit see the benefit for the whole country except their family. Instead na more misery and deaths na him we dey get. Petrol no dey and because of this people no fit go work, as for water unless you want go Bar Beach go get water because the one for Tap don dry. Armed Robbers don become Kings and Queens for our Obodo. Instead make Police dey fight Men of the UnderWorld, na Ethnic Groups like Awesu, Bakkassi, OPC, and Arewa na him dem dey fight. Plenty time, the guns wey the robbers dey use na our Police dey supply dem. The few lower class wey we get for Nigeria don disappear, na only poor people dey for our Obodo now. Poverty don kill plenty children as the parents no get money to feed dem. Our youths don turn to Cult and Prositution for University. You go Bustop, you no fit sabi who be PickPocket and who be Passengers as everybody look like Barawos. And as for NEPA, everything still the same, I no think say those people go ever change, no be curse.

As narrate all these things for ground my people, all these problem dey there before our Politicians carry their Agbada go Abuja. During their campaign dem promise us heaven and earth. Instead make the country better, na our hardship and suffering increase while our Leaders bank accounts triple. I no fit find one thing wey I go say dem do for us since this their yeye democracy enter our Obodo. But na everybody sabi the thing wey our Politicians and Leaders get from the thing as dem dey distribute Billion naira among themselves and their cronies. The first one na Furniture allowance wey each senator pocket N5 million instead of 3.5 million naira wey dem announce. If these people dey serious and get heart, se na furniture money dem go dey share among themselves when their own people dey surfer and dem no fit afford one square meal a day. Then transportation allowance, wey all of dem dey use our money buy expensive car when people no fit afford Phensic for Chemist place. I know say plenty thing dey when dem do for secret wey we no sabi but one day go be one day wey the landlord go come home catch thief wey dey steal him chicken.

So my people, why we dey pay this people self I no sabi? I don talk am before he no mean say we dey under Civilian regime things go change. How many of these people wey dey for Abuja no be part of the previous regimes. Whether dem be General then and come change to Chief now na this greed you go find for their blood. I no fit sabi one person wey dey for National Assembly wey no thief money before. The executive na the same thing. The money wey our President thief before na him he take build him Farm Business for Ota. Una remember OFN, all the machines wey dem buy for the thing, I no need to tell una where the thing dey. Se una see all the people wey call themselves Senators and Congress, plenty of them na former Ministers and Governors. The same thing wey dem do in the past na him dem start again. The thing dey for their blood and I believe say their mama born dem with am. Barawo na their Middle name. I dey pray say one of these days the thing wey happen for Ghana go happen to plenty of dem as dem no care about us the commoners wey no fit find food feed our family. Plenty innocent pikin don go yonder because their Parents no fit afford medicine money to cater for dem. My people na here I go stop o, I hope everybody dey pray say make God send us another Messiah because our so-called Leaders na Wolfs in the Sheep Cloths.

December. 21. 2000

How Come Our Govt Dey Make Things Hard For Us?

How dey go dey go my fellow Obodians, I hope say una don ready for Christmas and New year o? I hear say Nigeria Custom don ask all the Oga from Salary Grades 10 and up make dem come Abuja come take Exam before dem go promote dem. As I hear am from my source, plenty of these ogas no dey happy as the few ones wey go Abuja na Men of the underworld ambush dem for Road. Na so dem comot their money and belongings, some people even get accident for road. But make we tell the truth, I no say think say na because of the robbers na him make the Custom Officers no want go Abuja. Plenty of dem na through their Uncles, Brother concubines, Sisters' boyfriends and Men and women friends dem take get the work, no be say dem sabi book or dem go University. Dem think say if dem go take the test dem go fail am as their brain don pafuka, the few brain wey dey left na for Chop Money (Egunje) wey dem dey collect for Ports. Na this make me remember one thing wey don dey bother for a long time, na about the way our Leaders dem dey run Government, he don tay wey I say I go talk about am

How many of una go Ministry wey dem tell una say una file, dem don send am to Abuja and make una come back? Or una go Ajegunle go collect application wey una submit for work and dem tell una say dem never hear from their Headquarters for Ikeja.? Plenty time person buy land and come go Ministry go register the thing. Nine months after, you go back make you go collect the C of Own, dem tell you say the thing still dey their office for Kano? I remember my sisters wey be teacher for 35 years and she retire from the thing about two years ago. Last year when she go their Enugu office make she go collect her Pension, dem tell am say since na new Government dey for power, make she submit another papers for the thing. My fellow Obodians, where una hear wey Government go dey cause wahala for her people? Why be say instead make our Government make life easy for us na the opposite we dey face everyday. The question wey I get for these yeye people wey dey call themselves Civil Servants and Kolo Ministers be say, which kind Crazy people make the yeye decision wey person go submit paper for Lokoja and una go dey send am to una Lagos Office? Se dem want tell me dem no fit hire person wey sabi the thing for Lokoja wey be say na for only Lagos dem go fit do am? Why be say for our Obodo, na to make life hard for person na him we sabi? Why our Government no fit create the same office wey dem get for Abuja or Lagos for all the states wey be say if you need some information the regional office go fit do am instead wey dem go dey send am to Abuja or Lagos? Plenty time self, the thing wey for take one month go take years. He go good if dem go fit approve the thing for regional offices instead of their  Headquarters where the people no want work,  na Egunje dem go dey run after. As for the State and Local Government, he go good make dem open offices near people instead wey be say anytime wey we want something from our Government, na so we go pack our load and the few life savings wey we get and come dey go their office 250 Kilometres away, and plenty time the person wey go sign am no go dey the place. Na this kind thing dey cause make people dey offer or take bribe be that, as the wahala too much. I know say I no too sabi book but I get some sense, but he be like say these our people wey sabi book no dey use their gumption at all, plenty of the wahala wey we get, na their too know dey cause am. He go good if our Leaders make the Government work for us instead wey be say na us go dey work for dem. This dabaru wey we get for our Obodo don dey too much and he go good if we re-organize our Ministry. If we submit paper for Lagos, he go good make dem approve am there and send the copy to Abuja for record keeping no be say na both the original and copy dem go send Abuja for approval and the thing no go come back till another person enter government. Another thing wey I no like be say make person submit paper for Ministry and dem go come tell you say the person wey go sign am don go leave, una want tell me say if the person die, no be somebody go sign am? Why we go dey wait for person make dem come back from their Leave, because we go receive service from our Government? As if to say no be our money we go pay. Una want tell me say na only one person sabi the thing? He go good if we do away with plenty of these useless policies wey no dey work. Na here I go stop my people, make una dey do jeje o.

December. 20. 2000 (From our Archives)

Ha ba Pastor! Na wetin be this?

How una dey my people, I hope say una dey kampe? As all of una know say my brother dey for town and plus say na Holiday season na him we dey I no too dey get time write my tory but I promise say at least una go dey hear from me three to four times a week during this Yuletide. Once the holiday don pass, my Oga don talk say him no go allow this kind nonsense again. Since he don talk so, na everyday I go dey write my tory since na through my brother I tay get this I no want make he  talk say I be typical Nigerian and another thing be say  I no want make dem sack me.

Make una read this tory since na Holiday time we dey and plenty Pastor go dey in Town from Oyinbo Country as Holiday dey. Make una enjoy am, I go dey talk to una tomorrow.

This thing wey I want nak story about no dey easy for me. Plenty of my brothers and sisters  na members. But as I don talk am say nothing wey I no go do to make our Obodo country and her people better. This na about Pastor dem  wey be the leaders for  church. As thing dey get worse for our obodo country na so people wey we put for position of power come become selfish, unkind  and dubious. Plenty of dem no get moral again. For Nigerians both the one wey dey home and Oyinbo Country, the thing many our pastors dey do, I no thing say God go dey happy about am at all at all. Nowdays, you go hear plenty Pastor wey dey give people wey dem say make dem pray for belle. Many of dem get wife for home but dat one no do dem. Na all these young women na him dem go dey prey on.The thing wey I no sabi be say plenty of these young women get husband for house. I still remember for Bible wey I read for school wey dem talk am say make person no commit fornication and make we no look our neighbour wife. And na this same people wey God put in charge na dem be governor for the thing. I no fit see the thing wey dey under this earth wey dem never try. Some go go Babalawo place for power. If you comot some pastor cloth, na so so Onde  (charms) na him you go see. Ha ba na wa oo. As for the one wey dey oyinbo country, plenty of dem no want work. Una know say Oversea country no dey easy for our people as my brothers wey dey oyinbo country tell me. Plenty of our brothers wey be pastor na dem wife dey work. Some of the women na three jobs dem get. Na so so excuses and tory you go hear from our  brothers wey dem go say na God work na him dem come do here. And for Obodo oyinbo, no free lunch, if you no pay your landlord rent, him go throway your load and put am for outside. My mama's pikin no dey for oyinbo country. Plenty of those pastors na young men, because God give some of dem spiritual power, small time you go hear say dem don open their own church. As the thing don become business for our Obodo country na so he be for Oversea. Even self, he don reach stage wey be say church plenty past members. Pastor con poku for oyinbo land. Na this same pastor you go hear say him give him church member wife belle. Me and everybody know say the Pastors wey dey do this kind thing na minority and dem no plenty pass the good Pastors. But the thing wey I go say be say he go good if our Leaders for Church Denominations go make law wey be say as we know say country dey hard, make dem allow Pastors dey work. And as for the one wey dey oyinbo man country, he go good if all dem get work instead wey dem go put all the load for their wife and congregation head. The bad one wey dey give church bad name, make dem comot dem. Because time go dey wey people wey dem take him wife or give him wife or daughter belle go take dem go court and dat one no good for our religion o. I beg make una stop this bad thing wey una dey do before God wrath come fall for una head.  Na here me go stop, make una take this world easy o.

December. 19. 2000

Politicians Watch Your Mouth, No Cause Katakata For us

How una dey my fellow Obodians? Make una no worry, He go better one day. Plenty time I dey hear our Leaders for North dey talk about Injustice wey dey go on for our Obodo. And as we sabi now say na democracy system na him we dey, person fit talk anything him want, the government no go fit send Assassin after am. But at the same time, he go good if we dey watch the thing wey dey comot our mouth especially if we be Leader for our society. 

For the past weeks now na him our Northern Leaders dey talk say since dem don free OPC Leader Fasheun wey be Yoruba man, he dey fair make dem also release all the Northerners wey our Government put for Prison for murder in Lagos. Since our Government no answer dem, dem don begin dey talk say he be like say we get two different laws for our Obodo, one for Yoruba people and the other one for the rest of us. Since I no too sabi our Law I no fit talk say na so the thing be, but the talk say say palava fit happen if our government continue to ignore dem dey dangerous. If we look at this thing well, he don tay wey our Politicians for North dey talk say the way Uncle Sege dey rule the country no dey good for dem because the kind benefit wey dem dey get before no dey again. As I talk before, na all of us know say we get freedom now, we fit talk anything wey we want. But the only problem wey I get be say, if we start dey cross the boundary because we no gree with the government. My people, the kind talk wey these leaders dey talk now don dey tire me and the thing dey dangerous. Na Yoruba people dey talk am say ‘word na like egg, once you break am, you no fit put am back” These propaganda wey our Leaders start don cross the Line wey I go talk say our Democracy support. These words of mouth go cause war if these yeye leaders no watch their mouth and put am for bucket. He be like say as dem for top now, dem want try anything to get their glory back. Before now, na marginalize talk we dey hear from their mouth. 

 My fellow obodians , una sabi say I hear the thing so tay, I come begin dey think say dem don change our Country name to am, since na the new word we dey hear from our Politicians be that. When the thing no come walk, our Leaders for North come shift gear, courtesy of OPC wey kill plenty Hausa/Fulanis for Lagos. But I no go blame dem o, because I no remember say our Government put person for Kirikiri for the destruction. I know say dem arrest plenty people, but the thing wey I hear be say , our government don release plenty of dem. The question I have for my Yoruba people be say wetin happen to people wey cause this katakata? As I understand our law, if you kill person or you destroy person house, you must pay for am. Another question na to our Police, wetin happen to all the people wey cause this wahala? Where una put dem? He go good if our Government go treat everybody the same. But he no means say our Government go put person wey no dey involve for the thing just because say na him be the leader of the Group. If dem get proof say the man ask him Boys make dem destroy houses and kill all the Non-Yorubas for the area, then our government must charge am for the crime. But the talk say since dem don release OPC leader our Government must release Northerners wey dey inside Alagbon na nonsense.  I hope say our Northern Leaders go find another music play because this one own no be the kind music wey people want dance to. I hope say somebody go caution dem make dey “Me Chonu” as my Ibo brothers dey say am. Which kind excuse our Northern Politicians go give if some of us wey be poor masses come take their word serious and begin dey fight Non Northerners? I beg if we want dey continue dey call this country Nigeria, we must mind our Mouth before the thing cause trouble or put the country for war wey we no sabi wetin the end go be. Na here I go stop my people, make una think before una open una mouth my fellow obodians.

December. 18. 2000

The War Wey Dey Within, Brothers against Brothers (From our Archives)

I beg I dey sorry for my absence yesterday, na something happen for my Village. Wetin dey go on for our obodo, na so so bad behavior na him poku for our country now. Every where wey you go na brothers dey fight brothers, and sisters dey quarrel with their sisters. Na so I go my village yesterday because my family don become Bosnia, my Village people want make coffin makers and ground digger rich. This one na because of something wey be say years ago, you no go even hear make people cough about am. Na him I come search my belle and I come ask myself say wetin dey go on for Nigeria. Every place wey you go people dey quarrel. Army dey fight Police, Christian dey fight moslem, Ife people dey fight Modakeke, the people wey we know before as calabar dey fight demselves. Abia and Enugu no gree, Iwo people don kill themselves over who go be the next king. Kogi people don draw line for ground over politics, Middle belt and Hausa no dey see eyes to eyes again. And the relationship between Southerners and Northernes don go sour. My people, wetin dey wrong with us wey be say, this democracy wey for promote understanding and openness no dey work for us. Instead na war, strike and religion fanaticism na him we dey breathe for our Obodo. No be around this time last year na him Ikare, Ijaw and Itsekiri dem want kill their own race over oil. Na so so dead body na him we see for Television. For two weeks now people wey be civil servant dey strike; and me I no know the thing wey dem dey fight for, because the money wey dem dey ask for , na Mama Oloja and Molue drivers go take am from them. Even self, una know how I feel about them say dem no deserve am. I still dey wonder who their leaders be wey be say dem no feel call dem people to order. Everywhere you go, na so so fight destruction you go see for road. My question be say if una destroy everything, who go pay for am. No be us poor people again go surfer am. All this money wey una dey ask, where governments go get am especially for my state where gari wey dey easy to produce, the government no fit do am. Small time una go hear say dem dey lay people off.

As I dey talk before, now for Ikare and Akoko I hear say plenty people don die. Plenty houses don burn for two communities wey dey fight over throne. If you trace dem root, dem be family o. The thing wey I no sabi be say if you look am, na poor people dey do all this quarrel o. The two royal family wey dey fight for this throne I go surprise if their pikin no dey Oyinbo country. Even if dem dey our obodo, you no go see them carry cutlass dey fight. Na we poor masses go kill ourselves for them. Na wa for us my people. As dem dey talk am for my village say "Monkey dey walk Baboon dey chop". The question wey I go ask my people be say, why we no dey learn. Small time now this problem go end, and the Rich man go become king. If he come happen say some of the people wey dey fight for the king come get pikin wey want married the king daughter, na dat time my people go know the thing wey dem dey call Caste System for Ghandhi country. If to say the king dey speak your language now, wait when this kind thing come happen between una. Na dat time you go hear who born you. Na so so grammar you go dey hear from your new king. The person wey dey say una be the same before, go turn around and tell you say you no no your gang. If Even self; why be say now, we no dey see person wey poor become king. Una want tell me say every royal family for our Obodo now get money? I no believe am, the only answer wey I get be say, person wey no get money for royal family, no dey become king even if Oracle choose am.

This plenty fight for our country dey give us bad names. I no go surprise if our country come break up because as I talk before, this democracy don turn cracy for Nigeria. People no dey sabi tolerance again, if quarrel happen between two people instead make dem settle am jeje, na cutlass go end am. Which kind water wey we dey drink wey be say the time wey we for dey enjoy the fruit of our labor, na war we want start. I beg my fellow countrymen and women, make una look before una leap to destruction o.

December. 15. 2000

Ridicule wey our Fellow Nigerians Dey Face for Sky

How dey go dey my fellow Nigerians? Small small life go better. Since Christmas don dey come, few people wey get money go market go buy cloth for their family. And the rest of us wey dey pray say make God send Manna to us, go go Bosconer go buy "pass me down" Cloth and Shoes for our family. And the few people wey get family for Oyinbo Country go dey pray say make their people send money. As all of us know say plenty of our people go come home for Christmas, some people go comot Lagos go Ijebu or Enugu, while some go comot Kaduna go visit visit their family wey dey Ikot Ekpene or Akure. Plenty of Our people wey dey Obodo Oyinbo go come from America or London. And the Asewo wey dey among dem go come home from Italy come show their family plenty Jewelry wey dem buy with their Trade money.

Na this make me remember the thing wey I read for paper about the humiliation wey our people dey face for Plane. I know say plenty of us wey no sabi where Murtala Airport dey no go believe am because na all of us know say na only people wey get money fit travel comot Nigeria. The money wey Travelers dey take enter Plane no be small o my people. Una sabi say I want faint the day wey I see my brother Plane Ticket, na style I take look am o. The Bobo pay $1,500.00 each for him family. When I ask Mallam wey dey for our area make him times am for him, him talk say the thing na about N172500.00 Naira for Black Market. Na him be say my brother and him family wey reach four pay that kind money. I know believe say my brother go take that kind money enter plane and him go dey tell us say him no get money, say America no easy. My people poor man dey surfer o, If I get that kind money for hand I know say my Village people go make me Chief. But the question be say with all this money I hear say our people no dey get any respect from Airlines people. I know say the thing wey I read for paper talk say British Airways dey yeye our people for the thing. Dem say dem dey treat our people like say dem no be person. But dem fit put our money for their Oyinbo banks. But some people talk say no be only British Caledonia dey do am, dem plenty gan ni. Even self I hear say our fellow African Airlines too dey do am. My brother even talk say Nigeria Airways dey do am before dem pack off when dem dey go America. Him talk say the people go give you food wey dey cold and if you ask dem say make dem change am, the kind look wey dem go give you, he go be like say na dem pay for your ticket. My people una know say our women get that eyes proper and dem sabi use am too. My brother talk say dem go ask you say "wetin you want make dem do with the Food?" Me I no know say na so dem dey treat people wey poor man like me dey call Oga Money, the honourable Oppressors.

True true, if to say na so dem dey treat our people, our government must stop am. Me as I dey so, I no dey tolerate any nonsense, I know say I no get money but I get pride. If person no treat me well me too go disgrace am. Me Honourable Pa 'Mugo no get money but I get plenty mouth wey no dey close, and the thing no dey fail me at all. If these Airlines no fit respect our people, make our government no allow dem make dey come our Obodo country. I no blame dem o, na our yeye Leaders wey because of bribe wey dem dey give dem, na him dey make dem look the other way when dem dey disgrace our people. I no think say people like President Gaddafi go tolerate this nonsense for their country but our leaders the chop money wey dem put for their Bank account for Switzerland don comot their better brain. He go good if Nigeria Authority go create branch wey go dey monitor this kind thing. If people no fit respect us, make dem no come our country. And as for our Nigerian Airlines, if dem know say dem no sabi their work, make dem comot the thing. I go talk also say some of our people too, their behaviour no dey good and he remain small. Especially our so-call Rich people wey dem think say na their parlor dem dey for house. Dem go think say na their housemaid dem dey talk to. I sabi one Air Hostess wey talk say plenty of our people no dey give dem respect. Dem go talk to you like say you be their servant for house. As our Yankee Brothers dem talk am, 'he take two to tango Abe wetin dem dey call am?' He go good if all of us treat our fellow men and women well. Na him my mouth go stop today, I go dey talk to una, make una dey do jeje o.

December. 14. 2000 (Tory from our Archives)

"Give Am Chance He No Get Break & Our Road Na Death Traps"

How una dey my people, I hope say una dey cool am jeje? I say make I bring this my comment back from our Archives because of the accident wey dey happen for our Obodo almost everyday. Una know say for about Two months now, I don count about 20 Motor Accidents wey happen. This yeye accidents cause close to  500 Lives wey there time never reach. Plenty of the accidents na the thing wey we fit avoid if to say we dey take am jeje and follow traffic rules. Plenty of the thing na because we dey rush and we too dey claim our yeye right wey be say na death he dey cause plenty of our people. Na beg I dey beg una make una  take am easy if una dey drive or na una be passenger. If una see Motor wey una think say he no dey safe or the driver dey craze make una comot for the Motor and wait for another one. The life wey una save fit be our own or our family own.

Plenty of us dey drive like say we don smoke Igbo or some people for village don put Juju for our body. I know say plenty people wey dey drive for Nigeria no get training and the people wey for do am, the money wey dem want chop don enter their brain. Another problem na plenty road wey we get for Nigeria. Plenty of the road self I wonder if our Leaders no dey pass am because even person wey don Kolo go know say the roads bad. I wonder wetin all these yeye Contractors wey do road think about their cheap work wey dem call road? Una go see some road he go be like say na ants build am as the no make sense. He be like say plenty road for our Obodo, dem no get plan at all, Some roads be like the people wey do am dey blind and dem no fit see self.

I no sabi why our goverment no fit ask Julius Berger and their fellow Contractors Warranty as dem dey do am for Obodo Oyinbo? Plenty of these Companies self I no sabi dem at all at all, una think say the yeye work wey dem dey do for Nigeria dem fit try am for their country? But make una no blame dem na the yeye Nigerian Road Inspectors wey call themselves Engineers I go blame. The bribe money wey dem dey collect from these Contractors don enter their empty head. As I talk before, everybody go reap wetin dem sow for this life. Na so the thing be o.

Una hear that my people? Na so he be for our country o. I know say some of una dey laugh for this kind thing but I know thing say he dey funny. Make una see, how our government go allow this kind thing for our road. You go see some motor for night wey no get light.  If you go garage, plenty of the Molue and Danfo wey dey there,  don tey wey mechanic check dem. You go see some for road wey be say the front go go right and the rest of him body go go left. Na so he go full so tey some passenger na for the door dem go dey. I remember when I still be small pikin for Lagos, if I see bus wey dey call Oshodi, Oshodi, I no go enter am untill the bus don dey move, na him I go come jump inside. He don dey tey wey I dey do this kind thing. One day I dey for Lagos Island dey go Palmgrove na him I come see this Molue wey don full. Na so the bus dey make noise like machine wey dem dey take grind pepper for Ijebu. If una see the bus as he bend? He be like say the thing want tumble for ground as most buses wey dey ply our road be. As I no want wait na him I come jump. since say the thing full gan, na him I come hold on to the door. Even self my two feet dey on top of another man feet. As God go catch me, go slow no dey for road. Na so my fingers and my arm dey pain me as I no fit grab the door well well. Oh boy I remeber my grandmother wey don die dat date. As una know Lagos people be, na so people dey push me o. I think say I go die that day. The reason wey I tell una this tory be say for our obodo we no get law, we the people dey live dangerous live, You go see some motor wey you go dey see ground for inside. Some taxi self no get cushion for their sit. If come be say you dey go far, you don die be that because your yansh go pain you so tey you go think say na secondary school you dey wey your teacher dey flog you. If to say na the day wey God want punish you for all the bad thing wey you don do, he come dey rain and the taxi no come get winder, your body go soak so tey, you go think say you dey inside river Niger. Se una want tell me say we no get people for Ministry of Transportation wey dem hire for this kind thing. Dem dey, as I talk for the other day say our civil servant yeye. Dem dey somewhere dey take bribe. Na the reason wey plenty of our people dey die because our road and motor wey dey na dead trap. If you go Igbobi, you go see plenty legs wey dem hang. Na so dead body full our general hospital.

So my people, where we dey go from here? Una know say our government no fit do am alone. I beg una,  make everybody do him part well o. Nigeria na wa country o,  make una think about am before una think about una self.  

December. 13. 2000

Nigeria Don Become Killing Field

I no dey happy today because of the thing wey dey happen for our country. Every time wey I hear say people die for our obodo, I dey ask myself say how the person or people tay die now? Whether na North you dey or na for South, people life no safe again. Today na this Judge die, tomorrow na Company Director, yesterday na Lawyer the thing reach. I come dey ask say where our Security People like Police and Army dey and wetin dem go do to prevent all these killings wey dey happen everyday? Another question be say wetin dey cause all these killings self? This death no be say the people sleep and dem no fit wake up o. Before we get plenty Old people for Nigeria, but for now no be say we no get dem but the thing be say plenty of dem wey dey alive no get money. He go tay  before you go find person wey get plenty money and still dey old. Because as una know say money na power, if Chieftaincy  position open for village and the people wey dey run for the thing think say person fit want join the race, na so dem go send the Night Crawlers make dem go comot am from this world . And una know wetin that one mean? Na men and women of the underworld dey cause am. As the thing dey go now, we no sabi who be who again as crooks don plenty for our Obodo. Before crooks no too dey get money, but as the country change na so the life our Nigerian Criminals. Plenty of people wey get money for our Obodo now na Rogues. I no go mention their names or titles as una  sabi  the people. The first thing wey I think dey cause these deaths na Business deals. Na everybody dey dey afraid for business matter now because trust no dey again. Greed don become our National Anthem, and Crime na our motto for Obodo Nigeria. The decay don turn family against family, brother against sister and Northerners against Southerners. People no dey die natural death again as our people don sabi how dem fit yamutu their business partners and keep all the money for themselves or sometimes, na wife go plan say make dem go kill her husband because of money. Na him bring me to some of the people wey we hear say dem kill recently. The Insurance Managing Director wey dem kill with that Canadian Man, we no sabi who dey behind am. And as we no fit blame our police for every crime wey happen for our obodo, wetin our government go do for this tragedies wey we dey face almost everyday. Nigeria don become country wey be say plenty of him people wey dey Obodo Oyinbo no want come home since Hired Killers and Armed Robbers don become Chiefs for Roads. The man wey dem say Assasin kill for Lagos now, I go surprise if we find out say money no dey involve for the thing. As I talk before, people no dey fight with their hands again, na Hired Killers dem go send make dem come settle the score. No person life safe again especially if you be big man.

  Politics na another thing wey dey cause the thing. As we know say politics na dirty game but the one wey we get for our Obodo don become Deadly one. If person know say you fit beat am for election, dem go just send Dr Killers dem make dem come visit you for house. People go do anything to win election, una see the thing wey dey happen for America, only be say that one no involve killing wey we know. But for Nigeria we get our own style. The thing no be say now he dey happen o, he don tay wey our Leaders dey play this kind Politics. Una remember in the Sixties especially for Yoruba Land, plenty die because of Politics. I know say plenty of my Yoruba brothers remember Action Group. Na the reason wey plenty people for Ogbomosho no support our Late Papa Chief Obafemi Awolowo be that.

But these new ones dey different. Hired Killers don  become the Executioners whether the person dey guilty or not, as along you give dem their food wey be money, dem go finish the job. The only thing wey I go talk be say na all of us go reap the fruit wey we sow, all the people wey dem kill May God have mercy on their souls if their hands dey clean. I go dey talk to una tomorrow as my Father don talk am, make una dey do jeje o and treat una other people as una want make dem treat una.

December. 12. 2000

Silent Death: Cry From Our People For Obodo Oyinbo

How dey go dey go my fellow Obodians, I hope say una dey cope? I no know if una remember say my Brother wey dey for America don come home for Christmas. Since the man don tay for Obodo Oyinbo na him I tay style ask am about the thing wey dey happen for America. From general questions I come take style ask am how our people wey dey Oyinbo Country dey cope? Na this question come lead to this one wey when I ask say how our People dey cope with some of us wey dey home? Na him the guy come ask me say wetin I mean, make I explain myself? I come ask am say wetin our people dey talk about us wey dey live for Nigeria? Na him come talk say na everybody for Obodo Oyinbo dey complain about us wey dey home. I come ask am say if him too feel the same way? Na him come ask me say which kind yeye question I dey ask am? He come talk say se him no be Niija (na the name wey our people wey dey Oyinbo Country dey call themselves be that, the thing mean Nigerian)? I come tell am say no be so, I just want ask am if him too feel the same way? Na him he come talk say If I sabi why people dey complain? I tell am say yes, with all the bad news wey dem dey hear about our Leaders dem and the country. Plus all the crime and fight wey people dey hear about our Obodo for CNN. Na him the Bobo tell me say that one dey but no be the main reason why people dey compain be that. I come ask say na wetin then? Na him my brother come begin o, he talk say plenty Nigerians wey dey Obodo Oyinbo dey complain say we too dey ask for money. He talk say if you ask any Niija, whether na Japan the person dey o, or na for Europe dem dey live na the same complain dem go dey complain about their people wey dey here. Him talk say the thing don become inside joke wey be say when you ask your friends if dem dey hear from home? The people go talk say 'no mine those people, dem think say money dey grow for tree for Oyinbo Country". He say plenty of dem dey talk say every time wey you hear from home na about money. My brother talk say plenty Nigerians talk say people wey dey home too dey lazy, the only thing wey we sabi na to chop money and drink beer. Any time person die for family, na dem wey dey live for Obodo Oyinbo we go call. He say the thing wey pain people pass be say na everytime wey dem receive letter from home na always about money and bad news. Him talk say plenty of us wey dey live for Nigeria, no too dey ask about their family and how dem dey. And plenty time, we no dey send cloth or goods to their pikin or their family as if to say dem no sabi how to wear Nigerian Cloth.

My fellow Local Obodian, una know say my brother dey talk the thing with passion. He dey act like say na the same way him feel about the thing. I come ask am again if he feel the same way? My brother come talk say wetin I think? "Make I no ask am stupid question." He come talk say all of us na the same, we too dey ask for money like say we be beggars. He even talk say at least beggars go say thank you but no be us. If dem send us money we go dey complain say the thing dey too small. He talk say plenty of us wey dey here we no fit survive for Oyinbo Country because dem no tolerate Lazy people. Na from my brother I hear say because of pressure from home, some people go pack comot their house make people for Home no sabi where dem dey live. He talk say no be say people no want help but the pressure dey dey too much sometimes. He talk say the thing dey worst if na only that person dey for Oyinbo Country and him come get plenty family members for Nigeria. He talk say no be say he dem make excuse for people wey dey do fraud, but few of dem na the thing wey dey push dem do the thing be that as dem want do everything to impress their family. And the few ones wey no fit cope don turn to drug as their helper. And some of dem, the thing don bring high blood pressure for their body, dem go develop disease wey dem go treat till dey die.

My people, na from my brother I hear the kind surferness and pressure wey we dey cause our people for Obodo Oyinbo. As the my brother dey talk, he come be like say na me the man dey direct the thing to. But since man must wack, I tell am say na him problem be that. But deep down, I know say the man dey surfer for corner. I come tell am say plenty of us no be say we no sabi the thing wey dey happen, but na situation for our yeye country wey turn everybody to Alamajiris. My fellow Obodians, I hope say we go take am easy with dem o if we no want lose some of dem especially the young ones. Na here I go stop, make una dey do jeje o.

December. 08. 2000

Who We go Come Believe My People?

My people na wa o, how dey go dey go? I know say plenty of us dey follow the thing wey dey happen for Oputa Panel as our Leaders dey expose themselves for all the bad things wey dem do when dem dey for Power. Plenty of dem that time believe say dem be Untouchable and na their papa get our Obodo and the rest of us na their boyiboy. As we dey hear different tory from these people the question be say which of dem dey tell us truth? Today we go hear Mustapha talk say him dey clean and that during Abacha Regime him save plenty people life when dem for don kill dem. Next time we go hear other people go talk say plenty of the killings na Mustapha be the Man-in-charge. Some of dem talk say the man na right man for Abacha Circle. The following day Mustapha go talk say na lie the people dey lie, na him make we believe. He talk say plenty of these Ex-Leaders dey tell tory to cover their behind. Another time we go hear another person go say make we no believe anything wey Mustapha talk for mouth, dem go talk say plenty of the surferness wey dem surfer na him be the Ring leader. Na so all of this thing go dey go back and forth.

The new tory na between Diya, Abubakar and Mustapha. Mustapha talk say General Abubakar tell dem say make dem kill Obasanjo when dem talk say the man dey among the people wey dey plan coup during Abacha regime. When he come reach Abubakar turn him talk say him no go appear for the thing but he talk say na lie Mustapha dey lie. Make I talk about that one first, una see my people since plenty of us no dey there, we no fit say na this person dey lie or na the other person dey tell truth. But the thing be say plenty of our Leaders too dey get the thing wey dem dey call False Pride, and the palava wey we dey now na that kind thing cause am. How dem go talk say make everybody come explain himself for the bad thing wey dem do for corner corner, and some people go appear and some no go answer at all. I like Former Head-of-State General Abubakar and the man dey among my favourites but I no support the thing wey the man do when he no show up for the thing. He no mean say because you be former President if the country call you make you come answer for the bad thing wey dem say you do or talk you go tell dem say you no fit come. How our country go fit move forward when plenty of our Leaders no dey obey Law wey na dem create am? The other time na our House Leader Na'abba na him disobey police when dem tell am make he come explain himself. All these things wey dem dey do no dey help matter at all at all.

As I dey talk before, Mustapha talk say Diya dey among the people wey want kill Abiola and he also talk say the man dey among the people wey plan coup during Abacha. When General Diya come come, him talk say na lie the man dey lie. He talk say the man dey among people wey plan bomb for him car during Abacha regime. He even talk say he see the document wey show how dem want go tell him family about the him death.

The question now be say since na everybody dey lie about everybody, which person wey we want believe? My people as una know all of dem na rogues, and if you dey steal you go dey lie na so the thing be. He dey funny say these na people wey dey our Amry, dem train dem for death and dem no fit take responsibilities for their yeye behavior. As my brother for Obodo America dey talk am, these people no be Man enough, dem be coward. If to say na true true dem be soldier why dem no fit accept the bad things wey dem do to our country. Dem come dey play us like say we be ball and mumu. My people all these people wey dey trade tory with themselves na liers, make una know believe anything wey comot their dirty mouth. The thing don dey become joke self. Na here I go stop my fellow people, make una treat our country better o.

December. 07. 2000

Sharia Palava:  Who Dem Dey Fool?

How una dey my people? He go better one day. As the Sharia become full law for Kano, my question be say wetin go happen now to people wey no be muslim? As I talk before plenty people wey get business for the place na Christians, how dem go tay manage since the thing go affect their way of life. When the Idea first start the people wey dem call Sharia Overseer talk say na everything dem go look but up till today my fellow obodians, we no fit see the thing wey dem do. I dey hear say plenty people wey come from South don talk say dem no go come back to the place when New Year Holiday pass. Another question be say, as Sharia no fit create work or business, wetin Mekunu like us go dey eat or where we go come find work? Na the kind thing wey these our Sharia Leaders for consider before dem start the thing. We no say plenty of dem get money, and this kind surfer surfer na poor masses like us the thing go affect. All the yeye talk say the thing go drive away crime and adultery na big joke because if people no get work na him be say dem no go fit feed their family and if dem no fit find money feed their people, wetin these fools wey call themselves Sharia Committee think say go happen? I hope say dem get enough sense say the crime wey dem say Sharia go prevent na so the thing go poku with full force. I no think say people wey dey hungry go worry about Sharia when their pikin dey die of hunger. Sharia go bring the worse in plenty people. For example, if thief sabi say dem fit catch am, na him be say he go make sure say he thief plenty money well well and take am enjoy with Omoge as he know say na the end be that if dem catch am. Na all of us hear say plenty women for North talk say dem no fit find husband marry. And the men talk say dem no fit marry plenty wives since dem no get work. Wetin our Sharia Leaders think go happen when less people dey get work? If dem think am well dem go no say the marriage wahala go increase as men no go fit afford plenty wives. And if that one happen na women go surfer am pass, since all of us know say this body no be stone, the prostitution wey dem talk say Sharia go prevent go come double. Or if the women no say dem no fit do am for Kano, dem go go another state where dem go fit practice their trade. Na him be say plenty women wey come from those Sharia States go comot the place go another state. If my Sharia Leaders sabi economics small, dem go know say the thing go affect their States as people go go another state go find work. If this thing happen, who go dey left for Sharia Law? And these hypocrites wey dey push Sharia, I bet una say plenty of dem go dey go Non-Shari States go dey look for Women. Na him bring me to our Journalist Friends say na that time we want make dem do their work. He go good make dem send reporters go all Non-Sharia States make dem start dey ask Ashewo how many of their Customers come from Sharia States. With that kind thing we go know whether our Sharia Leaders go practice wetin dem dey preach to us  or  dem just dey use us the masses dey promote their political agenda. Na here I go stop my people, I no go surprise if this Sharia thing fail since dem no plan am well at all.

December. 06. 2000

Oputa Panel: Trial Of Violators

How una dey my people, se una dey manage? He get one question wey dey bother since these days? This Human Rights abuse panel wey our government organise, se una think say na true dem go punish the offenders? The reason be say no be say I no think say the panel dey serious but the question be say all these people wey dem dey accuse wetin go happen to dem? Plenty of these people na members of the power that be for our country. If una dey talk about the Big Boys na dem be the one. Wetin our government go do once dey find say na true true these big guns abuse people when dem dey for power. Me I no expect say our government go do anything to dem especially since some of the people wey dey rule our country now dey among dem.

Our Uncle Sege na number one, na everybody know say dem torture the man when he dey for prison for crime wey dem say he no commit. But the thing be say our President too dey among people wey do some bad things for people when he be Head of States. Una remember say na during him regime na him dem burn Kalakuta republic. No person wey dey alive for our Obodo during that time wey no remember the kind thing wey dem do Fela Anukulapo Family. Dem push him mama for ground from their Balcony. Another people wey dem mention na three Former Presidents – Buhari, Babangida and Abubakar. Na everybody remember say during Buhari, plenty of our politicians surfer when dem talk say dem thief money. But we know say na true true those rogues thief money because na that time our government kidnap Diko for London because dem talk say the man take our money go keep for obodo oyinbo. As for Babangida own, na everybody wey dey alive during him regime na him the man abuse. Plenty of the palava wey we dey face now, na him cause am. Na during him regime this Hired Killers nonsense start. 419, ritual killings, corruption, all bad thing wey you fit think of happen during the man regime. Una know say me too get problem with the man because plenty of my family surfer well well when Babangida dey rule our country.

The person wey I not dey sure of na him be Abubakar. I no say the man do some bad things for people but since na him be De Klerk of our Obodo, I go commend am because na him make this democracy happen no be Babangida wey dey talk say na during him regime he plan the thing but everybody know say he no do anything except fill him bank with our money. I know say there are some people wey dey important post during these leaders times wey I no mention but dem no themselves. My people I hope say una gree with me say I no know how this people go tay pay for the crimes wey dem commit. Make we start with Uncle Sege, wetin our country go do to am since na him be President? Na all of us know say the man do wrong to Baba Seventy Family. We know say dem no fit send the man to Kirikiri for the thing. So the question be say since Uncle Sege no go get any punishment how una go come punish Babangida dem wey our country no go dabaru? Na this kind think make me support people wey talk say Oputa Panel na joke because plenty of the offenders na who-is-who for our Country be that. How dem go come punish dem? Me I no think say he go happen, na the Mutum one wey no get power go surfer, people like Sergeant Rogers and Mustapha. But if we want dey fair na everybody wey dem convict should surfer the thing but I get sense enough say no be this our Obodo that one go happen.

Even self he be like say joke thing don start, because no be last week wey some of the players dem dey hug and exchange Hats for the place? My people these our Leaders dem think say dem dey fool us, small time dem go talk say na money make dem give the people wey dem abuse. The question wey I get be say, the money wey dem go pay dem where dem want collect am from? I hope say no be for our National Treasury dem go take am since we no dey there when dem dey thief our money and torture people, he go good make the offenders pay the thing from their their pockets since na dem dey responsible for the thing. But I go dey surprise if our Generous Government (wey no fit feed her people and plenty of her citizens dey poor) no give dem the money. Na this reason wey I talk say this country no be for me and you be that. The rich dey get richer why we the masses dey get wretched everyday. Na so he be for our obodo my people na only God, Allah fit save us.

December. 05. 2000

Blood Thick Pass Water: Na For Where?

Nawa my people wetin this world dey turn to? As our country dey pafuka na so our moral dey spoil for ground. As our long-throat for wealth dey grow na so our crime dey dey heinous everyday as Oyinbo people dey talk am. Every where you go now you go hear say dem find person body for dustbin wey dem don comot him body parts. And for the Armed Robber own, before if you hear say robber attack person dem go just take him thing and run comot but now even if you give them your motor without any wahala dem go still kill the person. Our people don become evil wey be say life no mean anytime again. Na the thing wey my brother for America tell me as him don come home for Christmas na him make me know say the people wey talk say we need Allah, Mohammed, Jesus and God Almighty for our life no dey lie. This our society don decay finish na only devine Intervention fit safe us from destruction. According to my brother, dem say one woman dey wey come from London come greet her family for Nigeria. And the woman no get Mama again, na her senior sister be the one wey take their mama place. During conversation, the Sister come dey ask her younger sister for money since na all of us think say Money just dey float for street for Oyinbo Country, all we go do be say make we gather plane money and go there go sweep our own and pack for Ghana Must Go Bag. The sister come tell her Senior Sister say life no dey easy for the place o. She come add to am say the small money wey dem fit gather na him dem dey take send their pikin go Nursery School. My people wetin dey wrong with that talk especially if person dey talk to her blood? As dey now, he no too dey good make person dey tell truth for our obodo because the thing fit cause you your life especially when you dey talk to your relatives. As the woman come go back to Queens Land for London, na him her pikin come start dey sick and dem carrry am go Hospital but dem no fit see the thing wey dey wrong with the pikin. I hear say dem even carry all kind of Disease test wey you fit find for our Obodo for him body but the bobo condition no improve. As una know our people na him dem carry the boy go Nigerian Church and dem come tell am the person wey dey behind the thing. But the people no believe say the Senior Sister fit do that kind thing. Na him dem come bring to Native Doctor for our Obodo wey dey good gan, the person say the same thing. Finally na him dem say make dem go Imam place since the Husband papa na Chief for Lagos Mosque, and tha one come confirm say na the Senior sister be the "ant wey dey eat the vegetable o." I hear say the Imam even tell dem the thing wey lead to am. Na that come make the woman believe say true true na her sister do am since the Imam no dey there when she dey talk to her sister about life for Obodo Oyinbo.

My people una know the crime wey the woman comit because she talk say plenty of her money na for her  pikin head she dey spend am. Na her crime be that o. No be the thing wey better mother dey do be that? Na wa my people, I guess say the Senior Sister believe say if she comot her Sister pikin, her younger sister go fit dey give am plenty money. Which kind money wey person dey find wey you go come kill your own flesh and blood, we dey talk about small pikin wey no reach 7 yet?

Another one wey I hear na some people wey ask their relatives make dem dey help dem dey look after their pikin when dem want go Obodo America. When life don dey better for dem for Aamerica na him dem come decide say make dem come home come take their pikin na him palava begin. The relatives no want make the parent take the pikin because the thing go end their own chop money. Ever since the people dey for America na him dem dey send money to their relatives make dem dey take look after the pikin. He come be say na him be the bread and butter for the relatives. Na the thing wey dem dey rely on be that, the thing come become their monthly allowance and benefit. Since our Naira don fall, na basket dem dey take carrry the money when dem change am to Naira. The people carry all the necessary papers go embassy but dem still no fit get Visa for their pikin. Dem go America go try am there, na the same thing he be. Na him the people come get lawyer for the thing and Immigration come tell dem say make dem do blood test wey go confirm say na their pikin true true. But my people una know say the thing come negative. America tell dem say the pikin no be their own. Orisanobuwa, how dem go tell person say the pikin wey she born no be him get am. As una know our culture na him dem go ask the Elders/Babalawo say wetin dey behind am, na him dey come tell dem say na their relatives wey no want make their chop money stop na dem dey behind am. No be say I believe in that kind thing but whether we like am or not, Juju na part of our cultures and plenty people still dey practice am. We no fit talk say the thing no dey happen because na all fo us know say he dey well and live for our society

Wetin this world dey turn to my people? Na the kind thing wey dey happen for our obodo be that o, money palava don become our God and soul wey be say we go do anything to get am. The talk say Blood thick pass Water na lie for our Obodo, unless money no dey involve for the thing. My people na sad story, and na everyday people dey die because another person want their money by force. I hope say the people wey dey do this juju for dem go think twice before dem do am because Judgement day go soon come o. Na here I go stop my people, make una dey do jeje o.

December. 04. 2000

40 Years Birthday Celebration: Note From Overseas

How una weekend my fellow Obodians, I hope say una enjoy the weekend? I don hear another one my people, but this one own na imported. My source for Obodo Oyinbo dem, na dem nak me this one o. Una know say plenty of us too dey tell tory, na him be say we too dey tell a little tory for thing wey no happen. Na all of us get the thing for body, me too don nak a little one before. But this one wey I want tell una,  even people wey dey live here no dey tell this kind lie. Even if my fellow local Obodians here this one, na so their mouth go open. As my sources tell me, dem say the thing don become epidemic for Overseas among our people. This one, men too dey do am o, plenty of time, na the wives or girlfriends dem dey make dem do am. I know say plenty of una go say wetin Pa ‘Mugo want talk wey he no fit open him mouth since? My people this one na real shocker for me. But as I don talk before say, anything wey concern my people whether na for here o or na Obodo Oyinbo, me I go talk am.

 My people the thing wey I hear, I no know if una don am hear before, but I go tell una. I hear say for overseas, our women dem dey do competition for birthday own. Dem say no week wey you no go hear say some woman dey celebrate her birthday. I know say people go talk say wetin dey new for that one? But my people this one different, as my source tell me, plenty of our Omoges dem dey celebrate their 40th Birthday.  Una no here me, I say plenty of dem dey celebrate this one particular bithday whether dem reach 40 or not. Una know say plenty of our women too dey lie about their age. But one thing be say make you lie about am, another thing be say make you come invite people make dem come celebrate am with you, na that one me I no sabi. When person do that, that means say he don certify am be that, and he no go fit change am again.   The thing wey I no sabi be say, se the people dem no know say dem dey make fool of themselves? Make I ask una my people, who dem think say dem dey fool self. The kind lie wey you no fit defend for future, make you no dey tell am. As my source tell me, he say there is one woman wey dey for their area, last year the woman invite people make dem come help am celebrate her 40th birthday own. Plenty people go there, go drink free booze and food. Dem say the party na one in town. But the thing get but for body. As dem dey talk am for our obodo say lier no dey get memory, this year na him the same woman come dey give our people wey dey come home for Christmas invitation for her Senior Sister 40th Birthday for December. The sister wey everybody know say at least take Five years senior the woman wey dey for obodo oyinbo. People come dey ask her say “If you talk say your Senior sister dey celebrate her 40th birthday this year, how she go come be your senior if you celebrate your own last year?” I hear say the woman no fit talk, na so she vex comot the place. Another one wey I hear be one Omoge (Woman) wey be twin. He don dey tay wey the girl dey lie about her age, two year ago, na him dem say she talk say she be 40 make people come celebrate am with am. Plenty people know say the woman dey nak tory but since dem no get proof, people just dey look am. As God go catch am, her twin brother come get Visa Lottery to God’s own country. The man come go with him wife for America. The woman come dey introduce her twin to people so that dem go fit help am for work. She no know say na the thing wey go kill am be that as three months pass, na him her brother wife come organize birthday party for that one. Everybody wey be everybody na him I hear say dey there as the Bobo dey nice. As dem come bring cake out , na him people see this big word, HAPPY 38TH BIRTHDAY for the thing. Na him some people wey want make fool of the Twin Sister come ask the bobo say how you go be 38th, when your Twin Sister celebrate her 40th Birthday two years ago? Una know say we men, we no too dey lie about our age, and when the thing happen na our women dey behind am. Na him the Bobo come talk say how she go be 40th when our senior sister never reach. The bobo talk say he no dey possible become as everybody know say na him be her twin brother. My people na so I hear say the woman no fit show her face for the place again o as she move comot go another state.

 Se una see the kind humilation wey our women dey cause themselves because dem no want make people think say dem be small pikin. As I hear the thing , I come remember the thing wey my Grandmother tell me (may her soul rest in peace) say a woman wey dey lie go dey fornicate and thief money and jewelry. I no fit sabi why person go dey lie about him age? Especially the one wey you no go fit defend, if your relative and neigbours wey sabi you since come dey around; wetin you go come tell dem? Una see my people, the same one wey one age fast when dem dey young, go come want reverse the thing when old age come.

My people the thing wey I go say be say, na this :Have Been To” go dey come dey shakara us for Nigeria say we no dey honest and we too corrupt, the question I get for dem be say, wetin different between us and dem if dem no fit copy Oyinbo way. Since I hear say Oyinbo no dey lie about their age, wetin be our people excuse at least me and una wey never comot Murtala Airport  get one, we never go Obodo Oyinbo before.

 Nawa o my fellow Nigerians, na the kind lie our women dem dey live for Overseas be that o. I hope say dem go change their yeye ways before the thing cause katakata for Oyinbo country wey dem go drive all of dem comot.

December. 01. 2000

Haba Governor, You Dey Think Like This?

How dey go dey my fellow Nigerians? I beg make una slow am down small small. Our Governor for Zamfara State don start another one o. Na last week my source for North dey tell me say the Governor want become President of our Obodo Country. This na the same Governor wey start Sharia Palava for him state o. Me I not get problem if a person want become President since na everbody for Nigeria get that right. The only thing be say before I go vote for a person, I go don know say the person go do better thing for us the masses. Na him be say I go look the man history, like wetin he don do for the commoners for him state and for our beautiful country. As for this Governor o, me I get problem with am but before I start dey tell una why make I finish tell una the thing wey my source say the Governor talk. My source tell me the Governor talk for BBC Radio say he go turn our obodo to Muslim Country. The man talk say Sharia go come become the thing wey everybody go dey practice for Nigeria. My people, when my source first tell me I think say the Bobo dey joke because no be kind thing you go hear from person wey no dey Kolo. I no even think say person wey be Mumu or dey smoke Igbo go fit talk like that. I no believe my Source untill two days ago when I read am for Paper.

My people this na person wey be Governor of a state o and no be say the man dey craze like this? And I know say the man go University, he no fit dey reason like person wey no get anything upstairs. Wetin we go say dey wrong with this man if to say na true true he talk am? Una know think say the man don dey smoke Ganja for him State House? How person wey we know say sabi our constitution go dey talk like this. Even if the man no sabi that, how the man want become President when plenty people wey dey for Nigeria no like am? I know say we get plenty Muslim pass Christian for our Obodo, but the thing be say plenty Muslim no like the yeye thing wey the man start for him State. Una remember say plenty people wey die for North because of Sharia no Sharia, na this man cause the madness. Na him use Sharia matter for Politics so him people go like am. Where he want get people wey go vote for am now? Even if the man win him state and some Muslim states for North, how he go tay win States wey no get Muslim majority? If you go Middle Belt area, plenty people wey dey for those states na Christian. And if you come come South West wey get plenty Muslim, the people there no dey vote for person because he dey practice their religion. If dem no vote for Obasanjo wey be Yoruba man, how the man think say dem go come vote for am since plenty family for South west get relatives wey be Christians? And I know say the people wey dey for South East and South- South no go vote for am with that kind agenda since almost everybody for the place na Christians. So Governor Sani, how you want do am now? If no be say the man dey kolo because I no fit talk say the man dey drunk since na him be Oga for Sharia (laughter), wetin we go come say dey wrong with the yeye Educated Illiterate wey we call governor?

If the man dey think, he go know say apart from my fellow Obodians, plenty Oyinbo Countries no go allow am because dem get too much for our obodo. Alhaji Sani or wetin you call your name, I fit bet you with every thing wey I get for this life say he no dey happen. But make I stop dey waste my saliva since we know say the man dey kolo.

My people na so our country be o, this one dey too much for me, how the man tay win election self? Wonder no dey cease for our obodo, this na baddest. Crazy person become Governor for our beloved Nigeria. Na here I go stop my people, make una dey do jeje o jare.

November. 30. 2000

Shame on our Southern Youths

How una dey my people, I hope una dey manage? I beg make una no vex for yesterday own, na my diskette no work when our Engineers dem want carry (upload) my file for Internet.

My people he don tay wey I talk say I go talk about this thing wey dey give me concern about our Youths for Southern part of our Obodo. Una remember say during past regimes, na almost everyday our pikin dem for south dey protest against the government. Na all of us know say he no dey easy for all of us especially the masses and our university students dem. But the thing be say the same thing wey plenty of dem dey fight agaist still dey well alive and dey kampe my fellow obodians. The only difference between our own Democracy and Dictatorship na name, every thing else still dey happen. Our Leaders dem still chop money. And plenty of us still dey die of hunger. No be this year we hear say our National Assembly dem divide our money among themselves and dem call am Furniture Allowance, wey plenty Papa and Mama no fit feed their pikin dem? He no mean say dem call am democracy the Barawo for their body don comot? Why be say that same energy wey our pikin for South dem dey display during past regimes we no too dey see am now? He no mean say the person wey dey there now na from our Region, make we no come talk.

Make we look am well well, plenty of our Elected Official dem dey among the people wey run our country during Babangida and Abacha dem. Una want tell me say dem no be Ibo, Yoruba, Itsekiri, Ijaws during military Regime? Ever since last year wey we start this I notice say anytime wey our Leaders for south dem do something wey no good or say something wey we no say he no good for the country, our youths for South dem no dey talk. This dey common among our pikin dem wey come from south west. Last month wey OPC and some thugs dem cause palava for Lagos, plenty of our Youths no talk anything. Dem act like say dem no dey for Nigeria. Now because our people get upperhand, we come act like say the people wey die no be person and dem no get family wey go miss dem? He com be like say we no get University Students for Lagos again, as all of dem just dey go their own way. And If I want dey fair I think our youths for South East na the same. Una remember when dem talk say our Brother Chief Okadigbo and some Senators for National Assembly do some mago mago and take wayo award contract to their themselves and friends, I no hear make our pikin dem for South East condemn the thing. But during Military regimes na everyday dem dey dey for Street dey shout say dem no go gree. Na this kind thing make me talk say na all of us get the thing wey dem dey call Tribalism for body. As I see am, he no mean say because person come from our area if we see am dey do injustice to other people make we act like say we no see am. Injustice na injustice whether the victim or the offender come from our area or not. If we see am, we must let the person know say we no like the thing wey he dey do.

Na him make me remember some Youths Organizations for North wey dem dey call Northern Democratic Forum and Northern Youths for Democracy and Justice. Anytime wey some of these Old Fools wey we get for North talk nonsense these pikin dem no go gree dem. I remember last month wey some of our Leaders for Arewa Consultative Forum dey talk say our Uncle Sege and him Cabinets no sabi their work and dem talk say the man dey marginalize my people for North. The Youths dem talk say na nonsense, dem talk say wetin the Leaders dem do for our people wey dey North especially since plenty of dem dey Leadership post during Miltary regimes. Dem even talk say plenty of the problem wey we get for Nigeria now, na these same leaders dem cause am. Una see my pikin dem, these na youths wey come from North o, dem no talk say because the Leaders na from their area, make dem no crticize dem. Na this kind thing make me proud of dem. Dem know say all the wahala wey dey for our country na these yeye leaders cause am. And plenty of dem wey dey call themselves Northern Leaders we no fit see the good thing wey dem do for my people for North. Only thing dem sabi na to chop our money and give their friends and family contracts.

So my brothers for South, he go good if una copy this behaviour because na the thing wey go help our country be that. If una see any leader wey dey talk nonsense, he no mean say because he come from una area make una no say anything. Wetin go happen if all the youths dey do same thing since una know say na una be our Future. I hope say all of us go condemn injustice when we see am. My motto be say make we call things the way we see am, na the thing wey fit help our country be that.

Na here I go stop, make una dey do jeje o.

November. 28. 2000

Privatization: The Name Wey Workers No Want Hear

How una dey my fellow citizens, se una dey manage? Wetin I dey hear say plenty of our Civil Servants no want make our government sell some of the Government Companies to Private Investors? My question about the thing be say, how many of us sabi the thing? Wetin the thing mean for plenty of us  wey no sabi book? Una know say plenty of our people no too dey hear well, plenty of us na Zombie we be, we no too dey listen well. I know say plenty people dey talk say the thing no good for us and if our government sell the companies like NITEL and NEPA, the worker no go get work. Na the kind excuse wey dem dey take dey scare plenty of us wey no sabi the thing be that. As I ask people wey dey around me make dem explain   to me, dem talk say true true some people no go get work when dem sell the company to Private group because the new owners fit talk say dem no want keep plenty people for their company. As all of us know say no person wey go take  money buy the company and he no go want make profit for the thing. He be like person wey buy house wey get Ten Security guards, if he think say Ten Security Guards dey too much, he go sack some of dem especially the ones wey dey lazy, na so this company thing be. If the people wey buy the new company think say plenty people wey dey do work dey too much for the work, dem go sack some people wey dem no like or wey dem think say dey lazy. Plus una know say dem go get their own management wey dem sabi proper and want bring for the company. Una know think say dem go leave people wey dey no sabi make dem run their company? My people I know say plenty of us get family wey dey rely on us but person no fit dey run company like that. Na all of us know say plenty of these companies wey our Government want sell no dey make money for the country. Another thing be say na all of us know say plenty of our Brothers and Sisters wey dey work for NITEL, NNPC, and NEPA dey lazy dem no want work. If una go their go ask dem for something, na so dem go dey look una like say you dey worry dem. As I talk before, if you dey sure of your work you no go get problem with the new Management, na only when you no dey do your work and you be Baba for Fraud na him you go dey worry. Na everyday people dey course NEPA, NITEL and NNPC since we no say dem useless. No be say we no get family for the companies, but the bribe wey dem want chop no dey make dem do their work well unless you give dem EGUNJE (Family Support) as dem dey call am now. As the thing yeye una sabi say plenty of these people no dey know family, if you go meet your brother or sister for work and tell am say for example una light no dey work, you know say he go tell you say na another person dey in charge of am since him no say he no fit take money from you. Na him friends dem he go talk say dey in charge for the thing and those want go come tell you say because you be their friend relative dem go take small money from you. As soon as you leave the place your so-called blood go go him friends office go collect him share of the money. Na the kind trick wey plenty of dem dey use be that. Make we dey serious, na all of us dey complain say plenty of these government companies no dey work and the only way wey our country go better be say make dem sell some of dem to private investors. The thing go fit better our life since people wey put their money for the companies go make sure say the workers dey work well well.

As the thing be my brother, no be say I support when our government sell the thing to their friends or families. And me I know support make foreign companies own majority of the company, dem fit get some shares since we need their expertise for the thing but no be say make dem get majority stake for the companies. He go good if our Leaders go do am wey be say no tribe, person, or group go dominate the company. He go good if our government do so tay all the tribes go get say for all the companies and no particular tribe, family or group go get majority since the companies belong to all of us and if we want sell am na every region go get money for the thing. He go good if our leaders do am wey be say no family or group go fit control all of dem since we no want make dem dey use wayo dey fix  prices as my Neigbours wey sabi Economics talk.

So my fellow Obodians, he go good make una ask about the thing before una go dey complain say una know want am. Me I no dey like make person dey do follow follow especially if he no sabi the thing wey dey go on. Another thing be say if we want make life better for us and our family, all these Government companies wey dey cost our country money must go. We no fit eat our cake and still dey hold am for hand. If we want better thing, we must sacrifice to get am. NEPA, NITEL, NNPC and the rest of dem must go. Na here I go stop my people, make una dey do jeje o.

November. 27. 2000

The Man Wey Dem No Want Make He Talk

How una dey manage my fellow Obodians, I hope say una dey Kampe? Tory don sele as Major Hamza El-Mustapha open him mouth. The man talk say there is plenty tory wey he want talk about the thing wey plenty of our Leaders dem do. As the man talk say he go tell it all, my source say some people dey threat him family. I hear say plenty Miltary Officials and Leaders from all corners for Nigeria no want make the man talk. The man even talk say some yeye Oba for Yoruba land dey beg am make him make himself president because of yeye money wey don make dey sell their soul and kingship. I hope say the man go fit tell us who these yeye people be so we go fit disgrace dem from their royal thrones. We dey hear say dem say dem go kill am if the man continue to open him about the thing wey some of dem do for when and after Killer Abacha dey alive. Nawa my people, our Leaders/Military don become mafia wey be say dem go do anything to get rid of their opponent. He be like say na true Major Hamza El-Mustapha dey talk about all the thing wey happen during and after Abacha regime. As the thing be now, he be like say the man and him family life no safe for Nigeria. My people since plenty of our leaders don turn to cold killers he go good make we invite foreign security force make dem come protect the man and him family if we want hear all the thing wey happen. I know say plenty una no go support this kind thing because una go dey talk say the thing affect our Sovereign as the Grammarians dey talk am but as we all sabi, our country no be ordinary country. Nothing we get wey dey work. If we no protect the man and his family we no go know who among us are traitors and killers. As the thing be now, he be like say powerful people wey no want the man talk dey plenty and as he be for our Obodo, before una know, una go hear say dem don kill the man. And if dem no fit get to am, na him family go surfer am. He go good if our government fit involve foreign government for the thing especially Interpol and CIA for America. Na only those people fit protect the man and him people. I know say he dey hard but if we want make the man tell us everything inside Abacha Web and the players for the Killer regime, na all of us go support say make our government protect the man. But the question be say who for the government go protect the man and him family since plenty people wey dey for our government now na member of the past government. Na him be say the man and him people life no dey safe for our obodo. I no go mind if dem move am and him family to foreign soil where the pressure no go to dey much for am. Because if we no do am, he no go tay for the people wey no want the man talk bribe some people for Kirikiri make dem kill am.. And as all of us know say for our country na everybody get him price, but I hope say whoever dem give the contract know say him too no safe. He no mean say if dem give the person money dem no go kill am. People wey dey do this kind no dey like make dem leave anything wey go fit point the thing to dem alone. Na the reason why dem want kill the Major Hamza El-Mustapha be that. I no say dem go dey plan to kill Sergent Roger as him too talk about the kind leaders wey we get for Nigeria wey be say dem go do anything to protect their yeye power.

My people na so life be for Nigeria o, if you cross these yeye power dem, before you know am dem go do everything to yamutu you for ever. I hope say Uncle Sege go do everything under him power to protect the man and his innocent family from the killers among us wey go dey gun for the man head. I hope all so say Major Mustapha too go remember say even if him no talk the people go still go dey come after am since dem no say as long as he dey alive he go fit reveal the thing to the public. Na this kind thing make me know say person no dey safe for our Banana Nigeria Republic be that, the country don turn to Mafia Era for obodo America. But make I tell una the truth I no dey surprise since dem don introduce hired killers to our obodo anything can happen.

My people na here I go stop I go dey talk to una tomorrow.

November. 24. 2000

Thanksgiving: From God's Own Country

How una dey my people, how dey go dey go? I beg today na my brother for America na him ask me say make I help am thank our Almighty God, and make the MAN continue to bless am and our people since na yesterday dem celebrate Thanksgiving for Obodo America. My fellow Obodians na wa for people wey dey for America o. As I see am he be like say dem get holiday for everything. If to say you be herbalist dem get their own holiday, and if na religion proper, dem get holiday for that one too. Any time wey I talk to my brother for the place dem dey celebrate something. If dem no celebrate war, dem go dey celebrate food, and if no be food, dem go dey celebrate work. Make una look am my fellow Obodians, the people for obodo America dem get holiday for everything wey you fit think of for this life. Yesterday na him dem say dem dey celebrate THANKSGIVING, which mean say dem dey thank God, Allah, Olorun and Chineke as the man dey bless dem with plenty food. Sometimes una go hear say dem dey celebrate the thing wey dem dey call President day, na the time wey dem dey thank their past president. Na wa, I guess we no fit blame dem since plenty of their President do better thing for dem. As for us, which person wey una sabi other than Zik, Tafawa Balewa, Awolowo, Gowon and Murtala Mohammed wey be say he do better thing for our Obodo. The only thing wey plenty of our past leaders sabi be say make dem take the money wey dem for take fix our obodo make am their own. Na so you go dey hear say dem dey take the country money carry am go Overseas with plenty 'Ghana Must Go Bags.' Instead make dem take the money do better thing for our county na so dem go carry am go help another country and their family.

Make I continue with my talk ojare, for obodo America dem even get holiday for workers, na him dem dey call labour day for the place. No be say he no good for Nigeria but the thing be say if we no want deceive ourselves plenty us wey dey work for our Obodo dey lazy. I no talk about our mama wey get shop or few of our sisters and brothers wey dey manage dey sell something for Market. I dey talk about some of the people wey wey call Civil Servants and corporate. Their nose don dey long for Fraud. The only thing wey dem sabi na to turn your business to empty stadium as dem don use their AGBARI sell your stuff finish. No be say I no like my country but the thing be say plenty of us we too dey do wayo too much. We no too dey get better thing for body other than say make wey use 419 for people.

My people if we look am well well no be say America perfect but the people dey give glory and thanks for everything wey dem dey do. Se una hear say dem get celebration for Witchcraft for the place na him dem dey call HALLOWEEN. If we look well well, no place get JUJU pass us for this World. If you want make person craze we get am. If to say we want use person make money that one plenty. And if na sport we dey do and we want make all our opponents eyes blind we get am too. And if person get belle and we want make he no born the thing, we get solution for that one too. Why be say na for America dem dey celebrate Evil why we no fit do am for Nigeria. As for Bible dem talk say make you give 'Ceaser wetin belong to am and make you give our LORD ALMIGHTY him own'. My people if we compare our country to America, the gap wey dem between us I no think say dem go fit close am generations to come. Why wey no fit dey celebrate those things too? As I see am God dey bless America because everything wey dem do for this life dem dey thank their God or the person involved. But for our Obodo, na only bad thing we sabi and that one too we no fit do am well. God talk say anything wey you dey do for this life or wey person do for you make you thank am well well. Una remember say in the Sixties and Seventies wey things better for us, we get plenty celebrations for our God. Whether na South West you dey o, or na South east and if to say na North you go too na the same thing. Everybody dem enjoy as people dey involve with our tradition. During this time, people go celebrate Yam Festival, God of Rain, God of Iron and Thunder. We get plenty festival for North, south and everywhere for nigeria. As the thing dey na so people dey enjoy. I remember for North wey we get plenty Groundnut, Turkey, Pepper, Cow and other food items. Na so the thing be for South too wey wey get plenty Yam, Red Oil, Cassava, Cocoa and other things. Every year you go dey hear different celebrations for our obodo. As we start dey go away from the thing, na so poverty come begin dey crawl into our society. Disease come plenty for our obodo as we forget our tradition dey run after Western own. People come begin dey comot farm dey look for gold mines in the cities. We come become people with no direction for life as we forget our traditions and ways of life. I no talk say make we no worship God o, but we get our Cutom too wey our Forefathers don lay down for us from generations to generations. If una look at America, all these things wey dem dey do he don tay wey dem don dey do am. Those people still dey follow their traditons as I dey talk now, up till today. But make una look us, our own no dey good for our face, na the thing wey dem do for Obodo Oyinbo na him we want kill ourselves for. Na this kind thing make our Factory and companies go belle up. All the palava wey we get now, plenty of dem na because of our long throat as we no dey proud of our own. My people as dem talk say people wey no get root or forget where dem come go become like a tree with no root. I hope say all of us go look within ourselves and change before it become too late o.

Na here I go stop for now, make una dey do jeje o .

November. 23. 2000

How Nigeria Fit Progress

My people me I don tire of all these people wey we call our Leaders. All these fake and Emergency Leaders wey we dey get for Nigeria time don reach wey we go find dem some place where dem no go fit dey cause wahala and poverty again. Every time you hear for Radio or Television, the people wey we call our Leaders go say some nonsense because dem no fit get want dey want. No be this week I hear say some of our Leaders for North dey talk say if the people for Yoruba Land no give money to pay people wey die for Lagos, Nigeria no go see peace. Dem talk say dem go dabaru everything. These na people wey tomorrow dem go come South west come dey beg for votes when dem want run for Election. The thing wey pain me be say, some of these people don rule our country before. But since the power no dey for their hands now, anything wey the other person do, no dey good for their face. I even hear say dem dey talk to our Vice President say make he help dem get the thing wey the Northerners deserve. The thing wey I no understand be say our Vice President na for whole nation. He no mean say because the man na Northerner na only him people he go dey help. This Vice President post no be regional one or local. If dem want person wey go only think about their area, dem get Senators and Legislators wey fit do that kind thing. As for this nonsense wey I dey hear say dem dey threat southern governors na sakara. Wetin tell dem say if dem start dey kill southerners wey dey for their area, wetin dem think say the other people go dey do? Se dem think say dem go just dey look dey for face. This thing wey dem dey say for public no be the kind thing wey you go expect from people wey we consider Statesmen. This power self wey all of dem want kill themselves for, wetin make dem think some of us wey be Northerners want dem to rule us even if we come from the same area? Plenty time wey dem dey there wetin dem do for us? I no care whether person come from my area or not, if when he reach the place he no do anything to help the country or some of us wey dey struggle the man no be our leader.

My people I no say this thing wey I go talk now, plenty of una go think say the thing dey cruel. If our country go better, I no think say we go get am from all these people wey we call our Leaders. For the past 30 years, plenty of these people don dey rule us, wetin we get for the thing, no be poverty? If una go obodo oyinbo, una go see their spoil pikin wey just dey blow our money for Asewo why we dey surfer for Nigeria. I go tell una this, the only wey wey we go survive be say make dem put all of dem for Prison, and throw away the key for Bar Beach . I for say make we do the thing wey dem do for Ghana, but that one go dey too much and I no support make people die for our hand. I know say plenty of these people deserve am, but Prison go good for dem wey den no go fit comot.

My people make I tell una this, unless the yeye Leaders comot patapata, I no think say we go get any peace for Nigeria. Make una look at people wey dey for important position for our country, how many of dem never dey for government before? I fit count dem for my hand, una know why because all of dem na proper Barawo. Dem dey too lazy to work with their hand, na the thing wey make dem be Jaguda for paper be that. See all of dem, plenty of dem na ex-solidier, which kind country wey una sabi wey be say plenty of the people wey get money na army? I hear say dem get plenty Soldier for America, but no be say dem rich, dem just dey comfortable. But for our obodo, if you want become rich make you just become Soldier, before una blink una eyes, he don build 50 rooms mansion for Lafiaji. As I see am my fellow obodians, as long as these Oyinochi, Barawo and Ole dey for these positions, we go continue to be poor. Na here I go stop, make una think about our Obodo first before una think about una pocket. I no want hear say na that one I go chop because na the thing wey dey cause our Wahala be that.

November. 22. 2000

Armed Robbers don turn our Obodo to Beirut

Na wa my people, how una dey cope with all these Armed robbers wey don turn our Obodo to their Domain. Everywhere you go now, na Armed Robber problem you go dey hear. No be this weekend I hear say the men of underworld kill four Police chief for our Obodo. Two weeks ago, na MD for Insurance na him meet him death from from these yeye people wey don turn our little Havana into Somalia. I even hear say dem kill one or two Foreigners for Lagos area. My people wetin our Leaders dem dey do about this yeye thing. As Uncle Sege dey go Obodo Oyinbo dey tell dem say make dem come invest money for Nigeria, which person wey get sense go answer am. I even hear say the man dey tell Nigerians wey dey Overseas make dem come home come invest. As I tell my brother wey dey for America, na the same thing I go tell una wey dey Obodo Oyinbo. This one no be say I no like my country but I no go fit live with myself if I no tell una this thing. My Fellow Nigerians wey dey Overseas, I beg if una value una life make una no come home not even for Chrstimas o. The way those murderers dey kill no be small, dem no even value life at all at all. As una know say plenty of dem sabi say most Nigerians wey dey obodo Oyinbo dey come home for christmas. Una know say dem go dey plan how dem go operate during holiday. As for the people wey dem talk say make dem come invest money, how person go invest money wey be say him life no safe. I know say some people go dey talk say our Government dey try him best against these killers but as for me o, I no think say our government dey try at all at all. If to say na true true dem want stop am dem for do the thing wey I talk about two months ago wey I say make dem announce am for Radio. The thing wey our Government go say be say dem go tell everybody say if dem know their pikin or brother wey  be robbers make dem tell Government. As una know, I no think say plenty parents dey wey no sabi the kind work wey him pikin dey do. Our government go talk say if dem catch Armed Robbers na all him family dem go put for Kirikiri for "aiding and abetting" as my lawyer friend dey say. I know say plenty family no go tell Police, but dem go fit warn  their pikin about him dangerous work. If our Government try this plenty people go tell their pikin make he stop the bad behaviour before he put dem for trouble. Another thing wey I think say he go fit slow the thing down be say make our government start dey show Robbers wey dey face Firing Squad for Television. At least the thing go dey shame their family. May be this kind thing go make parents warn or report their pikin trade to the Government. Another thing be say our Government should monitor all these yeye rogues wey dem dey call themselves Police & Army for our Obodo. My people make ask una something, where una think say the robbers dey get their gun? No be these yeye people wey we call Police and Army dey behind am? He go good if our government look him body first before he go dey look for killers outside. Since Police and Army na part of our government, make dey start dey put number for bullet wey dem dey give our Military. For morning if dem no fit tell our government where their bullets dey, na him be say na for Alagbon we go send dem. He go also good if we fit put our Force near the border since I hear say plenty of the Jeeps wey dem dey steal, na for Cameroon and Cotonou dem dey send am. We fit work with our neigbours too since na their country be the den for our cars.

My people I dey pray say our Government go tackle this palava wey don send plenty of our people to their graves. Na here I go stop, I go dey see una tomorrow as my God don talk am.

November. 21. 2000

In-Law Palava na Wa

How una dey my people, how life, I hope say una dey enjoy? I beg make una no vex with me, I dey too tire yesterday. My people why be say anywhere wey you go, in-law thing na problem. I no go lie to una plenty of the thing na women dey cause am. Before una start dey talk say na nonsense I dey talk make una listen to me first. If una look well well, every time wey problem happen for house, who dey behind am, na women. If couple marry for a long time, and God never answer their prayer wey dem go born pikin, na everybody for the man side go dey tell am say if him wife no fit born pikin make he go marry another wife. Na so you go see the people dey talk say the woman don comot all the pikin wey God give am when she dey young. The thing wey I no understand be say, una go expect say the women go pity the woman since dem understand the thing wey the woman dey go through, but no be so, na dem go be the leaders for the thing. The same thing wey dem go dey complain to their family say their husband family dey do wey dem no like na the same thing dem go dey do to their brother wife.

Another in-law palava na visit own. I know say plenty of una don experience this one plenty time. Why be say most wives no too dey like their husband family make dem come visit? Whenever husband family say dem dey come, plenty wives go dey complain about the thing. Dem go talk say dem no know why their husband family especially mother-in-law no fit stay her house instead wey she go dey disturb dem? My people this na wa o, una go see some women wey be say anytime wey their husband family dey come visit, na that time dem go tell their husband say dem no get food make he bring money. Some of dem go even hide stew under bed so that the people no go fit see am. These same women wey dey do that kind thing, no go happy if their brother wife do the same thing. Una go dey hear dey talk say their brother wife no fit separate dem and their brother. If she no want make dem come visit, make she carry her load and pack comot their brother house. I know say plenty of una don hear wey woman go dey talk say if their brother wife or girlfriend no want their pikin come visit, she go go be that. Dem go talk say na their brother house even if na the man and his wife get the thing.

The last one wey I go talk na the men own. I know say plenty of my brothers thing say dey go escape this one. My fellow obodians una no fit deny this one, plenty of us men, the thing wey we no fit gree for our wife or girlfriend, but if our sister husband or boyfriend do the same thing, we go talk say the man dey act like an old man. We go talk say the man too dey possessive and still dey behave like bush people. And if our wife try the same thing, na so we go talk say no be this house. My people na so in-law matter be o, anywhere wey you go na the same thing. I even hear say na so the thing be for Obodo Oyinbo. Na here I go stop my people, I go dey talk to una tomorrow.

November. 17. 2000

Make Una Tell Me Say No Be So

My people I don come again o, how una dey do? Una don hear this one? This na big one my fellow  Obodians. Na about the wahala wey dey happen between our Executives and Lower House of National Assembly. I hear say our President don ask Inspector General make he comot the Guards wey dey follow House Speaker Na'Abba.  Una know say our Politicians dem get Police wey dey follow dem around. Him talk say make AD Camp and his people go back to their barracks. My people how many of una hear the thing? Me I know believe the thing o, I told my Source say I no think say our President go do that kind thing. As all of us know say the President no get that kind power for our new System. If to say na during Military regime, I go say na true because those people no dey even follow their own Decree. As una know say I no too sabi our Constitution and Law, but I know say our Leaders no go give that power to one person. Na everybody know say our President na General for Army before him become President, but me think say the man don comot those sakara behaviour for body. The question wey I get be say wetin go happen if to say na true true the man do am? As I don talk before say me I no too sabi book but if to say na true the man do am, I go support the people wey talk say make dem impeach am. No be say the man do anything wrong to me o, and all of una know say me I no too support House Leader because the man himself no dey obey law. But because as I understand am, if our President do that kind thing, na him be say the man dey abuse him power and office. I no think say the office get that kind power over other branches. Nigeria Police Force dey under Ministry of Justice, and as dem get am Oyinbo countries, na so we get am for our Obodo Nigeria. We get the Executive, Judicial and Legislator. My fellow Obodians, I know say plenty of una go dey talk say where Pa 'Mugo get this kind information? As I don talk before, na the small pikin wey dey my area na him dey tell me this. The boy dey go University dey study Law. Make I continue with my talk, I hear say for the Constitution, na President be the supreme Head of the Country, but as dem talk am, dem put the thing wey dem dey call "checks and Balances" wey mean say our Justice dem and Crook Legislators get some power too, dem fit comot our President but the man no fit comot our Senators dem.

As the thing be, if to say na true true our President na him dey behind the thing, the Lower House fit comot am too; na the thing wey dem dey call impeachment be that. Una remember last year wey dem want comot President Clinton for America, na so our Legislators get that kind power here. As I talk before, I no think say Uncle Sege go do that kind thing. But if to say na true, the people wey advise am no sabi anything be that and dem no teach am well. If to say dem be lawyer, na him be say dem be yeye lawyer wey no sabi their work. I hope say for our country sake, this thing no be so because, this go cause katakata for our Obodo be that. As all of us know say some people for our Obodo no too like this government since last year. My people na the thing wey dem dey call "person put food for food for Cat mouth" be that, because na that kind thing the Enemy of Progress go use as excuse be that. And na all of us know say we no want Military back for Nigeria, because the problem wey we get now, na dem cause am.

Na here I go stop, make una treat our country well.

November. 16. 2000

Follow up: Nigeria Police No Get Respect

How una dey my fellow Obodians, se una dey manage. Una remember yesterday say I talk about how our Police harass Mrs Azikwe. We done hear a new one o, I hear say Mrs Stella Obasanjo our First lady talk say the thing no happen. She talk say her Guards no do anything to the woman. My question be say how she tay know if she dey for front? Una want tell me say na lie the old woman dey lie? The question wey I want ask una be say which person we go belief now? Na all of us know say our Police na expert for lie, even if you catch dem while dem dey do the thing, dem go still tell you say no be dem you see. I know say I no dey there, but I no think say our First Lady self dey there. She dey defend her guards because if she no talk so, the thing go make her look bad. My fellow Nigerians, na the kind thing wey I dey talk about our so called Leaders be that, dem too dey look other way if the injustice na from dem, but if to say the thing na against dem, na him you go dey hear dem dey cry foul. As our First Lady talk say the thing no happen, I guess say we no fit do anything to am since her husband na President. But as life be, if to say na true the thing happen and the woman lie about am, another young person go do the thing to am too. Na the thing wey my neigbour pikin dey call Nemesis be that. You reap what you sow, I no sabi why our people too dey lie especially our Public Officials. Una go think say since dem be leaders of our nation, dem go get some integrity but no be so for our Obodo. The worst crime wey you go find, na dem dey behind am. Una remember during Abacha regime wey be say people just dey disappear if dey talk something wey Abacha no like. This Hired Killers thing me I no sabi am? Who introduce the yeye thing to our culture self? No be our Leaders? The thing wey be say na him dey reign for Nigeria now. Anytime wey you do business with people, if you no want pay dem, you go send Hired killers to their house, and dem go just Yamutu your Partners for you, as as simple as that. Na wa my people, I hope say our leaders dem go clean the mess wey dey make before the thing destroy the country.

Na here I go stop, make una dey do jeje o.

November. 15. 2000

Nigeria Police No Get Respect

How una dey my people, se una dey manage? I no know whether una don hear the thing wey our First Lady Guards do to Mrs Azikwe and her Driver. Sei Sei Sei, na only our obodo this kind thing fit happen. Which kind excuse wey Police get now? I no say dem no go fit talk say the man no know because we hear say one of the Police ask Mrs Azikwe how she go feel if to say na her Husband dem do am to? Upon say dem sabi am, our uneducated Police still push the woman. My people may ask una this, if dem fit do am to our First President Wife, una know say the wife of a commoner like me done die be that. Even self, make we talk about the thing without the kind person wey dem do am to. We all know say the woman no be young woman since dem talk say na Late President Zik na him be her husband. Una know say that mean say the woman na Old woman since I no remember say Zik marry woman wey still dey young. I guess say as the country dey get worst na him be say our people no dey get respect for their elders again. Whether the people na Police or not, the woman wey dem do am to na Old woman, una want tell me say these Police wey harrass am no get Elders for home? Since we know say for our cultures whether you be Hausa, Ibo, Yoruba, Itsekiri, Tiv, Fulani, Efik or Ijaw, all of us know say you must respect your elders if you want live long for this Life. Although my people as una know, no be say I like our Police, but he good say the thing happen. Before una start dey jump on me make una let me explain the thing. Since Mrs Azikwe represent people wey their family get power and when people wey dey guard dem molest poor people like us, plenty of dey no dey say anything. Which time una hear say Presidential guard or Police escort beat people or spoil person car for road wey the people wey dem dey follow talk or do something about am? As we all know ourselves, anytime wey injustice happen as long as the thing no affect us or our family we no dey talk against am. But now as the thing happen to wife of our First President, plenty of our paper dey carry am for news. How many people wey our Police Escort done destroy their life or property because dem dey follow one useless Politician or Leader wey we read am for paper? As the thing happen to one of dem, wetin our government want do about am? The problem wey I get about the thing be say I no care who you be, our Police should treat everybody the same. I know say that no go happen, but if the people wey dem dey escort fit dey talk about this harassment, may be the useless Police go dey think about am twice before dem go beat the person. I know say the Escort dey there to protect the our Officials, but una want tell me say dem no get mouth wey dem go fit tell the woman say make she stop make dem pass? Wetin dem want do if to say na Cows dey pass, una want tell me say dem go kill am? Even if dem shoot am, he no mean say the cow go comot for road. To me my people the answer for this thing be say, make our police no too dey do giragira, wetin tell dem say the person wey dem beat today no fit become our Leader tomorrow? I know say he no go happen to me but my people if better come my way I come become President for our Obodo, all the Rich people wey take their money cheat me or use their yeye power on me, na all of dem go surfer am. As for the Police man, even the man retire, I go tell dem say make dem go arrest am, and I go make sure say he surfer for Kirikiri. My people that one na joke, but na true I dey talk about say our Police must respect everybody right, no person get two heads for our Obodo.

Na here I go stop my people, make una dey do jeje o.

November. 14. 2000

Wetin This World Dey Turn To?

How una dey my people, se una dey follow Politics wey dey go on for America. I know say plenty of us wey dey for Nigeria, we no too care about the thing since he no go put food for our table or find work for our Pikin wey dey look for work. I done hear another one my people, na my Source for Kano nak me this tory. He talk am say plenty Landlords for Kano done dey tell Women wey dey live for their house make dem comot as the day wey the Government for Kano go start Sharia done dey near. I hear say plenty of the Girls wey dey go Unversity for place no fit find place live. My people which kind nonsense be this wey person no fit live where she like because he no get husband. When the man first tell me I think say he dey joke. Na when I read am for paper na him I no say na true true the thing dey happen o. Osanobua, Olorun o, Chineke, Allah, I no sabi say this kind thing go dey happen for our Obodo. Una want tell me say na by force person go marry? Wetin happen to small pikin wey dey go University, una want tell me say if dey want continue with their education make dem first go marry if not, Kano Government go drive dem comot? My people I no know the thing wey our yeye National Assembly dey do wey this kind thing dey happen for our Obodo? If to say na money you put for ground now, you go see dem dey call you Banka dede, but since money no dey for dem to chop, you no go hear anything. The people wey talk say the pro Sharia Group no get sense no dey lie, how dem go introduce this kind thing for Kano, and dem no go plan am well? Dem want tell me say na every woman wey dey for Kano must find husband by force? Where dem talk for Koran / Quran say na every woman must find husband by force? The yeye Women Senators and Legislators wey we get, wetin dem dey do for this kind thing? My people this na real war, if to say the country go dabaru for this thing make he dabaru. I know say na the Landlord get their house but to me na sex discrimination, because you be woman and if you no come get husband for house, you no go fit live for this place? I hope say our Federal Government go ban this kind "uncivilized Behaviour" from our Sheik Wannabes wey we get for our Obodo. Even for Saudi Arabia, women dey live alone, and no be all of dem get husband. I hope say United Nations go involve himself for this kind thing. My people I no believe say our people go fit act like this. I no kuku blame dem, na our weak Leaders na him I blame? Which kind President we get wey go dey allow majority of him people dey surfer from these Religion Vagabonds wey call themselves Sharia Enactors? My people una see say I dey blow small grammar, na this kind thing dey make me borrow grammar from my Neigbour pikin. If to say our President done kill this Sharia thing, all this yeye thing no go dey happen. How come dem no start this Sharia thing when Abacha dey for Office, una want tell me say the man no be Muslim? Na because the man no go tolerate that yeye thing from dem? The people wey talk say Northerners no want make Southerners rule no dey lie, because I no get another excuse for this thing. If to say na be the Women, we go gather ourselves go Kano Governor house go live, we go pack all our belongings go State House. My people I beg una, make una tell every Nigerian and Nigerian Friends una sabi about this archaic behaviour wey dey go on for Nigeria. I hope say IMF no go put him Penny/Kobo for the States where dem dey persecute Women for Nigeria. I beg una wey dey for Obodo Oyinbo, make una tell una government about this yeye thing wey dey happen for our Obodo o. Na here I go stop my people, make we no allow our money or resources reach Sharia States including our OIL.

November. 13. 2000

Abacha Saga: Wetin Dey Happen To The Case?

How una weekend my people, se una enjoy am? Today I want talk about Mustapha Abacha and his fellow Offerders wey dey for Prison. I no know whether plenty of una dey follow am, but me I get stake for the thing. Una sabi say the thing done pass one year wey the people done dey for Prison, my question be say why our government no fit finsish the case in time? I no say the offender get plenty money and dem fit get any lawyer wey dem want but since plenty of us know say these people dey guilty, wetin our government dey do? I know say person dey innocent until dey find dem guilty but these people na real criminals. I remember during their Leader regime, you no fit say something to dem before dem go send Hired Killers to person house. Another thing be say our Government get person wey be part of their web. Even self we know say na him be the Oga patapata for Assasins. If to say we no get prosecutor witness I go say the people go escape am but our Government get Sergent 'Roger" wey be the person wey dey do their dirty work for dem. Even my source tell me say the exhibit wey dem get again these people no be small. Everytime wey you hear the thing for Radio or read am for Paper some people dey sick. If dem no dey sick, lawyer get another case. Na so so different tory you go dey hear. Na the thing wey make me no like lawyes be that. All of dem na crook, the Judge o, Lawyer o, and the Offenders, all of dem na wayo. As I talk before, these people get influence and money, but my people for the kind crime wey dem commit, if to say na ordinary person do am, our government go done kill the person long time ago. As the thing dey for Obodo Oyinbo na so he dey for our country.   If you get money you go fit buy your freedom for any where for this world unless your crime dey terrrible. And this one na all of us sabi say he dey terrible. Una remember how many people dem send to yonder before their time? General Yaradua, na dem put AID blood for him body. My people make I talk small about that. These offenders dem no be human beings o, I no sabi how dem fit dey sleep for night? Even self the Lawyer wey dey defend dem, I no know how dem dey do am o? Una want tell me say these people no fit refuse the case? My people, una know how poeple are, na because of money. Una remember for O.J. Simpson wey be say the spend plenty money to defend him self. I guess say the Offenders wey commit these crimes too go spend some of the money wey dey thief from our Country to defend themselves. But my people as we all know say this no be America, this people no go fit escape this one. I no care if dem get the best lawyer for this world, our Government no go let dem escape am especially since some of the people wey dem torture dey lead our country now. But as the thing done pass one year now, why our government dey waste money when dem know say the people dey guilty? But as the thing be, even I know say the people do am, but I no talk say make our government dabaru the case. If our court no find dem guilty, make dem let dem go because I no suppot the kind money wey the thing dey cause our Country, na all of us know say as the country dey now, we fit use am for people wey dey look for work and know say some us dey here dey look for food to wack. Na here I go stop my people, na beg I deg beg our Judge dem make dem close the thing intime instead wey dem go dey take the thing make money.

November. 10. 2000

Millenium Election: America God's Own Country Don Do Am Again O

How una dey my people, I hope una watch Election for America? Nawa for that country, we no sabi the person wey go be President. As for the thing wey happen, he mean say no Country dey perfect. Na this kind thing make me remember Politics for our Obodo. Una see say for America as dem no sabi the person wey win Election but the country still dey Kampe. Una remember say since last year, our own Politics don become yeye. Na everyday we dey hear shout for National Assembly. We no talk say people no dey disagree, but the way wey dem dey solve am for our Obodo na another thing. I hear say for America, Vice President Gore and him Party say dem go go court go settle am. But if to say na for our country, the Party wey dey for Power, no go loose that kind election o my fellow Obodians. Because the people go don stuff the Election bag with their own votes. Una remember during Shagari time wey be say the NPN just dey make their own law as people talk say dem no get majority. Who go come forget Akinjide dem the Honourable Attorney General wey be say the man do wayo as him dey make him own interpretation of our Election Law. My people I no say una go forget 2/3rd matter, no person wey dey alive during Shagari go fit forget that one.

Nawa my people, na these same people wey do Wayo in the Eighties dey cry for Obasanjo head. Shagari wey dey complain say North no get him own share, which kind contribution him make for our Obodo? No be during him time we hear say plenty Politicians thief our money and take am go Obodo Oyinbo.

As for our National Assembly, una remember say two weeks ago, na Boxing ring dem turn the place to. Na so I hear say all the people wey call themselves Educated with their yeye Boscorner Coat and Agbada dey fight like say dem be Area Boys. If to say na me be dem, I go take the thing wey dey happen for America improve my self and our Nations. I no want hear the yeye excuse say America dey Old pass us. Plenty of our Leaders sabi copy foreign habits when the thing favour dem, but dem no go copy the thing if he dey bad for dem but good for the country. For example plenty, dey build fine fine mansions with better gadget for house. Dem dey drive Jaguars and Limousines dey enjoy, all these things na Foreign Habits. If we sabi that one, why we no fit report our income to the Government, why be say if something no belong to us, we no dey return am? Why be say if we go all these better countries go visit, why we no dey bring some of dem ideas wey go help own country? But we sabi ones wey go help our pockets but not the country.

All these thing wey dey happen for America, if to say na for Nigeria, na Hire Killer we go send to our Opponents if we no say the person go beat us for Election. I never see person for Nigeria wey dem digrace comot office say make he commot jeje. Instead the man go dey plan how he go take send Killers to him opponent place. I no say I no too sabi book but Politics no mean say you must get College Degree. The only thing wey I know and he dey important be say make you dey fair and reasonable to your fellow citizens. And he good make the person sabi work with him opponent to make Nigeria better. But for Nigeria, we get our own cunning stylee, we go do everything to spoil am for our Opponent even if we no say the thing go help everybody. Una remember during Jakande own wey the man want build Metro Rail for Lagos, since say Jakande na UPN, our Shagari dem make sure say the thing no happen as dem no want make UPN get credit for the thing. If to say dem allow the thing, all the surfer surfer wey people dey face for Lagos now because plenty people no fit buy motor again no go dey. Our people no too dey think about the future, dem only concern about today and the thing dem go chop. Plenty of us no get the thing wey Oyinbo people dey call "foresight" unless na Jibiti. And as for our Politicians the book wey dem sabi done turn their head, dem done become Kolo (Lunatic). Plenty of dem no be human beings again.

My people na here I go stop, I go dey talk to una next week, make una dey do jeje o.

November. 09. 2000

Katakata Don Happen For Abuja , Who Go Come Win This War My People?

How dey go dey my people? I hope una dey manage this our Obodo? He don happen again for National Assembly as my Source tell me say Legislators for Lower House say dem go probe President Obasanjo and his Advisers for Bribe wey dem talk say dem want give to Legislators make dem take comot Oga Na'abba. According to my source, him talk say Speaker Na"abba and some Legislators talk say make President Obasanjo resign if him no fit work with National Assembly. I even hear say dem say Obasanjo go face probe since na him dem talk say he dey behind N4 Million wey dem want take bribe Some Politicians make dem commot am. My other source talk say Obasanjo defenders dey talk say the House want take style dabaru the thing wey people dey talk for our Obodo say make the House probe themselves. From the thing wey I hear, Presidential Adviser Okupe talk say the House no fit probe President Obasanjo since say na dem accuse am say he want bribe dem. Him talk say House no fit be the Complainer and judge at the same time. The man talk say make dem send the thing to our Police or dem fit send am to Anti-Corruption Committee. My people the question now be say who be real Barawo among these People. Which person dey nak tory and which person dey tell truth? Make we look the thing well well, I no too like the way wey our President dey run the country as we no fit see anything wey he do. But as for the palava wey happen between House and Executive, he be like say the bribe own na lie, but as I no dey for National Assembly when the thing happen I no fit talk say no be true or na true. But if we look am well well, he done take wey dem talk say make Speaker Na'abba allow the people make dem probe the house and the man and him groups no gree for the thing. Una remember say I done talk am before say if the man know say him hand dey clean, why he no gree dem make dem probe the house. When some people talk say make dem allow Police make dem investigate National Assembly, the House no gree dem. The question wey I get for the people wey dey fight the thing be say wetin una dey hide? I know say una no trust our Police and I no blame una, but why una no fit gree make some of una do the thing? As for the Probe wey una start against President, I no agree with that one at all at all. Me I no talk say make dem no probe am and the other , but thing be say make we allow another party make dem do the thing for us. At least my people, according to President Obasanjo Secretary, the executive gree say make dem probe dem but no be House wey dem call the accuser go do am. My people I think say this na good talk. If the House sabi say the allegation wey dem put for President head na true, make dem give am to neutral people to do am. If he come happen say the President no do am, the House too go allow neutral group make dem probe all our Legislators. Anybody wey dem find say he dey guilty whether na President or Na'abba, we go comot the person and come send am to Kirikiri.

Na this kind thing go make people think twice before dem thief our money or do wayo. I hope say our Politicians go fit resolve the thing but no be say dem go bury hatchet o. We want make dem probe all of dem so we go fit see person wey dey tell tory. He done tay wey important people dey steal our money, do wayo, and commit crime, and nothing dey happen to dem. My fellow Obodians, me I don tire for the o, I hope say the probe go fit solve some of the problem wey dey cause katakata for our country. As for our So-called Leaders, I no sabi why plenty of dem no fit use their head before dem go bring their tribal mouth for the thing. He go good if we dem allow probe make him take him course before dem go talk say person do am or not. Plenty of dem na educated Illiterates, dem no get brain for head. Na here I go stop my people, I go dey talk to una o.

November. 08. 2000

New Money Palava: Anti-Graft Na Joke For Our Obodo

How una dey my people, I hope say una dey Kampe? I dey sorry say una no hear from me since last Friday. Na our Computers dey yari for our Engineers for work. The company no fit fix the thing in time, even self as I dey talk to una, plenty of their Computers still dey for ground dey strike. I hope say dem go give dem some oil, before dem give up patapata. My people I no sabi say Computer wey be machine too get him own mind o, until the thing wey happen this weekend. Any way sa, I dey sorry gan, I hope una go forgive me my fellow Obodians.

Se una hear say our Government done release new money? As una know for our Country everything na about money. Na Sunday one of my Sources dey tell me say some people dey exchange new N200 Notes for commission. She talk say the way the people dey do am be say, dem go give you new 200 Naira Note and you go come give dem 220 Naira. The N20 extra na their commission. Accoding to my source, she talk say plenty of the people wey dey do am na Women. She even talk say the people tell am say na Bank Managers dem behind this Wayo. My people nawa for our Bank Manages, me I no get problem if person want make money but the thing wey I no like be say make person dey make money from the thing wey Government say na free. Which kind yeye business be this? Una want tell me say our Government no fit do anything about this thing? Wetin CBN and our Police dey do when this thing dey happen for Nigeria? Una want tell me say the money wey our Government give Banks make dem distribute to us we go dey pay commission for am again? Which person pocket this one dey go self? I beg make our Government/CBN and Police no tell us say dem no fit find the people wey dey behind this thing at all at all? Na all of us know say anything wey our Government want resolve dem sabi do am, na only the one wey you get one Baba Isale (Godfather) for the thing na him you go dey hear our Government and Police dey nak tory. When clash dey for Ajegunle and Mushin, dem sabi arrest OPC Boys and their Leaders, but I no hear the thing wey dem go do for this one?. This na proper 419 case, how people go dey make money for the thing wey no be say he buy am? If our Police want talk say dem no sabi solve this one, I get one for dem.

Since our Government/Police no sabi good Detective, I go tell dem small thing wey I learn for CBN. Na all of us sabi say the Paper Money get number for the thing, and for Central Bank, if dem want give money to Commercial Banks, dem go arrange the thing according to number. For example, If I give New 200 Naira Note N#123654980 through N#123655980 to Bank A, and N#123654981 through N#123656980 to Bank B and so on. Dem get this thing for Record for Central Banks if dem never destroy am as una know how our people dey get connection everywhere for Fraud. If our police want solve am true true the thing wey dem go do be say make dem send Detectives wey no wear Uniform (una know say plenty of our Police no get sense) to the place where dem dey sell new 200 Naira and take style like say dem want buy the thing. As soon as dem buy am, dem go arrest all of dem. From there dem go fit find Bank wey dey behind the thing. If our government dey serious for their yeye Anti-Corruption slogan, na this kind thing dem go do, so plenty people go know say our Government dem mean business. Dem go put all the Bank Managers and Sellers for Kirikiri, na this kind thing go make people think twice before dem start their quick money business.

But my fellow Obodians, our Government and Police no dey work like that. The bribe wey dem want chop done comot their brain. Na here I go stop, make una dey do jeje.

November. 03. 2000

Royal Fuss for Kwara: Emir Don Cross Political Line O

How una dey my fellow Obodians? He don tay way I say I go talk about our Kings/Emirs wey dey put themselves for Politics. I remember during Banbagida and Abachar Regimes, plenty of our Royal family sell their throne because of some yeye money wey our Military dey give dem. I hear say plenty of dem from North to South, join politics because dem want chop some Oil money. During Abacha regime, I even hear say some of dem wey abandon their people because our Dictator promise dem say him go build big Palace for dem. He even tell dem say him go open Bank Account for dem for Obodo Oyinbo. Na wa my people, una see how some of our Kings and Emirs tay useless themselves because of money and dem come dey sell their people cheap. When I hear say Abacha die I tell my neigbhour say buying our King/Emir go die with am but he be like say I just dey deceive myself.

Se una remember the meeting wey dem talk say some of our Leaders for North do wey dem dey talk about Uncle Sege. Plenty of dem na Ex-Heads of States and some na Politicians. He be like say among dem na some Emirs, but me I no too sure about that. But I know say Emir of Ilorin dey among dem. Make una correct me If I dey wrong, no be say in the past when people bring Politics to town plenty of our King/Emir go do everything make dem no involve dem for the thing? The reason I believe be say since we consider our King/Emir as our Elders and Supreme of the Land, if problem dey between people or groups dem go fit help dem settle am. Dem go make sure say dem no support one person over the other. But lately some of dem because of money wey dem go chop, don dey put their mouth where he no belong. Una remember say our Emir for Kwara na him be leader of the Arewa wey dey attack President Obasanjo three weeks ago. My question be say since he don put himself member of Arewa Council, he no go fit rule over people wey no be Hausa/Fulani for Ilorin be that? Because of this thing wey him do, I no think say Yoruba people wey dey for the place go fit comfortable with am as the man don dey take style tell dem say his first "Allegiance" as Oyinbo people dey talk, na to Northerners no be to every citizen of Ilorin Town whether you be Fulani, Hausa, Yoruba, or Ibo or not. As plenty of our people dey think, I know say our fellow Obodians wey be Yoruba go dey think how dem go get their own Oba for the place. Una remember the wahala wey dem say OPC want cause for Ilorin two weeks ago? No be say I dey support OPC o, but I no blame dem for going there since the man wey everybody call as their Papa, Oba, King, Obi, Emir don tell dem say him sabi how many pikin him get; and the people wey no be Hausa/Fulani no dey among him pikin. If you ask average Nigerian which language Kwara people dey speak, plenty of dem go tell you say na Yoruba. I no say the King himself no go fit deny that because as my Source tell me, the man himself get Yoruba name for him name before he remove am.

My people I no sabi why the man come turn around say him be Emir for only Hausa/Fulani people when he know say plenty of his subjects na Non Northerners. My answer be say the man dey do am for money because some Northern Emirs like our Emir for Kano, Sokoto and Kaduna wey all or us know say dem be Northerners proper no get involve for the thing because dem consider themselves as Emir of everybody whether you be Hausa, Fulani, Tiv, Yoruba, Ibo, Ijaw, Itsekiri and Efik, all of us na their Pikin. Na the thing wey Emir/King wey dey wise dey do be that. I go ask our Government if dem go fit send some of our Obi/Emir/Oba/King wey no sabi how to be King to Royal School so that dem go fit learn some manners and etiquette.

Na here I go stop my people, I go dey see una on Monday as my God, Olorun, Chineke, and Allah don talk am. Make una enjoy una Weekend o.

November. 02. 2000

Politics of Disgrace: Our Leaders don Become Hooligans for Congress

How una dey my people, how dey go dey go? I know say plenty of una don hear about our Politicians wey don become thugs for National Assembly. I hear say dem don turn the place to Boxing Ring as everybody don become Professional Boxers. I even hear say some Legislators, na wrestling be their own as Alhaji dey fight Pastor, and Pastor dey fight Medicine man for the place. And our Women dem not talk say dem no dey there as dem dey comot their dirty wigs for heads for the action. My source tell me say the place come be like Ajegunle war room as all heads break loose. Some people talk say dem see plenty Alhaji dey fight Alhajas for the thing. As I hear plenty grown men with their pot-belle dem comot Agbada as dem exchange blow for the place. According to my source for National Assembly, him talk say some Legislators wey dey support Speaker of the House Alhaji Na'Abba talk say our Unlcel Sege give some Legislators money make dem take buy people wey go help remove the Speaker. Na so I hear say dem bring about N4.5 million as Exhibit say na our President and his people dey behind am. Na from there katakata come happen as chairs and tables dey fly for air as Politicians wey want make dem probe the Speaker and him supporters come begin dey fight. My people una see wetin Democracy don turn our people to? I no sabi why dem no go Sierra Leone go help our Army wey dey fight Rebels for the place. Una see my fellow Obodians, these na people wey go dey make laws for us and dem no fit obey the law themselves. I wonder wetin our President go come do as him don talk say anybody or group wey cause wahala for our Obodo na Kirikiri dem go find themselves? My people na him be say we go have another Election since plenty of these Thugs go soon find themselves for Abuja Prison. Oga Inspector I hope say una go arrest everybody as una do people for Lagos o? As una don talk say, no person wey dey above the law, I wonder how una go do this one since na una make am. I hope say the Judge wey hold those Hooligans wey kill people for Lagos dey listen o. If to say na mi be the Judge, if Police no arrest our Legislators wey dey exchange blow for the place, I go resign from the the Case.

The question be say which kind Democracy we get for Nigeria wey be say the defenders of our Obodo don become the Offenders? Which kind excuse dem want tell the small pikin wey dey see all this thing for Television? Tomorrow now dem go act like say nothing happen. For democracy sake, I hope say our Law Enforcement People- Attorney General and Inspector General go arrest all the offenders if dem no want make this country turn to Yugoslavia O.

My people the thing wey I no sabi be say, if to say na true true na our Executive dey behind am, why dem no trace the money well well, and if dem no trust our police say dem go do better job, dem for bring Foreign Experts wey go help clear this disgrace wey dem don turn the National Assembly to? Even self, we get the Upper House wey get plenty level headed Politicians wey go fit go between the Lower House and the Executive? Instead, dem don turn the place to National Stadium, where our Legislators don become people wey we dey watch for for Field. My people I no go lie to una, I no think say I dey surprise because if una look well, plenty of these people na bunch of Educated Thugs, Pot-Belle Soldiers and Corrupt lawyers na him dem be. As my Mama dey talk am (may her soul rest in peace), plenty of these people be like small pikin wey dem put for bed but he come turn around say na for Mat he want sleep. I no see fit see the different between dem (our legislators) and the Area Boys for Lagos. All of dem na thugs including the women wey dey among dem.

Na here I go stop my people, because I don tire for these Politicians wey be say dem no fit do better thing for us the masses. Plenty people no fit find food eat and our youths no fit find work, but our Politicians dey busy dey talk about the thing wey no go help me and you. Una see how dem dey useless our money, make person dey play with 4.5 Million Naira like say na ordinary paper, which kind life we dey self? And these yeye people dey collect salary o, and I not sabi the thing wey dem do since last year. Na beg I dey take beg the managers of the Bank wey our National Assembly dey put money, please my fellow Obodians make una no release that money since we no fit see the thing wey dem do for us. Make una remember say the money belong to the country. My motto be say if you no work, you no dey get salary.

November. 01. 2000

The Country We Dey Call Our Own……Nigeria

How una dey my people, I hope say una dey manage? He don tey wey I dey hear different people dey talk say dem want form their own country if we no fit live together in peace. My fellow Obodians, this kind talk me I no support am o. No be say the way our Leaders dey run the country good but if we look am, plenty people go die to get the kind brains wey we get for Nigeria. And God, Allah bless our country with plenty resources and weather but the only problem na the drivers of that Nigeria motor, plenty of dem na thief and rogues. Nothing those Overseas Countries get wey we no fit do if we dey serious. If you go all the regions for Nigeria, na all of us get something wey be say others no get for their area. But the thing be say with all the people wey dey talk say make we break up, wetin self dem get wey dem think say if Nigeria pafuka their regions go fit survive? One by one I go take each region for our Obodo and talk about am. Plenty people for Delta dey complain say the oil wey dey keep our obodo na from their area dem dey get am, and the country still no dey treat dem better. I agree say he don tay wey our Leaders don dey take my people for Niger Delta for granted. Plenty of the thing wey we get for South West, no dey for the place. The oil company don spoil their land and villages. But the question be say he no mean say if we go our separate way things go better. Wetin we go happen if after we form our own new country, the people wey be our leaders still dey behave like our past leaders nko? Una want tell me say we go break up again? Another thing be say plenty of our people too dey drink Ogogoro and our women dem, plenty of dem na   Asewo market dem dey live. As for my people for South East, na all of us know say we get small oil reserve, plus people know say we sabi Business well well. Another thing wey God give us na say we sabi make things even if people call am inferior but as we progress, the thing go better. But the problem be say there are some other things wey we lack for example, since we no get big river for the area, how we go tay dey send our products to other countries if our neigbours no gree us use their ports? Another thing be say we dey too stubborn and backward sometimes. And some other people think say we  too dubious. As for my people for South West, I know say we dey close to Atlantic ocean because of that we go fit trade well well with other countries. Plus plenty of the things wey we get for Nigeria, na the area dem dey. Another thing be say our people good for book well well and we dey expose to things pass some of other groups. The problem be say, we too dey fight ourselves too much. We no dey together and  we dey too good for our own selves. Plenty of us too dey do the thing wey Oyinbo dey call "backbitting". As for my people for North, we get plenty dry resouces if we fit develop am, live go better for us. Another thing wey we get be say we dey united gan and this fit make our new country progress well well even if we no get oil because of the kind land wey we get for our area. But the only thing be say, plenty of our people na illiterate, and we no sabi book well well. Another problem be say even if we get leadership skills, but we no sabi how to manage am well. One big thing wey fit destroy our new country be say, we too dey allow religion enter our daily life too much and that fit destroy our country.

As una see, no be say I give better example, I just dey take joke point the small problem wey we get for all regions. The thing be say, if we want break away from Obodo Nigeria, make we make sure say we do am for the right reason. And he go good too if we think am well well before we do the thing because I know say if we get better Leaders for Nigeria, the country go be envy of other Nations. But the problem be say, all the people wey dey call themselves Leaders, se dem dey serious about moving our Obodo forward or dem just want go back to their old way wey be say na to thief our Oil money?

The thing wey I dey tell una be say, we need all the tribes and people if our country go progress. Every region get something wey the other need to survive, I no think say if all of us scatter scatter by going our separate way, na him go solve our people. Na here I go stop, make una dey do jeje o.

October. 31. 2000

Wetin We Want Chop?

My people, I hope una dey manage? Today I want apologise to our Army for the thing wey I write yesterday. I dey sorry gan ni. Na beg I dey beg everybody wey I yab yesterday as I find out say our Government send our Military to the place. Yesterday the owner of our company receive message from a man wey call himself a Miltary Official, and the man come point to article wey comot for Allafrica.com about the invasion. This go teach me lesson say before I open my mouth, make I make sure say I don check with source first before I start dey talk. As for today topic, I no think say anybody fit come to me and talk say the thing no be so because, na everybody know say this Democracy no too dey work for us masses as our family still dey hungry and our pikin no fit find job. And Armed Robbers still be Kings for our Obodo. My people wetin our government dey do about this poverty wey still dey kill plenty of us. I know say some people go talk say the thing no go change overnight but we don tire dey hear that kind tory again since our Leaders dem dey distribute money among themselves for Furniture and Motor. Which kind excuse dem want tell us now since na everyday we dey hear say dem take our money buy things wey I no think say go put food for our tables. No be last week I tell una say dem award 11 Billion Naira for some yeye Companies make dem take build Abuja Stadium. Na so I hear again say dem spend N40 Billion to buy 1000 jeeps for Local Governments. If this kind money dey why dem no fit take am build jobs for our pikin wey no fit find job when dem comot University. Even self which kind yeye thing dem dey do wey dem dey buy motor for Local Chairmen? Una want tell me say the Local Government people no fit buy their own motor na him dem dey run for election? This money self, una no know how many family the thing go feed for our obodo Nigeria. My people na wa o, I even hear say the motor na from Overseas dem take import am when we get Leland/Landcruiser Motors Plant for Oyo State wey dey struggle to survive. If dem take that money pump am into the company, una know how many people go get work through am? But our Leaders no go get that kind sense, na to help another country progress na him dem sabi. I don talk am before say these people wey dey lead our country now no be our messiah. The only Manna wey go come from dem na surfer and hunger, because plenty time when dem make decision I no sabi where their head dey? Plenty of dem dey act like say no be this country dem dey live as dem dey blow our money yanfu yanfu. Since this democracy, he be like say plenty people don become poor. I no fit point my finger to anything wey our Government don do for us the masses. But if you ask me about the thing wey dem do for their own kind, my brother, I no think say I go fit put my finger down for three days for the the thing wey dem do for their Rich friends. Which kind life we dey self my people? No be say we no get people wey sabi book well, we get plenty of dem. May be na the problem be that because dem too smart for their own good. Instead make dem do better thing for the country, if dem no blow grammar wey dem go take do wayo, dem go dey busy dey thief our money as advisors. Which kind I advisors wey dem be wey our country no progress? Una want tell me say if to say na business dem dey run and dem no bring profit, una no think say dem go don sack dem? Na everybody sabi say Uncle Sege no too read, but wetin happen to Advisors wey dey follow am like Zombies? If una look well well, plenty of dem na real book and dem sabi am gan ni. But as una know our people, everybody dey for him own. Na to chop money dem go dey plan, dem no concern about the Masses wey dem dey pass for road. Even self my people, he be like say our Leaders like am as the thing be because dem like make we dey use Oga Sir for dem. But una know say if you get plenty captain for boat, who go come be boy boy for dem? He fit be the reason why dem dey kill the country be that? I know say plenty of una go talk say that na yeye talk, but as for me o, since things never better for plenty of us, I go continue with my yeye mouth.

As I want stop here, I hope say our Leaders dem go find solution to this poverty wey dey send plenty of our people to early Graves. Na beg we dey take beg una, make una remember say no condition dey permanent o!

October. 30. 2000

He Be Like Say Our Government Dem Dey Tribal (Why We No Fit  Teach Our Brothers Lesson Small? )

How una dey my peopley, se una enjoy una weekend? Pikin nko, se dem dey kampe? Today I want talk about our government for the thing wey dem no do about our yeye neigbour wey continue dey put their fingers for our mouth. He don tey as I remember wey our brothers for Cameroon don dey attack our land for South East area. Today una go hear say their Army enter Former Cross River Area and kill our people. Another day una go hear say na their yeye Police invade our country and destroy our crops and villages and dem capture our people. For this year alone, he don reach three times wey dem don invade our country and kill our people and our Government dem no talk anything about am. I know say all of us na Africans, but I support say make everybody bear him papa name as the insult wey this people dey put for our face don dey too much. Una know say me I no dey violent, but make some people dey kill our fellow Nigerians na him me I no support. If we no fit be good neigbour make we be enemies. As I sabi am, I no think say Mexico fit dey kill Americans and make the Super Power no talk. If the thing continue, na bomb America go send to the area. My people se una notice say our Government no talk anything about the thing. Even our yeye Governors dem wey come from the area no say a word. Even papa, the Politicians dem wey come from the area, just dey look like say no be their lands the people destroy. I beg my people se something dey wey me I no know, because I still no sabi why our Leaders dem dey keep quiet for the thing. Even the yeye National Assembly wey I think say dem go voice their opinion just dey look like mumu. All of dem dey busy dey chop our Money. I hope no be say because the Victims na Minority na him make our Leaders dem no do anything? Make una help me out here my fellow Obodians wey sabi our Constitution small. No be say he dey for our Constitution say our Government must protect him territory and people against foreign invasion. Which means say if our fellow Africans attack us, we no dey turn our other cheek. We go just bomb their place. Una know say he don tey wey Cameroon don dey attack our people, and I no think say I remember one time wey our Military dem retaliate. The question wey I want ask our Leaders be say una want tell me say if to say na one of the major Tribes dem   attack, una no go run after dem? I know for sure say if to say na South West, North and South East dem attack, plenty Heads go don roll for ground. But since the people wey dem dey kill now na members of Minorities our yeye Government no talk anything. Na this kind thing dey make our people no fit die for our Country be that. I bet una if dem ask plenty Nigerians make dem obtain Nigerian Secret (no be say we get one o) and sell am to the Enemies, I no think say dem go think about am twice before dem go say how much? But if una ask other people from other Nations if dem fit sell their Country Secret, he go take dem long time to agree say make you bring money. The reason be say, their Country go do anything for dem if dem dey in trouble. But for our Obodo, if you get problem for Overseas, I beg my sisters na only God fit help you; make una no even ask our Government for help because na there una go die. Na the truth I dey talk my people, our Government yeye, you no fit count on dem if you need dem because everything for dem na money. Dem no get any dignity for body.

I go dey talk to una tomorrow, I hope say our Government go do something about innocent people wey dey die because our Government no fit protect dem from Cameroon Mercenaries. I hope say our Governor for Akwa Ibom and his partners from Cross River Area go fit take law into their hands if our Cameroon brothers try this genocide again. If our Federal Government no fit help ask those Militant groups from South East, West and North for help, I bet you, our neigbour for Cameroon no go try am again.

October. 27. 2000

The Thing Wey Our Leaders Dey Do……

He don happen again o my people, how una dey. Today I no dey happy at all with our Government. My source told me say our Government don 11 billion Naira to Bouygues Construction Company wey go build Abuja Stadium. My people wetin dey wrong with this picture? Plenty of us no fit find food eat, our University Graduates no fit find work, and plenty workers no dey get their salary in time and our Government want put this kind money for something wey be say na Entertainment. No be person wey don belle full go dey go Stadium go watch Sport?  The question be say, wetin dey wrong with our Leaders dem wey be say their behaviour be like say no be this Nigeria dem dey live. We know say plenty of dem no dey live for our area dem because the thing too dirty for people of their caliber. Plenty time wey dem want come our area, the government go clean the area because our leaders dem get two heads. But we fit talk say sebi dem dey see us for Television because last week when Ajegunle area dabaru, Plenty Television show am for people outside Lagos to see. Na this kind attitude dey cause our palava for Obodo. All the problem like NEPA own , na because our Leaders dem dey live for Mansion and dem no too dey see the kind surfer surfer wey ordinary Nigeria dem face every day. Since plenty of dem get money to buy Generator and some of dem, NEPA no dey take their Light because Oga NEPA know say na the last time wey him go be Oga for NEPA be that; and if dem no kill am na small he go be. But I don tire for all the excuses from dem as our situation just dey get worst, nothing dey work. Who tell dem say na this kind thing na him we need when plenty family dey die of hunger everyday and we talk say we get Oil money? This stadium wey dem dey build who want go there when majority of us no fit find food eat and go dey worry about Stadium money? We all know say na their own kind dem dey build the stadium for, because the money wey dey thief from us dey yanfu yanfu and dem fit blow am as dem want since dem no say Plenty money still dey for dem to chop. My fellow Obodians, I no think say he go dey wrong If I talk say no be Stadium we want chop as plenty of us no fit find money buy food for our families. Se our Government think say as the country dey bad so, na Stadium be the next thing wey dem go dey waste our Oil money, when the country dey like this? As I talk before, I no think say the people care if we die of hunger or not as long say their family dey kampe. Which kind advisers dey tell our President say na Stadium na him the people want? I no even fit talk proper because I no believe our Leaders dem especially Uncle Sege go do this kind thing to us. Me I think say the man don change for the Prison wey dem put am, I no sabi say the thing still dey for him body. Sebi dem talk say the man come from Poor Family like most of us, una want tell me say because the man don become President now he don forget where comot from? I guess na so life be o my people, when people get small money, he go come be like say dem no dey shit again. Which kind Leader go put money for Building when almost all the people for him country dey surfer and dem no fit find food eat? Abuja Stadium, which kind life be this wey our Leaders dem go like better thing pass dying kids for Street?

Na here I go stop my people, I no sabi this one o. How dem go put that kind money for Stadium when no be say our condition don improve. I no think say dem take the thing wey happen for Lagos serious because plenty of us wey be poor sabi reason that kind thing dey happen. Plenty of us  no get hope as our pikin no fit find work and our parents no fit find money buy food for their family.

I no think say I dey wrong If I say being Nigerians, na curse. When plenty country wey no get resources dey treat their people better than our Obodo wey God bless us with plenty, yanfu of dem, but we just dey get people wey their heads don dabaru (Lunatics) for Leaders.

October. 26. 2000

The So-Called Leaders Wey No Sabi Our Law & Policies

How dey go dey go my fellow Obodians? I hope una dey cope small small. I don hear new one o, no be last week Yobe State Commissioner of Police talk say him and his entire Force go make sure say all the people wey dey live for the state no violate Sharia. Yesterday the Governor Bukar Ibrahim come add him own, him talk say Sharia Law go apply to every place for him state including Army Barracks. Osanobua o, na these kind people wey dey in-charge of our Land o. If the Governor and him State Police Commissioner no fit sabi where Local law end and where Federal Law start how dem want take lead the State and their workers when dem no sabi the thing themselves? I go look at the thing with the small brain wey I get. I no say Uncle Sege talk say State Police Commissioner dey under Governor, and him also talk say Nigeria no ready for State Police. I also know say NPF na Federal Government get am. The question wey I want ask these people be say how Police go go Army Barracks go see Soldier wey dey disobey Sharia or arrest the Army wey dey drink Beer with him concubines? I know say even if Police get power pass Army, all of us know say dem never born Police wey go go army barrack go arrest Soldier. If the person try am, na him dead body him fellow Police go come carry. But this no be the palava, the problem be say how state go make law wey experts talk say he dey against our Constitution? As if to say that one no do, the Governor and him Police Commissioner want use the same Federal Entity dey run after the offenders. And dem even talk say dem go apply Sharia law to everybody whether you be Muslim or Christian, Civilian or Military. Another question wey I want ask be say, se when we vote these yeye people, I no remember say we vote so dem go make Sharia our State Law? Even if I be Muslim, wetin concern dem if I want go visit Asewo dem? No be me get my body and soul? And believe say that na between my Allah and me. Plus people practice religion different, some Moslem go allow their pikin and wives wear trousers and for some other people, you no fit comot for house if you no put scarf for your face. Me I no mind if dem put the thing for Ballot Box make we vote for am, if plenty people vote for am fine, but no be state some yeye Leaders wey no sabi their Nose from their mouth go dey make one yeye law for us to follow. Na this kind thing dey make me  agree with People wey talk say Sharia na Politics no be say the dem want take the thing improve our life.

As I don talk my own o, but if our Federal Government no want Nigeria make he dabaru, make dem make sure say no police enter Army Barracks go dey enforce one yeye law because the thing wey the thing go cause, I no think say we go fit control am. Since plenty of our Leaders no dey use their Sense well well, I go spell am for dem small. Let say Police carry themselves go Cantonment for Yobe and want go arrest Soldiers wey dey dey drink Beer, una know say katakata go happen. Another one be say when dem reach Army Barracks fight come begin between Police wey majority na Hausa and the Army wey dem want go arrest na Christians from South West, that means say the other army wey dey around go either support their Fellow Northerners/Southerners or support their fellow Police/Army. That one fit lead to Inter-Force war because una know say Police and Army no dey gree at all. The Police believe say na dem dey do the work why the Army dey enjoy am. Before una know, the thing don turn to war of the Gun carriers.

I no think say the thing go come to that, but as wise men dey talk, he go good make you plan for bad and good things so you go fit ready if the thing happen.

My people, I hope say somebody go go talk some senses into those two fools before dem start the thing wey dem no go fit control. Na here I go stop my people, he go good if our Leaders dey use their Brain small small before dem open their big mouth.

October. 25. 2000

Sufer Surfer Life Capsule: We Want our Way of Life Back Politicians

Nawa my people, how life dey treat una? As he be now he be like say things go soon better for us o. We just dey pray say bad thing wey dey happen since last year especially the wahala wey happen last week go soon tey for past patapata.

Wetin happen to our Way of Life my People? The thing wey I sabi be say in the Sixties and Seventies, everybody just dey gbaladun. All this wahala we no too dey hear am as the Country dey mellow. Na that time you go see people wey dem go talk say dem dey go Luncheon party, Emu dey shele well well gan especially for Campus. As the country better so, Sunday for Nigeria dey dey special, I go talk say na everybody dey eat Yam & Eggs for morning and dem go come nak Rice and Chicken for afternoon. For Sunday Night na Dodo and Beans go enter our belle dem no dey talk that one. All these things just disappear as our Leaders dem enter Jibiti/ Wayo School for Barracks. The leaders dem come become General for Fraud and Barawo for Oil Money. My people se una remember during Gowon regime wey dem declare Udoji Money for Nigerian Workers. No be say him regine dem no steal money but he no dey too much. The whole country enjoy am gan o especially our Market Women as plenty Family fit afford Turkey dem. Una go see all these Wives with different Hair Styles as the Husband don bring boku money home. Na real Christmas for Beer Parlor dem as Men flock the place with their Concubines dem. Those na better times as plenty people fit afford two cars including our Teachers dem wey be say now dem no even fit afford Bicycle. As the thing money poku for our obodo then, Animals too enjoy am espcecially Dogs and Goat, as all of dem dey fat since People dey throw way plenty food for gutter. As Oyinbo people dey talk am "Gone na those days"

The question now be say wetin happen to those days? Plenty of us masses no ask for plenty we just want dey enjoy time with our family. As Shagari dem enter the thing, that na the begining of the Enjoyment End be that. Plenty of the people wey dey call themselves our Leaders now na that time dem start their Wayo Systems. Na this kind thing make me wonder why dem want give National Award to all those Rogues especially Shehu Shagari and his cronies wey start this whole mess including OFN (Operation Fool the Nation). Small time things improve small under Buhari & Idiagbon dem, but the Barawos wey the Military comot talk say dem dey abuse people right. Dem come plan with some rich people dem including MKO come and plan another Coup. Na that me I dey call "The Big Coup", because the thing cause not only wahala for Buhari dem but kill the progress wey for happen for our Obodo. Na that time Babangida dem make Corruption unofficial Ministry. People just dey thief money as dem like. Plenty Mansions wey dem build for our Obodo now, na during that time dem thief the money. Our pikin dem come become Night Marauders and Criminals as the country don break down. Pikin no respect their elders again since Parents no fit provide food for table. Our Youths come become adults quick quick as dem master 419 tricks. When Abacha dem come enter the thing come move from slow lane to Jet style, the fraud come become International Syndicate wey people come involve drugs and contrabands for their trade.

Na all these cause the hardship wey plenty of us dey face now. If una go some people house, Television and Radio (Grundig) wey dem take their Udoji money buy na him still dey for their parlor. Middle class don become past tense for our obodo since plenty of dem don move down on National Ladder.

My people the thing wey we want, I no think say he dey too much. We just want our Freedom and enjoyment as he dey before Shagari dem back. Na for this make me talk say we masses must do everything to get our way of life back.

Na here I go stop my people, make una dey do jeje o. He go better my people small small.

October. 24. 2000

Militant Groups For Our Obodo Na Big Mumu

How una dey my people, I hope una dey manage? I dey sorry for yesterday as I no fit talk to una. Na yeye NEPA cause am, as know say you no fit rely on dem. Plenty of the surfer surfer wey we dey surfer for this country na dem and others dey cause am. I hear say our Government don put some people for Prison wey dem suspect say na dem dey behind the killing wey happen for Lagos last week. I also hear say some of the people wey dem arrest talk say dem dey innocent. Some people even talk say na jeje dem sit down for their house wey police come arrest dem. Another people talk say dem just dey gbaladun for outside their House wey Police come catch dem. But since I no dey there, I no fit sabi if the people dey nak tory or na Police just dey grab people as dem want pretend like say na true true dem dey do their work. I hope say our Government go take the same energy dey run after Armed Robbers wey don become Terror for our Obodo.

Since we dey talk about Militant Groups I get something wey I think say our people no too dey see for Nigeria. Some people talk say plenty of these groups na young people wey no fit find work na dem dey vex as if be like say hope no dey for dem. I agree say when our pikin no fit find work, dem fit become Criminals to money. But the thing wey I no sabi be say, I hope plenty of these Groups no be University Student because if to say na dey dey behind am, that means say our country dey for big trouble be that. Me as a person, I get enough sense say If you dey fight your Mama no be the cloth wey she buy you dey wear you go carry matches and put fire on am. The thing be say because if you burn am, how you go take go outside if you no fit find Cloth wear? The thing wey I mean be say if all these people wey we think say dem get small sense for head as dem be University Student, I hope say no be their own Obodo area dem dey burn as na dem dey live for the place. I know say sometimes when hungry dey kill person for Belle, no be the kind thing wey the person go dey think be that. But he good if we talk about am small. If our Obodo no simmer small, I no think say business go fit survive as all Mama Oloja go tanda for their house. The same thing go happen to Big business like Banks and Brewery because if the thing dey too much, the Parent no go fit go work, and as dem no fit reach work, the Banks and Brewery dem no go fit make money. And if dem no fit make money, that means say the small money wey you and your whole Family dey manage no go dey o as the Companies dem no go fit pay your Mama and Papa Salary. Na him be say your surfer surfer go multiply well well be that. All these jobs wey our government want bring to our Obodo no go fit happen o, because I no think say Oyinbo people want come Nigeria come invest money when dem no say, tomorrow dem fit put fire for the thing. And una sabi say plenty Oyinbo get sense, dem go talk say if we fit dey kill ourselves like this, that means say we no go think about am twice if we want destroy Oyinbo and him Business. The thing means say our trouble go continue be this because if I be Foreigner I no think say I go fit come open business for Nigeria as the country engine still dey burn like Locomotive with wahala..

My pikin, I no say plenty of una the sufer surfer don dey too much, but if we want turn am around, na the yeye Leaders wey thief our money we go go dem house go burn am or cease their properties; all these fight wey we dey fight ourselves no go surf am. I no sabi why una no carry that wahala go the Politican Places go dabaru am since na dem destroy our country? Una know say as una dey kill una selves, our Politicians Pikin dem dey Oyinbo Country dey gbaladun our money. Small time, these their yeye pikin go come come our Obodo come dey run for Election when the thing don simmer. Una see, the people wey surfer any pain go come reap the fruit of una labour. Na the thing wey dem dey call   "Monkey dey chop Baboon dey surfer be that". Na the thing wey make me talk say our militant group be Fools be that. I hope say plenty of the people wey cause this wahala na Illiterate wey no say dem no get future and the brain wey God give dem no sabi use am well. Because if to say na our University student dey behind am, make the parents dem just go hang the boy heads as their brain don become Painter own.

I go take this opportunity beg our Leaders say the time don come wey dem should start dey put all the energy wey dem dey waste dey fight among themselves fix our economy for our Obodo. As I see am now, the people in government just dey waste their time for the place because I no fit see the thing wey dem do wey go better our Pikin dem life. The only thing dem sabi na to distribute Oil money and benefits to their families while the masses dey dey surfer. The thing wey I no sabi be say, how plenty Nigerians dey surfer while our so-called Leaders go dey worry about how much dem dey pay dem or which kind Furniture go match their status when masses no fit feed their families for one day?

My people, na here I go stop o, I hope say one day, I go fit talk about better thing wey dey happen for our Obodo. But as I see am now, the time go dey long my fellow obodians. Make una just take am easy, he go better as Olorun, Chineke and Allah dey.

October. 23. 2000

How una dey my people? I not fit talk to una today as NEPA don take our light. Na beg I dey beg una so make una no vex with me. I go dey talk to una tomorrow, make una dey do jeje o.

October. 20. 2000

Nigeria Get Plenty Tribal Leaders

My people I hope una dey cope with the loss of lives for Lagos and Delta Area? Our country get big problem and I no think say the people wey call themselves Leaders go fit solve since dem be part of the problem. Ever since the thing wey happen for Lagos, we dey hear different opinions from our Politicians. And when I look at all of dem, na one or two better, all the other one yeye. Your hear OPC leader dey talk say no be him people dey responsible. The question wey I get be say if no be your group, who come do am? Plenty of our leaders go take credit if the thing wey their boys do dey good for our Obodo, but anytime wey dem disgrace the group, na so you go hear dem talk say na Imposters do the bad thing no be their boys dey responsible. Example na the fight wey happen for Ajegunle area. Plenty of our leaders too dey take credit for something wey dey no get control over but dem go come denied am if the thing bad. This thing wey I dey talk apply to our Police Force too. Se una hear say our Police kill 18 Youths for Delta, and the police talk say the boys want vandalize Pipes for Oil. No be say some of our youths dey innocent for this kind thing especially the thing wey dem do in the past. But he no means say every time our boys dey together, na wahala dem want cause. From the thing wey my source tell me, the villagers talk say the boys dey go play soccer. Since I no dey there, I no fit talk whether the thing na true or no dey true. But the thing wey I go say be say, he go good if dem train our Police well, no be say every time wey dem see people together na kill dem go dey kill dem. I hope say our government including the IG go investigate with the Villagers if no be say the Police just kill the pikin dem for nothing.

As for our so-called Leaders, why be say anytime wey something happen we too dey jump into conclusion especially if the people wey die na our own? Because of the thing wey happen this week, I don they hear our Leaders for North say Federal Government dey do tribal politics as dem no fit catch Mr. Adams the OPC Leader. Dem talk say the government should investigate OPC activities. Me I no get problem with that, the only problem wey I get be say when my people for North dey kill my people from South, these Leaders dem no talk anything. Dem no talk say make Our Government probe the thing as if to say some of dem get hand inside or dem sabi people wey dey involve. And na the same thing I go talk about my SouthWest Leaders wey be say when the Northerners dey kill southerners for Kaduna, na all of dem dey make noise. Why be say dem no fit make the same noise when OPC Hooligans dey kill Hausa people? My own be say wetin no good no good, he no matter which person do am. The thing wey we no want make dem do to us or our people, make we no support am if our people dey do am to other people.

My advice to our Tribal Leaders be say, if you no get better thing to say, make you just keep your opinion to yourself. Please if you see your people wey dey commit crime against other groups talk so that if the other people come dey do bad to your people, you go fit get mouth to talk and people go respect you for am. Na the thing wey I dey call leadership be that. Na beg I dey beg una make una watch the thing wey dey comot from una mouth. Plenty of this thing wey dey happen na una dey cause am. If una see any injustice he go good if una let the whole world know about am, no be say the only time wey una go see am na when the thing affect una people. Person wey be better Leader go get fairness for him body no matter who dey wrong for their face.

To our President, please treat all the tribes the same, no be when something happen to one side you go send your Mighty Gun to am, and when he come happen for the other side, na mie your mouth go dey. As for our Youth, he go good if una put all una energy for better thing instead wey una go dey let our Leaders use una for their yeye agenda. God, Allah, Olorun and Chineke will be with all of una o.

Na here I go stop my people, make una dey take am easy o.

October.19. 2000

Militant Groups: Who Dem Be?

I know say I no fit ask una how the thing be since our fellow masses dey die for Ajegunle Area. The wahala wey these Hooligans dey cause don dey too much my people. We know say dem mean well when some leaders form the groups but as he be now, he be like say anything wey palava dey for our Obodo, whether na for South or North o, the end no dey good for our communities. Una remember during Sharia war for North between the Moslems and Christian plenty of our people die for the thing. And plenty of the people wey die na the yeye hooligans wey call themselves Arewa Boys na them cause the whole wahala. I fit bet una say if to say our government do their work well, dem go find out say plenty of the properties wey burn, na the yeye militant groups cause am. And for South, the thing wey those yeye groups especially OPC dey cause no be small thing. The thing wey I hear be say the intention of the leaders be say make dem start groups wey go protect us, because dem want protect their tribes from crime wey don increase, and these groups come turn am to Vigilante. But as the thing be now, plenty of the people wey call themselves OPC, Bakassi, and Egbesu Boys don become menace to our Obodo. Plenty of dem na the people wey we dey call Area Boys. And una know say no person wey dey live for Lagos go say him no sabi the kind thing wey those boys fit do. Plenty of dem na Ogogoro and Igbo be their daily food. How una think say these kind people fit protect our environment wey be say plenty of dem don go Kirikiri and Alagbon plenty times. Every day for Radio you go hear say these Militant groups don lynch Robbers. No be say I dey pity robbers now, but the question wey I go ask these people say how dem go fit tell which person be robber which person dey innocent. Because as una sabi for our behaviour especially for Lagos, sometimes na Thief go dey call people Oleh Oleh. And na this kind thing dey make people dey afraid when thief snatch their Wallet or Bags, dem go just keep their mouth close because dem no want make people put tire for their neck for the thing wey be their own. The question be say who go protect the innocents if everybody dey call everybody Barawos? Na this kind thing no make me support make we dey Burn people when no be say we take our Korokoro see the  crime happen for our face. Na this kind justice the Militants dey do all over Nigeria especially Lagos and Onitsha. No be yesterday  I hear say 60 people die for Ajegunle area. Who want tell me say some of the people wey die for the thing no be innocent bystander. And this yeye thing wey everybody dey take law into him hand because our Police no sabi their job don tire me o. As the OPC dey kill all those Northerners, who go come protect innocent Yoruba people wey dey live for Kaduna, or Ibos wey dey live for Sokoto? Just as the Northerners dey kill Southerners wey dey for Kano, who go come save the innocent young Hausa Man wey dey live for Ajegunle.? Make una think about this before una start una yeye war. I no blame the government wey dey against the Hooligans. Na the kind thing wey make our government no support dem be that, because if you ask dem say make dey dey protect their people against Robbers and criminals, small time when dem don smoke their Igbo finish, na trouble dem go dey cause for other people. Which person die and com make dem Leader or Chief for their Tribe? I no sabi o my people.

My advice be say, since we know say plenty of these groups mean well, but some of dem dey do harm to our obodo than good. He go good if government make am law wey be say if you kill person even if the person na Robbers, you must go court go explain yourself. And as for our Leaders wey dey use these boys for Politics, make una keep on, one day na these people wey you dey use for your wayo go expose you. If you make deal with devils, small time, na the same devils go cause your downfall na so life be. I be Hausa, Yoruba, Ibo, Fulani, Ijaw, Tiv, Efik, Itsekiri and Godogodo, na beg I dey beg una, make no group kill person or people on my behalf because I no want the blood for my hand. He go good if una use una energy for something wey go help our country grow, no be this kind tribal war go make our country better. Na this yeye behavior we no support.

As for our Government, weting una dey do to help our youths find work? Some of these pikin wey dey join gangs and cults, na because dem no fit find any better thing do na him make some of dem dey become criminals and killers. I beg if una know sabi una job, make una comot and make way for good leaders make dem enter.

The Innocent people wey die, Make their Souls rest in peace, Amen. Na here I go stop my peace loving people.

October.18. 2000

The Thing Wey Teeth Dey Do For Our Body

How una dey enjoy this our Democracy my people? I hope una dey manage am o? Today I go talk to una about the thing wey I face last week. I know sabi if I don tell una the thing wey my teeth dey do to my body. He don tey wey my teeth dey pain me and as una know for our Obodo, na only people wey get money dey go Dentist place. I don use our home made medicine tire and the thing no gree go. My family even take me go Herbalist but the thing na the same thing. As I don tire dey ask my brother wey dey Obodo Oyinbo money, I no fit tell am and the thing no say he no want kill me. The thing don reach stage wey be say I no fit open my mouth as the don dey comot small. Some people even talk say make I go Mallam place wey dey comot "Belu Belu" but as una know me and pain no be friends. I tell the people say if to na this teeth pain go kill me I dey ready because I no dey the place. Wetin I want go do for Mallam place wey be say the man with him big hook go just pull my teeth comot as to say na animal him dey treat. As me and una know say no be say mallam go school for this kind wey him dey do. Wetin go happen if the man go pull all my front teeth instead of the two wey dey give me palava? As the pain don dey too much and plus the two teeth don dey come down small small, na him I come say make I call my brother o. My face dey change as the teeth dey come down small small . He don dey reach wey my friends talk say anytime wey dem see me for far na my teeth dem dey see first before dem see the rest of my body. Una know say when you don dey dey hear that yeye talk from your friends, na him be say my case don dey become talk of our Obodo. I remember one small boy wey call me Wang Yu. Na that talk plus pain na him come make me say, time don reach wey I go bury my concern for my brother mouth. Una believe say my brother talk say my Uncle don tell am when he talk to am last month.

To cut the tory short, my brother tell me say make I go see one of his friends wey dey for Lagos Island. The man look my teeth and come tell me say make I come back the following dey. When I reach the place, the man come give me one drug as I tell am say me and Needle no dey see eyes to eyes when he want give me injection. Small time my people as I dey inhale the thing he come be like say I dey waka for air, all the thing wey the people wey dey inside that room dey talk dey funny to me as I dey laugh like a fool. I hear say the thing na "laughing gas" na him dem dey call am for America. He come be like say I don smoke "Igbo". Una know say I no feel pain as dem dey comot the thing. After the man don finish dem come give me instructions how I go dey treat the thing. Dem even tell me say I no fit swallow Eba and Iyan for three days. My people when the man tell me the thing wey I no go fit eat, he come be like say dem no want make I live. As una sabi typical Obodian, when I reach home na eba and Apu na him I nak. My people I for don listen to the Doctor o, because the second time when I say make I nak "OKO" Fish head, na him the thing come stuck between my fake teeth, as I say make I pull am out, na my two teeth I comot. If una see the kind speed wey small pikin for our house take jump, una go think say dem still dey Olympics and na Sydney we dey. When I look inside mirrow I no sabi the person wey dey there. I come be like the dead people wey dey inside Michael Jackson song "thriller". My people na so I end up for the Doctor place, but I no tell the man say na Oko I dey wack when the thing comot.

My fellow obodians na that dey I no say our teeth dey important for our body o. As I tell my friends, he no matter how pretty you be, if you no get teeth, na run people go dey run from you. Na here I go stop, make una dey do jeje o.

October.17. 2000

Dictator Open Him Mouth: Self Proclam Founder of Democracy

My peole how dey go dey go? Yesterday I tell una say Former Head of States Ibrahim Babangida and him cronies get meeting for Jos. The man dey take credit for Democracy wey we get now, my people, he be like say the man no dey shame. Our Former Head Of States Abdulsallam talk say he good as the man talk; and him talk say this go make people know say Babangida wey him sabi for 50 years na good person. Make I tell una my people, our former Head of states Abdusallam na better person since na him allow democracy for our country again. As for the thing wey him talk about Babangida, that one no go sell for our our obodo because all the surfer surfer wey we dey surfer now na the man cause am. All the money wey disappear for him regime we no sabi where dem dey and wetin happen to all those contracts money wey dem award their cronies? Make una see us see trouble my people, how person go ruin the country and dey talk say he do well. Make I tell una this, I no think say these yeye people sabi the havoc wey dem cause our Obodo. During his regime, na so many innocent pikin die because our government no dey work for dem. Doctors no fit find money buy machine for their hospitals. Na during Babangida time na him our Middle class disappear for our country. Before the man become President, plenty people fit afford car, food, better thing for their family, but as soon as the man and him Barawos enter the thing, corruption come become the thing wey everybody dey wear for Nigeria. People no dey hide am at all, even before, Police when dem stop you for road, dem get these Drums wey dem go ask people wey want give dem bribe make dem go put money inside. Because corruption no too dey for our body well well, as soon as our Ex-Robbers enter government, people no dey hide the thing again, you go see police wey dem go come to you make you give dem money. If you no give dem money, your motor no dey go anywhere be that. The bribe wey be say he no too dey for Bank before Babangida become our President, now the thing don become yanfu for Banks since then. If you want open account or borrow money, if you no give dem "egunje" you no dey get money for the place be that. I remember four years ago wey my brother want open account for Union Bank, the bobo dey tell my brother say the bank no dey open account on Thursday and my brother dey comot dey go America that evening. Na only because we sabi their manager for the branch na him safe my brother that dey. But I no go blame the bobo, na my brother I go blame, when I tell my brother say the manager na family member him talk say him no believe in that to open account.

So my people, wetin General Abdusallam see for General Babangida wey the whole country no sabi because the man and Abacha ruin own country. I no think person dey for Nigeria other than him cronies wey go say Babangida regime better for the country.

I hope say our Historians go their work well because Babangida na cause to our obodo, him years na the thing wey Oyinbo dey call "dark Age" for our obodo be that.

Na here I go stop, I go see una tomorrow as my God Almighty don talk am. Make una dey do jeje o.

October.16. 2000

Meeting Of The Ex-Robbers

How una dey my people? I hope una enjoy una weekend? I don hear another one o. I hear say all the people wey dey for government during General Babangida go meeting for Jos. Una hear that one my fellow Obodian? Na only in Nigeria you go hear people wey thief our money go dey do meeting. The question be say which kind meeting these robbers dey do? May be dem want take style tell people wey dey for government say make dem hide the money wey dem thief well well as Investigators don dey come close. He fit be say na threat dem want threat some of dem wey want talk say dem thief our money. I know say na everybody get right for our Obodo, but this kind meeting I no think say he good for our country. I know sabi why Police go stop the other Leaders wey want talk about Sharia two months ago for Lagos, but dem no talk about the one wey happen for Jos. The question wey I want ask our Police and Federal Government be say which want dey dangerous pass, the people wey want discuss peace or the ex-robbers wey plenty of dem na Soldiers and dem still get supporters for Army? Na the thing wey I no sabi about our President be this, sometimes you go think say him advisers go advise am against am but he be like say dem no get sense at all at all or dem get am but the thing don dry. How una go allow people wey get that kind power dey hold meeting? Una think say if to say during Army regime, dem go allow that kind nonsense? If dem do, I know say na everybody wey go that meeting go dey under arrest because our Military sabi create yeye charges against there opponents. Na the thing wey dem take send this our current President and plenty powerful men and women go Prison be that. I know say me I no go school but I dey wise enough to know say this kind meeting no be how dem go return our stolen money dem dey discuss. The people wey organize na wayo and dem get motive and I no sabi say the thing dey better for Nigeria. I hope say the Nigeria National Security get copy of the meeting, if not na the beginning of an end to our Democracy be that.

I another yeye thing wey I hear na about the thing wey that thief Aikhomu talk. Him talk say he dey proud of the thing wey their regime do to our Obodo. My people una hear that? The man wey be say before dem nominate am for that position, he no too get money, but by the time he finish with our Money, na him and our Money dey live for him yeye mansion. I never sabi person wey live our government broke except Jakande. Plenty of dem na our money dem tey become Billionaires and Senators. Why be say for our government we get plenty Ex-Soldier wey dey National Assembly than lawyers? Na the thing wey make our country go down be that. People wey no fit win war against small country like Cameroon, dey make decision for the whole country. Our country don pafuka be that my people. I hope all our people wey dey Obodo Oyinbo and dem sabi book well well go fit look whether he dey possible for Nigerians to Sue these people wey dey take our money go Overseas for World Court. If that happen I wonder how many of dem go fit tell us how he get him Billions if no be our money dem thief. I know say if one person start this, all the people wey dey thief our money and take am go Obodo Oyinbo go think small before dem go take am go obodo oyinbo.

My advice to our current government be say make dem be careful, because when you see plenty khaki boys for one room, the thing wey dey come out no dey good o, na the money wey I get na him I dey borrow una. Na here I go stop, make una dey do jeje o.

October.13. 2000

Sharia For Our Obodo Na One Kind Religion Sham

Shari palava don happen again o my people. How una dey? my source for North tell me say another Governor don talk say him go start Sharia for him state. My people I no fit see person wey fit give me better reason why my people for North dey introduce this thing for their States. Plenty of dem talk say the thing no be new thing now, he don tey wey Moslems dey pratice the thing. My answer to that be say na true plenty of us sabi say the thing na part of Islamic Religion and he don tey wey people don dey practice am, but the question be say why dem want make am State Religion now if to say no be politics dem dey play with am? As dem dey ban everything wey dey against Sharia, which time dem go compensate people wey long time ago dem invite make dem come invest for their states. Abi the hotels wey dem say make the owners close no be money dem take build dem? All the business people wey build market for the Sharia States, I hope say the governments dey think well well about the people wey dem want run out of business; I believe say na politics dem dey play with people life. Make I ask our Governors this question, plenty of dem don dey go Obodo Oyinbo dey look for Investors, which kind cracy man go come invest him money when he no say small time dem fit bring another law and everything wey him put for the states go just vanish like that? Na the kind thing wey I dey say about our people be this, I no sabi why we no dey think well well before we make decision. I no talk say make we no practice our religion, but he go good make we look how the thing fit affect people including the ones wey dey different from us. We dey introduce all these new religion laws, and we no sabi how our people go take survive and how dem go take find their next meal eat. I hear say Sharia supporter dem talk say the thing go help reduce corruption, I no care how many laws wey una introduce, if people no fit find job and their pikin dey die because dem no fit find food eat, and dem sabi say the thing go affect their "livelihood" as Oyinbo people dey talk, dem go disobey the law. As dem dey talk am for oyinbo "an hungry man na angry man". How una think say the thing go stop corruption when plenty of our Leaders dem na the Chiefs for Barawo. Una want tell me say person wey get power like a State Governor go thief our money and him backers go allow una make una cut him hand?. Abi we catch one Emir Pikin dey poi another man wife, the State go come cut him legs for that? I know say he no fit happen for our Obodo because everything na power, na people like us wey be masses go surfer am.

The thing wey I go say be say since we know say the thing na politics and we no think say the thing go stop soon, my advice be say the next State Governor wey want become follow follow, make dem create area wey people wey no want follow Sharia go fit go enjoy for the state. Another thing be say, since na the politicians start this problem, he go good if our government go pay people wey fit lose their business because of the thing, as the Yoruba dey talk, "no person dey start business because he want lose money."

As for me o, I no think say we get proper infrastructures wey go fit support the thing. The thing about say Men and Women no fit enter the same motor, how many Molue we get for Nigeria wey go fit support that law? And wetin family go do if dem no get car as Papa no fit enter car with him wife and pikin? And if to say dem allow family member make dem dey together, how dem go take sabi say the people wey say dem be family na true dem dey talk as our people dey like dey tell tory?

Na here I go stop my people, na beg I dey beg our leaders make dem think well well before dem start dey introduce new law because the thing fit turn around and bite dem for face as life be. I hope say dem know say the next President fit be a Northerner and wetin dem go do if southerners come start dey introduce Christian laws? And the people come decide say dem want control their Oil which fit cause katakata for new President as some yeye Leaders want undermine the current government, wetin go happen my people? Make una think before una do am o. I go dey see una on Monday as my God don talk am.

October.12. 2000

Our Inspector General Na Disgrace

How una dey my people? Katakata don happen for our Obodo. The fight between our legislators and Federal Government don big pass Atlantic Ocean o. My source tell me say the Clerk for House of Representatives don receive letter from our Inspector General of Police, Mr. Musiliu Smith wey talk say he want interrogate Speaker Alhaji Ghali Na'Abba and his deputies because of report wey Senator Arthur Nzeribe send to IG for corruption. Dem talk say when our Speaker of the House and him supports receive the thing dem want give Senator Nzeribe some blow. I even hear say all the people wey call say make dem probe The House don dey receive death threats. One Legislator talk say dem send Hire Killers to him house this past weekend. Him talk say na him Papa head save am, but Police don arrest the assassins. My people wetin our country dey turn to? If me and you dey fight the next thing wey dey happen for our country now be say  you go send Hire Killer make dem come teach me lesson. Una see my people, these na the people wey we elect say make dem dey in-charge of our country o, na the same people dey send assassin to themselves if dem no gree. If these our caretakers dey do these to themselves wetin you think dem go do to people like us if we cross their paths? I don talk am before, any person wey vote for these thugs again, make him just take himself go Aro for Abeokuta because he don dey Kolo

As for our Inspector General, that one yeye and I support the people wey talk say make dem comot am. The man na real disgrace for Police. I remember say when people talk say make our Police Force interrogate Governor Tinubu because the man forge him certificate and lie for him governor form; our yeye Inspector talk say no be police business. Na so the man talk when people talk say our former Senate President do wayo for him certificate. Me I know say I no get money but I get principle, I no dey like  person wey dey do wayo for him work. This partiality wey the IG dey show for him work me I no support am at all. Since the man no do anything when Governor Tinubu and Senator Enwerem palavar happen, I no think say he good as he enter this one. I know say some people no like the thing wey I just talk but as the man don spoil am from beginning, he go good make our President comot am since him don fail us. I no talk say the people wey dey for National Assembly dey innocent but na the IG spoil the thing. If we dey fair, he go good make our President hire another IG and make that one probe all the people including Governor Tinubu. Me I no support say because person come from your village make you no arrest am if he thief money.

As for our Speaker and him cronies, all these yeye thing wey dem dey do no go fit solve the thing. If dem know say nothing dey wey dem dey hide, make dem let dem probe the House. This thing no be una papa house, small time una go soon comot. I no support say make people dey send Hire Killer to fellow humanbeings because una no gree. This position wey una want kill una self for no be permanent, small time another people go enter am if una no spoil am for dem. Na this thing make me remember King Sunny Ade song wey him talk say " Person wey get money and no want enjoy am, wetin happen to people like am wey come before am?' I know say no be about money we dey talk now, but the thing be say wetin make our National Assembly think say people wey dey come after dem no go probe all of dem? If you dey clean no worry about am, but I go bet una say if people like me enter am, una no go survive am o. All the wayo wey una do if we take the money wey una thief we go fit take am do better thing for the country.

Na here I go stop, make una dey do jeje o. Nigeria na our country make una treat am well.

October.11. 2000

Privatization: Na Our Life Support For Better Thing Be That O

How una dey my fellow Obodians, I hope say una dey kampe? He don shele, life go soon better for us o my people. I don hear new tory, na my source nak this one o and dem talk am for radio too. I hear say the Privatization wey our Government dey talk since dem begin this our new democracy go soon happen. I hear say no be only rich people go enjoy am o, poor masses like me too go fit join if we get money. My source talk say our Government say dem go create "Share Ownership Fund" which means say people like us wey no get plenty money go fit put our money together and take am buy shares for the companies. That means say me Pa Omugo, Mama Dauda and Brother Zebu go fit put our money for Share Ownership fund and take am buy NEPA and NITEL.

My people I know say plenty of us no get money to take chop but as our people dey do, if person die for our family, you go see people wey go borrow you money. Plenty of us dey complain say Politicians na only Rich people dem sabi and that dem too dey selfish. But my people this one na one real better thing o. If we fit find the money, I beg my fellow masses make we try and join for the thing. I no know about una, I don tire dey worship these rich people, I know say no be say the thing go make me become Millionaire tomorrow but if I fit find the money and put am for the thing, my pikin dem go fit do better thing with the money when I don go visit my Forefathers dem. As I dey tell my Friend Johnny yesterday say, as I dey for now, God forbid say I die today, I no get anything wey my pikin fit call their own or inherit, and dem go fit say dem go grab except the two Shirts and Agbada wey I get for Cupboard. Na this kind thing make me talk say he go good if people like us go fit put small money wey we get for the Fund. As my brother for Obodo Oyinbo dey talk, if you no invest in your pikin, all the surfer surfer wey you surfer no go end o because as you go visit meet your people for yonder, na so your pikin dem go carry the wahala for head. Since I know say surfer surfer no good for body, I no want make my pikin dem surfer the thing wey me surfer. I no want make dem dey call their mates Oga Sir. The one wey my family do don do.

Small time una fit see me for Television with my Agbada and Tie dey blow grammar for NEPA Board meeting. I promise una say if I become "The owner" for NEPA since my 5 Naira contribution dey for am, Light no go die again be that because na my tie I go take tie am.

My fellow masses, na the money wey I get na him I dey tey borrow una, make una start dey save money because this thing no be the thing wey we go let our Politicians buy finish for their pikin. I no want my pikin dem dey course me when I dey gbaladun with my Forefathers for heaven dem.

If we do this thing, may be the surfer surfer wey we surfer no go reach our pikin dem, I go talk to una tomorrow, make una dey do jeje o.

October.10. 2000

Federal Republic of Nigeria: The country wey Politicians no dey Shame

How una dey my people, se una dey gbaladun? I not think say plenty of una go like the thing wey I want talk today. But since I don talk am say, anything wey I see wey no dey good for our country and us, I must talk am for the sake of the small pikin dem wey dey come after us. As I see our Obodo, I no think say we go fit survive all these complaints and problem wey dey comot from all parts of Nigeria. I no too like President Obasanjo Government but I no say the man dey try him best. Sometime he go make decision wey I go talk say he be like the man don drunk when he make am. And sometime the decision wey go comot him mouth go be like say the man sabi him work well well. Since na all of us know say the people of our Obodo, no matter wetin you do for dem, some of dem go still complain about am.. For example the cry by some Old Politicians say President Obasanjo dey maginalize dem. Dem talk say since na dem vote for am wey he tay become President, he for give all the positions to dem. My brothers for North dey talk say all the Important positions he don give am to south-west (the Yoruba people). And my brother for South-west dey talk say the man dey toy with him root. Dem talk say all the better positions na Northerners the man give am to. And my brother for South-East talk say all the positions for him government na only one or two he give to their people. Dem talk say the man no respect Ibo tribe. People just dey use the word Marginalize like say na the new disease for our Obodo be that. Plenty of dem wey dey use am, I no think say dem sabi the gravity 'as Oyinbo people dey say' of their word because the thing fit cause war for our Obodo. With all these complaints, my question be say which of these people wey dey complain no dey for Government before? If na look well well my fellow Obodians, you no fit find one wey never chop our money before. All these people wey dey complain, and the ones wey dey inside government, wetin dem do wey don bring progress to us the masses? I no think say you go fit find one person wey no be say when he dey for government, no be only his family and friends dey enjoy am. All of us wey be masses, we no gree find work, our pikin and elders dey die of hunger and disease and these people family dey for Obodo Oyinbo dey wack our money. When all of dem talk say the government dey marginalize their tribe, I no think say dem include me and you wey be masses, whether you be Ijaw, Fulani, Yoruba, Kanuri, Ibo, Hausa, Itsekiri, Tiv. Now dem dey complain because the power don comot from dem hand, wetin dem do when NEPA dey take light everyday, our pikin no gree find work, our baby and elders no fit find medicine, and our doctor and teachers no fit find money to better their  profession, middle class   and civil servant no fit send pikin go university as government no gree pay dem. How many of these yeye Politicians dem think about us when dem dey carry our money go overseas go help Oyinbo develop him country? All of dem wey dey complain and the ones wey dey for government na rogues. If dem reach the position na the same thing wey dem do in the past na him dem go do again. Na everywhere you go dem sabi say our people no dey shame. The talk say make you remember the person wey be your parent no dey work for our country again. If you tell people say the yeye thing wey dem dey do dey bring disgrace and shame to the family, dem go tell you say se na that one dem go chop?

My people, I don talk this thing before, and I no think say people take my word serious. The only way wey things go improve for our Obodo be say make our generations form our own Political Party. I dey talk about people wey be 40 years downward. If we fit form our party and we dey serious about am, I think we go fit defeat all these repackaged Politicians wey dey repent when dem don  chop our money finish. I never see one wey say since he don become born again o, him go give all the money wey he thief to the people. My people, complain no go make our country better, na only if we take our own destiny for hand na him the country go progress. Na here me I go standa, I go dey talk to una tomorrow, make una dey do jeje o.

October.09. 2000

Oga Lecturer Se Na Life You Dey Chop Like This?

How una dey manage my people? I beg make una no worry he go soon better. As if to say things no dey hard enough, our Lecturers dem dey destroy our pikin life for campus small samll. I no sabi if una remember say na every month na him I dey talk about the wahala wey this our moral decline dey cause for our country. Na all part of our obodo life na him this thing don visit including our University dem.

For our university na so so problem student dey face for the thing. If this cult stuff no wahala dem, Oga Lecturer dey there dey wait for dem as if to say life no hard enough for dem. Plenty student no fit find food eat because there parent no fit afford am as dem don pay for school finish. If you go our university dem my people he no dey easy, I no sabi how the pikin dem dey take pass self as the whole system don scatter scatter. I remember last year wey I go library for LASU, my people, this place be like say na bread dem dey bake for the place as the thing hot so. The fan wey dey for roof self be like the thing wey no see water for 12 years as the thing don dirty. Na so the student dey sweat like person wey dey do exercise. And if una come look the shelf wey dem dey keep book, the thing come empty like our general hospital wey no get medicine for shelf. The place no get plenty books and the small ones wey dey don dirty, and the book cover dem don waka go Oshodi. Na wa for our pikin dem o. Na the thing wey dey make some of dem no sabi anything as dem no fit find book read. Na people wey their mama rich fit afford the books. With all these problems our Oga lecturer dem no gree let our daughters dem rest as dem dey force into yeye thing. I remember my talk with some of the students, dem talk say some yeye Lecturer if the girl no put yansh down, she no dey go anywhere. And if the girl come dey do Iyanga to Lecturer, na her boyfriend for school go surfer am. Him too no dey go anywhere as the Lecturer go just ask him colleague wey be the boy Lecturer make him fail am. Dem even talk say some of dem na money dem want as the country hard, if you no want fail for school you go give dem some money. This no mean say you no sabi book o, since dem get the power, na anything wey dem talk na him go happen unless you too sabi people. The question wey I come ask the student be say why dem no tell school authority? Na him dem tell me say the school system self get him own cult too, dem say if the person no be carefu,l he go just disappear. The student dem talk say as the student get their group na so the Professors dem get their own little club. If you do katakata around dem, this person fit find him self for yonder. I hear say our campus dem don become big Mafia wey be say if you no get money, you no come fine for body, and you no know person wey be "Power that be", university life for campus go be like na sahara desert you dey, because dem go make life tire you my pikin dem. As I hear, our Lecturers dem don become big Oppressors for campus and the thing wey dey pain me be say plenty of these yeye people dem get wives for house. And plenty of dem fit born these pikin dem wey dem want spoil their life. And this yeye thing no be only man lecturer dey do am o, I hear some women lecturer with their yeye wig dey do am too. Especially if the small boy come fine or get money for him family.

Una see my people, una no think say people wey talk say the world want end dey talk truth? Abi wetin una go call these jagbajantis my fellow obodians. These our pikin dem dey surfer o, this na real double dosage for dem. Dem go get am for university and when dem come again dem go get another one as work no go dey for dem. The pikin dem go go through this yeye thing and dem go come comot and work no dey.

Na wa my people, na beg I dey take beg the university authority and our government make dem resolve the thing wey dey happen for our campus and the country o. He go good if the school go comot all the yeye lecturers wey no dey shame before the pikin dem start their own revolution. And una know say some of these pikin dem dey smoke gbana. I beg make the goverment do am quick o.

Na here I go stop, make una take am easy o.

October.06. 2000

Our Democracy Dey Die Small Small, Who Dey Behind Am?

How dey go dey go my fellow Nigerians, I hope una dey yuppy small small? Today as I no fit talk yesterday na him I say make I talk small about Democracy for our Obodo. Wetin dey happen for our country wey be say the two groups wey dey for opposite side during our struggle na dem want kill the small life wey we get for Nigeria. The first one na people wey no want make Military comot as na him be their life line and the second one na people wey fight with everything wey dem get including their body and soul against our past Dictators.

I remember in the past wey be say people for Nigeria no get any freedom especially if you no get Oga Army for Family. Even self if you get am, if he no dey for our Past Leaders Circle, the family no go too enjoy. This people dem fit do anything to you wey be say you no go fit talk if you value you life. I remember say these cronies just they oppress the masses as if to say we no be person. You go hear say some people for Village the government don take their Land and dem no fit do anything. The people just dey spend our money as if to say tomorrow no dey come. While plenty of dem dey build mansions and dey buy expensive cars, majority of us no fit eat for days. Before na only cracy person go go party where dem no invite am, but as the thing dey get worse, na so you go see plenty mama with their pikin dey go party go dey for (ajeku) leftover as dem no want make hungry kill their whole family. And as una know our people for wayo, he come become the thing wey be say na everybody dey beg for food. The thing come become like fashion, we no gree sabi person wey dey hungry from the one wey dey greedy. As the surfer surfer don become too much for people na him too people wey dey do party come gboro. If dem no invite you and you come dem no go give water not to talk of food. Sometimes dem go even disgrace you as dem go ask you who you follow come? As all these thing dey happen to most of us, the people wey get Friends in the high places and their "power that be" cronies dey just dey do our money yanfu yanfu. These na the people wey no want make the army go back to Barrack because dem no say na their ticket to better thing go end and if army comot their account for Obodo Oyinbo go dry.

The second group na the one wey be say dem get small power but dem and the 'Power that be" no to gree. Plenty of these people spend their time for Prison. I sabi some of dem wey be say na dem and common criminals dey enjoy Beans and Eba together as the Khaki Boys want digrace dem patapata. Some of these people wey I dey talk dey among the pro democracy groups and wee see pepper together during our sufer surfer day, na all of us dey campaign against Babangida, Abacha and their cronies. If you see as these people surfer you go think say when we get democracy dem go make our life better as dem don taste how poor masses like us dey live. No be say these people no get money, dem get am but he just be like say Khaki boys no want see dem at all. Plenty of these two groups dey for Politics now and few of dem dey outside the government wey dem dey criticize every day. The one wey dey outside Politics na deym dey complain about current Government, na dem want dabaru our government since dey know say the government don dey move close to our money wey dey keep for Swiss Banks. Na these people dey complain say President Obasanjo dey marginalize dem. If una look well well, dem know say if country become scatter scatter, our government no go go fit come after the money. The ones wey dey for National Assembly including the ones wey take money buy election don forget the thing wey happen to dem during Military Regime. Plenty of dem especially the ones wey be pro democracy don forget where dem come from. As dem don become Oga for Government now, all the thing wey dem tell us say the Army dey do to us na the same robe dem dey wear. Plenty of dem don become Proper Pen Robbers, dem just dey thief our money as fish dey play with water. Na these people dey fight against probe since dem know say their hands too don dey soil. As the khaki boys dey fight against civilian rule last 15 years na so these people dey campaign against probe as dem don chop bele full. Na so he be my people, the people wey we think say dem get some sense for body, don become Chairman for Contracts. I guess the goodies wey dem no gree chop during Abacha regime na him dey want wack before another coup happen. As the thing be now, if this two groups succeed, our country go become another Angola. I dey pray say the good forces of democracy and justice go quash these murderers since dem want kill our little innocent baby call DEMOCRACY. Na here I go stop my people make una dey do jeje o. I hope una go remember say Nigeria na wa country make we treat am well. I go see una on Monday since my God, Allah, Chineke and Oluwa don tell me.

October.05. 2000

How una dey my people, I hope say una dey kample? I no go fit tell una anything today as I dey tire. I go dey talk to una tomorrow by God's grace, make una dey do jeje o.

October.04. 2000

National Assembly: High Class Robbers

Greetings to my fellow Obodians, how una dey? I don hear another one o. According to my source, he be like say our accused Senators dem no go face tribunal after all. He talk say last week when President Obasanjo and Senate President Anyim dey for meeting, our Preesident come talk say make Senator  Anyim send the probe report to Tribunal Commission for Fraud and the Senate President come talk say him no support that kind thing. Dem say our new Senate President talk say the affair na inside matter, he no concern the public. The thing wey I hear the Senate President dey tell us be say make we mind our business and the National Assembly na their papa own. My people make una see us see trouble o. The people wey we vote for don become Oga for our head. The person wey be Oga patapata for National Assembly na him dey talk this nonsense o. Dem say the man dey lobby "Power that be" make dem go talk to President Obasanjo make him forget the idea. As I talk before, I no think say these law makers dem fit lead us to promise land. These people na real Master Fraudsters, dem fit sell their papa house while the man dey alive. How person wey be leader of our Upper House go dey fight against prosecution of Accused Rogues. Which kind message him dey send our pikin dem? No one fit tell me say these people wey dey for National Assembly no be Robbers. Even I respect Armed Robber pass dem since that one no go deny am if dem catch am. But these our so called Legislatures go tell you tory even if you catch dem redhanded. Which kind mafia gang we get for our National Assembly wey be say dem fit chop our money any time wey dem like and we no fit do anything to dem. Una know say as the man say him dey against prosecution of our Pen Robbers that means say him too go soon thief our money. Na the only thing wey I go fit say dey make the man no want turn the case to Attorney General of the Federation be that. And the people wey say dem no do the thing wey the panel say dem do, if dem dey innocent why dem no go court? I no sabi why person go accuse you say you thief money and you no want go court go clear you self unless be say na true you thief the money. Na so I hear say all the accused politicians and their cronies dey fight against the report panel. Dem no want make dem release the thing to Journalists and public.

My people the only thing wey I go say be say make our Politicians continue with there yeye behaviour, the thing wey I sabi be say small time the masses go revolt and when we do am, I no think say dem go fit escape our wrath o. Make dem dey pray say if dem catch dem no be younder dem go find themselves, because this criminal activities don dey too much for our our people to face.

Na here I go stop my people, because our politicians don yeye this our new democracy.

October.03. 2000

Papa Landlord I Beg Fix Your Road

My people I dey sorry say una no hear from me yesterday. As our Leaders dey spend our money for Abuja, me dey home dey cry for our obodo Nigeria. Una see as our leaders dem dey celebrate our 40yrs Anniversary, I come dey ask my self say wetin our country don achieve since our independence. Me I no too sabi the thing o my people. As dem dey talk say a fool at 40, na fool for ever, I hope our country own no go be like that. Na beg I dey beg Chineke, Olorun, Allah, God say make our country own better.

My fellow obodians, make ask una this, may be una go fit answer am because me I no sabi the thing. Why be say when our people wey get money build mansion, plenty of dem no dey fix road wey dey near am? If you go around Obodo especially for Lagos, you go see some houses he go be like say na whole country go dey live for the place as the thing dey big so. I don go plenty houses wey be say the rooms wey dey am, my people, if dem put all the people wey dey look for place to stay for Ajegunle dem no fit fill am. Plenty of dem, the compound go big pass Stadium ten times. Na so you go see plenty motor from "Be my wife (BMW) to Landcruiser" na so dem go fill the place. If you come enter am, Osanobuaaaaaa, he go be like say na Queen Elizabeth palace for obodo Oyinbo na him you dey. Na so you go see fine fine furniture for the thing. The parlor nko? That one go reach ten. Some Rich people self, their pikin go get their own parlor. If you reach some parlors, he go be like say na Oyinbo Cinema house na him you dey. The Television wey you go see for wall, he go long pass my whole village. Their bedroom that one na out of this world as the thing go fine so. Some bedrooms big pass Onikan for Lagos.

As I describe some of the houses so, I no sabi why the owners dem no fit tar the road wey pass their house. Plenty of these landlord no be say dem no get money wey dem go tey fix am. You go see some fools wey be say for middle of the road dem go build this mansion and come paint am white. And dem no fit tar road wey dey near the house, na so you go see motor wey dem go dey do gbaga gbodo for the place. Come see am when rain fall, you no go fit pass the place self. Small time the house wey you think say na out of our obodo don become Conde. Na so the house go be like say he never see paint for 8 years as the thing don fade. The wall go crack like say na Police barrack you dey.

So my people wetin dey cause this kind behaviour because me no sabi? How person go take that kind money build mansion and no go fit fix the road wey dey around am. Na so you go see dust every where as motor dey pass. The thing wey dey baffle me be say, you mean dem no dey see say as dem leave the road like that na the thing wey go make their house old quick be that?. I pray say the God wey give dem money to build houses go give dem brain wey dem go take remember road wey dey near am. I hope no be say our Millionaires dem no want tar the road because dem know say na everybody go dey pass am including poor masses like me. I just say so because since I no fit put one brick for ground na him make me no sabi how the thing dey work. I hope my friends wey their papa get money go fit explain am to me because the thing no make sense at all at all. My people I hope no be say plenty of these people don dey  kolo.

Na here I go stop my people, make una do our country right o.

September.29. 2000

Motor Mouth Affairs: Our Big Mouth Leaders

How una dey my fellow obodians? Who no know no go know na him our leaders be. I remember when I be small pikin wey be say if something happen for village, na the elders go settle am. I remember one concrete thing wey dem tell us, dem say anything wey you know fit defend make you no do am. As dem dey talk am then, dem go say before you talk, think well well before you say am because once the thing done comot you no fit take am back. I know say plenty of una go dey wonder say wetin Pa ‘Mugo dey talk now? My people he be like say plenty of our Leaders dem no dey watch the thing wey dem go say for mouth.

The first example na the thing wey dem say our President talk about our people for South East. I hear say our President tell some of dem wey dey complain say he no dey treat their people well say ‘make dem happy say him do small thing for dem.’ The man talk say our Ibo brothers ‘should be happy say dem dey get something from am.’ I no sabi if our President talk am or if he no talk, but as the thing comot for paper our President no talk say him no say am. At the same time, him no tell us say him talk am. I come dey ask myself say if the man no talk am why he no fit tell the whole country so? Since na him be the Leader of our obodo. As the man no talk say him no say am, he be like say our President do the thing because you no fit take this kind thing wey dey sensitive joke. The question wey I want ask our Leaders from other Tribes why dem no talk say the thing wey the man do as my Yoruba people dey say "O ku di e kato". The thing means say the man for no talk am, no be the kind thing wey a wise Leader go dey talk for mouth. If our pikin do something wey no good he go good if we tell am say my son this one wey you do o, remain small. The question wey I want ask our President be say wetin he mean say the people should happy say dem dey get something from am? How the man go feel if the table come turn as he be Four years ago wey dem put am for Prison? As for me o, if to say na true our president talk am, make him apologize to my Ibo kindred. Sebi him na Yoruba man, and as I remember for our Yoruba land, we are very proud people and we get plenty pride. This no be the kind thing wey we go take from another person or group at all. I hope say the man done learn him lesson because this one wey he do, make me think say our President no dey humble. He be like say him done forget the humiliation wey him receive from Late Abacha and his cronies.

The second example na the thing wey my brother Chief George Muoghalu talk wey him say the probe and impeachment wey happen for Senate na to disgrace Ndigbo race. Him talk say the enemies wey plan am dey use am to tell people say our people no sabi lead. My people una se our so-called leaders o, I no sabi if the man dey drunk when he talk am abi he dey sleep. Which kind nonsense be this? I no sabi the thing at all at all, because he no make sense. The thing be like person wey him pikin thief something and dem come catch am, and the Mama come dey tell people wey catch her pikin say dem put the thing to embarrass am since dem no say he go steal am. Na this kind thing dey make me wonder if we get leaders self because some of the thing wey dey comot from their mouth no make sense at all. Una see me see trouble my people, and this man na chief him call himself. Which kind message he want show small pikin wey be our future. Why be say anytime wey somebody do something wey bad instead wey we go tell am say the thing wey him do wohwoh, we go begin dey talk about tribalism. Se Chief Muoghalu want tell me say because our former Senate President come from Ndigbo make dem leave am alone even the man thief money. How many poor people from South East our Senate President give chop money to when dem dey die of hunger? The question wey I go ask our Chief be say the money wey dem say Chief Okadigbo take buy things for himself no be all of us get am? Wetin he take am do? Because I no remember say the man give the money to poor masses like us because we be Ibo. Una see my people na the kind thing wey I dey talk about our leaders be this. Plenty of dem dey selfish and greedy. Dem sabi how to protect themselves, una think Chief Muoghalu go talk if the person na poor Ibo man? I no think so my people, this our Politicians only sabi their own. Just because a fraudster na from our tribe no means say make we keep quiet

The last example na the yeye thing wey our Governor Tinubu talk say he go good if Judges dey ask criminals pay money instead wey dem go dey send dem to Prison. The man even talk many people plenty for Kirikiri and he go good if our Judges free dem. Him talk say the condition wey dem dey he dey terrible. My people na here we go again with our leaders wey no dey think before dem open their mouth. This kind statement tire me o my fellow obodians, and me I no sabi am. How person go talk that kind talk wey Armed Robbers dey kill people left and right. Wetin he want people wey robbers kill their family members do? Una see my people, se na the kind thing wey person go dey talk especially when plenty people no fit comot outside for evening because of crime. Una see say our Governor no dey sensitive at all. I no blame am, na people wey vote for am na him blame. He dey easy for him to talk that kind nonsense since he get security 24-7. How him no go talk am since him fit see sleep well for him house. Na another thing wey I dey talk about our leaders say dem only sabi their own. About the talk wey the man talk say the condition wey the robbers dey for Prison dey bad, my answer to that be say plenty people dey wey dem no dey prison and their condition worst pass the criminals wey him dey pity. At least people wey dey prison dey get food in time and dem no dey pay for am, plenty of us dey wey no be criminals and we no fit find food eat. Na the kind statement wey dey make people no want work be that. How him go dey worry about people wey disobey our law and the people wey dey outside, him no fit find dem work?

My fellow Nigerians, se una dey see the kind people wey dey rule our country? And una dey talk say things no improve, how our life go better with these kind basketcakes wey we call leaders? Make I loan una the money wey I get, na only God, Olorun, Allah and Chineke fit help us for this country because this people no be our messiahs.

Na here I go stop, make una enjoy una weekend o.....................

September.28. 2000

President Obasanjo Na Toothless Leader: Se na True?

He go better my people by God's grace, how una dey? I hope una dey Miliki small. I done hear another one o, some people say our President no dey get any respect from some of our Northerner Leaders. Dem say if the people ask our Uncle Sege make him jump the man go say how high. I come ask my source say where he dey hear all these yeye rumors? Na him the man come tell me say I no see say Last Weekend when the people talk say na dem put our President there and dem fit comot am if the man no treat dem with respect. Dem say the man dey retire plenty of their people for Ministry and Army. I hear say dem even complain say he done move plenty federal offices to South. My people make ask una this, se na true say our President no dey treat our Brothers for North well? Make we see if the thing wey our people for North dey say na true.

As I done dey tell una, me Pa Omugo go call the thing as I see am. If una remember say during election, plenty people wey vote for our President na Northerners. Him people wey dey for South West no too vote for am because dem say he no treat dem well before when him dey for Army. And the people wey dey for South East and South South half of dem vote for am and the other one vote for him political opponents. If we look am well, if our brothers for North no vote for am, I no think say the man go be President today. Na the thing wey make me say I support my people for North be that. If you dey run for election and I come vote for you, you go greese my elbow small I be my people? No be so we dey practice Politics for Nigeria? Na so the thing be for Obodo Oyinbo as I hear o. The only different be say for Overseas, dem no go put am like that.

Na true my people our President man dey weak. I no sabi how person wey be oga for Military no fit do anything self. Plenty people done dey complain about him government he no do anything. But when the Northerners talk the man come dey jump. I no sabi why the man dey afraid of our brothers for North o? Which kind person wey our president be? Una sure say na Yoruba man? Se na true him be Oga for Military? No be same man wey tell him army make dem go carrry old woman for her house and come throway am out for balcony? Na wa my people, and the woman na from him tribe o? I know say this na civilian government but he go good if him go treat all tribes the same.

As I talk before, na my people for North make am become President of our Obodo. But the first question wey I go ask my people for North be say, How come una vote for a Yoruba man? Se na because the man help una during Former President Shehu Shagari time wey be say Shagari no win election but our Head of States (Uncle Sege) come give am to am? As dem dey say for Obodo Oyinbo, Pay back time, una dey pay debt wey una owe am abi?

I hear before wey one Alhaji for North dey talk say na dem put am there and dem fit comot am. My second question be say, Se una put Obasanjo there because na him be the best candidate, or because una think say if una no put Southerner there katakata go happen for Nigeria as the people done dey talk say make dem go form their own countries? And if the country pafuka, una know say una food done end be that because my people for Ijaw no go give una oil money again; se na the thing wey make una change una mind be that?

If I say make I continue with my question, I no think say I go fit finish before tomorrow, because of that na here I go stop my questions. My people, before people dey go dey start dey sakara say na dem put the man there and dem fit comot am if the man no becareful na lie. I think the people dey fool themselves because na all of us sabi say if to say dem no put southerner for president the country go pafuka. Plenty people done dey tire for the thing. My brothers for North make una no dey use that sakara again because plenty of us sabi say una think the country go break and if to say the thing done happen, una contract money done finish be that o. Make we talk true, all these people wey dey sakara na minority for their area because plenty masses for North done tire for our Northern Leaders wey be say the only thing wey dem sabi na Bankadede for their families. All the money wey dem chop na to help their families and friends. I no fit see the thing wey dem do for my fellow masses for North. Una see just like some of my Southern Leaders wey be say dem be Ogbologbo for corruption, the only people wey dey benefit for their leadership na themselves and their cronies. Plenty people dey wey be Northerners/ Southerners wey no fit find food chop. We no want hear this una yeye talk say una go take power back. Wetin una do when una dey there? The problem wey we get now, no be una cause am? If una be better leaders why be say plenty of our pikin no fit find job and plenty of dem wey go obodo oyinbo no fit come home because dem know say the country no safe. My brothers dem wey dey Overseas, plenty of dem done dey there since 1980 and dem no fit come home because the county done pafuka. The question wey I go ask una be say, wetin una do for us lately as my sister Janet Jackson talk for her song?

The only way wey our country go get peace be say, our leaders must treat everybody same even if the person na poor masses like me. Na here I go stop, make una dey do jeje o.

September.27. 2000

Bribery: Murtala Airport Way

How una dey my fellow Obodians? "What is happening?" as dem dey say for America. My people I want tell una the thing wey dey happen for our Airport. Na everybody sabi say Bribe done become our Papa name. Whether you be Iya Oloja o or Judge, na everybody for our obodo dey take bribe. But the kind bribe wey I want tell una today na real Imported one. The only problem be say no be say we dey import am from Overseas na for this our Nigeria he dey. The only people wey sabi am na people wey dey work for Airport and the one wey dey travel.

The first one wey I go tell una na "Arrival" dem dey call am. For our Airport, if you know say your relative dey travel come from Overseas and you know say he go carry contraband, the thing wey you go do be say you go done go airport or ask your friends if dem sabi any Custom Officers. As dey done introduce you to the Custom, una go done arrange how the thing go be. The kind thing wey your relative dey bring una go discuss am and the man go tell una him price. After una done discuss the thing una go come meet for airport. As your family dey come the custom officer go tell the other custom officers say the man na him relative and na so the man go just enter our country with contraband because our custom officer done collect money for back.

If the man no sabi person for airport, the thing wey him go do be say as soon as dem reach luggage section as my brother tell me, as dem want check the man suitcase him go done put money for him passport and give am to Oga Custom, and the custom officer go just tell him mates say make dem let am go. And if the man wey dey come na Foreigner, that na food for our Obodo vultures because the airport personnel go just live dem work and go dey talk to the person like say dem be good ambassador. All because of some money wey dem go collect from the man.

The next one na the one wey I dey call "DepartBribe", I sabi this one gan because I done follow my brother go airport plenty time and take my korokoro eyes see the thing. One day I follow my brother go airport as him dey go back to Obodo Oyinbo, and as we reach the person na him my brother come line for the Airline place. Una sabi say my brother plane dey live for Night but everybody done dey airport since afternoon. I no believe am when w reach airport and the line for the place come be like people wey dey go Hajj for Kano. I come ask my brother which time wey dem go open the counter him come tell me say na 7 for evening. I come ask am say if dem dey open am for 7pm wetin we come dey do here 2pm. Na him he tell me say for our Obodo, he no mean say you get ticket for hand dem go carry you. He say if we reach there for 7, dem fit tell am the thing done full before the reach him turn as dem done sell the sit to another person. As we dey there, na him I come dey tell my brother say he go hard for person to take bribe as dem get plenty security here. The man laugh, he come ask me say no be Nigeria we dey? I come tell am say I know. He say which profession no dey take bribe for Nigeria? He come talk say for Nigeria na everybody dey take bribe even small pikin. I come laugh, I say brother you done begin tory now. How small pikin go take bribe? Na him the man come tell me say wetin you go call when you first reach house from Obodo Oyinbo, if you want send person make him go buy you food, na so you go see all the pikin wey dem go dey fight say make you send dem. Since dem know say you no go take change from dem. As the time wey you want comot our obodo done dey reach, you no too get money for hand, you go come dey take your change back from dem. That time if you ask dem say make dem go do something for you, na so all of dem go dey tell you tory. He go be like say na desert you dey as dem go run comot for house for you. Na him he come ask me say, wetin you go call that? No be just like you go ministry wey be say if you no give dem money the first time wey you go there, next time you go, dem go act like say dem no sabi you.

Small time he come tell me say make we go see if the line done dey move for front. He tell my relative dem make dem dey watch him suitcase. As we reach front dey look na him we see one Airport Personnel dey tell one woman wey dey go say make she put the money inside her passport and come tell am say make she stand there like say na front she dey since and him go go help am carry her load. My brother come look me say, you see now, wetin I just tell you. Since my brother na "Jagidijagan" roughian, him come tell dem say no be hear una go use that kind wayo. Na so dem come dey argue o, to cut the tory short na everybody wey dey airport that dey hear the thing as my brother dey talk am loud.

When we come reach near counter, na him we dey see people dey put money inside passport give the Airline checkers and Custom Officers as dem dey check their loads. My brother come tell me say person wey no do am like that, the gari, tuwo and stockfish wey him carry for suitcase na custom go wack am with their families. Because dem no go let you carry am comot if you no give dem money.

Una see my people, na so our country be o, this anti graft wey our President dem sign go hard o because some people na the thing wey dem go take build their mansions for Leki be that o. The thing wey I go say be say, if we dey talk say bribe no good, make we dey talk about the people wey dey give am as we dey talk about people wey dey receive am for hand. He go better if all of us go stop the disease including our Leaders. Na here I go stop my people, make una dey do jeje o.

Nigeria na wa country o, make una treatam right.

September.26. 2000

Why My Northerner Brothers Dey Cry Foul Now?

How una dey my people? I hope say una dey kampe. I dey hear rumors say my people for North no dey happy with our President. Dem talk say plenty people wey dem retire for Ministry na Northerners. Dem even talk say the Government done move plenty of  Headquarters from North especially the big ones. I no think plenty of my people go like the thing wey I go talk today but as I done talk say anything wey no be proper I go talk about am.

The question wey I want ask my brothers be say how come Federal Government dey retire plenty people for North? I no say plenty of una go think say the man dey do am because he no like Northerners. But since we no dey inside the man head, we not get proof say na the thing wey make the man retire dem be that. As I done tell una, me no dey behind any tribe for Nigeria. People wey do right by the masses na him I go support. Na all the tribes for Nigeria get wayo people among dem. Sebi una see National Assembly, all of dem talk say dem dey represent the masses but that one no stop dem when dem dey thief our money. As I dey talk to una now, I no see one National Assembly Member way go fit  tell us the thing wey furniture go solve for our country especially since plenty people wey dem say dem represent no fit find food eat, hunger done kill plenty of dem and Armed Robbers no gree us rest.

As I dey talk before, If we look am well he be like say the government dey do this because plenty of this people done old and dem done tey for the place, whether dem be southerners or northerners. Another reason be say if my brothers for North want talk true, during past regimes, plenty of those "Ogas" na Northerners whether dem qualify or not. If a new government come talk say he want reform the people wey dey for Government, una know say na the people wey plenty for Government na dem the thing go affect pass. As the thing come be like that, una know say since my brothers for North plenty for Ministry as oga, he no go make sense if the thing no affect pass since na dem be Directors for plenty of the Ministries . Make I make am easy for people wey no sabi my talk. He be like say make you get 100 rooms for your house. When you want hire people, you hire 60 people wey come from Ibadan, another 30 for Sokoto and come put the rest of dem wey be 10 from Enugun for the place. Small time, the man come sell the house to another person. The new owner come talk say him no like the thing wey the hundred people dey to the house and come talk say make everybody comot for him house. As the thing be, una know say plenty of the people wey the man drive comot na from Ibadan. Make I ask una this question my people, se una think say the new owner no like people wey come from Ibadan or na because the man drive everybody comot since dem no sabi the thing as he want am? Plenty people for our obodo go say na everybody wey dey for the house na him the man comot, no be say him no like people from Ibadan. He dey so because na dem plenty pass.

He go good if my brothers from North go look this thing well well before dem go dey accuse Federal Government say the man no like dem. If our brothers dey think like this, wetin Vice President come be if him no be Northerner? If to say President Obasanjo no like northerners una know think say the Vice President go done see the thing for him body since na him be his deputy. Unless una think say the man na Zombie.

As for the Agencies wey dem talk say Presiden Obasanjo dey move, wetin happen to una wey dem dey carry all the things go North from Lagos during previous Governments? Una want tell me say no be this country una dey wey all these things dem happen, why una no talk say make dem no move am? Na this kind thing dey vex people like me because plenty of una wey we call leaders na "Oppotunists" as my brother for Obodo Oyinbo dey talk. If una see injustice wey favour una, una no go say anything but if the thing come no favour una, na that time una go dey cry Allah dey. Among all the Leaders wey we get for Nigeria, only few I fit talk say he no dey selfish. Plenty of una wey call una selves our Leaders na wayo and the only thing wey una sabi na to oppress poor masses like us whether Northerners or Southerners. As for me o, na only person wey go stand by truth whether the thing favor am or not na him I go call true leader no be the ones wey we get now. If una dey talk about all these nonsense wetin una want people like us wey be minorities do? Since dem born me, I no think say I see person wey be minority as President or Head of States. All our past leaders na from the Major tribes, Ibo, Hausa and Yoruba. Una think say una get two heads? If una want be fair why una no talk say make dem make one of us wey be minority President of our Obodo?

I know say plenty of una no go support am because na only una own na him una sabi. The only way wey Nigeria go get peace na when everybody whether you dey poor or rich see ourselves as equal and treat ourselves as one. If we know bury this yeye tribal Politics, I no think say the country go see peace. Na here I go stop my people, make una dey do jeje o.

September.25. 2000

Wetin Happen To Our Boys for Olympics?

I know say plenty of una still dey mourn for our Boys wey lose Football for Olympics. Na the same problem me too get o, yesterday I no fit comot since I dey sick because of the thing. Make I ask una my people, una no see say every time wey we lose for Football na so many goals our opponent dey score for our post. Even self the ones wey we dey win, the goals wey our opponent dey score no be small. Una remember for World cup wey Denmark beat us, the boys score four goals for our house and na one our boys score against dem as he also happen for Australia. This problem no be only for Green Eagles so, our women too get the same problem wey be say opponent fit score for our Goalie and we no fit stop dem. As I see am, he be like say for our Obodo, our people no too dey play defend for football. Whether we dey play better team o or na yeye team, he be like say for Nigeria, our back too dey yeye. And this kind thing if we look am hard, na from our yeye ego dey cause am. Football for our Obodo na everybody want be Odegbami and Mudashiru. Plenty of us want play forward and go score for front. Plenty of us think say if you dey play back for Nigeria, dem no go recognize you. Na this kind think dem make opponent no too dey respect our Team since dem know say if dem play better for better for back their front go fit score plenty goals for our house. Make we look am well well, if we want win World Cup, we no fit dey play like that. If we no we stop that yeye behaviour I no think say we go fit reach Final or even Quarter Final self. Most Nations sabi say Nigeria get plenty boys wey sabi football but the problem be say dem also sabi say we no too dey like dey play defense. Una remember the game against Cameroon for Nations Cup, dem score two goals for our post before we come equalize. For the tournament, all the countries wey we play score goals against us before we come come back back and beat dem.

Another problem wey we get for back na our goalkeeper. Plenty of our boys wey be goalie na basket. Since Okala done retire for football, all GoalKeepers wey come after am yeye. The only thing we dem fit catch na Eba and Ewedu. That man wey dem dey call Rufai, that one no be better Goalie at all. Una remember how the man tay play for last World Cup. Plenty balls wey come near am na inside net na there we find dem. But I no go blame everything on am, because during Okala time, the people we dey play defend better. Una remember Christian Chukwu and Odiye dem people like that sabi football so tay even if you no pay dem, dem go still give us better show.

The thing wey I go say be say he go good if our Football officials hire better Defend Coach wey be say him job go be say make him teach our boys wey dey play back how dem go dey defend our our Goalie. He go also teach dem how dem go dey play against especially Free Kick. Una wey dey follow our boys for football, una know say our boys no fit defend Free Kick, if we foul our opponent outside box 18, una know say that one na Goal tarara because our boys no too sabi play against that one. If we fit follow this thing, our opponent own done end be that because few contries fit play better pass us. Me I think say na because our defend no dey good na him make us dey lose plenty match be that.

Na here I go stop, make una continue dey do good.

September.22. 2000

Where We Dey Get Our Officials From self?

I hope say una dey enjoy this Olympics for Australia? I dey pray say our pikin dem go do well for the thing and if dem no do well, I hope say dem do their best. Na this bring me to the thing wey I hear our Sports and Social Development Minister, Damishi Sango say. I hear the man talk say make dem no pay members of Falcon Women Soccer Team bonus money wey our Government   promise dem. Una remember the thing wey I say about NFL Chairman two days ago when the man dey talk nonsense say our Boys Footbal Team Coach no sabi him work well. This yeye talk wey this Minister dey talk surprise me again o. Where our President dey find all these yeye people wey no fit carry ball for hand self? I hear say dem go collect the Jerseys wey the girls take play since dem no win their soccer match for Australia. The man even talk say him go sack all the officials wey dey involve. Me I no sabi the kind Minister wey the man be o, If he want sack people make him first sack himself since na him be the top Oga. If he fit do am we go know say the man mean business and be good leader as he done lay good example since people wey dey under am done fail Nigeria as him talk, him wey be their Oga too must resign. As dem dey talk for Oyinbo, na him be"Captain of the Ship" if you be Managing Director for company and the company no do well, you wey be oga patapata go comot as you done fail your shareholders. When you done resign, the shareholders go come leave the decision whether make dem sack people wey dey work for the company or dem go let oga wey come after am do am. Since na you hire the people, and dem no come do well for work, he go good if you wey hire dem resign first since na you make the decision. This go good if to say na perfect world wey we dey live but for our Obodo this no go happen. As una see, the man no go resign because him think say na our Football officials no sabi their work no be him.

Make we talk true, I no sabi why the Minister no want pay the Players because dem no win soccer. The thing wey I no understand be say, no be say the girls dem no sabi play soccer, dem play well but the problem be say the the group wey dem dey, dey hard. As I talk before, the other three teams wey dey for their group dey better pass dem if we no want deceive ourselves. From the thing wey my source tell me, America na him be number one for soccer, China and Norway come follow am. Nigeria still dey far and no be small. If una remember before, the other teams dey beat our pikin by 10, 7 and sometimes na 12 goals dem go score for our house wey our pikin no go fit score one. But now the girls done better small. Just like the Brazilians, two years from now our girls too go done become the Oga for soccer. As for me o, I go thanks dem well because before last year, plenty of the other countries no dey respect our girls at all at all just like the way dem dey treat our boys before dem come dey beat better teams. If the Minister want sack the coach make he do am since say na him be the oga. But as for me o, the girls try their best and make he leave dem alone. About the money, if to say na me be the girls, if the Minister no pay me, next time dem want make I play I go tell dem say make dem give me my money first before I play "money for hand, back for ground" since dem done cheat me before. As for the Minister, this kind thing wey he want start no good for soccer, because some girls fit talk say dem no go play soccer for our obodo. Since you no fit rely on our Officials. Women soccer still dey young for our Obodo, the small ones wey dey play am, he go good if we dey encourage dem no be say we go dey tell dem the only time wey go pay be say if dem win game, that one no dey good for soccer. If to say our Officials get sense small especially person wey be say he no smell soccer ball before for him life, we go tell dem say if dem win soccer we go give dem 20,000 Naira, and if dem no win, na 7,000 Naira we go pay dem. For this kind thing everybody done sabi where him dey for the thing. No be say we go promise some money and if dem no come win, the officials go come spend the money for him family.

Next time our President want select people for Government work like our Ministers make him select people wey sabi the thing well well, no be person wey be say he no know the thing wey him ministry dey do. If you no sabi sport, just carry your Agbada and fila and sit down jeje for your house. No come dey spoil the thing for our players for us. Na here I go stop, make una dey do jeje o.

September.21. 2000

Anti-graft na joke for our Obodo

How una dey my people, I hope una dey enjoy the success wey I boys dey enjoy for "down under" Australia? Shame on the yeye veterans wey no want play soccer for their country because of some money wey no go last. Any way sa, make I talk about the thing wey dey kill me and the other masses inside belle.

Wetin come happen to the thing wey Senator Aluko talk about the extra money wey senators pay themselves for Furniture allowance for back? Se the rogues done pay am back and dem no tell us or I be the thing go just die like that? My people this kind thing wey our Leaders want start no good for our country and the next generation to come. I no know why the media no dey talk about thing everyday till the Politicians go respond to our request. If we no resolve this now, I think say na the thing wey go hunt all of us till we die. How the Minister of Justice and the law people go dey harass small crook while the big one go dey waka about like say dem get two heads. Which kind lesson we dey teach our pikin wey be say anytime Politicians thief money we no go too talk am or if we talk am, he go be small. For our obodo especially for Lagos, if a thief steal ordinary 100 Naira we go linch am if we catch am, but when the politicians steal Millions of Naira and we come catch dem, we go talk about am small and na the end be that. Na this kind thing na him make me talk say the anti graft wey Government introduce na yeye especially if the offender na Big man. Dem only do the yeye law for people like us wey no get power. The yeye people wey call themselves Jurists and the defenders of Justice dey useless. The person wey make me vex pass be that Old man wey call himself Lawyer Gani Fawehinmi. As long say na him dey defend dem him no go see anything wrong, but make come be another lawyer, you go see him dey cry yan yan waka about like fowl wey no get head. All the people wey dey cry corruption during Abacha I no too hear dem again since plenty of dem done become the offenders and the power that be. All those injustice wey we dey hear dem dey talk during military regime done become kampe for their eyes now since na dem be Chief Barawos. Na wa my people, this life dey funny self. Politicians thief billions of Naira, we talk about am small but when poor man thief Kobo the Judge go send am to Kirikiri.

Make Politicians thank their God say I no rich and plus I no be lawyer because I go dey defend all poor people wey thief small money. And if I come be Judge all thief wey no too get money na him I go free. No poor man go go jail for my court since our Leaders think say dem get two heads. Shame of all the people wey dey cry Corruption, Injustice and Dictator during Abacha regime and come close their mouth when their Brother, Friend, Client and themselves come dey do the same thing now. I think the time done come wey we masses go form our own Vigilante group like Arewa, Bokassi and OPC but our own be say na all the Thief wey dey for National Assembly or Government Post we go dey catch when dem come their village. The only thing be say we no go dey burn dem as the other groups dey do. We go get own own lawyer and Judge wey go prosecute dem for Market. If dem dey guilty, we go comot their cloth and make dem waka for Market as small children dey sing Ole, Oyinoshi and Barawo for their back. Then we go come take their house and rent am to people wey no fit find place sleep. Na the kind thing wey go make our politicians think twice before dem thief our money be that. The group name go be Poli Crime Burster (PCB).

The thing wey I go say be say he go good if some of our fair minder lawyers go look am for their law book if he dey possible for Masses to bring our Corrupt Leaders and Politicians for court since our Minister for Justice no sabi him work. Me I no too sabi law but if one the offenders done talk am say dem thief 1.5 million Naira each I no know the thing wey our Government lawyers dey wait for. All of una wey call una selves Jurists make una just go close una chamber because una done fail the future generations. My people, na here my motor mouth go stop, make una dey do jeje o.

September.20. 2000

The Wahala Wey Oil Strike Dey Cause

How una dey cope with the oil wey no dey? I no say he no dey easy but by God's grace he go better. I no say the Oil workers wey dey strike dey do am for their well being and me I no have palava with that one. The only problem wey I get be say, plenty of the masses no fit go work because petrol no dey. And una know say for our Obodo, the people wey be the Power behind this strike get motive. And no think say dem dey do this for the workers. Make we look how the thing dey cause surferness for our people and the country. As una see am my people, na the masses dey surfer am pass, but plenty rich people too go feel am as dem no go fit buy petrol for their motor. If una go petrol station now, na so the line long pass people wey want enter National Stadium. This strike today and strike tomorrow no dey good for us o. Everytime wey something like this happen na the country go dey sufer am. I no think say the Executives for NNPC dey feel am as dem get their own private Oil reservoir for their Estates. He go surprise me if plenty of dem no get Petrol Stations on the side. This wahala na Big Boom for Petrol station business and their owner, because plenty of our Petrol stations dey use this suffering to make money. Una know say Petrol Stations wey get petrol before the strike begin go come increase the money as dem know say petrol dey scarce for Nigeria. Another people wey the thing go benefit na the Transporters, una know say plenty of dem go say because the money wey dem take buy petrol for the motor done increase na him make dem increase bus money. If we look am true true, na so he be but una know our people even if the thing no be so, dem go still increase the money. And dem go also add their own "Jara" to am. All the strike to me no dey good for a country like our Obodo because of her condition and thing wey the Military people do to our land. As the strike continue na so the suffering go reach people for home. People no go fit find Kerosine and Cooking Gas buy to cook food for house. And if dem lucky the few wey dem get, na plenty money dem go take buy am. Na another wahala wey people wey organize the strike dey cause be that. I know say dem sabi say the thing go cause hardship to the masses but I no think say dat one concern dem. This question for the thing be say who we go come blame now?

As me no too sabi the thing wey cause am, I no fit talk anything, but the only thing wey I go say be say na beg we dey take beg the NNPC and the Strike Leaders say make dem find solution to am because the suffering done dey too much. The small money wey we get we done spend am on Kerosine and cooking gas and we no come get enough money to buy food for our pikin. Make una try and "compromise" as the Oyinbo people dey talk. Na here I go stop my Wakabout legs as I no get money to enter Molue, I go dey talk to una my people. I beg make una remember say people life dey una hand o. Nigeria na awa country make una treat am right.

September.19. 2000

Why Una no Leave Bonfrere Alone Make Him Do Him Work

How una dey my people, I hope say una dey enjoy our pikin for Olympics. He dey bad say our Falcon girls go soon dey come home as dem done eliminate dem for Soccer. I know say plenty of una no dey happy as dem no dey successful but if we want talk true, for the group wey dem dey, dem no get chance. Na the top three country for women soccer dey for their group, how we go come think say dem go fit beat those country if we no want deceive ourselves. As for me o dem be champion, because plenty of us no think say dem go fit reach this stage. Before I dey think say soccer no be for women but today I go give dem sara. Dem be real bankadede for my face. Any way sa, me go salute dem when dem reach our obodo.

Wetin I dey hear say National Football Chairman Brigadier Onyeka dey vex with our Olympics Soccer Coach Johannes Bonfrere. I read am for paper say the man dey talk say our boys no perform well for the two games wey dem play. Dem say the man talk say if the team no beat or draw with Italy wahala go happen. The man talk say him no want make Nigeria play Spain as dem dey hot now. My people no be say I like the idea make Foreigner dey coach our boys but the thin wey me no like be say if una done give person work make una let am do. All this Sakara wey the NFL chairman dey do for him office no go win soccer for us. If him sabi soccer why him no go coach dem. This na sport and no be war, make una let the man concentrate for the soccer and the boys. Instead wey him go dey worry say dem go sack or not. I know say the boys no dey play well now but dem still dey try their best. Wetin those yeye professional wey dey for Europe dey do? No be Pounds dem dey run after. Even self how the General come be chairman? I know say plenty of una no want talk this, but I no sabi how dem come make am chairman since I no fit remember say he done play football for our Obodo before. Which time we go stop this nonsense wey be same we no dey hire people because dem sabi the work but because dem be our friend or dem come from our village. Na the same nonsense wey we dey do for other professions be that; wey be say person wey be engineer we go make am Bank manager. Which kind nonsense be that? He be like say make we put person wey be labourer as Oga for Hospital una no know say the hospital own done finish be that. I no think say the man na proper oga, na the thing wey dey make am dey sakara be that. If you no like how the man dey do him work, you fit call am for corner and tell am say you no too like the thing wey him dey do, no be say you go dey sakara for public and dey do Inyanga because na you be big Oga. Plenty of people wey be military still dey go back to that their yeye style wey be say everything for dem na by force. Na the thing wey make our Obodo pafuka be that, all the thing wey dem do by force una see where our country dey now. People wey no sabi run government use force take over our country . I no get tell una lie, if I be president, I no think say I go make person wey be  army minister or chairman for my government other than Ministry of defense and Police matter. No be say I dey blame dem o, na the kind system wey dem sabi be that. Even self plenty of the thing wey our President talk or do, him still think say na barrack he dey.

I know say plenty of una go say the talk done do, and me agree. Make we let our Coaches do dem work well, if dem no do am well, we fit sack dem if we sabi say na dem be the cause no be say we go dey use force for everything wey we no like. All the thing wey these boys dey do na good service for our obodo, no be those yeye politicians wey be say everything wey dem do na to steal our money. My people na here I go stop, make una dey do jeje o.

September.18. 2000

Mama Oloja Wetin Concern Dollar For Your Market?

My people I hope say una dey enjoy Olmpics games for Australia? Since our mind now dey for Oyinbo country ask we dey watch Olympics na him make I say make I talk small about our Market Woment wey be say every time wey you ask dem say how come dem market dey dear dem go tell you say Dollar done increase. My people I know say this thing done happen to plenty of us wey dey especially for Lagos State. Na jeje I sit down for my Obodo dey enjoy na him I say make one small boy for our house go buy me Gari make I tay nak fried Fish wey I buy for road on my way home, from one woman for our area wey we dey call Mama Taju. I come give the boy 20 Naira make him go buy gari for the woman place. He no tay wey the boy come back and I come tell am say make he no tell me say money wey I give done lost since I no see gari inside bowl wey him carry for him hand, na him the boy come tell me say the woman say one tin of gari na 30 Naira. I come dey ask the boy say se him sure say na gari him ask the woman and he come say yes. Na him I come follow the boy since una sabi boys of nowdays. As I reach the place na him ask the Mama Taju say the boy say the money wey I give am no reach, na him the woman say na true. I come ask am say no be three days ago ask Effiong (small girl for our house) make she come buy one tin of gari from you? The woman say she sabi but since yesterday things done dear. I come ask say how the thing go come dear quick since no be say dem dey bring am from far na him the woman come ask me say se I no know say Dollar done increase? I look at the woman and I laugh and the woman come dey ask me wetin dey funny? Na him I come tell am say na am since she talk say Dollar done increase. I come ask am say wetin dollar come do with gari wey dey dear? I come ask say se una dey import una gari from America now since I no sabi say Gari done become Oyinbo man food. Na him Mama Taju come tell me say na me sabi make I carry my wahala comot. Una know say this woman no gree sell me that gari for Twenty naira o.

My fellow Obodians, make I ask una the same question wey I ask the woman, wetin gari dey do with American dollar? Abi dem done dey import gari from Oyinbo land now because I no sabi. The last time wey I go village I see plenty Cassava for the place. How come these Market Women now come dey talk like say na dollar na him be our currency for Nigeria. And no be say Oyinbo country na there dem take make gari. My people as our country no get price control, people just dey put price for things like say the money na for road we dey get am. This thing wey I dey tell una so he done happen to my brother before but that time me I think say dem want use 419 for my brother as him be Yankee. And plenty people done dey complain about this but me think say na joke. How we go dey spend Naira here and all these Iya Oloja wey no be say na for Oyinbo country dem dey take get these things go dey talk like say na New York we dey live. How dem want make people like us wey be masses survive with this their yeye oyinbo word wey dem hear from our Yankee Brothers and Sisters.

He go good if our Government go put a stop to this nonsense before dem start dey sell everything wey we dey produce for our Obodo in Dollars and Pounds. I go dey talk to una, till tomorrow, make una dey do jeje o.

September.15. 2000

Haba! Federal Govt No Gree Pay Him Workers For Two Months

My people na me as usual, how una dey? Se una hear say Federal Government no gree pay the workers for the past two months. When the thing want cause embarrassment for our Government na him the Minister of Finance, Mr. Jubril Martins-Kuye come dey talk say the reason be say plenty Ministries submit plenty workers names wey dem think say na ghost workers and dem no dey work for dem. Na because of am, na him make the government no pay all the workers because dem want make sure dem no salary for people wey no dey work for the Government. Una dey hear my people, I understand say plenty people name dey for their payroll wey no dey for work for dem. But the thing wey I no sabi be say wetin dem want the workers wey dey for Ministry chop. How the one wey get pikin want take feed their family. Una see the thing wey I dey talk about our leaders, una want tell me say before this thing reach two months dem no fit find the names wey be Ghost workers? Se be dem get people wey dem dey call experts for the Ministry, una want tell me say those people no fit resolve am and pay the workers their money while dem dey investigate. Una want tell me say na everybody wey be Federal government workers the thing affect? I think Government think say we be mumu, because we know say all those Pen Robbers wey call themselves National Assembly including the Ministers done collect their money. Na only the poor masses wey be say dem dey struggle remain. I done talk before and I go talk am again, our leaders dem no be better people , na only their own dem sabi. How dem no go pay person salary for two months, wetin dem want make he chop? And dem know say Landlord and Mama Onigari dey wait for their money. And dem come dey talk about this Ghost workers nonsense. Me I no sabi other people o, but the thing wey I know be say plenty masses sabi say na lie our Government dey lie. If to say na truth dem want tell us say dem no be Federal Government workers? Or dem think say since dem done give themselves that yeye title dem done become special? If dem be true leaders, dem for done find answer to the problem since. Plenty people just dey manage the small money wey our government dey pay dem, how dey go come survive now?

As I dey talk, person wey rely on our Leaders na foolish person. The thing wey I no sabi about our leaders be say, dem go dey talk about all this anti corruption this anti corruption that. Dem forget say na this kind thing wey dey make people steal be that, since he know say he no go get salary for months, and if he no come get money for bank na hungry go kill him and his family. Small time the man go steal money from the Government coffer.

Una see my people, he go good if our Leaders dey think before dem make their yeye decision especially if the thing go affect people life. Na beg I dey beg dem, make dem pay the workers in time before una go dey start dey see people with tie dey steal their neighbour goats. Na here my danfo go stop o, I go dey talk to una later, make una dey do jeje o.

September.14. 2000

Season of Tricksters: who be who for our Obodo now?

How dey go dey go my people? I beg this matter wey I want talk today dey important gan. I know say this done dey happen for a long time for our obodo, but he be like say as time dey rough for the Masses. Our people done begin dey "innovate" as Oyinbo people dey call am, how dem go become reach if dem no want become armed robber. Anywhere wey you go now, people go tell you say make you be careful because 419 people done begin another wayo. No be last year wey my brother wife wey dey America send money to her mama through one woman wey dey come home from America. As my brother wife mama dey come from the place na her and her best friend go the place. Dem enter danfo wey dey go Yaba. As dem reach Yaba na him dem say make dem enter taxi wey go take dem go Lagos Island. As dem dey wait for taxi na him some people call dem, dem dress like say dem dey come from mosque. And my brother wife mama and her friend na Alhajas, dem be what you call Muslim proper. This my brother wife mama and her friend done old. According to the woman, she know sabi how dem take know her pikin name. As dem reach the people, she say something wey she no fit explain happen to am and her friend. The people take the Dollar wey she go collect and tell her and her friend make dem dey count NEPA Poles as dem dey go. My people the woman wey be say na Lagos dem born am spend Four hours for Yaba dey look for direction as she no sabi the thing wey happen to am. To cut the tory short the poor woman and her friend no sabi the thing till dem reach Lagos Island na him dem come realise the thing wey happen to dem. Na recently I hear a woman wey talk say na some Pators use wayo for am as she dey go Bus-Stop for Ajegunle dem. As una sabi say for our coutnry now, na everybody be born again. Every corner wey you go, you go see church everywhere. I guess the thing wey fool the woman be say dem tell am say na people from her village dey do am and na the reason why she no fit find husband be that. The woman talk say by the time wey dem go finish with her both the money and the jewelry wey she carry for body na him dey take from her.

My people una see how our country done turn to garden of evils and tricksters as dem talk for Bible. These people wey dey use God name dey use 419 for the masses, I no think say dem sabi say that one na the worst crime wey you fit do. Una see the thing wey money palava dey cause for our country. How dem go dey use Koran and Bible, the things wey dey sacred dey use dem for wayo. Who we go come believe now since we no sabi who be the real man/woman of God? This is their new style done pass me my people. The worship of money done make our people become Masterwayo for their trade. My fellow obodians, the thing wey I go talk be say make una be careful of una surrounding. If you see person wey dey call you and you no sabi am, please no answer am especially if you no dey live for the area. I know say he no go dey easy since we no fit know whether the man one ask for direction or not, but as the thing be for our obodo now, you no fit trust anybody again even our Politicians as we just found out. And all of una wey like women too much, make una be careful o, because even the Robbers too done dey use women as bait. Na here I go stop, make una dey dojeje o. I dey beg una, make una no go become good samaritan wey go land una inside hot water o.

September.13. 2000

Our Rogue Politicians Done Start Again

My people our National Assembly no dey hear word o. This there longthroat stil dey proper for their body and I no think say person fit comot am. How una dey my fellow Obodians, I hope say una dey manage. Our politicians done start again, no be four weeks ago some of the senate leaders resign because dem put their hands where he no belong. He be like say dem no learn their lesson oh, and dem want start another wahala. But this time around, we done ready for dem as the cat done comot outside. Anybody wey get some dignity for body must carry this fight for our unborn pikin since na dem be our future. We go fight this good for nothing National Assembly with everything wey we get for body till our last breath. I know say all of una go dey wonder say wetin dem do Pa Omugo again o? Na yesterday I hear say our congress dey vex because Federal Capital Territory Minister Ibrahim Budu talk say him no go fit give the National Assembly land wey him promise dem when dem want confirm am for Minister work. From the thing wey I hear from my source, dem say the minister say him go give each of dem land for Abuja free when dem dey argue about him post. I know say he no good as the man promise dem say him go give dem land and he come dey change him mind. Una sabi say me Pa Omugo be man of my word, if I tell una say I go do something, I go stand by am. But this one dey different, this land belong to all of us. Even me I no support the thing wey the man do wey him dey promise dem land wey no belong to am. But make we talk true, if to say our congress be better people why dem go accept the man promise when dem know say the land no belong to am. Plus no be dem be our caretakers? How the man want give the thing wey belong to the whole country to dem,and dem no fit say no to am. Na the thing wey I dey talk be that,  I no think say we get leaders for Nigeria, na Legal Robbers na him we get. All of dem want build mansion for the land wey no belong to their papa. Ewoh we done surfer for this country my people, and na double surfferness. Armed robber dey kill us for right and our National Assembly dey rob us blind for left. If to say na so everybody dem do, una no think say by the time wey we do three elections, all the land wey dey for Abuja go done finish. And he go come be say na only Politicians go dey live for the place. I dey happy say the man come to his senses, because I no sabi how this rogues go fit explain to us why dem go get land for free wey ordinary people go come dey pay money for am. He be like say these people wey dey for this National Assembly think say dem get two heads because how person go give una the thing wey no be him get am? Se bi dem talk say plenty of these our congress people know book small, una want tell me say dem no get small sense at all? Una know say for court, that means say person dey receive stolen good. As we done start this democracy, my head done dey work like Shomolu watch repairer. As the Minister done talk say him no fit do am, all the National Assembly done dey talk say dem want probe am for that. I hear say dem dey talk say na person pressure am make he no give dem the land again. And dem want find out who tell am make him no do am again. My source talk say dem think say na President and his advisers dey behind the decision. As for me o, I no want sabi who dey behind am, even I go thank the person wey pressure am because na the thing wey we the Masses expect from a good leader or leaders be that. As oyinbo people dey talk am, "he go take a real man to say him dey wrong if he dey wrong" No be these our yeye follow follow National Assembly wey be say both male and female dem, no one fit stand strong and fight injustice. Na only true leader fit do that, and day by day, Our President dey win my confidence for Now. Because for our Obodo, you no fit leave your guard down because dem go make fool of  you. I hope say the Minister no go change him mind because if he do am, we no go forget when the time come. If dem want buy land make dem auction am wey be say na every Nigeria wey get money go fit buy am whether you be President or Labourer. No be these undeserving people wey be say dem think say our obodo property na their birth-right and na only dem fit get am free and the rest of us go pay money if we want am. I hope say dem get small shame for body and this matter dem go let am rest. Na here I go stop my fellow Nigerians, make una continue dey do good to our country o, because anything wey you sow na him you go reap for this world.

September,12. 2000

Our Skypower (Nigeria Airways) go begin another life in October

How una dey my people? He go better as I talk before. Na yesterday I hear say our Nigeria Airways go begin dey go America in October. I dey happy say this thing dey happen because before I think say the thing no go fit happen as the past oga for Airways done chop all the money. I know say plenty of una go talk why me dey happy since no be say I get money wey I go take travel. As I tell una before, my brother dey for Obodo Oyinb. Anytime wey better thing happen to our Country whether the thing go affect me directly on not, I go still dey happy for our obodo. Plus, I hear say some of those foreign airlines wey dey come our country no dey treat our people well. The thing be say, una know say that time wey Nigeria Airways no fit go America, plenty of our people wey dey there if dem want come home dem go first go Europe first before dem come Nigeria. I hear say that one no dey easy for dem especially the one wey get pikin with dem.

As I dey talk before, this na good news for us as our dollar wey dey go oyinbo airlines go dey come Nigeria small because plenty of our people no dey like make dem dey go with these foreign airlines. I know say my brother for America go dey happy as he talk say some African Airlines no dey treat our people well too. I remember one time wey him say he follow Air Afrique come Nigeria. He say if you see how those yeye people treat dem wey be Nigerian you go pity dem. Him talk say when you ask the Air Hostess question dem go tell you say dem no sabi Oyinbo. He say that thing make all Nigerians wey dey inside that plane dat day vex. Dem come ask dem say if una know say una no fit speak English why una come dey go Nigeria since una know say na Oyinbo we dey speak there. I guess say those yeye Ivorian like our money but dem no like our people. Na this kind thing make our people say he go good if our people wey dey in charge of Nigeria Airways go think about this insult wey our people dey face from some of those foreigners. This thing just dey make me happy but make I talk truth, our people for Nigeria Airways dem, you no fit rely on dem. Una remember the thing wey dem say the past Oga for Nigeria Airways do to the Airlines. No be a week ago wey dem dey ask the Ex-General Manager how some of the money take disappear. Una hear the thing wey the yeye man talk. Everything wey dem say dey wrong for the organization the man blame am on his workers. How person go say him be Oga patapata for company and he no go know how billion Naira go disappear for the company account. My people I no think say una want me make I explain am as all of us sabi say the man done chop the money. I hope say this time around he go better pass old time wey be say as I hear the old Nigeria Airways workers no get any respect, and dem no sabi how to talk to person. Dem say before you no fit eat their food because the food wey oyinbo dey give him dog better pass am. And the Air Hostess nko? Make you no talk about those girls, dem wowo. Dem go treat you like say na dem pay your money. Na the thing wey make some our people wey dey live for Oyinbo country no dey enter Nigeria Airways when dem want come Nigeria.

Na beg I dey beg the new oga make dem hire people wey go do the work well and no be dem girlfriends wey no sabi job. This na business make we do am well. Anybody wey dem hire make him remember say the customer fit go another place and if una  no treat dem well, na your work want finish be that. Make you go ask the thing wey happen to the oldtimer as dem see pepper when work no dey again.Na here I go stop, I go dey talk to una, make una dey do jeje as Lagosians dey do

September,11. 2000

Who Dey Fool Who For Our Obodo?

My people I no dey happy this weekend as I hear the kind salary and benefits wey the yeye Revenue Mobilization Allocation and Fiscal Commision recommend for our Politicians wey dey for Government from our President down to the Local Government Chairmen. I no sabi how person go dey for government for four years and dem want reward am with that kind money. Na the thing wey I dey say for our Nigerian brothers wey call themselves Educated. This their brain self I no know how dem dey take am think. Before I talk self, those yeye people wey dem put for that committee where dem get dem? Which kind person put dem for the the yeye committee. I no say as the thing be for our Obodo, all those people wey dey for that Fiscal or wetin dem dey call dem, dem done give dem some money for back. This thing dey pain me gan my people. Make I make am easy for una small. He be like say make you work for some place four years, and after you want comot make dem come multiply your salary three times and come give am to you as your benefit. This na because you work there for four years. If to say na so private company dey do am, I no think say money go remain for shareholder wey get the company. How this people go dey government  four four years, una go come dey give dem all these yeye benefit wey we no say for private company this yeye bonus the board of directors no go agree to am. I for understand if some of dem done dey for this position twenty years. Who tell una say this people go win their next election if our obodo still dey kampe. I no get problem for the president and him deputy if dey get benefit after dem comot as plenty nations dey do for the head of states. We know say na America na him we dey copy for this kind government, but I no think say for Obodo America dem dey give this kind benefits to their politicians wey only serve for congress one time. If to say na so dem dey do, I no sabi say that country go better as he dey so. But for our country, all the people wey we think say dem get sense small and dem sabi run government, but no, all of dem na barawo. If una see the kind benefit wey dem go get because dem dey for government? Na all of us go become politicians. The thing include money for house, transportation, utility (NEPA and Water), Maid, entertaiment, furniture, hardship allowance; dem call all this thing fringe benefit. If all those Akowe want use dabaru for us na him dem go use big oyinbo wey we no sabi. My people poor man done suffer, how una go dey dey help person pay him Houseboy and the money wey him go take enjoy (entertainment)? Where all this money dey wey plenty people dey surfer for our obodo? Osanobuah! with the kind salary wey dem go dey get, una want tell me say dem no fit buy dem own petrol for their car wey be say una go dey give dem money? My people, these rogues go finish our country o. Upon say dem go dey collect transport money, dem want add money wey dem go dey take fix their care evern if the thing no spoil. These people think say we be fool dem no know say na themselves dem dey fool.

My people, if I be una, I no think say these people wey dey run our country now get any better thing wey dem go do for our obodo. The thing wey I go tell una say as we done do this now, we go make sure say the next election, make we no allow these kind people there agan if we want better thing for our pikin. If una want read recommendation  tory, make una click on Fat pay for Governors, Deputies and others. Na here I go stop, make una dey do jejeo.

September,08. 2000

OKADA NA MENACE TO OUR SOCIETY

How una dey my people, na me Pa 'Omugo again o. I done dey get better small. He done tey wey I want tell una about the thing wey happen to one of my sisters for Festac. The poor woman say as she want cross the road, she look left and look right as she no see anything dey come, she come cross the road. Suddenly out of no where, na Okada dey speed dey come and the yeye man come hit my sister for ground. Thank God sa, my sister dey alive today but she dey injured gan. I know say plenty of una go say may be my sister no look road well. Whether she look or she no look since I no dey there, I no fit say anything about am. But the thing wey I want talk be say if una look well well, Okada dey cause plenty accident for our road. no be say when dem hit people for road, I dey talk when you go see dem dey move in and out between other motor especially when go slow dey. Before I go talk about that make we talk about how the thing done become big business for our country and whether the thing good for us or no una go be the judge. In the seventies the way I remember am, we no too get plenty motorcycle as dem dey so. But all of us know say na the economy condition na him cause wey be say na everybody want dey use their motorcycle for business. Young people wey no fit find work, dem go gather small money and go buy the thing dey take am carry people waka about. Small time the thing come become big, as una know for our obodo, we too dey follow follow. Just for example, when people know say taylor dey make money, na everybody want become Fashion designer as dem dey call themselves now. Na so you go see Taylor shop everywhere wey you go. Another example na this business center business. Before you know it, the thing done become popular business wey even people wey no sabi anything go open dem own business center.

Make I go back to okada own, as the thing done poku, people wey no sabi ride motorcycle go go buy am dey carry am make taxi. As the thing become unofficial poor man taxi, Okada come increase the number of passenger wey dem dey carryfrom one to two. Na so I go dey go for road wey I go see husband and wife dey ride Okada with their small pikin for back. Una know say some pregnant women too go ride am as dem no value the life of pikin wey dey inside their belle. But sometimes I no fit blame dem na the condition dey cause am. If una remember for years we no get plenty buses and danfo for Lagos as the thing too dear for transporters to buy. As plenty people wey be middle class no fit fix their motor, na so you go see for bustop wey go be like say na market you dey. As this thing dey happe, our greedy transporters come increase bus money. Since people no fit afford am, plenty of dem go just go take Okada as that one dey cheap. From there, Okada Business come explode. Before you know, all those Market Women done join the business even the few middle class people sell their motor wey dey die everyday to buy Okada. As the thing poku na so the people wey no even sabi ride bicycle go dey ride Okada. Una sabi the thing wey happen next, na so plenty people dey die for road as the molue and danfo no too sabi how to move around this new kabukabu. If una go Igbobi and LUTH na so so body dem lay for ground as dem dey send people out na so dem dey bring new people in. To me I know say na condition make some people dey ride am, but the problem wey I get be say why our government no fit make people take lesson first before dem go allow dem dey use am for transportation. As those Okada dey move in and out between motor, dat one self fit give person Heartattack. Na so many innocent people done meet their death because Okada driver no sabi how to ride am. Just like any other thing for Obodo, our governments leaders just pretend as if to say say dem no know say Okada dey for Nigeria. As for me, I hope say the people wey dey ride am go work go think twice before dem do am, as dem no put for Okada Person head say this one sabi am and this one no sabi. If you ride Okada na risk you dey take, this means say you fit no reach your destination because of your foolishness. As for our government, he go good if dem fit make law wey be say people wey no sabi Okada well well make dem put dem for jail. Una sabi say I no talk say people wey no get license as that one no mean anything for our obodo. If you get money, you go fit bribe your way to Okada license for Local council. But person wey no sabi am, he go show because if the motorcycle no fit waka straight una know say that Okada driver na menace to our society.

My people as una sabi say na little I know about life, the thing wey I go say be say think before you do am. Something dey wey be say your decision fit cause your life or people wey dey around you. Na here I go stop make una dey do jeje o.

September,07. 2000

Town Planning na Joke for Nigeria

How life dey treat una my people? Make una no worry, he go better one day. Town Planner job for our obodo na joke. As long say you get small money, if you want put suckerway inside your roof dem go approve am. Even if you no want make gutter pass your house that one dey easy as long you put some chop money inside document when you dey submit your house plan for approval. Se una done visit Festac Village lately? How the place be compare to 1977 when dem first build am? Person wey never reach there before go say se na the place wey dem say he better gan be this? The place now be like Barrack for Surulere. I fit bet una say Abiola Garden wey be say na there people wey get money want live as he dey hot now; na the same thing go happen to the place two years from now if dem no control the growth. As our country dey pafuka na so all the thing wey we build dey collapse. Se una notice say for our obodo especially Lagos, he be like say we no get   Town Planning Council. Because everywhere wey you go, you go see one storey building, next to am na bungalow you go see. As you look towards left of the bungalow na him you go see a Six Storey building and that one go get several shops for front. The place go just dabaru like say Town Planner no dey for town. And this area wey I dey describe na residential area o. But for Nigeria, you no fit separate residential from Industrial area because any small land wey you see people go just dey build one kind thing for am. If you go Shomolu or Mushin area you go see plenty of this kind plan there. Lagos Island na him dey worst pass. Na everywhere wey you go na him you go dey see as people, Malu (cow) and motor dey fight for road because the Landlords done build shops for the place wey people fit dey waka. As una know for our Obodo, na everybody want that Naira, any small space wey landlord get, na shop he go build. I no think say open space dey for Lagos again, na so so buildings you go see. Some dey big while some dey small. You go see some buildings wey be like say dem no get side dem be like stick as dem narrow so. I no sabi how people wey dey live for Lagos Island dey do am because the houses dey too close. If you look out for your window na so you go dey see everything wey dey inside your neighbour house. Some people wey dey live for storey buildings for Lagos dem no dey comot their room if dem want borrow salt from their neighbour, all dem go do be say make dem just call their neighbour name from their window that one go just give dem the thing from him window. Na so some house dey close o my people. And another thing wey dey happen be say you no fit dey live for Lagos Island make you no get plenty Fan for house because na heat go kill you. As una know say since dem build those houses too close all the air wey for dey blow inside house no fit gree enter as buildings done block the thing. As the rush for money done make people lose dem sense, you go see Landlord wey done turn bathroom to shop because of Naira.

All these things wey I talk say dey happen for Nigeria na because the people wey dem hire make dem dey look for Landlord wey no dey obey Housing code done turn Government office to him own bank, the difference be say na only deposit you fit make for him bank. The bribe wey dem dey get from these offenders na him dey make dem dey look the other way for our Obodo. If you go City Council for Lagos Island, I no think say one Landlord dey wey no get pikin or family member for the place. Na so so ngbati ngbati na him you go dey hear instead make dem dey do their work. Town planner profession done become yeye for our Obodo since dem no fit enforce any code. No be say na all of dem dey wowo, but the one wey get long neck poku so tey he go hard before you go fit see one wey no dey take bribe. Na the thing wey make places like Festac and other housing estate turn to dump be that. I remember in the Seventies wey my sister and her husband dey live there, any time wey girls ask me where I dey live na so I go tell dem say na for Festac na him I dey. If you see as some of dem go take look you, he go be like say na VI you tell dem say you dey live. If una see plenty girls wey I done get because I say I dey live for Festac. But now my brother if you no want disgrace yourself make you no mention Festac for girls o. The road wey be say before na so he go dey clean, but for now, na soso bush na him you go see. The land wey we dey take play during old days done become market now. I no think say dem get empty land for Festac again as people done spoil the place. He get some people wey done turn their boysquarters to shops. You no fit find space between the main building and Boysquaters again as dem done turn the space into either shops or extra rooms for rent. Na wa o my people. This money rush no go kill us as he done turn everybody into hustlers.

Now as I dey so, everytime wey I hear small pikin say dem want become architect or town planner, I go just laugh because I know plenty of dem na because of extra money wey dem go dey get na him make dem dey talk so. If you hear now say you fit become millionaire if you join Police, na so you go see everybody dey run to Police Academy.

As the thing be so , I dey pray say the coming generation no go trade their profession for easy money. I hear say if you go Oyinbo country na so you go see as bulding go dey straight like say na inside Book you dey see dem. All this yeye thing wey we dey do for our obodo you no fit do am there. But the thing wey dey pain me be say some of our pikin wey dey live for Obodo Oyinbo, when dem want build house for home instead make dem lay good example na the same yeye thing wey some of us wey no sabi airport go do na so dem go behave. He go be like say dem never comot our country before. I no talk say na everything wey Oyinbo dey do make we dey follow am, but the one way dey good make we dey do am for here, since the thing fit make our life better. All of una wey dey for position wey una decision fit affect our life make una do am right, because you no fit sabi the person wey you go save him life for decision wey you make today. Na beg I dey beg una Town planners say make una do una work with dignity, this money wey una dey run after no dey last, wetin you want tell your pikin if dem ask you say ‘se you done do things wey cause another person life?’ How you go take answer that if you no want lie to dem? Na here I go stop my people, make una dey do jeje o. The decision way you make today fit affect your pikin dem tomorrow.

September,06. 2000

Housing Estate Contractors na Rogues for our Obodo

How una dey cope with the wahala for our Obodo? I hope say una dey do jeje. Today I go talk about all those overnight contractors wey be say dem be proper Onyeoshi. My people, if you ask people now wetin dem dey do? Plenty of dem go tell you say dem be contractors. But the question be say how many of these people know the trade wey dem dey put contractor for? Na so you go see these people with their complementary cards dey parade ministries and local government buildings for contract. These people wey dey call themselves contractor become contractors because dem know say for Nigeria, all you need to do be say tender bid for a contract especially if your brother or your sister manfriend na him dey in charge of the contract, you know say you go get am. As soon you get the thing just do small work for the place, the rest na your money just dey enjoy yourself. If to say na goods dem say make you supply, just supply 5000 if dem ask you to supply 12,000 and the rest just take go build mansion for your village. Na this kind thing dey make everybody wey be say dem want become contractors. But today I go talk about contractors wey dey build Low cost housing estates. If una look well for our Obodo plenty of the Government own Housing Estate for Nigeria look like the place wey dem dey keep rear Fowl. The buildings look like say dem just pack concrete together without any plan. I never see one housing estate wey be say the rooms inside dey finish. The road nko, make we no talk about that one. The only thing the contractor go do be say make he just finish the road wey dey for the main entrance, for all the other roads, he go just level am if una dey luck. Plenty of the building dem go just leave dem like say paint done finish for Nigeria. The sockerway no dey deep enough if dem do am at all. Plenty of what dey call rooms be like say na criminal go dey live am. The kitchen and the rest of the house go be like the house wey small pikin build for sand. Na the cheapest materials and equipments na him dem go buy for the houses. I hear say some contractors no go even buy that at all, dem go just chop the money. Una remember the Iba Housing estate wey I say my brother for America buy where him go dey manage before him build him own mansion. The whole estate be like place where pig dey live. The place wey dem dey use as dustbin be live Mountain Kilimajoro. Na so you go see people and livestock dey fight for food and bottles. The contractor wey do am just do small road, the rest you no fit drive your motor especially if he dey rain, because na so the area go be like say na inside River Niger you dey drive only be say river niger water dey clean.

The question wey I want ask una be say, which kind Government Inspector approve the Estate self? Se na him office he dey when he approve am or he dey drunk? Because I no think say person wey him head still dey kampe go fit approve that kind Estate for people make dem dey live there. If I be inspector, I no think say I go even approve am make dem dey keep Animal for the thing not to talk people. Another thing be say, which kind contractor build that estate? I beg make una no tell me say the man feel good about the thing wey him do. Na all these things na him dey make our country no dey progress. If we check well, that inspector wey inspect that estate done chop some money and him no even go the place self. Plenty of these contrators the material wey dem give dem make dem take build the houses, dem go send dem to their Shop go sell and take cheap materials go the place. Since say for our obodo na Naira na him we dey worship, the contractor done take money wey dem give am to build houses done use for election for him village. Small time una go hear say the man done become one of our leaders. I no need to tell una which kind leader that one go be. And plenty of dem dey for Abuja as I dey talk to una dey pass law wey go affect me and you. When una hear for news say some buildings collapse for radio, una go dey wonder wetin cause the thing? Na the kind thing wey dey happen for our country be that wey be say so many innocent victims done die because the place wey dem dey live or work dem no build am well. Small time the house go break into pieces and na so dem go lay plenty body for ground. A lot of times na small pikin go dey play near suckerway wey the thing go just drop because sand plenty pass cement when dem dey build am. Me still no sabi how some people dey sleep for night when dem done cause death to their fellow mankind especially small pikin wey dey innocent.

Na beg I dey beg our government officials say make dem do their work well with dignity as dem done increase their salary. Before una go give contract to people, make una make sure say dem sabi the thing and dem go do the job well well. He go good if to say anytime wey a contrator no finish him work and we done pay am money, we go take the money from am and plus ask am make he pay interest for the thing. He go good if we blacklist all the contrators wey be rogues because I know say there are some contractors wey dey do their work well. All these things wey dey happen, na the thing wey we go fit prevent if we no too dey worship money. Our people no dey care about their actions especially when he be about safety as long dem dey make money. I pray say one day for our Obodo, inspectors and all the people wey their action/decision fit affect plenty people go think before dem put that bribe money for their pocket. Na here I go stop my people, I go dey talk to una , make una dey do jeje o.

September,04-05. 2000

Visa Lottery Done turn to Big Business for Nigerians

Se una enjoy una weekend well well? One day sa this our Obodo country go better. I just hear from my souce say Visa Lottery for Year 2002 go soon start. Dem say for person to qualify the person must send him application betweeen Oct 2nd thru November 1, 2000. Me too done dey work on my application because as the country dey go so, I no think say thing go improve quick as our politician done dey chop money wey go move the country forward. Since we dey talk about this visa lottery, I go tell una the kind thing wey I hear about the thing. Una know say na every Nigerian want commot this country go America since na there money dey. No be say the dem dey pick the money for the street but as I hear, even if to say na gutter you dey clean, you go still fit get all the thing wey be say na only rich people fit get am for house for our obodo. Motor nko, as I hear, na everybody dey drive motor for America. As dem dey talk am, dem say car poku for the place. No be here wey be say na only rich people fit afford am. My people make I no lie to una, he no dey easy for that Obodo America but if you know say you fit work hard, every thing go dey easy for you. But if you dey lazy, I beg my fellow country people, make you just sitdown for here jeje because no be kind place wey you go dey go work late because dem go sack you. My brother talk say dem no dey play for that country, if you dey lazy na street you go find your load.

Since say na everybody dey leave him work go America na him say make I talk about our fellow Nigerians wey be say na business dem dey take am dey do. Dem go collect money from innocent Nigerians and tell dem say dem go help dem get Visa Lottery. And those innocent fools no know say na mail dem go mail am just like everybody wey dey apply. Dem no sabi say the thing na free and the only time wey you go pay money be say if the computer select your name and you go interview na that time you pay money for processing and Visa. I hear say some people go tell you say make you give dem some money and dem go help you get the thing. My brother make una no listen to dem o, all those people na rogue, the only people wey go fit give you the thing na States Department for America, and no be say dem go just give it to you as I talk before , but if their computer pick your name that means say you go qualify to get the thing after wey you done pass their interview for their Embassy for Nigeria. Na only this Ministry dey in charge of the thing. All those people wey dey say dem fit get am for you na lie. Plenty of innocent Nigerians done loose their money to fellow Nigerians wey be say dem bit fraudster. I get one nephew wey be say one man for America help am apply for the thing. As he come be, dem come pick my neiphew name for the thing. As the man go use wayo, he come send a copy of the letter wey dem send my neiphew to am since na him address for America na him my neiphew use. But the man done commot the reference # wey my neiphew go fit send the thing wey dem ask to send. He tell my neiphew say him go help am find wife as he done tell am make he put say he done marry for the application. The last time wey I hear, my neiphew no hear from the man again. He done sell the thing to another person as una know say for our Obodo, he dey easy for person to assume your identity for our obodo. All dem go do be say make dem go Oluwole go buy document on your name. If una see my neiphew now una go pity am, the poor boy done tell everybody say him dey go America. This thing wey happen to my neiphew dey common for our Obodo. Plenty people done loose money to some Nigerians wey dey do am as business for America. And I hear say this thing wey dem dey do, he dey against the law for America. If dem grab dem, na for America jail na him dem go find themselves plus dem go take their green card away from dem. Na Nigeria dem go find themselves. Na the thing wey I dey say about our people bit that, plenty of us na money we dey worship. These Nigerians for America wey dey dupe their innocent Nigerians wey dey desperate because of the economy condition of our obodo. For all Nigerians wey dey do this kind thing, una dey selfish and heartless. Una done dey for the country already, instead make una be good ambassodor for una fellow Nigerians na dupe una dey dupe dem. Plenty family go sell all their belongings just because dem want move to America. Some people get better job but that one no do dem, dem too want go there and go pluck all the money wey dey for Yankee Trees. Na my brother say there is one couple wey be say the man and him wife na oga patapata for Nigeria but because of greed dem sell all their properties for Nigerian and move to America. He say the man na security na him be for the place now. Una see my people, person wey be say he get house-maid for Nigeria and two cars. He dey command poku money for work, but this dollar wey him want get for America no let am use him head again.

My people, I know say make we no go America, but if you get better job and no be say people want kill you, why you no fit dey enjoy yourself for our obodo and dey gbaladun for your mother country? This America wey una dey rush to, which person tell una say he go better for una when una reach the place. Me I belief in destiny, if God done talk am say na for obodo Nigeria na him you go make your money, he go happen. And if God talk am and you go go America, I no think say he go dey easy for you my people. Please before you sell all your properties and pack go Oyinbo country think twice before you do am. No go there go dey regret because as dem talk am, Overseas too get their own palavar. I go dey talk to una tomorrow, make una dey do jeje o.

September,01. 2000

Democracy: Nigerian Flavour – The enemies wey dey within

Nigeria we hail thee! How una dey cope with Obodo Nigeria? I beg make una no worry, he go soon better by God s' grace. My people na as I just dey sitdown jeje for my domain, na him I dey think about the American President wey just visit our country. Small time na him I come think about some of the thing wey the man talk say this democracy wey we get for Nigeria, that everybody must do in part well well if we want progress. Na him I come dey think about the wey our politicians dey live and their mates for Oyinbo country. I remember one time wey my brother wey dey America and me dey talk about different things wey dey happen about for this our planet. Small time na him we talk about politics for America. Una know say for there, na only President and his Vice President dey live for Government house, all the other one from Senate Leader and down to ordinay clerk for Ministry, na dem go find their own house and pay for am with their own money. And if una look, for our country, our leaders talk say this democracy dem want follow Oyinbo way to do am. The question wey I get be say, how come any time wey we put our hand for something wey oyinbo do, we go add our own bad idea (no be good idea) to am? I no say make we no do thing wey go dey in support of our custom and cultures. Any person or group wey want do away with him history, that one na one lost soul. But this our own way of government me I no sabi am at all at all. If we look plenty of those oversea countries, dem get boku money pass us, but dem dey manage am well. Our country wey be say na almost all of us no fit feed ourselves and families. Plenty of our pikin no fit find job when dem comot school. The one wey dey work self, no fit get salary in time as the man in charge of the money done wack am. With all these problems wey we get, our leaders still dey find money to buy things wey dem no say we no fit afford. But since poverty no gree visit their house, dem no care about the rest of us. The reason why I talk this be say, how una go dey build official quarters for all those government executives from the Permanent secretary to the Senate President. Wetin dem dey do with salary wey dem dey get? And as that one no do, una dey give dem official car wey be say no be one or two, small time I hear say the Senate Leaders get about 10 motor. Wetin dem dey do with that plenty car. Where the money dey wey be say the masses no fit gree eat for days? Se na life una dey live? No be yesterday na him I hear say the House of Reps go probe President Obasanjo because the man allocate boku money wey dem go take build houses for him Ministers and him cabinet. Na wa my people, Western Nations wey dey borrow us money no dey do am, I no know where we wey be debtors dey find that kind money? The thing wey I want ask our Leaders be say, if we say we no get money, how we come dey give extra money for furniture allowance and dey buy politicians plenty cars. Sebi na the person wey done belle full na him go dey say he want buy extra motor and furniture. If we talk say we want serve our country and make am progress, no be say make we dey use that dey put money for our pocket and steal all the thing wey dey for the whole country. The are plenty Nigerians wey no fit find food eat. Plenty of our masses look like person wey dey sick and nothing dey wrong with dem. And no be say our Leaders no dey see this thing, dem know but that one no be their palava. As I dey think am he be like say make I cry. How be say Oyinbo people go treat us better pass the people wey we call our own. Wetin dey wrong or change inside our black body wey be say na only our own na him we sabi now. We no even care if our neigbhour or friend die, as long we dey kampe. Haba our leaders, una no do well at all, una dey spend all this money on una self when people like me no even get food to feed my family. Na only God almighty go repay una for all the young and old Nigerians wey die because dem no fit find food to eat or no fit find money buy medicine when dem sick. And the people wey die in the hands of men underworld nko? Because young people wey no fit find job when dem commot university done becomo armed robbers for night. Our leaders this una Nigerian style of government no dey pay us if una want know. I beg one day sa, we go find true messiah and his disciples wey go think first about the country before dem think about how many mansion dem want build and own. Na here I go stop my brother. We hope say he go better.

August 31, 2000

HOUSE OF REPRESENTATIVES NA BARAWO FULL AM

I know say plenty of una go dey say wetin dey wrong with Pa 'Mugo we be say he too dey sick, but make I tell una, I still dey kampe only be say fever not gree live me alone. But make una no worry, I go dey ok before una know it. How everybody dey for our Obodo, I hope say una still dey breath. Me I dey sorry say I no fit talk to una yesterday, na the fever no gree me.

Wetin dey happen for House of Rep we be say na to remove President Obasanjo na him dem dey work on. Why be say every time people talk say make the House probe himself, na so the leaders go fight against am. I know sabi why the House Speaker N'Abba and his people dey fight the thing if dem no have something for corner corner. The new story wey I dey hear from the Lower House be say some of people want take probe dabaru the House. I beg my people una believe that kind story. Plenty of people wey vote dem there say make dem probe dem but the Congress still dey do strong head to fight the thing. To me, he be like say the people know say if the probe happen na plenty of dem go comot. I guess be say dem no want the thing wey happen to Senate to happen to dem. Na the thing wey make me think say the people na proper barawo. If una sabi well well na since people done dey talk about this probe na him dem done talk say na the President and his people dey push the thing. As for me o, he go good if all the people wey dey for big position for government we probe all of them. I know think say the executive hand dey clean too. Na all of dem hand dey dirty. Even the Governors too na the same thing. Na one of my source tell me say some Governors dey pay big money to buy expensive motor from Oyinbo country. The thing wey I know understand be say any time wey good person enter politics for our Obodo, plenty of dem go become Ole and Onyeoshi before dem comot. Before all these Politicians comot from government, he go good if we find out how many motor and houses wey dem build why dem dey for government. He go good if all these foreign government wey dey talk say our country too dey corrupt go help us find out how many of our politicians dey build house for their country and how many buy expensive motor with cash while he dey for government. I know say if those country want help us dem fit do am. As dem dey talk am for Yankee "Either you put up or shut up", the oyinbo people get equipment wey dem fit found about our Crony Politicians. Before, me I think say AD people na better people, but for now all of dem na the same. Sebi I remember say Governor Tinubu wife go Oyinbo country go take him pikin for America, una belief say the woman take with am police people and some Lagos Government workers come Oyinbo country. Make I ask una my people, which person una think say pay for the thing? The money wey dem spend for the trip, go fit feed boku people for Lagos Island. And the yeye people no fit spend that kind thing when dem no dey for Government. I even hear say dem stop for London and dem even tell the people wey follow dem go say dem no fit buy or take something for the place since the woman want take the two suitcase wey everybody dey entitle to park stuff for him family. Na wa o, some Rich people dey greedy self. Small time dem go dey talk say dem dey for us masses, na the person wey no know dem na him make dem go tell that tory to.

As I dey talk before, House Speaker N'Abba and his people no fit disrespect the wish of people wey put dem there. I hope say all of una wey dem send make dem go do the country work go do am well, because no condition dey permanent and nothing wey last for ever. Small time the thing wey una think say una do for corner corner and people no fit sabi go come out one day. He be like the thing wey dem dey talk for Yoruba land say "na plenty day be for thief, and na one day go be the owner". Na here I go stop o, make una dey do jeje o.

August 30, 2000

I bey my people this sickness no say him no want kill me. I go talk to una tomorrow, make una dey do jeje o.

August 29, 2000

Nawa for Our Golden Fleece

Se dego still dey go? How una dey my people, se una still dey kampe? Me still no well but since wey I done tell una yesterday say I go dey here na him make I come. As the President of the God own country done go, I say make I take that talk about our people wey dey go Oyinbo country go look for golden eggs. My people the thing no dey easy o, if una ask our people wey dey Oyinbo country dem go tell you say you no fit dey work like the way wey we dey do for our obodo. To find work no dey easy, and when you find am self, dem go work you like say tomorrow no dey. All these our people wey dey come home come dey spray Money like say na for Oyinbo Tree dem dey find am, na lie dem dey lie unless dem be people wey be say na for 419 na him dem dey do for the place. As I dey talk, una see the day wey person leave him family say he want go overseas go work, everybody for the family go dey happy. The small pikin go tell him papa or mama say make him bring am plenty sweet and cloths. The wife go tell her husband as him dey so, na the latest wear and outfit na him she go dey wear now. She go tell the man make him send plenty bata and bags. And if to say na the woman dey go oyinbo country, her husband go tell am say make him send am better motor, so that when him friend see am, dem go know say the chief done come. As the thing dey happen my people, plenty of us no dey think about the effect on our family structure. We go just dey think about all the bettter things wey we go get now as our family dey go Oyinbo country. How many family wey dem family member go oyinbo country dey happy apart say dem get plenty naira to spend. Another thing wey I found now be say the kind activities wey the people involve dey do as their partner no dey around. Una know for our culture say he dey okay make man get concubines beside him wife, although me no support that kind thing because just as dem dey say "cow just dey manage, knive no dey good for him neck". How many of us go dey happy if our women too dey do that kind thing? Una know say plenty of our women no like am when dem husband or boyfriend get another woman for corner. As time done change na so our women too. As the man wey dey Oyinbo dey poi Oyinbo and Ajereke and dey gbaladun for overseas, una know say him wife too dey do the same thing. Plenty of dem go tell you say this body no be stone. Na wa my people, dem no dey do women as the women wey dey during my mama time. Wey be say, if there husband go war, na home dem go dey wey dem go dey take care of their pikin. Dem no go look another man face as dem know say if dem do am, na shame dem go bring to their family. And una know say no man want dey share him wife with another person. These women of nowdays no care o, even when you dey around dem get boyfriend not talk about when you dey across the ocean. The fools wey call themselves husband the thing wey him dey chop for Oyinbo country no let am think say dem dey do the same thing to him wife. And some of our women wey dey Oyinbo country too dey do am, only be say dem no plenty. Since una know say Oyinbo country dey cold, plenty of those women na that time dem go find man wey go be their friend. Even if the woman no do am for Oyinbo country as women fit do without am, but him husband wey dey for Nigeria, the car wey him wife send am, na the same motor him go dey take carry girlfriend about. Sei, some men no get conscience, the car wey be say na the woman salary for six months na him take buy the motor and the money wey she take send am home. Na him her husband dey take gbaladun for Lagos, dey do Omo boys for road. As I dey talk about wife wey dey for our obodo, I hear say plenty of dem when dem know say their husband go come home for holiday, na that time the woman go tell her boyfriend make him no come see am as her husband go dey around. The poor bobo dey think say nothing happen behind am, he no know say some of the thing wey him bring for him family, na him wife friend go end up dey wear am.

Una see my people, make una think twice before una take on this journey dey look for golden geese. I no talk say na everybody dey do am, but the one wey dey do am plenty pass the one wey no dey do am. The thing wey I know say if your spouse know say you dey trustworthy, I no think say him/her go betray you especially our women. Plenty of women wey dey do am, na their husband dey push dem for the thing. The only thing wey I go talk be say, before you do anything, make you think twice before you do am because how you go feel if your wife or husband do the same thing to you. Na here I go stop, make una dey do jeje o my people.

August 28, 2000

Abuja no say him no dey there during President Clinton Visit

I hope una enjoy President Clinton visit to our Obodo. My people this weekend I dey proud to be a Nigerian o. If una see as our Government clean Abuja area, una go think say Overseas na him una dey. All the dust bin wey dem never pack for months, dem comot am. Na everything wey no dey work before work. Even the yeye Police too behave themselves. NEPA self no dey bad as them no say if anything happen to the light when President Clinton dey for Nigeria, heads go roll. The light no blink once. I get say this na sign say thing go better in the long run for Nigeria if we continue to follow better part. And our Politicians no too disgrace themselves as una know how our people dey behavior when dem want show off their power. Our country even give the man 3 Nigerian Names from the the three Major tribes. President talk some sense to our Politicians, the question be say se dem go follow the thing wey the man talk about how democracy dey work for him country. The man even go one village for North but he no visit south because of the wahala wey dey happen for our Obodo. Na so America and Nigeria Flags full everywhere. As una know say Dem no invite poor masses like me, I no too know whether na all the Governors na him dem invite. The thing wey I no sabi be say if we fit make our area clean like that how we no dey do am everytime. Se bi na Yoruba people dey talk say "na from home we dey take jewelry (make up) outside". I hope the visit go make our politicians change their yeye behavior wey be say na to chop money na him dey know. As I no dey too well today, I no go talk too much. But I promise una say Tomorrow topic na out of this world. This tory apply to all able Nigerians whether you dey for our Obodo or na Overseas you dey live. I go dey talk to una tomorrow, make una dey do jeje o.

August 25, 2000

I hear say Congress Want Impeach President Obasanjo

My people our National Assembly done become National Theatre. I hear say our House of Representative want comot President Obasanjo because of the thing wey dat one talk two weeks ago. From the thing wey I hear from my source, dem say the politicians talk say the man ridicule dem for National TV because the man say dem send dem to National Assembly make dem go make laws no be say make dem dey award contracts. My people na wa for our politicians o. Me no know the thing wey dey wrong for the thing wey the President talk. Na everybody for our Obodo know say the contract wey the Congress dey award no be part of their job. As I done talk before, I no know how these people tey win election for their communities because dem dey act like say dem be small pikin. I dey pray say the next election na all these rogues we go comot for the place. As I done dey talk before, these people no dey shame. Dem catch dem say dem dey steal our money instead of make dem tackle our country problem. Make I ask una something, sebi plenty of these people go school even if na school where dem dey learn how to thief money? For where he dey for constitution where dem fit impeach person because the man talk truth? No be true say dem thief our money. How dem want explain the 1.5 million Naira wey dem add to their furniture allowance. If that one no be fraud, I no know the thing wey he be. Instead wey dem dey worry about the thing wey the President talk, dem need to worry about us the masses. He be like say dem no sabi say we fit recall all of dem from the place since say dem dey do thing wey dey against the constitution.

Make ask una something my people? I no know the thing wey our Minister of Justice dey do? Sebi dem talk say the man na proper lawyer? Una want tell me say the thing wey our congress do for the allowance no dey against the anti corruption law wey the President sign. Na the thing wey I dey talk about our leaders be that. All of dem na the same, dem be real Barawos.

Me still believe say the only way wey our country fit move forward na if we masses start our own political party. If we do am, we go fit send all these people to where dem belong, Kirikiri and Alagbon. I beg my people, make una no just sit there, plenty of our people wey dey for Oyinbo land get small money wey we fit use run our own political party.

Na here I go stop, since me too go waka go Abuja go meet the President of the God own country – America.

August 24, 2000

21.5 Billion Naira Scam

How una dey my people, I beg make una no vex with me, na our computers get problem.

Una remember the other time wey I dey tell una about 419 wey dem want use take my brother house for Iba Housing Estate for Lagos. Another thing done happen again o. Na the owner of this company dem want use 419 for again. This one na for obodo America. The man say him name be Dr. Suleimen Idris. As dem tell me, dem say the man say him be member of Federal Government Contract Award Monitoring Committee for NNPC. He come talk say dem put jara for the contract when dem dey award am. The man say make the owner of this company send am him Bank account, company name and address for America to am. I think from the thing wey I hear the man say the money na about 21.5 Billion Naira.

Before I talk about the 419, I go talk like say the thing na true. Una see as the people wey we put in charge of our country resources dey do. The man talk say dem put "Jara" for the thing as all the people wey we call our leaders dey do. Una remember about the Senators wey add 1.5 million naira Jara to their 3.5 Million naira Furniture allowance. These na the same people wey go pass decree about our Obodo future o. Una see as our country done become the place wey people feel thief money and the country no fit do anything about am since the Judges wey dem dey call the enforcer of the law too na Onyeosi (rogues). This man want take this kind money wey dem allocate for project for Nigeria go Overseas country. Before una know una go hear say the man too dey run for Election. Small time him people go make am Chief and him too fit become either a senator or dey run for Political post for Nigeria. With this kind thing wey dey happen, una think say our country go change? As I see am, if you get money for our Obodo, you fit do anything wey you like. Even self if you want get respect for Nigeria, just go steal some big money. Because if you steal small money na either death or jail na him go visit you. But for big money, na everybody go be your friend. Your Village King go make you chief. And the politician feel make you either a Minister or Senator wey you too go dey pass decree wey the honest people for our Obodo go dey follow.

As for the 419 case, una see as our people dey spoil our country name for Overseas. The man self no too get sense. How he think say my boss go give am him bank account number. Another thing be say, plenty of the people wey own the company na Nigerians. I guess the man no do him homework well because he for done sabi say these Nigerians no go allow their partner make him send that kind information to am. The thing wey I no understand be say, how the man take know the company name and him owner? If our country people fit get that kind sense why dem no fit use am for something better wey go make the country proud as Oyinbo people dey do. My people, I dey pray say make dem catch this man and him gangs wey dey spoil our country name. By God’s grace, as the man dey disgrace and betray our country na so our country go disgrace am the day wey dem go send am to America Prison. Una wey dey do this kind thing, if una no know, Nigeria government done dey send our people wey do 419 to foreign country make dem go do prison there. As dem deport  dem to Nigeria, na Kirikiri Prison go dey wait for dem. Dem go spend another time of their life for Kirikiri for the same crime again. I hope una go learn lesson from the thing wey our Government do yesterday wey dem put for paper all Nigerian criminals wey America Government dey look for.

The thing wey I go say be say, if you dey do am make you go stop am. Because as dem dey talk am for my village, "na everyday be thief own, na one day go be owner own", if you know stop, dem go catch you.  And that fit be the end of your life. Na beg I dey beg una, make una do our country well o.

August 15-23, 2000

Pa Omugo go come back on Thursday

I beg my readers make una no vex na our computer get problem and another thing be say I go leave (holidays).  I no fit put the message wey I want leave for una as our computer no gree work. Any way sa, I go talk to una on Thursday. Make una dey do jeje o.

August 14, 2000

419 People Visit My Brother


How una dey fellow Obodians, Se una enjoy the weekend. He done tey wey I done dey hear 419, but since I no too dey hear I am me I think say the people done shift base. Na last week I found out say dem dey well well and alive as dem want do am to our family. Una know my brother wey dey Oyinbo Country for America. He get one small house for Iba Housing Estate wey our Government say dem build for middle class. As I done visit my brother for the place several times when he come to our Obodo. I know say my brother too no like am as him dey talk say the place be like place where dem dey raise Chicken. But as him never finish him mansion, na dat house him still dey manage. One day last week na him the person wey my brother say make he dey look after am since the neigbhours dem na there dem dey use as there dustbin as my brother no dey for Nigeria. We complain to the association, but the yeye people wey being him neighbour no gree stop. As the Bobo come I dey surprise since him no too dey come our house unless something wrong for the house. And that one no too dey happen. To cut the tory short na him the Bobo tell us say na jeje him dey relax for house na him hear 'gba gba gba for wall' and him think say na the neigbour pikin dem dey play for outside. As the thing done dey too much, him come go outside go see which yeye pikin dey do that nonsense. As him reach outside na him see some people for the entrance. Him come ask dem say wetin dey happen, na him dem call tell am say them want come lock the place as the house done belong to dem. Him come ask dem say wetin dem mean say the house belong to dem and na him dem come tell am say the owner for the house use am as collateral for loan wey dem borrow am. Him come ask dem wey the owner dey na him dem tell am say the man dey for Lagos. Na there him come know say something dey wrong as he know say my brother no dey for Nigeria. Na him come tell dem say this one no be the house because the person wey get am dey for America, and na there him dey live with him family. He come say the people tell am say if him no comot for the house na Police na him dem go call for am. As dem dey argue, na him some of the neigbhours come come out and dem come tell the people say na true the man dey talk but if dem no believe make dem come back like tomorrow because the man brother dey for this Lagos. Na the thing wey make the Bobo come call me be that. As hear the thing I know say either someone done use 419 for those people or dem want use 419 for my brother. I come run go meet my friend Johnny since him know some Police for our area. The following morning me and the Police come go my brother place. As we reach the place the people never come, na him we come sit down for the house. Small time we come hear knock for the door, we open am. Na the people and police show up. Na him I come ask dem say which person  tell dem say na him get the house? Na him dem come tell me say that one no dey  as dem be get document for hand. I come tell dem say whether dem get document or no document, this house na my brother get am. And sabi how he take get the house. And I know say him no fit borrow money from una because him no dey live for our Obodo. Plus the man fit buy una and me together. Na him dem come dey say wetin I mean by that? I come tell dem say if to say na 419 na him dem want use, that one no go work here because my brother lawyer dey come this afternoon. Him dey bring all the proper document for hand. Na him the police wey dem bring come ask dem say as una talk say the person wey una borrow money dey for Lagos, why una no go ask am where how he take get the house since the neigbhour say dem know say na this man brother get the house. Then come dey ask the police which kind nonsense him dey talk. I tell dem say may be the person wey borrow money done use 419 for una because this house no be am. To cut the tory all of us come go Police Station wey dey for the area. Then cone take our statement and the Inspector cone tell us make we come back next week with the documents and he tell the other people make dem bring the person wey dem borrow money.

My people, nawa o, se una see how 419 dey work for our Obodo. My brother done own this house for about 15 years now, why be say na now somebody one claim am. The only thing wey I think dey happen be say this person wey want use 419 for my brother no expect say dem go see person for the house as he never tey wey my brother ask someone make he dey live there. I hear say na so those people dey operate. Na the reason wey for Nigeria now people dey put sign for their house say "The house is not for sale or rent".

I go let una know as the thing dey progress, make una be careful of Men and Women of the Underworld call 419.


August 11, 2000

New Political Party Dey, Who Want Join?

Since say na about Politics we dey talk this week se una done ready to join a new party, this one I beg una,  na for people wey no get experience for the kind corrutpion politics wey our old politicians dey pratice. How una dey? I hope say una done ready for our new Senate Leader and him Deputies. My people today na serious matter na him I want discuss with una. If una look well, plenty of the people wey dey run our country now na old politicians. Some of dem done dey for this politics before dem born some of us. And if una look well well, una go see say na dem cause all this surfer surfer for our obodo. Small time another election go come, and na these same old rogues na dem go dey contest again. I no know for una o, but as for me, I no want see this people there again. The thing wey dem do for our country done do. All this bad thing wey dey happen for Nigeria na dem cause am. Na wise men dey say if you want do something good make you do am yourself. Me I done tire dey complain because I no think say this people go change. Se una hear the thing wey Senator Aluko talk, wey him say all of dem pay themselves 1.5 million naira extra for furniture allowance apart from the 3.5 million Naira  wey dem tell us. This nawa o, when plenty of us no even get room to sleep come dey talk about furniture. Na all of dem be Onyiochi; Barawo and Ifafi; since we no fit trust dem, me come decide say make we form our Party.

I know say plenty of una dey laugh, but if una look hard, wetin una want lose for the thing. If all we dey do be say dey complain, these rogues wey we call leaders no go ever comot. I know say to form Political Party go take some money, and plenty of us no get am. The thing wey we go do be say we go feel tell everybody wey want contest for an office make dem put some money down. Since we know say our opponents dem get plenty money to burn, we go do our own the masses’ way. All the organizers go dey go from one place to another as we no get plenty money to do advertisement. And we go talk to journalist dem make dem cover us for free. I know say there are plenty Nigerians wey dey Overseas wey go dey want join our party. If we fit get the ones wey dem know about politics small even if dem never run a campaign before that one fit work. Some of dem fit give us ideas as dem dey do for Oyinbo country. If we fit find better leaders, plenty of our people wey dey overseas go support us as the Mexicans wey dey for America do for their new President. I know say plenty of our people wey dey for our Obodo no get money but if dem know say our Political Party fit change their life for better dem go vote for us. I know say plenty people done tire of these old politicians wey no get any good idea except how to wack our money.

Another thing wey we go do be say, anybody wey done run for election before no fit join our party. Na only people wey dey under 50 years fit run for office under our Political Party. This go make us prevent all those corrupt politicians wey go want join our party. Another thing wey we go check be say you go declare your assets and how tey get dem. Because we no want all those new millionaires wey be say na for Toll gate na him dem take get their money. I know say I no get all the ideas, and some of the thing wey I talk some people fit no agree to am but this na just the begining.

My people, he done reach the time wey go take back our country. We get plenty resources for our Obodo, now we go need to make better use of am. The reason why I say this thing be say, all of our people wey dey whether na Nigeria na him dem dey or na Obodo Oyinbo, make una form una own party if na tire of these Old Politicians. Na here I go stop my people, if una want reach me my e-mail address dey for top.

August 10, 2000

Why be say plenty of our Political Parties na Regional?

How una dey cope my people, I hear say the senate leaders dem done resign. I hope say this go make other people think twice before dem wack our money. The question be say which time wey the other people wey dey for senate go resign since say dem pocket 1.5 million Naira wey dem no tell anybody. I beg my people make we move to another tory.

Make I ask una question, se una sabi why plenty of our Political parties na regional. AD – Afenifere I be wetin dem dey call dem during last election na only Yoruba area na him dem win. The thing wey I know sabi be say sebi the election na national one, una want tell me say na only their people na him dem want represent. I know say if to say Pa Awolowo dey for life him no go like am. If we call ourselves one nation under God, why we still dey practice this tribal politics? Small time I hear say my people for North too want start their own Political Party. I think dem say the name na NEPU (Northern Elements Progressive Union. The thing wey all these tribal parties go solve me no know. How una go dey say una dey for One nigeria for one hand and una go dey form political party based on you region with the other one. If una sure of una selves why una no fit bring program wey be say na all part of the country go dey part of am. The question be say how una go come tell the people for other region make dem come join una party. As he dey so, na only foolish person wey come from other region go join una Political Party. You think say if I be Urhobo man I go come join una party? The name of the Party done tell me say na only people from una area na him una do am for. Which time wey this nonsense go stop, since the time wey I be small pikin na him I done know say this tribal politics no dey work. Na wahala na him the thing dey cause. Small time now una go say una dey campaign, and come bring one corrupt politician make him come represent us since him come from our area. And for the foolish man, the money wey una done give am no let am use him head. Sometime I wonder which kind planet wey I dey wey be say people no dey use their God given sense. I read am today say some people for North dey form Northern political parties and dem come invite Maryam Abacha for the thing. Make una see me o, una know how I feel about people wey be Pen Robbers for our country. But devil self get small right, una know say the woman self come the thing when her son dey face trial of him life. Which kind mother go do this kind thing wey be say if dem find her son guilty na the end be that. This for tell una say the woman no be good mama, because no good mother go do this kind thing for my village.

As I dey talk my people, if our country go move forward, all this old behavior should comot. The people wey dey in charge of Federal Election Committee must do dem part for this thing. If to say dem ask me o, any party wey no involve all the regions of our obodo no go qualify for the election. Na only Politcal Party wey cover all regions for our obodo fit help us comot all this tribal politics wey we still dey practice. As computer people dey talk am, this na new millennium, all these old systems must comot for better thing to happen for our Obodo.

August 09, 2000

Which Senators Hand Dey Clean and which One Be Barawo?

My people nawa o, this National Assembly thing done open a can of worm. Se una hear the thing wey Senator Aluko talk say all Senators dem collect 5 Million Naira instead of 3.5 Million Naira for furniture allowance. That mean say na lie dem lie about the money wey dem take buy furniture. Haba, a whole National Assembly dem lie to us. The question my people na be say which senators go say him dey clean since na all of dem take the money? Make I ask una question my people, which kind furniture wey dem take 5 million buy. Se na gold dem take make this furniture because me no understand? How dem go talk say the country no get money, and dem come use wayo buy furniture for their family. He dey bad enough say plenty people no support the allowance self, dem come add another 1.5 million Naira on top of am. Che che Che, Orimi o, Na barawo dem we send go National Assembly. As President Obasanjo done talk about corruption say anybody wey dem catch him go go Kirikiri. I guess say our Prison go get some important people. Because I no know the kind story wey dem fit tell people like me wey I go believe dem. These our leaders dem na disgrace, I no know why we no recall all of dem and come send dem to Alagbon. If to say na poor man do this kind thing, una go burn am alive, since say this na Pen Robbers, he be live say the whole country dey sleep. Where our Media dem dey, no be dem be landlord for democracy. Una want tell me say na only us see this kind robbery. How we go expect our pikin make dem listen to us, when people wey dem dey come leaders na Barawos. Small time this people go go their states go dey tell these small pikin dem make dem believe in dem, haba senator! Una go steal us blind and come dey lie to ou pikin too? And as for the inquiry of Senate President and his deputies, se una notice say na all of dem deny the thing. My question to dem be say who come award the contract if dem no do am. Unless for our obodo, contracts just dey award demselves. If dem want know the truth, make dem ask the people wey win contract how dem take get am. We know say dem too go lie, before we ask dem, make dem put dem for Prison wey be say na mosquitoes full the place. My people dem go talk if mosquitoes come begin dem eat dem. Una know say plenty of dem na Ajebota, dem no fit stand mosquitoe noise, never surfer before since dem get our money to wack. All this thing wey we dey hear na tory, make all of dem comot as we know say dem increase furniture money and dem no tell the country. Even self which kind President wey Obasanjo be? Una want tell me say him no sabi say dem increase the furniture allowance? I beg my people who all of dem think say dem dey fool? As I talk before and I go say am again, we no get leader dem na Onyesi dem na him we get.

Make una continue o, one day una go pay for am because plenty people dey wey no fit find chop eat and una dey waste our money for furniture. Make I ask una, wetin go happen to the furniture if una no win re-election? As I know my people dem, the furniture will just dissapear………….Barawo, Ole and Onyesi na una be. I beg make una put people wey go do our country right for the place.

August 08, 2000

Which kind government be this?

How una dey people? I dey pray say things go better one day. Wetin be this I dey hear say our Federal Government no go pay for Oil spillage wey happen for Ughelli area of Delta. My people na wa for our country. If our government no fit take care of us wey be her people, who will go come ask. I no think say I hear the thing real well. Wetin government want people wey the thing destroy their village do? I no fit sabi our leaders, how una go come our area come dey pump oil, problem dey and una go say una no go help people wey the oil destroy their house. As I hear the thing, dem say na the vandals na dem cause the problem for the people. And the thing wey our government dey say be say, make the villagers go get money from the people wey destroy their village. If the country belong to all of us, why be say poor people wey no sabi as the thing happen, na dem go fix the thing. But if to say na one powerful politician him house destroy una go give am money. Na the thing wey I know sabi about our yeye leaders be that. He bad enough say all the money wey una dey get for the oil, na una dey chop. Una come say the thing wey destroy our community na we go fix am. Which kind committee make that yeye decision. I no say me no sabi book well well, but I get common sense. How una want make the villagers survive for that kind environment. We get plenty pikin (wey be citizen of this our great nation the last time I check) wey go dey play around this oil, una no think say dem fit get accident because of am? Me I think say our Federal government dey to protect all her people unless the thing done change. The yeye Minister wey announce am no dey shame? Una want tell me say the man no fit use him common sense. Shebi all of una get pikin for house. Una no think say the thing fit put those pikin for danger if una no clean am? Wetin go happen if those pikin go  play with matches for whre the oil dey?. Una no think say the thing go cause another problem for our obodo? Na the thing wey I dey talk about our Government be that, he be like say the people wey dey make decision no get sense at all. If una no know the thing wey una dey do for work, se na by force? Nobody beg una, I beg make una comot. I no know which kind Oga wey make that yeye decision. I beg if una get some sense, make una change una decision before another havoc happen to our people again especially the small pikin. Na wa for Nigeria, Na only God fit help us because all these people wey we think say because dem no book small go get some sense, I guess say as dem dey talk am for my village say "because you sabi book no mean say you go get sense" Na here I go stop, I go dey talk to una tomorrow. Make una do our country right.

August 07, 2000

Wetin we go do to Quack Doctors for Obodo

How una dey, I hope say una enjoy una weekend. Me no fit say the same o because of the thing wey happen to my friend wife. I no know whether una sabi say we get plenty doctor for Nigeria wey no sabi   medicine. Plenty people done die for the hand of dis yeye doctors wey dey practice medicine without license. This thing dey happen gan to people wey dey go see Quack doctor for abortion. Na so you go see plenty girls wey be say na abortion dem go do but ma death na him dem find. Some of dis girls go just bleed to death as the doctor done pull some thing wey him no for pull. This thing no be only clinic he dey happen o. Our General hospital too woh woh. If you get belle you go there go see doctor. Plenty of dis doctor no sabi which time you go born pikin, na so you go see dem dey press your belle. Na the size of your belle na him dem go tey tell you the time wey you go born. I hear for Obodo Oyinbo, the Doctor dem go fit tell you which time you go born pikin and whether na boy or girl. No be say this no dey for our obodo, na only rich people fit get that kind treatment because the thing dear. Na only our country I know wey be say if dem no know the thing wey dey wrong with you, dem no go send you go another doctor. You know our people dem, dem no want make the other doctor get money past dem. Plenty of dis quack doctor, instead make dem tell the person say dem no sabi the problem, dem just dey give am medicine. As una know, the medicine wey dem give fit dey bad to the patient, but since the doctor na yeye one, he no go fit sabi.
As I want talk before, na my friend Johnny wife na him get belle and the thing come dey worry am. As una know say dem get money, na better hospital na him dem dey go. The doctor dem no sabi the thing wey dey worry am. When we go hospital, my friend ask the doctor wetin dey wrong, the man use one big Oyinbo wey I know sabi. He come tell my friend say the woman go dey ok now as him done give am medicine. Another day come, the woman still dey surfer, na him Johnny come call him senior brother wey dey Oyinbo Country. To cut the tory short, within one week, dem send the woman go America. My people na wa for our doctor, una know say dem say the woman get the thing wey dem dey call "Ectopic Pregnancy". As dem explain am to me, dem say the pikin no dey the proper place. Na so dem comot the belle because the thing for kill the woman. My friend say dem tell am say if to say dem no bring the woman in time, she for die as she done dey bleed inside. You see my people, if to say na poor man wife, una know say the woman no go escape am o. Na the kind surfer surfer wey plenty of us dey surfer as we no get money. I dey beg doctor dem make dem ask our government make dem give dem better machine wey dem go fit find this kind problem if he happen to us the masses as we no get money to go private hospital. I go dey talk to una tomorrow.

August 04, 2000

Why Our Educational System No Dey Kampe As He Be Before?

How una dey my fellow Obodians, I hope say una dey take am easy. Today I go talk about our pikin wey dey school and their Teachers. I no know whether na only me see this o, how be say for our Teacher dem go dey strike as if to say dem no get pikin for school. Una remember say during Soldier regime, the pupil dem just dey gbaladun for house since say na everytime na him school dey close. Some years, student no go go for almost one year. My question be say wetin cause am, and which wahala the thing cause for our pikin dem.

I remember between 86 through 99, wey be say some States no pay their Teachers salary for months. I even hear say some people dem no get salary for almost two years. Dem say na Ministry of educations and school administrators na dem chop am. My people una see say we no fit blame Teacher wey dey strike. How we want make dem feed their family when government no gree give dem salary. I hear say some teacher dem comit suicide as dem no fit find food for their pikin. My Friend Jonny tell me say him know one man wey him and him wife na teacher. As hungry want kill am for house, this na the year wey dem strike for about one year. Tthe man pack him load and him family go dem village. As una know say I get sisters wey be teacher, that time no dey easy for dem and me o. If una see as I be, una go pity me. These na people wey dey give me gari as man no get work.

This problem wey be say student go go school today and dem no go to tomorrow done tire plenty people for our Obodo. The thing wey the thing cause for our country no be small o. Some university dey wey be say na 6 years na him dem spend for campus to get their degress as school no open. I get Niece wey dey University that time wey be say, she for done become Tailor as she sit down for house for one year as their University close. If una go plenty of these university now, the thing no be as he be before. Na so so old book na him dem get. If you go some higher institution for our Obodo, the library dey empty. Some you no fit call dem Library as nothing dey dem. And the kind book wey the pikin dem read for school dey old. School no get money to buy book for the place. Ha ba na wa o, which kind country go dey play with him citizen future. I remember the time wey I go visit my nephew wey dey read computer for school, una know say na only one computer na him dem get for Lab. How dem want make these poor boys do against other country. I know say I no go Oyinbo country but the thing wey I dey see for television wey be say small pikin dem for school get  plenty computer. This na small children wey be say na primary school dem dey. I wonder how many computer the one wey dey university go get. All these our Leaders dem wey dey go Oyinbo country you mean say dem no dey see this kind thing. Na to hide our money for Oyinbo bank na him dem sabi. Abi because their pikin dem dey Oyinbo country, so this kind thing no concern dem. Ma people se una dey listen, how come our Leader no fit buy books and computers for our pikin. Small time dem go give contract to Oyinbo people make dem come fix all computers for Ministry. All that na money wey dem for use train our pikin well for school instead wey dem dey give to Oyinbo. Na the thing wey dey cause am wey we no dey balance na so so debt we dey owe foreign government. We go borrow this we go borrow that, but na to chop am na him we know. If una see my brother pikin wey dey Oyinbo country, him pikin dem dey young. If una see as dem dey play with computer una go think say na dem make am. But for our Obodo, na only theory na him we sabi. How person go be computer Engineer wey be say the first time wey him go touch computer na for work. If to say I get company, una think say I go hire person for computer work when he no sabi use am. The only thing wey he sabi na for Book. I beg my people, our Leaders dem must improve on this thing wey dem dey call Information Highway if we go survive. I dey beg people wey get plenty money, as our government no fit do am alone, to donate computer and Books to our pikin wey dey go School, as we no want dey behind again. If I be politician, na the thing wey I go dey do be that before ask people make dem vote for me. I hear say President Obasanjo done tell him minister make dem dey promote computer usage for office and put procedures and everything for computer. I hope dem go continue with that plan o, because na the thing wey go fit turn our pikin wey done lost around be that.

August 03, 2000

Poverty No Good For Body My People

Nagode my people, how una dey? As our National Assembly dey make fool of themselves, na him I come say make I go around go ask the masses wetin be their opinion about the Senate Inquiry. As I comot for my house for morning na Ajegunle I face. I reach the place around 1pm for afternoon. As una know for obodo say if you want know the thing wey dey happen for our area na buka be the place. As I reach the place, I come sit down for one corner. If you see as some of the people beyou go pity dem, he be like say dem get kwasioko for body. Sometimes me I no know why I no dey respect myself. As I sit down na him I open my big mouth come ask the people wetin dem think about the thing wey dey happen for Abuja. If na dog dey talk or na person, this people no answer me o. Some of them dey even dey look me as if to say I dey craze. You hear the Mama Olonje dey say "If una no want buy food make una leave". As see say dem no answer me, na him I say make I  comot before dem disgrace me. As I stand up, na him one young rich man come pass with him motor. The man come reverse as him see one man wey him know for the place. Na so the man comot for inside car and him and the man wey dey for buka come hold themselves. He be like say he done tay when dem see each other. The man tell him friend say him done go him house na him neighbour tell am where him go dey. If una see the man, as him body de shine, my people he good make person get money. The man come tell Iya Olounje make she give everybody for buka food. If una see as everybody for buka jump. You dey hear "Baba Rere, Na you we go worship for life" Me too join dem o, as I no get plenty money for pocket. All of us come dey act like say we never chop for months, but I no go lie to una, I no go surprise if plenty of people wey dey there never chop for days. We reach about 12 wey the bobo pay for him food. The man come comot with him friend. As I dey walk on my belle na him I come ask the people wey dey there again wetin dem think about our politicians. Na him one man come tell me say make I know spoil him food for am because he no want hear the tory atall atall. I come ask the man na wetin? No be you vote for dem? The man come look me like person wey dey fex. He come say as you see me so you think say me go waste my time come dey vote when me and my family never see food chop. The man come ask me say which time wey I see politician dey come talk to people like am. Beside, he say the last time wey him put food for him belle na two days ago. I come ask if the man dey fast? He say "which can stupid question you dey ask me when I no fit find job, I get pikin for house wey be say dem no fit go school because money no dey." Na him the man come tell me the kind surferness wey him family done surfer. Na for under bridge na him and him family dey live since landlord done throw way their load for outside as dem owe money. The man say he no want hear any tory about the politicians because na all of dem dey lie. The only thing dem know be to thief our money and take am go Oyinbo country. He say this kind problem wey him get na dem cause am. Other people wey dey inside the buka come ask me why I dey ask? I come tell dem say I just want find out if the masses dey concern about am. Plenty of dem tell me say as dey dey so, dem no know where dem go get food for tomorrow. Them come tell me say he go good if politicians find answer to all this surferness wey person dey surfer.

Na wa my people, una know say na the same people wey dey look me before as if to say I dey craze when I first ask dem wetin dem think about National Assembly. As soon as food enter their belle na so everybody dey yab. If na see as all of dem dey laugh because dem done bellefull. Na the thing wey hungry dey cause for body be that o, our politician wey dey waste our money for furniture and dey buy car for their girlfriend, plenty Nigeriains dey wey no even get money to buy food for him family. We dey beg una say before una put our money for una pocket, make una think about some masses wey no get food to chop. As dem dey talk am for my village for Aba say "no condition permanent, no one no tomorrow." Na here I go stop, I beg una make una do our country and her people right o.

August 02, 2000

I beg Lawyer Loco, Man Innocent till una proof say he dey guilty

How una dey cope with this hulahula for our National Assembly? My people una know say me no too like our politicians because you no fit trust plenty of dem. But this thing wey I dey hear say make Dr. Okadigbo and him colleagues quit I no support am. How una go say make person resign when dem never finish the case against am. Me think say all these rushy- rushy to judgement no good for democracy. The inquiry for this Contract palava start two weeks ago, and as I hear for Television, the commission for the Inquiry go present the case yesteday. How we go come tell the people make dem comot when we never hear the thing wey dey inside the report. If una look well well for our obodo, the people wey dey push this thing na people wey go benefit for the thing. Some of dem think say if dem comot these people now, dem go fit put their own people for the positions. Make una take am easy o. Na my grandmother dey am talk say "stick wey we take beat Senior Wife dey for roof and never dry, na the same stick we go take beat new wife if she no take time." Na for law dem dey talk am say man dey innocent till dem proof am say him do am. Me and una know say the thing go happen again. Because the thing dey inside our politician blood. All of una wey dey say make dem remove dem before we see the report, una want tell me say if una dey the same situation make dem commot una even if we no get proof say una do am or we never finish the matter? See as all our politicians dey say make dem resign. My people, life dey funny, dem come dey act like say dem no get skeleton for inside their cupboard.

The thing wey I go tell the committee be say make una do the job well well, if una see say dem dey innocent make una tell us. And if to say na true dem thief our money make una also tell us. I beg una make no listen to all these yeye people wey want influence una decision. As true leader dey say, make you dey fair to your fellow mankind. If una do dabaru for the case, time go tell. Small time we go hear all the thing wey happen. If to say he go take ten years, one day we go hear am. Make una remember the thing wey happen to Abacha and him gang wey dem say dem kill people. Una see say dem think say people no go hear about am, but where all of dem dey now? No be jail dem dey? Na so he be my people. Make una do am well. If dem no dey guilty, make everybody go continue him work but if to say dem do am, I beg una, make dey face the same punishment wey ordinary person for our Obodo go face. I hope the thing go teach our politicians lesson say una no fit chop our money as una dey do before, because na everybody dey watch una.

 Na here I go stop my people, make una do our country well o.

August 01, 2000

This Respect Thing For Our Leaders/Elders No Pay Us

Hello My people, how una dey cope with our Obodo. This na serious talk and I know say some people no go like the thing wey I want say but I believe say na truth na him go set up free. Make I ask una my fellow citizens since wey dem born us wetin we done get from these our new leaders and Elders. We no say for Africa, respecting your leaders and Elders dey strong gan for our cultures. But apart from our past leaders and Elders like Pa Zik, Baba Awo,  Sultan Ahmadu and Papa Tafawa, all these new found elders and leaders na disgrace and wayo. Make una look real hard, the country get plenty resources and manpower but majority of Nigerians dey live for poverty. We no get middle-class again, The only thing wey dem know be say to serve their own interest and family. All these wahala about Sharia and other religion matter na disgrace. If una read una history well Christianity and Islam na foreign religion to our Obodo. The people wey bring am na dem also sell plenty of our people for slave. Our Arab brothers do am to us and na so the Europeans. Before these two religions, our people get dem own custom and belief we live in peace and there is no wahala. Since dem bring these religions to our obodo we no dey the same again. if na look well well na only Africans no dey proud of him heritage and religion. If una go Asia, majority of them na their own religion na him dem still dey practice. You go India, na Hindu na him dem dey practice, and if to say na China una go, na Buddhism na him dem sabi. If you una go those two areas, their countries dem dey progress because dem no forget their customs and religions. And no be say Arab and European no carry their religions go there. But if una come look our continent, na so so wahala na him dey. If we no fight war among ourselves, we dey die of hunger and famine. To me, if we look am well well na because we done forget our African beliefs, customs and traditions. Na the reason wey I think say we no go fit get peace for Africa be that.

Small time dem say some leaders dey call themselves Southern Muslim Leaders. Wey be say plenty of dem na Yoruba. If una want know, my Mama na Muslim and my Papa na Christian. But the thing wey I know be say no yoruba person wey dem no get Orisha for their Family. All these people wey dem dey call themselves Leaders na fake dem be. Only when dem get something for the thing na him you go see dem wey dem go dey talk. Plenty of our Elders/Leaders go interpret the constitution well if the thing go favour dem but when the thing dey go against dem na him you go hear another tory.

As una see me I no sabi book but I get small  sense for head, and I dey use am well well. I know say you no fit serve two masters. Dem even talk am say give to Caesar the thing  belong to Caesar and give to our almighty God the thing wey belong to am. My muslim brothers wey want introduce Sharia,   una know say plenty of una neighbour no be muslim, how una go feel if to say na the other way around? I know say una no go like am, if una look well well una go know say the thing wey una want do go cause katakata for our obodo. But the thing wey una want chop no let una use una common sense and dey fair to your fellow Nigerians. The people wey even get this religion no do as una dey do for dem country. Why be say for us our own thing no dey good for our face but if to say na the thing wey dem bring from abroad, we no go say we no want kill ourselves for am. I no want hear the talk from any of our Leaders/Elders because na dem cause all these suffer wey all of us dey surfer now. How we go get plenty resources wey God dash us and we go still dey surfer like this. I know want hear say na Oyinbo People cause am wey we no fit sabi any thing because that one done tey. Among all the continent for this world, na Africa get plenty resources past others but na us dey surfer pass. The only thing wey our Leaders/Elders know na to steal money. I remember the thing wey my grandmother tell me wey she say no thing dey worse pass thief for this life. But the people wey for be our role models dem be Barawos. Plenty of African leaders na rogues and dem no get one kind shame for their body. The thing wey pain me be say dem no dey shame. Na the thing wey make me say as long as dem continue this their yeye behavior, I no go ever respect dem. This na ma opinion and I go continue dey tell am as he be. Make una dey do jeje o.

July 31, 2000

Haba Why Una Dey Rock The Cot?

How una weekend? Se una enjoy am, I beg make una dey do am jeje. Today I go talk about una wey be say na small pikin dem na him una dey befriend. Una know una self , na soso sugar mummy or sugar daddy na him una be for small pikin wey una fit born. If una want see how bad the thing be make una go some of the universities, una go see plenty old men with these young women wey no be say dem be their pikin. The thing wey I no sabi be say how these old cargoes dem no dey shame. If na look no be say dem no get wife for house. Even self plenty of dem get plenty wives for their obodo. But that one no do dem. Some of dem, you no fit play near their female pikin because dem go kill you for am. I remember the tory wey my nephew wey dey for Ogun Poly tell me. Him say one dey him go visit of our our relative wey dey for university and he come see one girl wey him like. He say the girl fine well well. Small time him talk to the girl and the girl come gree. One day he go visit the girl for house when she dey holiday. As him and the girl dey talk, na him her Papa come come home. He no fit find place hide, to cut the tory short the man find am for the place. He say the man fex gan o. He tell am say if him ever see my nephew with him pikin again, him go call police on am say he be thief . He say the man really disgrace am, he tell my neiphew say there is no way wey him go let him pikin marry poor man like my nephew even if he go University dem

One dey sa, as God go catch the man my nephew and me go visit one of our relatives for Ikeja. As we enter the street na him we see one of my counsin pikin with one man wey dem dey talk. The place no too far from the house. As dat one see us, she come greet us. We come ask am say se her papa and mama dey for house? She come say dem dey but make we please no tell dem say we see am. As we dey waka dey go na him my nephew come talk say he be like say him know dat man for someplace. We done almost reach the place na him say he done remember where him see the man. He say se I remember the tory wey him tell me about a girl wey him go visit wey the girl papa disgrace? I come say I remember, he come say na the man be that, as I hear that, na him I come say make we  go back. As we reach the place na him we see dem wey dem dey kiss, dem no see us. As I grab the man neck na him my nephew grab him agbada. The man come dey ask say wetin dey happen? My nephew come ask am if he sabi am, him say no. Dat one come tell am where. Na so the man dey shake. I come tell my nephew make him go call our relative dem. Our relative pikin come dey beg us. We come tell am say no be say we want tell her parent but because of the thing wey the man do we no get choice. Come see as the man dey beg and cry at the same time. Na through the pikin na him we hear say the parent done catch am before and the papa tell am say if him see am with him pikin again him go kill am. We know say our relative husband fit do am because him be Soldier. To cut the story short, the man and girl beg us gan, we come let the man go because of the little girl. My people se una see? The man no want any man with him pikin and him want destroy another man daughter life. This story na the thing wey common for our obodo. Na the thing wey make those small pikin no respect their elders be that. All of dem done become Asewo, na so you go see all those old men wey no dey shame dey run around with small pikin.

Women too dey do am, If you go Lagos, you go see plenty Alhajas with small boys wey dem fit born dey work on dem. Plenty time dem go dey buy dem lace and jewelry. The Book people too dey do am for Office. You go see woman wey be director go tell her husband say she dey go Abuja for meeting. But na she and small pikin boyfriend dey go. Dem go go stay for hotel together dey gbaladun. This thing dey among the thing wey make our small pikin no get moral again.

The thing wey I go say be say any thing wey we do make we think before we do am because as dem dem dey talk for my village,  you go reap what you sow that one nat sure banker.

July 28, 2000

Armed Robbers Done Become Chiefs For Our Obodo

Sand done enter Gari for Nigeria my People, na armed robbers dey control our life. I no fit ask una how una dey since Armed Robbers no let us rest. Everywhere wey you go now for Nigeria, people dey cry about the men/women of the underworld wey done become Panaki. Nothing wey our Police Force fit do. These robbers just dey kill people like fowls. Una remember last week wey I dey tell una about the thing wey dem do to some Passengers wey dey go my Mama town for Onitsha. These heartless men kill all the passengers inside the luxurious bus. I hear say he take the robbers  2 hours wey dem just dey comot goods as if to say Police no dey for town. If you go North na the same cry everybody go dey cry. And for Lagos, na there be their Abuja. The place wey be say before when I be small pikin, you fit leave your house for Mushin around 9pm, say you dey go party for Ajegunle. Nothing wey go happen to you or the car. But for now, if you no fit do party for afternoon, people no come to am. Na you and your family go eat the food. Na everybody dey afraid now including the Police. Everywhere for obodo when people dey come back from Ariya, dem go hide their jewelry. Even I know some people wey be say dem no dey wear chain again because of this wahala. The robbers now dey bold wey be say dem go even rob you for daylight and no person go rescue you. Some people tell me say some armed robbers go even tell you say make you open your door for dem and if you no do am, that means say time done come wey you want go see your grandmother wey done die for heaven. I hear say some of dem go even work on your wife if dem like am. Haba that na abormination. We ask for democracy, na men of the underworld show up. I remember for December around Ikeja Police Station wey I hear say robbers dey attack one Street for evening and people  call police. Una know say police tell dem say se na dem dem want make dem kill? Una believe say Police no answer dem as the robbers dey rob all houses wey dey for that street. If una go some street now, people done dey put big Iron for road. For some area now, you no fit comot or enter their street after 9pm.

As the thing done wohwoh, na him make people dey start vigilante groups. Every where wey you go now dem get their own group. Na the thing wey bring OPC, Bakassi boys, Egbesu boys, and Arewa boys for life be that. Now people wey get money done dey get bodyguard wey go dey waka with dem when dem dey outside and security wey go dey watch their house for dem.

The question now be say wetin our government go do since we know say Police no fit do am because dem no get plenty guns to fight robbers. As our population done increase reach 120 million, I no think say we get enough police wey go fit battle these Barawos. Even if dem give the police plenty guns I no think say dem go fit do am with the kind money wey dem dey pay dem. And me I no go blame dem o, because me too no go fit do am with kind money wey dem dey pay Police. My only advice to our leaders be say make we hire plenty people for Police Force with better money and allowance. And all the police wey dem know say dem get connection with the robbers make dem put dem for Kirikiri because I hear say plenty of the guns wey the robbers dey use  na Olopa dey give am to dem. Our government must find answer to all these small pikin dem wey no fit find work when dem comot school because I hear say plenty of the robbers now know book well well. Another thing wey government fit do be say make dem announce am say if you know say your pikin or your family member be robber make you tell police or people because if dem catch am wey him dey rob and dem come find out say na your family, na kirikiri you go find yourself. I know say parent dem know the kind work wey their pikin dey do. This na just my opinion o because if we no find answer to this wahala, I no think say democracy go dey around for long because na so una go see Army wey dem go use that as wayo to come back. President Obasanjo dem make una find solution for this problem quick.

July 27, 2000

The Trial of Professional Pen Robbers

Wetin dey happen my people. I know say una go dey talk say which person teach me grammar. Na so I see am my people. He done shele for our congress dem, I hear say politicians dem dey investigate themselves. I no dey sure if the thing wey dem say the leaders do for contract matter na true. If na true say dem do all these things wey dem say dem do, he go be real disgrace for dem. As I hear dem say the Senate President and his deputies just dey give Christmas bonus for demselves. Dem say the civil servants wey dey in-charge of the thing tell dem say the thing wey dem dey do no proper, dem no answer dem. I even hear say some of the Senators dey borrow our money to go Oyinbo land. Na wa o, I guess say all of us too go go Abuja go borrow money wey we go take chop and clean our house. Dem even talk say that Lebanese wey steal our money during Abacha regime, him too get contract for the thing. My people na look una dey look me?. How foreigners go dey steal our money for our eyes and we no fit do anything to dem. Se because the men know people for high places. As dem dey talk am for Yoruba land "if big storm dey kill us, small one too no go say him no want floor us for ground." Nigerians make una see, this kind behavior wey be say people go just dey steal our money since dem know say we no fit do anything, we must stop am, this disease done dey ruin us. How people wey we say make dem lead our country na our money dem go dey steal. This thing dey pain me gan o because the thing done dey dey too much for me. Plenty masses just dey waka about dem no get work and dem no fit feed their family, and for Abuja, these Professionals rogues just dey rob us blind and dey do our money yanfu yanfu. Una want tell me say these people no fit buy their own car. I hope say when dem comot na all these things dem go leave for government quarters. Me I dey respect Dr. Okadigbo before, I go dey disppointed if na true he dey involve. Which kind fools write the procedure wey be say National Assembly dem go have that kind influence for contract. He be like make person put food for Cat mouth and say make him no chop am. Una know say these people na Real Pen Robbers. Even self I no know why me dey fex, plenty of the people wey dey for National Assembly dey among people wey put our country for the surfer wey we dey now. This our Akowe (learned) people for Nigeria, na to steal money na him dem know. Which kind Doctor our Senate President be? I hope say no be PHD for book na him get, because if he be, na disgrace na him bring for academicians,. he should remove the yeye title. But me I know go say anything now as dem never proof say the man na fraudster and corrupter.

I no sabi while we the masses no fit make our own law because if we no stop these Barawos dem, the country go go yonder. And una know say these Onyeshis go just pack their load run go Oyinbo country while me and you go dey surfer for our Obodo.

The law wey we go pass be say, if dem fit show say na true true you steal our money, all the thing (properties) wey you and your family get for una life na him the government go take. Whether na our money you take buy or build am, na everthing we go take patapata. May be if we start dey take all their properties, this go make people think twice before dem go steal our (country) money. Another thing be say, if you defraud the government, you no go fit contest for election for ever till you die. Na so he go be for all your family. This thing no be joke anymore, I done tire dey call people wey dey steal my birthright Oga Patapata. As for me o, this na treason, anybody wey dem find guilty should be put for Kirikiri. How be say we no fit find people for Nigeria wey go dey honest and do right by all of us, this na shame.

I go dey talk to una tomorrow, I dey fex, the thing want make me cry.

July 26, 2000

Nigerian Bankers na Barawo

My people na mi again o, I no know whether una hear about money wey Banks report say their workers thief from their Safes. The money na about 22 billion Naira. That na plenty naira wey feel buy all the lands wey dey for my state. Na wa o, how we go come trust the people wey dey work for banks since plenty of dem na rogue. I read am for paper say the money wey dem thief we feel take am open twenty new banks. Haba bankers, se na life una dey live? How people go bring money for una make una keep am for am, una go come whack am? The thing wey me no sabi be say, how these kind money go vamoose for bank wey the directors dem no go know? Unless then be part of the gang wey steal the money. Since I dey work for bank before, I know say all those people wey call themselves oga (managements) na Baba nla Oleh, dem feel take lion pikin while the big lion dey look dem, that na how dubious dem be. When people dey talk about Onyeoshi na dem dem dey call. If we look hard, some of the money na with their friends and family dem dey thief am. Dem go ask their friends make him bring phoney documents come their bank and dem go come give am loan. As dem comot for bank, na so you go hear say dem done start their own business. The thing wey I want talk be say I never see person for our obodo wey get business wey no be say na thief him thief the money. Me I no dey talk about those Mama Olojas dem, I dey talk about people wey know book. Dem feel sell you while you dey stand. Small time una go hear say banks done park-up, how he no go happen when the people wey dem say make dem dey manage am, na barawo na him dem be. As for my people wey dey for Obodo Oyinbo, if una like una self make una keep una money for Oversea because if una bring am come keep for Nigeria, na the last time wey una go see the money be that. Plenty of our people wey dey work for bank na Ogbologbos. Una go bank go collect money wey una put there, dem go dey tell you tory. Dem feel tell you say the person wey go sign the cheque no dey for office or he done go leave. The thing wey common be say if dem know say you no dey live for Nigeria, and you come get money for bank, na your money dem go borrow go build mansion for their village. And the Ogbologbos go even take your money go become Chief for their village. Na the reason wey me no blame Foreigners wey no want invest for our Obodo, because our Country dey full of 419s.

This thing no be the thing wey we go dey joke with, na the thing wey fit break the country be that. Because Bank dey play plenty role for society. If we want go forward, we go need bank system wey go dey strong. No be the kind one wey the people go dey dey afraid to put their money. For Obodo Oyinbo, na their banks dey finance plenty of dem developments like bridges, roads, airports and big buildings. But for our country, the thing wey dem dey finance na to build mansion for dem village. He go do our country well if our leaders do something wey go prevent this kind fraud for our Obodo. As I dey talk to una, the small money wey I get for ACB, I no fit collect am. If una remember, ACB, WEMA and National Bank, na the thing wey make dem go yonder be that. The people wey dem hire make dem dey manage am, na only their own na him dem sabi. I beg my people, if we no change, na our pikin dem go surfer am. I beg una, make una dey do jeje o.

July 25, 2000

Wetin Our Government Dey Do About Typhoid?

How una dey my people, I hope una still dey Kanpe. Una know ask say where I dey for all these days? Make una help me thank God wey dey for heaven as him still dey with me and dey protect me against my enemies. Na this yeye thing wey dem dey call Typhoid na him no say he no want kill me o. Last week I dey feel one kind, na so my body dey weak, wey be say small food wey I get for house, I no fit chop am. He come be like say my body no be mine again. Small time, I dey think say na work wey I no get na him want cause sickness for my body. I no fit drink water, and he come be like say I dey die of hunger. And when my family give me food, I no fit chop am. Na dat time my family come dey worry as dem know say me I no dey play with my belle. As the thing dey get worse, na him dem come carry me go clinic wey dey our area. Before the yeye people go even see wetin dey wrong with me, dem ask my family make dem first put some money down. My family come give dem 500 Naira, na him dem come ask my family wetin make dem take that one do? My family come tell them say no be una ask for deposit? Dem come ask say if dem ask for deposit, se na 500 Naira we ask una? If una see the speed wey those people take push me outside, una go think say na express we dey. dem talk say if we know put 2,500 Naira down, dem no go even look at me. As una know say I get bad mouth even say I dey sick, I come tell dem say, which can hospital wey una be wey be say una no go sabi the thing wey dey do person before una go dey ask for money? I come tell dem say na the thing wey make dem no get customer be that because una owner the money wey he for take buy machine and medicine he done take am feed him fat face. Na only money una know, una no know anything. Where una want us get that kind money? Thief barawo. Na so dem ask the gateman make him push us outside. Na him I come tell my family make dem take me to our village. Some of my relatives say make we go call my friend Jonny for office, I tell dem say make dem leave the man alone. The bukata wey him done carry for my family done do.

As we reach my village, dem come carry me go our Native Doctor, the man give me Agbo to drink. He ask him pikin make go bush go collect some leaves. Na him the man come cook the thing and come ask my family make dem go ask outside. He come start this incantations, call him God and papa for heaven. Small time, he come ask my family make dem come inside, na him say na my enemy want kill me and he done ask the God wetin I need to bring for dem to fight evil. I come dey tell myself say dem done start again. To call the story short na my friend Jonny na him bring him friend wey be doctor to our village. The man talk say na Typhoid I get, I come ask say, Sebi dem talk say if person dey boil water, the thing no go catch am? He come tell us say that one no mean say person no fit get am. He say the thing done become an epidemic for our Obodo. Plenty people done die and many more too go die as our government no take am as crisis. He say if to say for Oyinbo land, their government go take am serious if dem know say plenty of their people dey die for the thing. But for our Obodo, as only money na him dem know and dem no care about the masses. And if the thing catch their family, dem get money to take dem go overseas for treatment. Na only poor people like us go surfer am. Che nawa o, how person go dey country wey be say the leaders dem too sabi their own. We vote for dem make dem do better thing for us and the country but the thing wey dem want chop no gree dem think about the thing at all. This Typhoid problem done dey for our obodo longtime now, and government no see am as crisis, se na when all the Mekunu done die finish na him dem go say dem want do something? I hope no be say dem want take style and use this to reduce population? Because these our leaders dem, I no fit take thing pass dem. Dem fit think say if all of us die finish, dem go get plenty money to wack.

Our Leaders dem, una tell us last year say with democracy, all of una go dey accountable to us, and that una dey here to serve us. We need una now, and children wey dem never born need una. Why be say una dey act like say no be this country all of una dey live? Una no dey read am for paper say plenty of our people done die for this thing wey dem dey call Typhoid? I beg una, make una give money to people or organizations wey go find medicine for this disease, he done almost kill all of us. If una do census or wetin dem dey call am- Survey, una go sit say na every family for this obodo except una family, done lose person to the thing. I for done die if to say no be my God and my mama wey dey for heaven talk am say my time never reach. I beg, na beg we dey beg una oh, make una make us proud as the Westerners dey do of dem governments.

July 20, 2000

Make una see the Wahala wey Polygamy dey cause for our Obodo

How dey go dey go my people, I beg make una hang in there. I know say una go dey talk to una self say wetin people wey marry plenty wives do Pa "mugo now o? Una see my people, plenty of people wey I know for this our Obodo come from this kind family. The thing common among my Yoruba brothers. Una see before we think say as our Nigeria dey move forward, our people too go forget that custom wey be say na wahala he dey cause for our family. Let say una dey do census, as una dey go people house, na so so men wey  marry many wives na him una go dey meet. When me I dey grow up, the people wey I sabi wey dey do this kind thing na people wey no read especially the one wey dey for village. Dem get some people wey go university wey dey do am too, only be say dem no plenty. I remember say my grandfather dey tell me say during him time, na only people wey get money na dem dey do this kind thing. As you dey get plenty money, na so you go dey add concubines. But for our Obodo now, people wey no get money dey marry plenty wives. You go see small pikin dem wey be say as dem get promotion for work, na so dem go add another wife. Come see some men, na so dem go dey takar for the thing. If one go marry another wife na so him friend too go go carry another woman. The thing wey I no sabi be say some men no be say dem get plenty chop money, but the fools dem go go add another wives as things dey better for dem for work. You go go some people house, he go be like say na chicken farm na him you dey as you go see him pikin wey dem go dey do yan-yan- yan all over the place.Which kind yeye custom be this. I for understand small if to say you be king and you get plenty money. Some men dem no even get enough money to feed the one wife wey dem get, small time you go hear say the Iyawo Kekere (small wife) done come. The house wey be say before dem get small peace, now everything done become scatter scatter. You go dey hear the man wey go dey complain say him no get peace for house. Na so so quarrel him dey meet when come home from work. My question be say who cause am? No be say na jeje trouble sit down for house wey this man come invite am make him enter. The small money wey the man and him small family dey manage now done become the thing wey two family go spend. Because if una look, that second wife go ask for her own share. Na so dem go dey play wayo with their husband. The thing wey be say before the first wife no go think twice before she buy gari for house with her own money, now she go dey tell her husband say she no get money or she go tell the pikin make dem go collect money from their papa. Na the kind thing wey polygamy dey cause for family be that. The whole family go become lier and thief. Na so you go see all these wives dey teach dem pikin how dem go do mago mago to collect money from their papa even if dem no need am. This na low profile palava as the man no get plenty money. If to say for family wey be say the man get money yanfu yanfu, that one na real war. Especially if the man come get plenty property. Na the kind thing wey dey keep Babalawo and Afa employed be that. Because for this, the wives na for the kill na him dem dey go for. I never sabi a polygamous family wey the wives dem no dey do juju. You go some Babalawo, na so you go dey see different women dey go in and out for the man place. And if the Baba come dey good, as Benz dey comot na so you go see Volvo and BMW dey enter the man yard. Na wa my people all this because say dem want control their husband live and properties. But me no fit blame dem o, na the man wey say him head dey too full make people come help am scrape na him I blame.

The thing wey I go tell both my sisters and brothers be say make una stop this yeye custom because no better thing dey come out of am. Plenty husbands, wives and pikins done die before their time because of this wahala. If you be husband stay with one wife wey you get and for the women, I beg leave that Married  Old Man alone, go find another peson wey dey single. Because if una enter am, na the thing wey go make una old before una time that if no kill una. Na oyinbo dey talk say "look before  you leap" if you no want burn yourself.

July 19, 2000

Wetin we go do for Tribalism wey dey our work place?

How una dey cope with the wahala for our Obodo? I hope say una dey do jeje. Why be say for Nigeria we no dey hire person wey no the job because the person no come from our area. Even say I no know book, but I still believe say if you hire person wey go do your work well, na better thing go happen to your company. If you hire person because na your concubine's sister or brother, and no be say the person sabi the job; na the thing wey go kill your organization be that. Plenty of the wahala wey dey nak us for face now, na that kind thing dey cause am. This thing wey I want talk now, my Hausa brothers no go like am but na the truth. Una remember say if you go Ministry, na so so Northerners be the Oga patapata. I know sabi why be say na only dem be oga when I know say plenty of dem no know the work. Na wetin my brother? The only thing wey I sabi be say dem hire dem to be oga because dem be Northerners or dem know the Ministers. If una look well well, how many Northerners dey for university, dem no plenty. During Military regime, na so so Northerners be Ministers, and for Permanent Secretary jobs, you go see dem as dem poku. My Hausa brothers think dem wise, dem go put for yonder the southerners wey know the work as their assistance. My brothers wey dey Oyinbo country tell me say he no sabi Hausa wey dey do dirty job. The few Notherners wey dey for overseas, as dem finish dem degree, work done dey wait for dem for Nigeria as Directors. The small pikin wey no sabi the work go become oga for the Southerners wey done dey do the work before dem born the small boy. No be only Northerners dey do this, Yoruba and Ibo dey do am too, only be say na Hausa plenty for Oga position for Ministry. I remember when I be messenger for central bank, plenty oga dey wey be say I no know how dem come become Managers because the thing wey dem read for university different from the thing wey dem dey do for work. Because money dey for bank na so dem poku for the place . You go see some oga wey be say dem learn about plants for university, I think oyinbo people dey call am botanist, but na bank dem dey. No be say plant dey chop money but this people dey for central bank wey dem collect salary. And plenty of dem for work na engineer dem read but na bank dem dey work. Na the thing wey dey cause problem for our obodo be that because plenty of this ogas, na to steal money for bank na him dem dey engineer.

If we dey hire person wey sabi job well for Nigeria, our country go dey move forward but if we continue to do am wey be say na only people wey come from our area or person wey be like us na him we go give job, our suffering no go end. Another thing wey we dey again na when we give person job because him be yellow or because we dey dark and na only person wey dey dark na him we go give work to. Plenty of una go say that one no dey happen for our Obodo, but as una know say me no go talk the thing wey I no sabi. I done see this plenty time. Una even dey do am when una dey look for girlfriend or wife to marry. Me believe say as democracy dey grow for our obodo, na so our live go better and all these bad things go quench.

July 18, 2000

Nigeria done dey turn into anarchy

Una see me see trouble. Na so I just dey go my own jeje, na him Police stop me for Bariga side and come carry me go station. Dem beat me so tey my yansh want comot from my body. If to say no be my friend Jonny wey come rescue me, una for done hear say that me Honourable Pa Omugo, the senator of the Masses done go visit my forefathers for yonder. This yeye Police no say dem no want kill me. Na my friend come ask dem wetin I do na him dem come tell am say I be member of OPC (Odua Peoples Congress). Na him I come yell Chineke, Allah, and Orimi, Olorun mi o o. So una beat me because una think say I be OPC gang. I come ask dem say as una see me, una think say I look like those thugs. Se person like me wey no get meat for ears na him go be members of OPC. I come tell dem say me think say because of the quarrel wey I get with one woman that afternoon before I found out say the woman husband na Oga for Police na him una dey beat me. Na all the epe (curse) wey I know na him I put for their heads. If to say I be Babalawo pikin, na onde (charm) na him I go take curse dem. As we dey comot for the police station na him we see those OPC dem for outside, dem for burn me and my friend for the place if to say no be say we sabi some of dem. Na so OPC and the Police begin dey fight with guns. Na so we dey hear pa- pa-rapa, before you know it, me and my friend Jonny done ferege, come see as everybody dey run for shelter. Una go think say with the way those yeye Police beat me, I no go fit waka, but me too surprise myself. I even run pass my friend with him big belle. If una see as people dey fall like dead chicken, una go pity mama wey born dem. The thing wey I take my eyes see for Sunday, I no go fit talk am for here. The thing happen for Mushin, Agege, Orile and Surulere. Na so Police and OPC people just dey shoot themselves like say na for jungle dem dey. The thing wey pain be say these groups since dem no say na for citie na him dem dey, and plenty people including small pikin dem dey around, I no know why dem no carry their wahala go desert go finish themselves. Even self, nightime dey, I no know why dem no do am for that time. If to say Police dey put this kind energy against armed robbers we go get peace for our Obodo. But you no go see that kind work from our Police force. Since na dem and the robbers dey share the loots. As for these people wey dey come themselves OPC, their action done go too extreme. Una talk say una go fight criminals but he be like una selves done become this criminal. Why una go dey kill Police wey dey protect us instead of the criminals. I know say some of these police na armed robbers. If truth say una want fight crime, why una no fit catch police wey una think say dey work with the armed robbers go show am to their Oga or for Television. This go make people believe una say, una dey do this thing to protect us. Na wa for Nigeria, wey be say everybody done become armed vigilante. The way it be for our Obodo now, we no know rogues from normal person. People done to turn crime. He dey bad say armed robbers done become kings for our cities, and our Police force and the Government no fit do anything. The only way, wey this crisis go end for our obodo be say, our leaders go work hard to bring security, safety and peace to all part of our country. Na so I hear say for Onitsha dem, robbers attacked two luxurious buses wey dey come from Lagos. Dem kill all the passengers and take dem things. The question be say where the police dey when all this thing dey happen since I hear say the thing done happen for the area before. If we no want our Obodo to turn Lebanon where people dey form their own army, our leaders must do something now….

July 17, 2000

Our Doctors dem done become Doctor Death

My country people na me again o, I hope say everything dey Okay with una. Today na about our hospital dem and their yeye doctors. As I done talk before say for our country as the dey go backward na so everything too dey pafuka. No thing dey work for obodo now, police yeye, civil servant done become civil burser and for hospital now, everthing na about money. If you get money you go get treatment and if you no get money pray say the thing wey dey do you  no dey big, if not na that person death be that. He done dey tey wey I dey hear say our health system done become Jankara market. Na only people wey get money  go survive. Na so I go visit my friend dem for clinic, as una no our Nurse dem na Asewo, if you get money na so you go see dem wey dem go dey go back and forth for your front. But as una know say me I no get kobo to my name, dem no even look at my side. I go meet one nurse, she no even let me talk before she say make I go sitdown.  As I sitdown there for twenty minutes,na so yansh dey pain me, na him I come go ask dem say I dey ask for my friend. Na him that Nurse wey tell me say make I go sit down come say "no be say sit I say make you go sitdown?" Ha him I come tell am say I no come find job, na my friend Jonny na him I come see. Na so dem turn around and come look me up and down. One come ask me say you be Mr. Jonny friend? with laugh. I come ask am say wetin dey wrong for dat? She come say may be I want talk say I be the man gardner, all of dem come laugh. Una know say me I get bad mouth, I come tell am say - Se na me you dey call gardner, with your wig wey be like mad woman  rag. To call the story short as I dey force with dem my friend  come hear my voice and come tell dem make dem let me enter. As I sitdown for Jonny room na him I dey hear person wey dey scream like say he dey in pain. I come ask my friend wetin dey wrong with dat one and why dem no give am medicine for him pain? Na him come tell me say the man done dey here since yesterday and since he no get money and dem no know him family, the doctor no want treat am. I come ask am say wetin you mean say dem no go treat am? How him family go know say the man dey here if dem no go call dem? Na him Jonny come tell me say one man wey dem bring that morning from motor accident die for the clinic because the doctor no treat as him no get money. The thing pain me gan, I for cry if to say no be outside I dey. My people se una see the thing wey dey happen for our obodo. If you no get money and you come dey sick, please my people, make you just tell your family make dem give you Agbo (herbal medicine) and if dat one no do, just ask dem make dem take you go Native Doctor. Please no even think say na for hospital you go go if you want live. Even self this na for everybody, including rich people.This thing wey dey happen for our Obodo should concern everybody o, if you think say because you get money no be your palavar, please think again. God forbid you get accident and dem come take you go hospital, and no be say dem put sign for your head say you be millionaire, you done die be dat o. Because if you dey in a position wey be life and death and person no dey around wey go go tell your family, the only thing wey go save you be say if the doctor na man of God and God say your time never reach. If not, ask yourself, how your family go know? Even if una get telephone, una know for our obodo say our phone no dey reliable. How the person go get well when doctor no go treat am if him no put money down. I hope una see say this na big problem for our country.

I dey beg Our Leaders say make dem address this because na the thing wey fit cause trouble if this thing continue for our obodo. And I dey beg doctor dem, I know say na money una go take pay una workers and una also get family to feed, the thing wey I go say be say make una treat the person and if him no pay make una no let am leave una hospital. If to say una go build prison where una go keep people wey no pay make una do am. Because the thing wey dey happen now no dey humane. Plenty people done die because dem no get money for treatment and the one wey get, sometime their family no dey around to pay for the thing. He go even good if all us get identity card wey we go dey carry about, so if something happen to us, our family name and address go dey for emergency people to see. Nigeria go better if we treat ourselves with dignity whether we dey poor or not.

July 14, 2000

Government, wetin my people for Delta do for una?

My people I dey fex today with our Government, and I no happy for thing wey dem dey do to us. If una look well well, the thing wey happen on monday for Delta no go happen if our leaders dey think about us the commoners . Make the school children soul wey die for the thing rest in peace.  I no know wetin we do our government wey be say dem just dey pump oil for our area and nothing wey we dey get in return. Make I tell una, If una see as the oil company do our our farm una go think say na for mechanic shop una dey only be say this one na for big area. Plenty of villagers no fit plant crop for dem farm because oil done ruin everything for dem. If una see the animals especially our fowl, dem be like say dem pour engine oil for body.    The thing wey pain me be say if una see where people wey dey work for the oil companies dey leave and the place wey my people wey get the area dey leave he be like make we compare Victoria Island and Ajegunle. Some of the villages no get water, no better road and no NEPA light. At least for Lagos una get the machine wey dey bring light even say NEPA for everywhere dey useless. But for the villagers, dem no fit get NEPA Pole wey dey bring electric come dey talk about light. Government, how una go dey pump oil for our area and una no go do anything wey go make our light better? You go hear wey some people go say Government dey give our states money. If to say na true government dey give us money, I no know which person account dem put the money, because my people no get kobo from the thing. During army regime, na the yeye people wey dem dey call MAMSOR (Military Administrators) or wetin dem dey call dem, na dem dey chop the money. Since dem no born dem  for our area, dem go take money wey dem want take fix our roads and schools, take am go build mansion for their states. Sometime, na the same money dem go take build schools and road for their towns. Small time you go hear say their king done make dem chief because of the thing wey dem do for their town. Some of these military leader go even use the money go buy big land for their states. Na the thing wey happen to some military governor for somewhere around Ibadan. Wey one governor build mansion for him colleague for him state and that one do the same thing for am. Ha ba our leaders, se this thing wey una dey do good? Wey una dey rob peter to pay paul. I no fit blame everything on military because during Shagari regime, sebi the governors dem na native born. Wetin dem do? Na to chop the money and carry the money wey dem allocate for our states go Oyinbo land go keep for bank. If una look, I no see one rich man for our Obodo wey him hand clean. Plenty of Rich people for our Country na thief na him dem thief money wey dem get. How person wey be civil servant go get plenty house and car with small money wey dem dey pay am? No be steal he steal am. Na everyone wey I know for Toll gate get plenty houses wey dem build. But that one na another tory for another day.

If we go stop all the bad things wey dey happen to oil pipes, make government do things wey go make people wey dey leave for oil states happy. If job, water and light dey, and people get money to buy food and televisions, I think the country go see peace. Una remember the time wey General Gowon be head of state, people dey happy and the country see peace, even we no say dem chop money. But the thing wey make people no feel am be say na everybody dey gbaladun. Government dey pay workers well well, no be now wey be say na the managers go chop him  workers salary. If una  do right by us and our obodo, una go see peace. I dey go bed, I go see una for Monday.

July 13, 2000

Petrol Hustler Una No Get Heart

My people dis one dey serious. Se una hear about School Children wey die for Delta area. May dem soul rest in Peace. As for the people wey cause their death, Our God dey look una o. If to say una dey among the people wey die, una go get una own when una reach the other side. But if to say una still dey this our Obodo country, una no go know peace as una cause pain for people wey una cause their family death because of una own selfish reason. I even hear say some of the vandals na school children.Wetin this life dey turn to self? How people go risk their life because of some illegal wealth. I wish people go think about dem action before dem go dey run around looking for easy money. And parent wey dey send dem pikin go dey thief oil no be good parent. I no fit sabi how a mother or father go send their children for that kind errand.  People wey say the world want end, no dey lie. Haba, small pinkin dem dey look for easy money, na wa o. We all know say country dey hard, and he no dey easy. For una to put innocent people for danger to me that one pass armed robber o. At least for armed robber na only himself dey for danger if dem catch am or him plan no go well. But for una, the whole people wey dey around una when una dey thief this oil dey for danger if the thing explode. The People wey die for this recent mishap for Delta no know anything about una plan. And no be say if una succeed, una go give dem money. Ha ba my people why now o. Poor innocent children wey never reach dem prime come die because of una greed. The thing wey I no sabi about this be say, this no be the first time wey this thing go happen, una want tell me say our Government no fit do anything about am. And the Oil company wey dey sock our well dry, una want tell me say dem no get machine wey dem go fit put for ground wey go prevent our people from this danger wey some undesirable elements dey cause. He be like say our government the only thing wey dem care about na money and about themselves if not, this thing done happen plenty time. Una no fit put barbwire around the pipes? We know say our people dey dubious and dem go find another way. Sometime una go think like the vandals. Our government fit put electric barbwire wey be say person wey torch am na another life na him go find himself. I dey beg our leader make dem ask security experts and fire brigade dem (no be local one) how dem go fit prevent this destruction for future. Even self if our government go get one kind camera and security people as dem dey do for oyinbo country wey go dey monitor all the area. I beg make una do am quick before another tragedy go happen. I beg my people, young and old make una dey do jeje o, the life una save may be una.

July 12, 2000

Wait for Your Turn, No Do Juju To Get Money

How una dey do my people, I hope say una dey gbaladun. He be like say for our Obodo now as poverty plenty, na so the people wey want get quick money dey increase. Una know say everything wey I dey say na from the thing wey dey happen for our society. This talk today na about the film wey I see with my family. This na about a man wey dem send back from London for fraud. As him reach our obodo, the man look for work so tey he tired am. Small time he come turn the motor wey him send him wife to kabukabu. As I see am, he be like say the man get person wey dey do am for him village (that one na joke). To cut the story shot, na him wife wey him like gan an, na him dem take do juju for am. The man get money but he end no dey good.

As una know say, plenty of the thing wey dem dey do for film, na from the thing wey dey happen for Obodo. Everytime you go hear for radio say dem dey look for person wey lost. This practice done dey happen for our Obodo for a longtime. And na so the thing wey dey happen to people wey use another person make money.You go hear say the end no dey good for dem. Since dem know say the thing no dey last, why be say plenty people still dey do am. Even self, he be like say the thing done poku pass the time wey I be small pikin. And for people wey dey do am, my question to dem be say, se all this bad thing wey dem do to get this money worth am? Because, I hear say some people na the person wey dem like plenty na him dem go say make dem kill. And sometime, na their pikin dem go use. I even hear say some people na dem body part na him Babalawo go use to do the juju. I hear say one woman, wey never born pikin, na her female organ na him she use for money. I come ask say since the woman no go fit born pikin again, which kind life be that. With all the money wey she get, who she go come leave her properties for. Even self, all this Babalawo  wey dey do juju for dem, you mean say dem no fit use their power do better thing like the Oyinbo people dey do. And our people wey dey do am, which kind bad name dem want bring to their family. I know some of una go say, as Nigeria be now, people no dey worry about that again. Me still be among the plenty people wey believe say our family name dey big pass Gold. As my Grandmother and my Mama go say for village, make you remember the pikin of who you be. Na the thing wey make us be Nigerians and Africans be that. Family name dey precious, if person no get am, he go be like tree wey no get root. And una know the thing wey go happen to am. I go dey seee una, make una think befor una do am. As dem dey talk am, you go chop corn wey you sow.

July 11, 2000

Our Football Players No Get Discipline

Me Pa 'Omugo done come again o, and the thing wey I go talk today I no think say plenty of una go like am. Se na everybody watch the World Cup Qualifying match between our Boys and their Liberian counterparts. Make ask una, I know say we no be brazillians, but no be say with the kind players wey we get na Liberia go dey beat us. Our players yeye, den go dat place go disgrace themselves and the country. Na the kind attitude wey dey kill us for this country, na him those village boys go show for Monrovia. This no be first time wey dem go carry their nuckle head go represent us for soccer and dem go disgrace us. I no say our government leaders yeye and plenty of dem na thief. Small time the money wey dem allocate for soccer those officials dem go chop am. But I no know for una, as I dey poor so, I still get my pride. I no care if dem no pay me, if to say na the thing wey I dey enjoy, I go still do am. For me o, money no be everything. If be the thing wey make me no get money be that. Make una see those guys, plenty of dem na millionare, how much money wey those our yeye NFA officials go chop wey go affect dem wellbeing. Na the thing wey I dey say about our people be that. Anytime wey we get small money, we go thing say we be God. Na the thing wey dey happen for our Obodo wey be say person wey get Ijapa dey get driver and him go do Babaalaye for back. Dem talk say plenty of these guys done comot their oversea clubs since May, the question be say why dem no show up for camp intime wey be say half of dem na two days before the match na him dem appear. Na the lack of discipline wey dey kill all of us for the country na him be that. Na all of us dey do this, if dem ask us say make we reach work for 8, na 9 o'clock we go reach there. I remember say for Africa Cup, na so dem do, this guys no dey shame. If dem no want play football for our Obodo no be by force, make dem comot. I know plenty people wey dey my village wey want play am. Even self, as my belle big so, I still fit play am only be say na goal keeper na him I fit be because I done dey too old go dey run after small pikin dem. I no know why our Officials dem no fit put those local boys wey never see dollars for face. If una go Brazil, plenty of their players wey dey play for national team na for their country dem dey play. I no know why our boys no fit behave like Michael Jordan. The way the bobo like Basketball, he go play the thing with him heart even if dem no pay am. The advice wey I go give our Players and the Official be say before dem go represent our country, make dem sign agreement for the kind thing wey the country and dem go accept. And our sport official too go sign agreement say if dem chop money wey belong to the players and the country na their whole family dem go put for Kirikiri.

July 10, 2000

Bribery and Corruption Palava for our Obodo

He go better my people, how una dey? Today as I sit down for my house na him I see our government anti-bribery and corruption message for television. I come say to my family say he go good if our government dey serious about the thing. Na him my family come talk say some people na the thing wey dem dey take chop be that since the salary wey dem dey get for work no plenty. I come ask dem say, se una no know say na the thing wey dey spoil our country be that? Dem come talk say people wey dey hungry and get family for house na dat one dem go chop? Na him I come explain the thing to dem as teacher go tell him pupils for school. Na him I come begin my people make una hear. Bribery and corruption na the thing wey make our country be like this. I go tell una the wahala wey the thing dey cause.  Danfo driver comot him house dey go work, as him dey go, na him he see road block for road. As he see the Police, him know say something go comot for him pocket.  Police come ask am wettin he carried for back, since the man know say if him no give dem money him no dey comot. He give dem some money and dey go. Una know say the man never make money but he done dey give part of money wey him go make for dat dey to police. And una know say those Agberos for motor park go get their own share. When night come for him to deliver, him go lie to his owner say him just dey come from police station, and he never work since morning wey him comot. The man wey get the danfo no go make money for dat day be that. And if to say the man na the thing wey him rely on be that, him pikin wey dey school no go get pocket money for school be that. The same thing go happen to Mama Oloja, the only different be say she go pass the cost to you for market. And una go talk say thing dey dear (expensive) for market. Doctor go wharf go get equipments wey him order from Oyinbo country, as una know, if him no bribe dem for Tin Can Island, na there those him machines wey him want use for him hospital go rotten. Since the man done pay plenty bribe money for Wharf, when una go him clinic, he go increase the money for him service. And  if to say na emergency, wey be between life and death, if you no pay money, him no go treat you. That is why plenty people dey die for our hospital if dem no get money. Na the same problem dey happen for bank wey people go pay bribe to get loan. When you done use half of the loan money pay bribe, na the thing wey make some people no fit gree pay  bank the money wey dem loan am.

Se una see my people, na the thing wey I dey tell people be dat , make we think gan before we take that bribe. Because, one way or the other, you go pay the thing unless we stop am. Na the ripple effect of dat corruption dey cause wahala for our people and the country. This thing begin with all of us, Nigeria go better if we treat am right.

July 07, 2000

The War Wey Dey Within, Brothers against Brothers

I beg I dey sorry for my absence yesterday, na something happen for my Village. Wetin dey go on for our obodo, na so so bad behavior na him poku for our country now. Every where wey you go na brothers dey fight brothers, and sisters dey quarrel with their sisters. Na so I go my village yesterday because my family done become Bosnia, my Village people want make coffin makers and ground digger rich. This one na because of something wey be say years ago, you no go even hear make people cough about am. Na him I come search my belle and I come ask myself say wetin dey go on for Nigeria. Every place wey you go people dey quarrel. Army dey fight Police, Christian dey fight moslem, Ife people dey fight Modakeke, the people wey we know before as calabar dey fight demselves. Abia and Enugu no gree, Iwo people done kill themselves over who go be the next king. Kogi people done draw line for ground over politics, Middle belt and Hausa no dey see eyes to eyes again. And the relationship between Southerners and Northernes done go sour. My people, wetin dey wrong with us wey be say, this democracy wey for promote understanding and openness no dey work for us. Instead na war, strike and religion fanaticism na him we dey breathe for our Obodo. No be around this time last year na him Ikare, Ijaw and Itsekiri dem want kill their own race over oil. Na so so dead body na him we see for Television. For two weeks now people wey be civil servant dey strike; and me I no know the thing wey dem dey fight for, because the money wey dem dey ask for , na Mama Oloja and Molue drivers go take am from them. Even self, una know how I feel about them say dem no deserve am. I still dey wonder who their leaders be wey be say dem no feel call dem people to order. Everywhere you go, na so so fight destruction you go see for road. My question be say if una destroy everything, who go pay for am. No be us poor people again go surfer am. All this money wey una dey ask, where governments go get am especially for my state where gari wey dey easy to produce, the government no fit do am. Small time una go hear say dem dey lay people off.

As I dey talk before, now for Ikare and Akoko I hear say plenty people done die. Plenty houses done burn for two communities wey dey fight over throne. If you trace dem root, dem be family o. The thing wey I no sabi be say if you look am, na poor people dey do all this quarrel o. The two royal family wey dey fight for this throne I go surprise if their pikin no dey Oyinbo country. Even if dem dey our obodo, you no go see them carry cutlass dey fight. Na we poor masses go kill ourselves for them. Na wa for us my people. As dem dey talk am for my village say "Monkey dey walk Baboon dey chop". The question wey I go ask my people be say, why we no dey learn. Small time now this problem go end, and the Rich man go become king. If he come happen say some of the people wey dey fight for the king come get pikin wey want married the king daughter, na dat time my people go know the thing wey dem dey call Caste System for Ghandhi country. If to say the king dey speak your language now, wait when this kind thing come happen between una. Na dat time you go hear who born you. Na so so grammar you go dey hear from your new king. The person wey dey say una be the same before, go turn around and tell you say you no no your gang. If Even self; why be say now, we no dey see person wey poor become king. Una want tell me say every royal family for our Obodo now get money? I no believe am, the only answer wey I get be say, person wey no get money for royal family, no dey become king even if Oracle choose am.

This plenty fight for our country dey give us bad names. I no go surprise if our country come break up because as I talk before, this democracy done turn cracy for Nigeria. People no dey sabi tolerance again, if quarrel happen between two people instead make dem settle am jeje, na cutlass go end am. Which kind water wey we dey drink wey be say the time wey we for dey enjoy the fruit of our labor, na war we want start. I beg my fellow countrymen and women, make una look before una leap to destruction o.

July 05, 2000

Sharia Done Dey Create Problem For Our Obodo

Na me my people, I done come again o. Una remember my conversaation with una about this Sharia, he be like say the thing done dey gain strength. I hear say dem done dey pressure other Northern Governors say make dem introduce the thing for their states. As dat dey gain momentum na so southern Governors dey talk say make dem no send their pikin wey dey for Youth Corp to North. Dem even dey talk say make Federal Government no give VAT (Value Addes Tax) money to the Sharia States. This I believe say go include oil money.  He be like say emotion done dey run high my people. My own question be say where we go go from here as end no dey near. I no know whether the states wey done introduce Sharia go fit roll am back, and I no think say southerners dem go gree. The people wey say make dem people no go North if dem post dem for NYSC, I no blame dem o. Una remember say two or three months ago na so the Fanatics for North dey kill plenty southerners. Dem even kill their fellow muslim wey come from South. My queston be say if this na only about Sharia why dem go kill other muslim. Na the thing wey make me say dem get something for corner corner. As I talk before, he be like say some people no like President Obasanjo government and dem want take style comot am. If una look well well, since this democracy thing start na him we done dey hear about this sharia problem. He start from Zamfara state (a be wetin dem dey call am) to another one or two states. Now he done reach Kano wey be one of the important states for our obodo. The thing wey I no sabi be say  if the Sharia people continue with dem program and he come make Nigeria scatter scatter, wetin dem  go come gain. I no think say dem sabi the thing at all, Make una dey pray for us masses for North. This Sharia people for done ask my Ethiopian brothers about landlocked area. Nothing wey you fit produce, na famine we go end up with if our Obodo break. Na dat time dem go know say khaki no be leather. Because if Nigeria break, no more oil money wey dem go share with the southerners. And if to say na my Arab brother dem want rely on, their own done pafuka be that, because the people get dem own problem. Even self, how dem go help us wey dem never help Sudanese wey be fellow arabs.

I beg my people make una stop this una selfish propaganda, because na people like me wey dey poor for north go surffer am. If the thing pafuka now, una go gather una load and family and run go Oyinbo country, na us the masses go die of starvation. Please I beg una make una think about us the masses and the country before una create havoc for our obodo.

July 04, 2000

AIDS Dey Real My People

Na wa my people, the thing wey I go talk today na serious matter. Na about that thing wey dem dey call AIDS. I no think say we take am serious for our obodo. I remember my talk with my cousin two years ago for Beer Parlor. My brother wey come from America na him and my cousin and me go beer   parlor go enjoy. Una know say when men poku for a place dey drink beer na women matter na him dem go dey talk. As we dey talk na him my brother comot condom for pocket; the thing reach 10 for him pocket. Na so we ask am wetin he go take dem do, he come tell us say he bring dem for us and himself. He even tell us say na whole box na him bring. We come laugh say we no dey use that yeye thing. He come ask us say why, because he no say we like women palava. My cousin come tell am say him not fit enjoy sex with condom. My own story be say my women dem go think say I dey call them Asewo. My brother come laugh and shake him head say we be fools. He come ask us say, na for where we hear say the thing no go make you enjoy sex. He come ask us, if we know  the thing wey dem dey call AIDS. He come say the thing dey kill people, young and old, men and women, and black, yellow, and white. He come talk say the thing no get cure, if you catch am, make you just pack your load dey expect death.  We come tell am say na prostitutes and men wey dey sleep with another man for Oyinbo country dey get am. My brother come ask us say how we tey know say the women wey we know no be Asewo. Even if dem no be harlot, how we know say the other men wey dem dey sleep with, no dey go asewo place. To cut the tory shot, my brother come tell us say he dey sorry for us. Na the tory wey I read for paper last week na him make me rember this o. I hear say the thing done poku for our obodo, and done kill plenty people. If you go hospital, na so so people wey get the thing na him you  go see. And plenty of dem na young people. I beg make una be careful, I hear say the number of people wey get am now done reach 5 million for our Obodo, chei.

My only advice be say whether you be man or woman, young and old, make una slow down because if you go catch the thing, na disgrace you go bring your family. As una know for our culture that one na killer, because people no go let your family rest. Make una dey use condom o, apart say the thing go prevent AIDS, he go also prevent those yeye belle wey una no want and venereal diseases like gonorrhea. I beg my people, if we want enjoy this democracy wey we get, make una take am easy and wear your condoms. Na here I go stop o my people.

July 03, 2000

Our Politicians Dey Get Richer Why The Masses Dey Surfer

How life now o? I hope say una enjoy una weekend. I know say plenty of una done hear this, but for una wey no hear am, I go tell una the kind bill wey our congress dem want pass. I hear say our senator dem want pass bill wey be say dem go buy insurance for themselves and their family with our own money. The Insurance money for each of dem and their own family poku so tey if dem self my whole villages for Ondo, Enugun and Sokoto, he no go reach money for one senator. The bill go include money for motor wey dem go dey drive o. And the motors na those ones wey cost money. The Senate President Okadigbo dem and him colleague for House Leader Ndabba go get limousines. Che che che, na wa! God why me no be Senator self? Una see my people, how our country go move forward with the rogues wey we get for Congress. Me I never sabi the kind thing wey dem do to deserve that kind benefits. No be the same people wey allocate money for themselves for furniture small time ago. The thing wey I go say be say if these people no be bad leaders and selfish, how dem go dey think about this kind thing when the country dey in shambles. This thing dey pain me o. My people,   make una see self, these people wey we dey talk, na rich people. Plenty of dem get boku mansions and cars, why be say that one no dey enough; since say we owe western  nations money. Even self make we talk about the thing wey dem done do since last year. We still get NEPA problem, water, I no even remember last time wey tap for my area spill water. The only tap water wey I see na for television. Dirty still dey everywhere you go; and  go slow for Lagos na cause, it done become permanent for our life. Telephone for our Obodo, na locomotive, call within our obodo country na problem. Small pikin dem wey comot university still no find job. I know say na our  second year be this for democracy and the thing wey done spoil longtime go tey before dem go fit fix am. But the money wey dem go take fix am na him dem dey share among themselves and their undeserving family, how our country go tey better? Since last year, na so so quarrel dem dey do among themselves and the one wey call himself the President. If dem no quarrel about money dem go fight over leadership. Which time wey you hear say that same passion, dem put am for us poor masses matter. Even self, pass bill wey go help us the masses and rich people.

Our Leaders dem, make una continue o, una go reap wetin una sow. I still no understand why be say you no fit point one african leader wey do good for him country. Una no dey shame? Na so so ECOWAS and OAU meeting na him una go dey go. Since wey dem born me, I never see good thing wey come from this yeye meeting. How Oyinbo man go respect us when be say na so so na me be there attitude una get, no achievement. I beg una, make una do thing wey we and una family go tey take proud of una. No one know tomorrow, make una dey do jeje o.

June 30, 2000

"Give Am Chance He No Get Break"

Una hear that my people? Na so he be for our country o. I know say some of una dey laugh for this kind thing but I know thing say he dey funny. Make una see, how our government go allow this kind thing for our road. You go see some motor for night wey no get light.  If you go garage, plenty of the Molue and Danfo wey dey there,  don tey wey mechanic check dem. You go see some for road wey be say the front go go right and the rest of him body go go left. Na so he go full so tey some passenger na for the door dem go dey. I remember when I still be small pikin for Lagos, if I see bus wey dey call Oshodi, Oshodi, I no go enter am untill the bus done dey move, na him I go come jump inside. He done dey tey wey I dey do this kind thing. One day I dey for Lagos Island dey go Palmgrove na him I come see this Molue wey done full. Na so the bus dey make noise like machine wey dem dey take grind pepper for Ijebu. If una see the bus as he bend? He be like say the thing want tumble for ground as most buses wey dey ply our road be. As I no want wait na him I come jump. since say the thing full gan, na him I come hold on to the door. Even self my two feet dey on top of another man feet. As God go catch me, go slow no dey for road. Na so my fingers and my arm dey pain me as I no fit grab the door well well. Oh boy I remeber my grandmother wey done die dat date. As una know Lagos people be, na so people dey push me o. I think say I go die that day. The reason wey I tell una this tory be say for our obodo we no get law, we the people dey live dangerous live, You go see some motor wey you go dey see ground for inside. Some taxi self no get cushion for their sit. If come be say you dey go far, you done die be that because your yansh go pain you so tey you go think say na secondary school you dey wey your teacher dey flog you. If to say na the day wey God want punish you for all the bad thing wey you done do, he come dey rain and the taxi no come get winder, your body go soak so tey, you go think say you dey inside river Niger. Se una want tell me say we no get people for Ministry of Transportation wey dem hire for this kind thing. Dem dey, as I talk for the other day say our civil servant yeye. Dem dey somewhere dey take bribe. Na the reason wey plenty of our people dey die because our road and motor wey dey na dead trap. If you go Igbobi, you go see plenty legs wey dem hang. Na so dead body full our general hospital.

So my people, where we dey go from here? Una know say our government no fit do am alone. I beg una,  make everybody do him part well o. Nigeria na wa country o,  make una think about am before una think about una self.  

June 29, 2000

Na wa for us with Big Titles and Names

Na me my brother and sister, how una dey? If una no know, my village people and my family done give me another title o. My name now na Chief Professor Doctor Lawyer Engineer Conductor Poornaire Merchant Pastor Alhaji Pa Mugo. Una no see say for a poor man, I get plenty titles. Na so he be for our Obodo my people. The question wey I want ask be say why we too like big names and titles? You go see some people, their title long pass Oyinbo train for London. Who con start this yeye custom self? Because I know say the thing done dey for a longtime. Since say for now for our obodo no middleclass, only few people wey get money yanfu-yanfu dey reign, na so dem go dey get big title from left and right. And una know say if you no get big title with your birthname, people no go respect you. I remember long time ago, wey I go visit my uncle pikin for university, na so you go dey hear wey students go dey introduce themselves say this na Aminu Kano- Part three: Mass Comm, Obiageli Azikwe- Part two: Meds, Isiaka Awolowo- Part one: Political Science. Me as una know say I no read, he con be like say no be Nigeria na him I dey and na greek the pikin dey talk. I con ask my uncle pikin say wetin be that jangbajantis wey una dey talk? He con tell me say na the "lingo" wey dem dey use be that. Na so the thing dey start o, wey be say we no feel call ourselves the name wey our family name us. Make we look this thing well, I understand say person wey be doctor, chief or sometime lawyer we go call am that. Which one be say una dey introduce person for party, and una go come call am Engineer Ajegunle Ikoy, or Chemist Victoria Island. Even for obodo Oyinbo, I no think say dem dey use am like that. But una know for our country, our own too dey different. Na so you go go party wey be say na so so Chief This and Chief That you go dey hear. Even the title self don loose him value, he don yeye. Since say na everybody wey get money na him dem dey make chief even if the person na thief. The question wey I get be say if everybody be chief, who be the servant? Na wa for us o. This thing no end there o, dem even dey do am for religion self. You see all this people wey dem dey call themselves Alhaji and Alhaja because say dem go Mecca. I no know if dem sabi say that name for Arabic na Visitor. If he be so? Why be say dem still dey call themselves that name for Nigeria, unless be say dem be visitor for our Obodo too. The Arab people wey get the thing no dey even use the thing at all, because dem no say he no dey proper once you don comot their country. One of my friend say him hear say during Abacha Government, some of us wey be Ibo dey change our name to Alhaji. I guess my name na Alhaji Uche Pa Mugo. Una see that, because of say dem want get Contract. Small time you go hear Christians wey go Jerusalem dey call themselves Jerusalem Anthony Shomolu or Jerus David Abakaliki.

I beg my people, this kind ye ye custom no pay us o. If una look real hard, una go know say na the thing wey dey cause our problem wey be say people want become rich at all cost. Because since say we too dey worship big names, people go do anything to get power even if dem go steal money, so we go dey respect dem. Na here me I go stop o, I go dey see una tomorrow as my God done talk am. Make una dey do jeje oo.

June 28, 2000

Nigerian Civil Servants/workers dey lazy

Make una look o, my brother dem dey argue about our work ethics. Dem talking say some of us wey dey home no dey take our work serious. Dem say if people no bribe us we no dey give dem good service. Dem come talk am say our brother wey dey obodo country no dey behave like that. Since say me no know much about Oyinbo country, I go talk about the one wey I know. If we no want deceive ourselves, the thing wey some of dem say na true When our people dey look for work and dem come get interview. Dem go reach the interview place before quick quick. You go think say dem be good worker. Once dem done get the work, this finger no go enter their yansh again. Na so dem go dey come office late. Sometimes, dem go reah office wey open for business for 9am, at 10am. Na so customers go wait tired. Small time our workers done ready for lunch, and dem no go come back till 3pm. You see, dey hire dem say make dem dey provide services to customers. If you talk, dem go ask you say "na your Papa job?"  How many of us wey go ministry go get something and get am quick? Me I no talk about the people wey be say na their family be Oga. I dey talk about ordinary person like me. If go Ministry for our Obodo and you no know person, your own done finish be that. The first thing wey I go say be say, dem no go even look or answer you. Na so some of dem go dey look like cow wey dey angry. And if dem come ask you the thing wey you want, the way wey dem go take ask self, he go be like say you and am get fight. No go there go submit form o, na the last time wey you go see that form be that. Na so dem go dey behave like say na you owe dem. This na people wey dem hire to be our government represatative. Dem no want do anything except say make dem dey run their mouth. The women nko? Those na ogbologbos for the thing. Dem go take that their bigeyes look you from head to toe, and con hiss. Ha ba na wa. Na every place wey you go na this same thing. Hospital workers, those ones done become Angel of Mercy. The Nurse, Chineke. Dem no want do anything, na so you go see dem wey dem go dey waka with that their cut-shoe. You go dey hear kako kako. Befoe you ask dem question, dem done ask say na wetin. This one no be good "na wetin", this one na as the Grammarians dey talk am "do not bother me". The only way wey you go get good service be say you go private hospital. And that one get but inside, because if you dress like hungry person. Chei! Na the gateman go drive you back. And I dey hear now say, for those general hospitals, Doctors go write you two medicines make you go buy am, he go give you one make you take and him go come keep the second for him private clinic. This na doctors o, if dem dey do this, who you want trust. The only thing wey I go say na corruption na him dey cause this. Because if we no get bribe for our Obodo, people go do their work. Since dem no say extra money no dey for dem. "As give me I chop don spoil our country", people no want do their work again if you no give dem chop money. Na every part of our country get this problem. University oo, Secondary, all of dem done decay. My siister go kill me, she be teacher and him too dey do am. Teachers dem, dem done become business people. Dem go go school today, and go their business tomorrow. My question be say, how those pikin go take pass? I know say people go blame am on our governmnet say na dem no pay teachers. For Nigeria, we no dey take responsibility, we go blame am on another person.

If this our country go move forward, this na the thing wey our leaders go tackle. This na by force o, if we no resolve am, we go continue dey suffer am. For our obodo, people too dey selfish, he go good if all of us remember how angry we dey when we go buy or get something from a company, and the worker con dey do us one kind. This go remind us say na so other people dey feel when we treat dem bad. Na the thing wey make me tell my friends dem say, Nigeria no be better place for poor man. This na as Oyinbo people dey talk am "double dosage". One, you go get poor treatment from Rich people; and second, the civil servants dey wait for you with their bad mouth and attitude. Na the only country wey we sabi o, please make am better…………..

June 27, 2000

Nigerian Police na disgrace

How una dey manage for this our obodo country, I know say country dey hard but one day, the thing go better. Today na about those people wey we call Nigerian Police Force. I no know for una, since I dey old enough na him I don know say our police na joke. Plenty people go think say this my talk dey too cruel but make una look back. Which time wey you know wey our Police do better thing. I go tell una the thing wey make me talk about dem today. Na jeje me a sitdown for front of my house just dey watch as people dey pass na him I see two police wey dem dey argue. I con go near dem go find out the thing wey dey cause this hulahula na him I hear dem dey talk about the money wey dem gather for check point. Una belief say this two grown men dey fight over 100 Naira. Na this come remind me about the thing wey I witness one year ago. Na Me and my friend go concert for Ikeja for Water Park. As the musicians don finish their music na him everybody con dem go home o. Small time na him we see people wey dey front come dey run back inside, we come ask dem say na wetin. Na him dem con tell us say robbers dey for gate. Dem even talk say the robbers comot two women jewelry. There is this woman wey dem comot all the thing wey she wear for body. All this time wey this thing dey happen for outside the police wey the concert organizers pay make dem dey look after the place dey inside dey argue about money. I take my korokoro eyes see, wey some people dey tell police the thing wey dey happen. If una see how dem take tell the people say make dem comot. Na the small change wey dem want share na him dey for their mind. Even self, the person wey hire dem come there come call dem, dem no answer am. Na so the people come summon courage and dem come fight the robbers, this na small robbers dem no get guns . Na after people don almost kill this robbers na him the so call police come show up. People for our obodo as una know, we no respect police and police no respect us. Make una seen now, the police wey dem hire say make dem dey in charge and dey look after us, dem dey useless. You go see for road wey be say some of dem go wear uniform and come wear bathroom sleepers. Na so you go see dem dey chop corn yamyam. Sometimes self, the shirt wey dem wear no get button.

But instead wey be say na only bad thing I go talk, make we look the thing wey cause this problem. If we want tell the truth, how many of us want join police, we no say not many people go raise their hands. Because dem no dey pay dem well. But people go say dem no force dem make dem go join police. The thing wey I go say be say, wether dem force dem or not, this people dey put their life on line for us so that we go feel waka about for night. Only be say for now, you no know who be who anymore, police don turn to armed robber and armed don turn to police. I hear say some robbers dey get their gun from our Police. Na wa o, this world don spoil. The only solution wey me think be say make our leaders hire people wey go do the job and make dem pay dem well, and I know say that want no go make dem make dem no thief money. But dem go think am twice before dem take bribe. And if dem pay dem well I know say plenty of dem go do the job well . Even self people wey want join police, but because say the money small dem go change their mind. The people go feel join if the money poku.

Wey this woman wey dem dey call "Mama Toyin" dey? He go good if dem feel make am the Oga patapata for Police. Una know say when the woman dey for police, she no dey take bribe. Conductors and drivers fear am so tey if dem hear say she dey for road, dem go take another road. Na this kind person wey done do good for the country na him make dem hire, no be the one wey be say na through say dem know people for top, na so dem take get their job. I go dey talk to una, make una dey do our country jeje ooo..

June 26, 2000

Ha ba Pastor! Na wetin be this?

How una weekend? I hope say una enjoy am. This thing wey I want nak story about no dey easy for me. Plenty of my brothers and sisters  na members. But as I don talk am say nothing wey I no go do to make our country and people better. This na about our pastor wey be the leaders of our churches. As thing dey get worse for our obodo country na so people wey we put for position of power become selfish, unkind  and dubious. Plenty of dem no get moral again. For Nigerians both the one wey dey home and abroad, the thing many our pastors dey do, I no thing say God dey happy about am at all at all. Nowdays, you go hear plenty Pastor wey dey give people wey dem say make dem pray for belle. Many of dem get wife for home but dat one no do dem. Na all these young women na him dem go dey prey on.The thing wey I no understand be say plenty of these young women get husband for house. I still remember for Bible wey I read for school wey dem talk am say make person no commit fornication and make we no look our neighbour wife. And na this same people wey God put in charge na dem be governor for the thing. There is no thing wey dey under this earth wey dem never try. Some go go Babalawo place for power. If you comot some pastor cloth, na so so Onde  (charms) na him you go see. Ha ba na wa oo. As for the one wey dey oyinbo country, plenty of dem no want work. Una know say Oversea country no dey easy for our people as my brothers wey dey oyinbo country tell me. Plenty of our brothers wey be pastor na dem wife dey work. Some of the women na three jobs dem get. Na so so excuses and tory you go hear from our  brothers wey dem go say na God work na him dem come do here. And for Obodo oyinbo, no free lunch, if you no pay your landlord rent, him go throway your load and put am for outside. My mama's pikin no dey for oyinbo country. Plenty of those pastors na young men, because God give some of dem spiritual power, small time you go hear say dem don open their own church. As the thing don become business for our Obodo country na so he be for Oversea. Even self, he don reach stage wey be say church plenty past members. Pastor con poku for oyinbo land. Na this same pastor you go hear say him give him church member wife belle. Me and everybody know say the Pastors wey dey do this kind thing na minority and dem no plenty pass the good Pastors. But the thing wey I go say be say he go good if our Leaders for Church Denominations go make law wey be say as we know say country dey hard, make dem allow Pastors dey work. And as for the one wey dey oyinbo man country, he go good if all dem get job instead wey dem go put all the load for their wife and congregation head. The bad one wey dey give church bad name, make dem comot dem. Because there go be time wey people wey dem take him wife or give him wife or daughter belle go take dem court and dat one no good for our religion o. I beg make una stop this bad thing wey una dey do before God wrath come fall for una head.  Na here me go stop, make una take this world easy o.

June 23, 2000

Workers Don Set Bad Precedence

Wetin dey do Lagos State Workers Union Leaders? I hear say Court tell dem make dem no strike, dem no listen. All of us dey talk about democracy, I no think plenty of us know the thing wey the thing mean. As me understand the thing be say all person go obey law and do thing as the law and constitution say. Na this make me say I no understand the people wey call themselves our workers and dem Leaders wey no obey law. And na the same people go cry fowl if na government do thing wey dey opposite our law and constitution. I know say country hard, but he no mean say we go follow law when the thing favour us. He be like say make Government come your house come take your bicycle, and you go court; and the court tell the government say make him return your bicycle. The government people come no obey. Na all of us go dey cry and shout say the people wey dem say make dey protect the country and the law of the land, na dem dey spoil am. The thing wey I no know be say, how the people wey dey strike go do am if government come talk say dem no dey give anybody money. Una come take dem go court, una think the same court wey una no obey go hear una case? Na de thing wey I dey talk about our leaders be that. He be like say plenty of dem no dey think at all at all, even self I no know how some of dem become our leaders. He no mean say because person go school, he go dey wise. Dem get plenty fools for our country. Dem no dey think before dem act. I know say this thing wey I go say, plenty people go eat me alive. Which kind salary increase wey this people want. I never see any of dem wey dey do him job proper. If go those secretariat go ask for something, you go dey there so tay, dem no go beg you before hungry want kill you. Na so you go see dem wey be say, na so so talk dem go dey talk. If you like yourself no go ask dem question o, because the way wey dem go look you, he go be like say you no be person born you. Plenty of dem useless, if to say na me be governor, I go don sack all of dem. Na only our Obodo country I know wey people wey dey provide service go dey make iyanga for their customer. For example for our bank, you go go bank wey be say na you get your money wey you want go put inside bank or say you want get your money, you see cashier wey sit down and no do anything, if you tell am say you want withdraw your money, you don bother am be that, him go act like say you dey give am wahala. The thing self no make sense to me, I no know if dem know say if me and plenty people no put our money for dem bank, how the bank go tay pay dem salary. Na the reason wey me say we too no dey use our common sense. I beg make una resolve this salary matter jeje o, make the government and the workers leaders go place go talk am over, make una resolve this thing o, una know say plenty people no get extra money wey dem go take feed dem family. I beg na here me go stop, my belle don dey make noise.

June 22, 2000

Nawa for our Nigerian Oppressors

How dey go dey go my people, na me o, the senator of the masses. Today I go talk about those Nigerians wey dey Oyinbo Country. I no know whether una notice say every time wey our people wey dey overseas come, our home grown pikin don surfer be that. If you be man and you no get money but you get girl wey fine, you know say she go leave small for sometime till the Oppressors don comot. And our grown women self, na real christmas for dem. Dem know say those Foreign Nigerians get money especially the ones wey call themselves Yankees. Those ones, na real bank, the way wey dem dey spend money, he go be like say, Federal Reserve Bank for America, na dem get am. We no say the one wey dey Queen Elizabeth country no too get money. Even if dem get am, dem dey stingy with the thing. I know blame dem because thing hard for that part of town. Another thing be say, that one na Lagos extension. Our people plenty for that Obodo, you go think say na Jankara na him you dey. Na so you go here this "ungbati ni gbati, Bia ne ba, and Ka siko" thing. The market self na wa, some Oyinbo self don learn our language since say dem won self market. As I dey talk before, the Oppressors no get respect for our women, and the Omoge dem no get respect for themselves. Una know say na Money those one want. Na so you go dey here those Girls wey dem go dey talk about how dem go get those Americanas. For December, that one na bazaar, Na so you go see different wig and yansh. Some of the women self you go see as dem go nak their wig. Their head go be like Masquerade own. Na so you go dey smell different perfume. Both the one wey own Church make and Oyinbo own. Na so dem go dey clash. The thing wey I know like be say, these Nigerian holidaymakers know say dem no go marry these poor girls, and plenty of dem get Wives for Obodo Oyinbo. For dem na gbaladun, dem want come here come enjoy. And the innocent girls (few) think say if dem do the thing wey Foreign Nigerians want, dem feel take dem go Oversea country. Na so dem go use these girls like Lagos Taxi and leave dem. The poor home grown Men na dem go pick the pieces. All these thing dey happen because our society don decay. Morality no dey again. All our daughters dem don become unofficial Harlot. My advice to the people be say make una think before una do am, as dem dey talk am, "what goes around comes around" If you use this small pikin because you know say dem dey desperate, make you remember say your daughter or sister dem dey, and another person go do am to dem. And the girls wey be say dem dey greedy for money, make una be careful. Because you no know where you go meet again, no man wey want marry Prostitute. And as for my poor home grown Men, make una hang in there, one day he go bettter. Na here I go stop, make una dey do jeje oo.

nijanawa.gif (4735 bytes)

June 21, 2000

Why be say na money we dey worship?

How una dey, Na me Pa Mugo the senator of the Masses and the leader of the oppressed. Na so I sit down jeje for Beer Parlor dey enjoy myself with my Ice water na him the people wey dey for the place con dey talk about money matter. From where I dey I no fit say anything because the thing wey dem dey talk I no get am. And for our Obodo country na o, no be better place for people like me. Before when you dey poor, you know say you poor and the people wey dey around go pity you. But now, if you dey poor, he dey bad enough say you no get money, but people wey get money go make you feel pain of poverty. The way wey dem go look you, he go be like say you no be person. You go hate papa wey born you.The thing go reach your bone, aba, na wa for Rich people oo. As I dey talk before, Na him dem come talk about the money wey dem get, how dem feel do thing wey dem like. Na him one talk say he friend wey he know before he become rich, he no fit dey talk to dem because him dey ashame to be with dem. If you see how all of dem dey talk, I no believe say these na my fellow person. One even say he don stop dey go church because the church people dey too poor. He say some of dem, their cloth be like say dem never watch for long time. He talk say the white gown wey dem dey wear dey brown, and the thing wey him dey take clean him gutter clean pass am. Na him my friend Jonny come look me and ask me if I won commot. You see my friend Jonny na true friend, he get money but he no let am push am like person wey dey drunk. And me and Jonny don begin this friendship when we be small pikin. And him no be person wey dey do yanga with him money. For out country now, na money people dey worship, if you get money, you feel buy another man’s soul. Na so the thing be. Small pikin no get respect for dem elders especially the one wey get small change for hand. And for the women, I beg make you no talk that one, because na money dem know. If you no get money, make you no waste your time say you want to talk to dem. The thing don tay dey bad wey be say, the elders too don join dem. If a girl tell him parent say he meet one man, the first thing wey dem go ask am be say che de person get money. Before, dem go ask am say who be him family. Gone na those days wey rich pikin go say he dey in love with poor man and him family go say if she dey happy, he dey ok with dem. Now, the girl no dey even think that, if your papa na nobody, I beg my brother make you hang am. Even if the girl con be one way no mind, he parent feel get you beatup and if you no take time, dem feel kill you self. Because everything wey do now, na money dey am. If you go visit your family and you no get money, dem mo go ask you wetin you want drink not to talk food. But if to say you get money. Dem go even kill fowl for you because dem no say you go give dem plenty money. I beg my people this no good o, and na him cause am wey be day those small pikin no want work hard, dem want fast money.

Make una remember tomorrow, person wey noget money today if feel get tomorrow and the one wey get am today, make him no step over the one wey no get today. No one no tomorrow. Make una de do jeje and treat your fellow man with respect as grammarian dey talk am.

June 19, 2000

Career Plenty for our University

I don come again my people, this time matter no be joke. As I sit down for my obodo na him my friend Jonny come tell me say he want go see him pikin for University. As me no get thing wey I dey do, na him I tell am say I go follow am go. We reach the place for evening, as we want enter gate na him we see him pikin with her friend wey dem dey enter Danfo, dem plenty. Na him we con follow dem, this na about 8pm for Night  and NEPA never take light. As we dey inside the motor, my friend dey quite he no say  anything, na him I come ask am say, why we no go home since he be like say him pikin dey go party with her friend, na him come say he no think so. After wey we don drive for 15 minutes, na him we reach this area wey dey known for Nighworkers, as we reach their so, na him their danfo come stop and all of dem come comot, dem reach 12 in numbers. To short the story, my friend take him eyes see him pikin wey dey sell her body. The girl na Asewo proper. Na from this experience  I hear say, plenty of our pikin wey dey university na harlot, and the men if dem no join Cult dem go join armed robber. This pikin wey dem parent send dem make dem go school go read, na another profession na him dem go learn. If you see some of dem, the way way dem go dress and nak makeup, he go be like say dem want go work. The kind thing wey dem go wear self, people we get better work, no fit afford am. And their parent dey for village dey think say him pikin dey learn book.

And for our people wey dey come from oyinbo land   come holiday here, make una be careful o, because I hear say some of this pikin get gang. If una go Club go party and see a woman wey una like,  make una find out who the woman be before una start dey blow una American /British grammar for the girl. Plenty of this women, na nightworker and dem too no grammar because dem be university student for day and Asewo for night. The thing wey I want tell my brothers and  sister be say, I know say country dey hard, but the thing no worth make una dey sell una body or become armed robber. Because unh, the end of dem two profession no dey good. If you no get disease for dem thing or get killed, one day sa, some thing  bad go happen.

Na here me go stop, till I talk to una. make una dey do jeje oo.

June 16, 2000

Why Sharia Now? I beg na wetin?

Na me Pa Mugo again o, how una dey? I hear for news say Kano State want introduce Sharia law next week. Me know no why all of dem want introduce the sharia law, but since say I no be expert for Constitution matter, I no go fit say whether dem get right or not. But the thing wey I no understand be say, why this thing no come out years ago when Abacha and Babangida dey there. You mean say these people dey too afraid to announce am. He be like same something dey behind am. Because we all know say the two past leaders na from their area and all dem na muslim. I be because since we get democracy, everybody feel do the thing wey him like. The thing wey I want ask the people wey dey push this thing be say, wetin dem want gain from this thing, because I know say majority of our past leaders na muslim, and na most of dem cause all the problem wey we get now. You mean say dem know no the thing wey dem dey call sharia that time. Another question wey I want ask the people be say, the money wey all of dem thief from our national treasury make dem put am back because as dem dey talk "charity dey begin from home" make dem live by example. I hope the sharia people know say for their Koran, he dey against their religion make dem dey drink alcohol and beer. That mean say, all alcohol taxes and tariff wey Federal Government dey get, make dem no give am to their state. And all the thing wey no go with their religion, make dem tell our Federal govt make dem no include their states if dem dey share the money. The thing wey I go tell Christian states be say, make dem go make their own law. For the law, anything (oil, gas, gold, emerald, etc.) wey dem find from their place make dem no share am with states wey get Sharia. Make our President and Congress make law say any state wey want introduce sharia law, make dem go do am. But the thing be say, all the money wey come from our natural resources wey we get from non Sharia states, dem no go share am with us. We go con see how dem want live since dey no get anything for their area. The only thing with that one be say no be everybody wey dey live for those sharia States support dem government action, the thing be say we feel tell dem make dem come live with us.

I beg make una think twice before una do things wey go create palaba for our obodo. I go dey see una, make una dey do am jeje oo.

June 15, 2000

How We Dey Kill Ourselves slowly

My country people na me again, I hope say everything dey Okay with una. My topic for today na about our behavior and how we dey live. I know no whether some of you don go Lagos State recently. The wey people dey live for lagos na wa o. Na everywhere wey you go get dustbin for road. Even the thing wey I no understand be say, as dey so, you go see people wey dey sell food near am. Some people go even put fire for am, sometime na middle of the road na him you go see this Mt. Kilijamaro. Although our government dey at fault, but the question be say no be we be the government? The thing wey pain me most me say, majority of the people wey dey dirty Lagos na Workers (people with Ties). If you want see sample make you enter molue or Danfo, you know say poor people no fit dey buy food from the street hawkers, because the thing cost plenty money and he dey small too. But you go see these people with tie wey dem go ask hawkers may dem bring crackers, ice water, plantain, and so forth. As soon as dey finish the food or drink na so you go see dem throw the thing for road. And na these same people go dey complain say Lagos dirty. Make I come back to how the thing dey kill us slowly. As we put fire for the thing, na so you go see smoke all over the place, and one thing about this thing be say he know no whether you dey poor or you get money, na all of us dey inhale the thing. Small time, you go here people complain say dem get headache and cough. Small time, dat one go turn to big disease. And dem know no say na the kind air wey we dey breath na him dey cause am. And be like say the thing dey get worse, because everywhere you go for Lagos, you go see the problem. The thing dey even happen for Rich people area- Ikoyi and Victoria Island. The only thing wey I go say be say, make government do something to clean this thing up. All those Street hawkers wey dey sell food and goods for road, make our government find dem place where dem go dey sell their market. And some of us wey dey buy the thing, make we dey put thing for our pocket or make all the molue and danfo get basket wey people go dey put their dirty. And as for those of us wey be say we see sign wey dem say make we no put dustbin, please no do am, because if you do am, na your family you dey kill slowly if you know no. Na here I go stop, I go dey see una tomorrow as my God don promise.

June 14, 2000

Why be say so many of our People dey bleach?

How una dey my people, na me again oo. I hope say una dey enjoy our pretty wheather. I beg make I ask una, why be say plenty of our people dey bleach. As be so now, even men dey do am bigtime, I dey talk about Godogodo Men. I no know the thing wey dey happen because he be like say the world want end. Ogini, kashiko, kilode? My question to una be say, where dem find this kind jabajantis from. I think say this nonsense go end for our shore but our people take am to Oyinbo country, I guess na our own Export be that. Wetin dey make people do am, I no know. Me I go make our interpretation or analysis. The people wey dey do am, I think say dem get the thing wey Oyinbo dey call "low esteem" because to me be say, if your like yourself very much, and you like de way God made you, why you won turn your skin to Oyinbo own. I no know think say the people know de thing wey go happen to dem after dem don do am for a long time. You go see some of dem, you no go even want make dem come near you because the way wey dem dey smell. He go be like say make person vomit. Agaga if you enter Molue with some of dem, and the bus come full, he go be like say you dey inside Oyingbo Water where dem dey dump shit. And some of dem think say dem better pass person. If you con see the one wey get tribal marks, I beg my sister, him face go be like Oyinbo road with plenty lanes. Some time I dey wonder if some of dem get mirror for house. He dey one man wey I know for our village, the man dey dark pass the pot wey my grandmother dey take cook Tuwo for Sokoto. The next time wey I see the man, he be like Michael Jackson wey dey poor. I think say na Iwin (devil) na him I see. And the man think say him be Mr Universe. I beg my brother and sister, if you dey do am go stop am because the end no dey good. I know plenty old people wey do this thing for a long time, now if you see dem, dem body be like person wey fire burn. The thing no look good atall atall. Another thing be say, doctor say de thing na health hazzard, he no good for our skin. A person wey truly like you no go care whether you be like skin or dark skin. Na the thing wey dey inside na him want. I know say there plenty people wey be say if dem see o say you bleach, de first thing wey go enter their korokoro head be say you be ashewo and Alatika, and dem no go respect you. I beg na here me go stop, make una dey do jeje oo, I go see una tomorrow because my God don say so.

June 13, 2000

Wetin dey happen with former House Leader Buhari

I don come again my people, this time around I dey angry with our politicians. Wetin I dey hear say the former house leader Buhari, the one wey forge him certificate and lie about him qualifications dey come back again. I hope say this one na joke because I no fit believe say our leaders wey supposed to clean out corruption, go turn around and reinstate a known liar and fraudster. He dey bad enough the one wey call himself the president gave the man Presidential pardon. Which kind precedence him dey set. I guess for our obodo country, he dey ok if you lie and thief as long say you know people for top, you go fit get away with anything. Unless the man and his cronies get something on our President. Because he still no dey clear to me why President Obasanjo go give am pardon. I know say my Yoruba brothers no go like say I dey criticise their brother, but truth dey pain. As dem dey talk am say "if you see your neighbor wey dey chop rat and you no tell am say make him stop, if the thing dey worry am for night, you no say he no go allow you make you sleep." The day wey Obasanjo become President of the Country, he talk am say he no go compromise him integrity to root out corruption. But the problem be say me I dey among people wey no believe am. Because majority of the people wey dey him cabinet and congress dem be rogues once. Make una look all the people wey represent us, how dem take get their money? Majority of dem don dey do this politics before dem born my mama. I never see one wey produce something other than say dem steal money from either the corporation/Ministry wey dem work for in the past or take contract money and run. Make I go back to the problem wey I get with our leaders about Buhari. How that small boy con get this influence I no no. Dem say the man no even attend one university but he get money, I know say a lot of our mama no go primary not to talk university and some of dem get money and I understand that. But for this man I never see one product wey the man invented, and no be say him papa get one cow ranch for Kano. So the question to you my brothers be say how him take get him money? I think say like the rest of them all, he steal from our national treasury or he know people wey still the money. If the man be true muslim, make him just face him business and leave the governing of the country to people wey qualify and dey trustworthy (Ithink say dat one dey hard for our Obodo, I laugh because I know not many people go fit meet that criteria for our country, he dey sad my brother). Na Oyinbo talk am say once a rouge always a rougue. If our Leaders still get some decency in dem, make dem let sleeping dog lie. I beg our President, no push to have the man back to congress, because that na wrong message for our youths. If to say na me be the president, the man go don dey for kirikiri, because the thing wey he do, na big treason. But as una know, I no think say dem want me for congress and even papa, I no think say me want the job sef. I beg una, my omoge dey call me may I come sleep, and me I no dey play with that kind thing. Make una dey do jeje o, tomorrow na another day.

June 12, 2000

Our So Call Politicians na rogues

Hello my country men and women, make I salute una for una patience and perseverance ( I beg una we be grammarians make una pardon me for this Oyinbo), una dey try with this katakata for our obodo nigeria. The thing wey I no understand be say since we get this thing we then dey call democracy our country just they go one step forward three steps backward. I beg the people wey we call our leaders make dem fix the problem wey dem cause. Since we dey for the subject of democracy, make I talk about am small. Una no say all the people wey run for the last election get money. Una know say most of the money na from our national treasury dem get am without our permission- dem no ask me about am. We know say Poor man no dey run for office, if he run, he go dey  lucky  if he get one vote because even him family no go vote for am as him opponent go don give them bribe. He no wrong if I say all the people wey dey our congress na millionares and dem fit afford anything wey dem want. The thing wey dey trouble me be say how them go say dem wan turn the country around and the first bill wey them pass na to buy furniture for themselves. Which kind  mother wey her pikin go dey hungry for food  and the little money wey she get na to buy jewelry for herself. Na so our countrymen be o. We know  say most of the money wey all them get then thief am from our national treasury, as if that one no do, dem con they distribute money for furniture while the masses  dey suffer. I get one experience wey I won share with una. I take my korokoro eyes see this one no be say dem say. To let una see how our people dey suffer, we no even get middle class anymore,  the masses no even get money to eat not to talk about buying furniture. I go some people house, dem still get the furniture we dem buy twenty years ago with holes in it. You no go even fit sit down for am, because the only thing wey you go see na large nails and spring; and I know say if na your papa born you no be the kind place wey you go dey pretend so your host no go fit bad, because na general hospital you go find yourself and your yansh. I just dey pray say thing go turn around for the better for us for our obodo country. Because as he dey so, e no good for us and the pikin wey dey come after us.

Na here I rest for now,  I go dey talk to una tomorrow, make una dey take am jeje o!

nijanawa.gif (4735 bytes)

 


About Us  Add URL  Ad with Nigeriainfonet  Affiliate Program  Career at KEK Technology  

 CommunityCorner   National News   Pa Mugo's Pidgin Joint  Yourname@nigerianetmail.com 

KEK Technology Inc. Network and Partners

Siftthru.com    Siftthru.net   Everyone.net   OzForex   Freepolls.com   Thunderstone.com   Kekhost.com   NigeriaNetMail.com


Send mail to sfd-w@nigeriainfonet.com with questions or comments about this web site. Copyright - 2000-2002 - KEK Technology Inc.